خلاص تعبت من حياتي ونفسي

[susuu]

سلاام

شخباركم بنات
الي ما تذكر موضوعي هاي هو
http://www.q8yat.com/t882972.html

بخبركم شو سويت ..
تغيرت صرت اسكت ابدا ما اقول شي ..ينسى اسكت ..يوعد ويخلف اسكت..لا اساله عن ولا اكلم زيادة عسب ما اتعصب
مثال :طلبت يغير ليت بالكونة لاني اصلي الليل هناك كل يوم يوعد صار شهرين ولا غير وانا اصلي واقراء في ظلام بس هم سكتت ماقلت شي

وطبعا تعبت وايد بحملي بسبب هواش وسوالف وصار عندي نقص دم والالام بكل الجسم ..كل ليلة ماكنت انام من كثر الالم واقضيه بالبكاء استغفر الله
لين ماجا موعد ولادة وهم تهواشنا ليلتها ونمت بدون عشاء وتعبت بالولادة وصار لي مضاعفات وشفت الويل بالطلق والولادة رحمتك يارب وايد تعبت
وقف معاي عقب طلع وراح نام مارسل مسج او سال عني حتى
عموما مشاكل زادت يوم عن يوم وكل يوم يوعد يتغير وكل شي بيتغير وهم يظل نفس شي

ولدي كمل شهرين ماشاء الله والاوضاع ونفسية مثل ماهي

عموما امس كان عيدزواجي ..طلبت من بداية شهر وخبرته ارجوك كثر ماطلبت حملي يكون غير ماسويت لي ولا شي وفعلا صار غير مع نفسية شينة والالم فارجوك ابي اطلب منك هاليوم يكون غير
صارت ساعة 12 وكنت مريضة ومحمومة ونايمة قعدت من نوم 12:30 جان لا يباركني ولا مسوي شي مع اني ترجيته يفرحني وتهواشنا وااايد وبكيت من خاطري وتميت صاحية لين فجر

عقب راح دوام حتى مادق علي ورجع ظهر وتكلمنا وتراضينا وحاولت انسي
قالي بسويلج شي مميز اليوم ..جان نطلع بالليل عازم بحديقة في فندق ومسويلي ساربرايز عشاء وعازم كم اصدقاءنا قالي بيكونوا 20 شخص وهو دافع وبوفيه وكيك مهم انتظرنا وانتظرنا ماجاوا الا 8 اشخاص تخيلوا الاهانة والاحراج الي حسيته
ياربي كل حد يسال وين بقية ..ليش محد جا.. كل هاي اكل وسوالف
جان اساله يقولي بالبرود مادري ليش ماجاوو مع انهم اكدولي ..وهاي 8 اشخاص من ملل طلعوا بسرعة وانا ماتعشيت ولا من صبح ماكلة شي وقبلها سهرانة لين الفير
جان نرجع بيت لا قالي شي ولاهم يحزنون وتهاوشنا وما اشوف نفسي الا ابكي واصارخ ودفرته على كرسي وتميت ابكي وابكي وبعدين زاد الهواش وقلت له انت فاشل في كل شي في شغل في وعودك وحتى اليوم فشلتني يوم محد حط لك اعتبار
كل هالسنين وماتفشلت جدامهم وبسببك تفشلت وحتى ما كلفت عمرك تسالني تعشيتي ولا تجلس معاي تتعشا وناكل كيك

تخيلوا ضاع اهم يوم ومناسبة وراح في هواش وسب والبكاء ..كثر ما بغيته غير صار اخس

شو اسوي احس نفسيتي شينة وكل يومين صايرة امرض حتى ماعاد فيني طاقة اشل رضيعي وظهري يعورني مااقدر انحني وصايرة اتعصب على بنتي وولدي

وخالتي تجي من صوب تحاسبني على المصونة وليش ما اكلمها مع ان ولدي كمل شهرين حتى ماجات تزورني ويوم اروح بيت خالتي ماتسلم علي بس اذا خالتي جدام تسلم

تعبانة وايد شو اسوي
وهل غلطانة على موقف اليوم ؟ وشو اسوي الحين

ربي يسعد الي تجبر خاطري ولو بكلمة

 

[ام فواازي]

احسج غلطانه بكل شي نحشتي الرجال من حنتج ومشاكلج وغيرتج من مرت حماج
مرت حماج طنشيها ورجلج قبل كان بشورج وتحت ايدج حاولي تردينه مثل اول وهالشي يبيله صبر وطولة بال مو تصرقعينه وتتهاوشين معاه عشانه ماسوالج و حماج مسوي لمرته
ضحكي بوجه و قومي فيه وخلي بيتج جنه له مو جهنم مثل ماانتي مسويه ومع الوقت اذا استمريتي ان شاءالله يرجع لج مثل ماكان
واذا تبين شي طلبي دلع و فرفشه مو نكد وانسي مرت حماج شلج فيها سلمت ولا لا قلعتها شلج فيها ولا تزورينها مثل ماتسوي انتي سوي ماعليج الا برجلج
والله يرده لج مثل قبل

 

[*E.B.D.A.3*]

الله يهديج ترى ضغطتي عليه وايد
اكيد اهوه متكلف على العشاء وعلى كل شي
وهم مابين بعينج رديتي البيت وزعلتي عليه !!!
اقل مافيها قولي شكرا ، يعطيك العافية ، ماتقصر ..
وليش ماتعشيتي؟؟؟؟ ياخي تعشي واكلي وناديه يتعشى معاج !!

وخير ياطير، اذا ما يوو كل المعزومين ؟؟
معناته اهوه فاشل؟؟ شسوالج عشان يصير فاشل؟؟
بعقلج ياختي! هالشي بسبته صار ؟؟
طيب ناس وظروف حاشتهم ، وماقدروا يحضرون
ليش محمله زوجج المشكله !!

انتي الي عفستي يوم زواجج على نفسج !!
وانتي الي خربتي هاليوم مو اهوه
والا اهوه ماقصر، سوالج مفاجأة وعشى، وتكلف !!
وانتي هم مو عاجبج، وزعلتي ولاااااااا محملته الغلط كاااااااااااااامل !!!!!!

مالومه اذا حقرج وسكت عنج !
لان شنو باليد ؟؟ ما بالايد حيله!
الي عليه سواه ، وانتي هم مو راضيه !!!!

والله ياختي لو اني منج، ارووح اكل واستانس
واقعد اصور نفسي بالمنظرة عشان خواتي يشوفون مكياجي ---> اهم شي هههههه
وبالعكس،،، اعيشه وجني اعيش احلى يوم بحياتي لو انشالله الضيف كان واحد !! مو 8 !!


اما بخصوص كماليات البيت وغيره ،
يا امي ليش معطله روحج على الفاضي؟
استاذني منه وقوليله راح ادق على الي يصلحون اللمبات وبيخلهم يركبون لي اللمبه اليوم، اوكي؟
وبس !!
مشي امورج انتي بنفسج!!
ليش وايد متكله عليه بكل حبه وكل قبه !!
وماتوقع زوجج من النوع العسر ! يعني اكيد بيرضى ويقول اوكي،


والله انا بعدج اختي ، وهالاشياء لو تسويها اختي بكون صريحه معاها واقولها اياه بالويه
" انتي نكديه "
اختي انتي تتفنين بقلب موازين الامور،
من افراح الى احزان
انتي بيدج قاعده تسوين جذي!!
وتشيلين بخاطرج وتشوفين الدنيا سودة، وتصيرين سلبيه لابعد درجة، طق وهواش وصراخ
هوب هوب هوب
هونيها يبه هونيها !!
الشي اذا مامشى your way
انتي خليه your way

مثل ماقلتلج فوق، لي تعطل شي عندج باليت
دقي على الي يصلح وخليه ايي ويسويلج اياه
وبسسسسس؟
انتهت المشكله !!

 

[Beyoncee]

انتى متحسسه منه وعصبيه
اخذي الامور عادي ماركب لمبه مو نهاية العالم
خففى من توترج وانفعالج
حرام حب يفاجئج وتردينها له فاشل
جذي انتى الفاشله اللى ما عرفتى تديرين الحفل وحياتج بذكاء

 

[رق رق]

حراااااااااااااااااااااام عليج سويتي جذي بالريال والله بجيت علي شانه ،
انا اتخيل اني اسوي عزيمه حق ريلي ومااي الا عدد محدود وريلي يدقرني ويقولي امفشلته امبييييييييييه لا لا لا .
بالعكس اقعد واضحك واستانس واقص الكيكه واوكله ابايدي ، واشكره وامدحه ان سوالي هالشي .
ريلج وايد زين وعلي نياته بس انتي الله يهداج نكديه واايد ليش ؟
شوفي حياتج واستانسو ، مالج شغل اباحد .
خلي دائرتج امصكره كلها لا اتخلينها ولا تنفه مفتوحه ، خالتج ضايقتج بالعنه والله يهديها ، طوفيها وضحكي .
والله يهديج ،

 

[popa]

حبيبتي انتي تعبانه نفسيا
طلعي ارتاحي واخذيه معاج فظفظي الي بقلبج وابجي وريحي نفسج
وزوجج ترا زين بس مظغوط حاله حالج
كلنه نوصل لوقت معين وننفجر ونرد عادي
الحين انتي انفجري وردي طبيعيه وفكري عدل ولا تسوئين الظن

 

[خلطات المذهله]

ماعليه اختي صبري وادعي دايما ربي يسخره لج وتذكري ان الزواج هو اتحاد روحين ولازم الاتحاد ياخذ وقت لان كل منا فيه صفات ومواصفات غير الثاني تاخذ وقت علشان توصلون للتفاهم والاتفاق

 

[أم عزيـز]

لا حول ولا قوة الا بالله

تره زين منه الريال ساكت وصابر.
شوفي اختي دام انه سوالج بوفيه وعزم ناس المفروض تفرحين
مو مشكلته انه الناس مو كفوو !

والمفروض هذي فرصه ان تصفون النفوس وترتاحون وتتفقون على الياي
ومرت حماج لا تعبرينها وخالتج لا تردين عليها خل تقول اللي تقول قابليها بابتسامه علشان خاطر زوجج بس

وحاولي تسافرين انتي وياه مكان هادي ورومانسي بمنتجع تجددون ايامكم وتريحون نفسيتكم والله الهادي

 

[إماراتية ملقوفة]

مابزيد شي على الخوات !

ماكان لها داعي الحساسية الزايدة

خلج عملية وواقعية احس جنج تظهرين حرتج فييييه ومحاصرته من كل الجوانب ! خفي عليه شوي !!

 

[سحـورة]

الله يكون فالعوون ..
أنا ف عادتي ماحب الإنسان السلبي الحساس اللي كل وقته حزن وضيق ،
مهما كان إنتي اخلقي لنفسج جو من الشعور الحيوي بالحياه ،
عيشي واستمتعي بيومج و بصلاتج وقربج من ربج !
ريلج فاشل ؟ خليه ناجح بكلامج الحلو
ريلج يتأخر بالوعود ؟ غيري أسلوبج من هالناحيه
ريلج غيريه بطريقتج ... و بإيدج
همّج وحزنج ربي يفرجهم عليج
لكن ي عزيزتي لا تقابلين ريلج بعبوووس ،
سوالج حفله بارك الله فيه ؟ يت عالمعازيم ؟



اعيدي النظر في نفسج
و ربي يهدي سرج و يبارك فاوقاتج

 

[نعم نعم شنو]

يا حياتي يا سوسو

عورت قلبي انتي تاكلين من روحج وتتنكدين وتعصبين وكل هذا على حساب صحتج

انتي شعليج من الناس ومن مرت حماج او خالتج بالطقااااااااق اهم شي نفسج صحتج اغلى من كنوز الدنيا

باجر لي مرضتي الله لا يقول سمله عليج الله يحفظج منو راح يتألم ويتعب غيرج باجر عيالج بضيعون بدونج

ابوي انتي لا تسوين بنفسج جذي الله يرضى عليج يبين عليج صغيره وماكنتي متوقعه الحياة الزوجيه جذي

روحي حجزيلج سبا او روحي منتجع وخل يسوولج مساج خل ترتاح نفسيتج من الضغط الي دار مدارج

اشتركي بمركز صحي لا تخلين همج الناس اهتمي بنفسج وبس على الاقل اذا شغلتي نفسج بشي راح

تشتاقين حق ريلج وتتغير نفسيتج وحرام عليج جذي تكلمين ريلج اهوا بروحه حاس بالنقص من معاملة امه

تيين انتي تهزئينه اكثر وايد كسر خاطري ترى بالحاله شخصيته راح تضعف اكثر واكثر بدال لا تشجعينه

وتقوليله مشكور حبيبي تنعيت وحجزت لنا بوفيه لو كلمه تطيب خاطره انا عارفه حتى انتي تبين يقولج كليتي ؟

بس شلون يبي يخاف على شعورج دام انتي كل يوم هواش وتزفينه شلون تبين يحبج نفس قبل دام انتي تغيرتي

وقمتي تحقرينه تتوقعين بيظل يحبج ؟؟ كل انسان وعنده طاقه شي لا يحتمل

ليش ما تروحين حق استشاريه تعلمج الصح من الغلط لانه انتي يبين عليج وايد طيبه وحبوبه بس يبي احد يرشدج

ويخفف الضغط الي عليج

بس قبل هذا كله ابيج تسوين شي واحد وهالشي يغنيج عن كل الي قلته

تدرين شنو ؟؟

اقري سورة البقره كل يوم والله العظييييييم تغير حياتج تحسين بشعور غريب تكونين هاديه وتروح عنج العصبيه

استغفري وتقربي من ربج اشكيله بدال لا تشكين حق احد محد راح يفرج همج غيره سبحانه

اوكي الناس بتساعدج بتعطيج النصايح بس منو المفرج غير الله

تصدقي بنية انه ربي يغيرج ادعي ربج يغيرج ويخليج نفس اول واحسن صدقيني بتشوفين الي يسرج

وبتضحكين على ايام النكد هههههه اي حبيبتي ضحكي الدنيا ماتسوى هالنكد والصراخ باجر لا سمح الله ريلج يهدج

انتي شنو بتسوين شي طبيعي بتتحسفين ف ابدي من الحين بالتغير

الله يوفقج وين ما رحتي ويسرلج امورج الصبر ثم الصبر وان شالله ربي معاج لا تخافين

 

[ثريا الكون]

انا ماراح اجاملج كلش وياريت ما تزعلين مني انتي وحشيه في مره اطق ريلها واطق نفسها جد انتي مريضه نفسيا وحرام هل ريال فيج كل شئ عندج سب وصراخ وهواش ووحده اطالع رزقت غيرها وهذا امج معلمتج عالقناعه نصيحه مني روحي صلحي حالج وبعدين صلحي وضعج الخلل ماسكت من راسج لي ريولج هذا الي عندي لج

 

[جادل سبيع]

انتي الضعيفه الغريبه العجيبه ليش كل هذا؟؟؟؟؟؟؟؟؟؟؟

مرت حماج ماتسلم الا جدام خالتج ادقريها وقوليلها انا مو ابكيفج لي بغيتي اتسلمين سلمتي ولي بغيتي اتقاطعين براحتج ؟؟؟؟؟؟؟؟؟قوليه جدام خالتج وقوليلها اهي ماتسلم الا اذا شافتج بس وكبري راسج واقعدي تقهوي وسولفي وضحكي وطنشيها ..

زوجج جننتيه الله ايعينه ايحاول باللي يقدر عليه وانتي وراه بالمرصاد نصيحه خليه يتزوج وحده ثانيه تكسبه واتحبه واتدلعه بلا هالمشاكل اللي اذيتيه فيها >>>قهر صح بس هذا اللي يبيه الواحد من زواجه اقلها مو كل يوم مشاكل

حرااااااااااااااااااااااااام هذي مو حياه يابنت الناس خلاص كم عمرج اللحين وتصرفاتج تصرفات جهال ..

 

[ام كوثر2007]

مابي ازيدج بالكلام بعد

البنات عطووج بما فيه الكفايه

صراحه انتي وااااااايد اوفر بكل شي وتتهاوشين علي امور سخيفه جدا

الله يهديج

 

[sosowaty]

الله يهديكم

 

[susuu]

ما اكذب لو قلت قعدت ابكي على كل كلمة منكم
ثريا الكون ..خليتيني ابجي من خاطري لين قلت بس على كل كلمة كتبتيها

ما ابي ابرر بس يمكن وصفت بطريقة خطا بس انا ما اغار من مرت حماي ابدا وربي يشهد ابدا ما اسال شو عندها ولا احقدها استغفر الله ربي يهنيها
بس هي خربت علي عند اهل ريلي وخاصة عايلتهم وايد كبيرة ومترابطة
تخيلوا في وايد بنات اعمارنا يوم اقعد تشلهم مكان ثاني واتم بروحي او يوم نروح بيت حد تاخذ طاولة وتنادي كلهم الا انا اتم منحرجة وتكلم من وراي بس بطريقة جدا ذكية ودبلماسية اهم شي تخرب اسمي

وخالتي تاثرت شوية لاني كل شي اسوي من خاطري بس مادري ليش كان يصير كذا

وريلي ياربي انا وصفت وخبرتكم وانتوا طلعتوني وحشية ونكدية
صدق اتهاوش واسوي بس ما ابدا بدون سبب ..ودايما له دور وخاصة يوم يوعدني ويخلف
بس الحين مب وقت ارجع ماضي واقول كذي ولا كذي
الحين بجد ابي اغير من نفسي ماعرف شو اسوي ولا كيف ابدا

كل ما اشوفه اتذكر مواقف وايد سوا معاي ومن اقل شي ما امسك لساني
وهاي الي ابي اغيره

كيف امسك اعصابي ..كيف اغير من نفسي من انسانة مرحة وحبوبة صرت نكدية وحزينة واهم من كل هاي مريضة كل شوية امرض ومناعتي قلت اقل شي يصبني واطيح بالفراش
علما ان ما اتهواش ابدا جدام عيالي وابجي واكل نفسي يوم ادش الغرفة
وتعبانة نفسيا وجسديا لاني كل شي اسوي لهم بروحي ومن نوع الي اخاف واقلق وايد لو طلعت لربع ساعة حتى

ياربي ابي اشوف حياتي ونفسي شو اسوي حتى كم مرة سافرت مع ريلي بدون يهال كله اتم اصيح واتصل كل شوية احاتيهم ريلي يقولي عيل ليش جيتي يوم تحاتيهم

بليز بنات انصحوني

 

[Reham 84]

حراااام فوق مو مسوي عشا تقولين له فاشل شذنبه
اذا ماجوا كثير
والله والله حتى لو زوجي فاشل مستحيل اقوله هالكلمه قوية ترى
انسان مااعرفه ماتنقال له فاشل عيب شلون ابو عيالج
ماقريت الموضوع الاول بس بصراحة بدون زعل
حسيت انج ماتحبينه وتتصنعين المشاكل
او انج تعبانة نفسيا وتحطين الحرة فيه
الله يعينكم

 

[وَِطَنْ ~]

لو ان زوجج مو زين اتوقع تنزلين موضوع تدورين رضااه !!!

اختي اكسبي زوجج لا تنكدين عليه

تذكري ان رضاه عليج يدخلج من اي باب من ابواب الجنه تشاءين ..

فما بالج انتي تصارخين بوجهه !!

الله يهديج ويصلح بالج

تقبلي ردي

 

[لولو كـاتي]

الحين الرجال مسوي عزيمه وسوبرايز تقومين تزعلين وشنو السبب علشان ماحضرو المعازيييم

من جدك انتي زين هووو شدخلللللللللله ماله ذنب

هوو ماقصر سووا اللي عليه بصراحه انتي نكديه

وانصحج تجلسين مع نفسك وترتبين امورك

بعدين خففي حنه حنه حنه ترا الواحد تلوع كبده

ونصيحه لا تشوفين غيرج هذا شرا وانا لا هذا عنده وانا لا ترا كل واحد له ظروفه وكل شخص غير عن الثاني حتى لو اخوان

وبعدين زوجك فهميه ان هذي مسووليته اذا خرب شي بالبيت يصلحها بس اذا ماسواها وهالشي تافهه مثلا تصليح لمبه

استاذنيه قوليله بجيب احد يصلحها عادي؟ وسوي انتي اذا مايمانع بس لا تحنين كثير وريحي تفسك

ترا هالامراض بعيد الشر عنا ماتجي الا من النكد والهم طنششششي فكري في صحتك ماحد بينفعك بعدين

 

[صادقة بكلمتي]

البنات ما قصروا والله الله يهديج ترا الواحد اه اللي يسعد نفسه او يتعسها استهدي بالله وصلي واهتمي بعيالج وريلج وبيتج وانسي الناس اعتبري نفسج عايشه وياهم بروحج شتبين بالناس وترا الحين عندج ريال لا تندمين باجر ان تملل من النكد وهدج حاولي غيري نفسج وتعايشي مع اوضاع حياتج علان تكملين واللي يبي يشوف كل شي بسلبية ما عمره بيفرح وبيموت منقهره اتقي الله بعيالج ونفسج وريلج واسعي للتغيير وباذن الله تشوفين كل خير