السلام عليكم
اليوم بنتكلم عن الحمولة والخاله بالشكل الرئيسي
طول عمرج حطي هالشئ براسج انج تخلينهم يحترمونج مو الا تخلينهم يحبونج الحب من الله
الله كتب وانها حبتج كاهي نبيها ما حبتج خلاص كافي انها محترمتج ومحترمه اهلج بس هذا اللي كافي
خالتج خالتج خالتج بعدين باقي اللي في بيت
انتي عايشه مع ريلج عليج بخالتج والباقي مجرد علاقه سطحية
اللي تسوينه دايم سويه لله لا تنطرين منها ان تكافئج على اللي سويتي
في مثل دايم يقولونه
لو الخالة حبت الجنه مرت ولدها جان ابليس دخل الجنه
كافي انها تحترمج هي وبناتها ويذكرونج بالخير
حطي في بالج هي كانت امه والحين انتي يايه تشاركينها فيه فشئ اكيد راح تلاقين بعض الحركات طوفي قلبي ولا تحطين في بالج كلش انتي تطوفين حق الناس اللي يضايقونج بالشارع بس حق ام الغالي ما تطوفين
كل ما ييتوا بيت اهلج بوسيها على راسها وقعدي يمها طبعا راح يضيفونج لا تتكبرين وتسوين سوالف في ويهج ان عيشتهم مو من مستواج والا الاثاث والسوالف مو عاجبتج
دامهم حابينج وقاعدين حواليج وقاعدين يسولفون معاج خلج انتي بعد خوش اذميه معاهم
خلج ساكته لا تتليقفين وتسالين عن فلان وعن علان اسالوج ردي على قد السؤال ما اسؤلوج اكتفي بالابتسامه
وخالتج اسألت عن امج طمنيها عليها وانهي كلامج ان امج دايم تسال عنج عند افلان اللي هو ريلج وهي وايد تسلم عيلج
راح تستانس الحجية وراح تقول اياي انا مهمه وفي احد يسال عني هههههههههههه
خذيها على حديث اللي يقول كلمه الطيبه صدقه
انا ما اقول دوسي على كرامتج وصيري بلا شخصية عندهم بس هم لا تصيرين شرية وتقعدين على كل كلمه لهم وتسوينها سالفه
لما يضايقونج بكلمه نفس الحزة ردي عليهم بكلام يحرجهم بس بدون انفعال ولا عصبية
يعني حماتج استقبلتج وقالت لج وينج يالقاطعه ما تنشافين ردي عليها بابتسامه انتي وانيج يالواصلة اللي تنشافين
قالولج اخونا قبل مو جذي كل يوم ايينا من تزوج ما ادري اشفي الحين يالله ينشاف ويسال باتسمي وردي عليهم هذا هو مثل ماهو من يوم خذيته تربيتكم انا شكو هههههههههههه
علقوا على شئ من لبسج باتسمي وردي عليهم ترى انا شفت روحي بالمنظرة قبل لا اطلع وانا من طبعي ما احب احد يعلق على لبسي
هالكلام بس ينقال للحموات لا تطوفين شئ لا لهم ولا لحريم الحما علشان يكون لج شخصية تهابونها
اما خالتج خليها ميخالف طوفي لها علشان لا يقولون هذي نصرة وام السان
خلي علاقتج سطحية ولا عمرج لا تبطلين اي سالفه عن بيت اهلج عندهم
لانهم في نفس الحزه راح يتعاطفون معاج بس لما تخلصين راح ينقدون عليج ويقولون هذي بيت اهلها ما سلموا منها عيل اشلون احنا
وتعالي بعدين حق المعاير اللي ماله تالي
عزايمهم
اعزموج كشخي ورزي نفسج وروحي ولا تقعدين جنج صنم وسط المعازيم لاء قومي ساعدي حمواتج ووريهم انج سنعه بس عاد مو تشيلين كل شئ وتبهدلين روحج لاء على الخفيف يعني وزعي حلو صبي قهوه وروحي قعدي عند خالتج او حماتج الكبيرة
ما اعزموج ووصلج الخبر من ناس
لا تعبين روحج ولا تزعلين منتي ميته على عزيمتهم هم الخسرانين ومفشليم روحهم ان جنتهم مو موجوده هم اللي راح يطلعون بالشينه
اذا رحتي لهم بعد العزومه لا تتشرهين لا عندهم ولا عند ريلج
نقطه حطيها في بالج مشاكلج مع خالتج وحمولتج لا تقولينها لريلج ابد ابد مثل ما قلت لج ردي عليهم انتي وحده بوحده لا تسكتين
بس مو جدام ريلج لاء جدام ريلج خلج الحلم الوديع اللي يغلطون عليها وهي ساكته
طبعا هم ما راح يقصرون راح يوصلون المشاكل لريلج خليهم تيي منهم ولا منج بالعكس فرصتج
لما ايي وهو معصب من الشحن اللي اشحنوا هم انتي على طول نزليلج جم دمعه وقوليله الله يهديهم انا ما قلت لك علشان كنت ادري انك راح تعصب ويضيق خلقك بس هم الله يسامحهم قالو لك وتبجبجي وخلي هو يتفلسف وانتي خلج ساكته لا تردين
صدقيني انا ريلي كان جذي من ينشحن ايني لا وكان يصرخ وما ادري شنو يبي يسمعهم وانا ساكته ولا عمري قلت له عن مشاكلي وياهم
انا كنت اخذ حقي بنفسي مرده ولدهم راح يوقف معاهم واصير انا موزينه ومع الوقت قام يمل منهم ومن شكاويهم وبس يبطلون موضوع معاه تلاقينه يدور النحشه علشان يصعد وما يرد عليهم
لدرجه حماتي الصغيرة قالت لي انتي ساحرة اخوي ما يلتفت لنا بس يبيج رديت عليها اي رحت حق نفس الساحر اللي انتي تروحيله وسحرته
هذا كله لما ريلي مو موجود
ترى انا علاقتي ممتازه مع حمولتي مو تقولون ان عندي مشاكل معاهم بس ما اسكت عن حقي وهم قاموا يحسبوا حساب الكلمة اذا بيقولونها
علاقتي سطحية معاهم انزل اسلم واقعد مع خالتي اساعدها اذا تبي شئ ما تبي شئ اقعد عندها لازم اقعد يمها ما احب اقعد بعيد عنها حتى حريم حمواني ههههههههههه قاموا ينافسوني الا بيقعدون يمها هههههه حريم عقولهم اي شئ
لما اطلع مع ريلي وارد لازم اوريها شنو شريت هي بروحها اذا لقيت عندها حريم حمواني والا حمواتي اسلم واطلع شقتي
لا تقولين الحماة مثل اختي لا يا قلبي الحماة زينه وتحبج مثل اختها بس مره في يوم راح ايي اللي تقلب عليج فخلج زاهبه حق هاليوم لا تعطينهم اسرارج كلش مشاكلج مع ريلج محد يعرفها لا اهلج ولا اهل ريلج
احنا مع خواتنا اللي منا وفينا نتزاعل عيل اشلون مع اخت الريل
عندج مشكلة حطيها عندنا والحمد لله المتزوجات ما يقصرون وشوفي اللي يناسبج بس لا تخربين صورة ريلج عند اهلج ولما تروحين تشتكين عند اهل ريلج بعد راح تخربين صورتج انتي عندهم
هذا اللي عندي اياه اليوم
الله يوفقكم
