خايفة من حلم وماأبيه يتحقق شسوي ؟؟

[الغدق]

السلام عليكم ورحمة الله وبركاته

اشلونكم بنات شخباركم
بصراااحة احترت مادري وين أحط الموضوع
فقلت ماكو لا هالقسم عشان كل وحدة اتقول أي شي اتعرفه
بنات أنا حلمت حلم وطلع تفسيره مو زين وخااايفه
منه بصراااحة فأكيد أكو شي انسويه عشان الله يكيفينا شر هالحلم
ومايتحقق شنو أسوي بنات بليييز اللي اتعرف
دعاء أو صلاة أو شنو بالضبط ؟؟
لأني حتى بقوقل مو عارفه شنو أكتب
والمصيبة وقت الحلم كان بالثلث الأخير من الليل
يعني رؤيا مو حلم

والله يجزاكم خير أبي شي أكو له دليل
من السنة أو القرآن يعني مو خرفات و
عادات وتقاليد

 

[النهج الاسمى]

تعوذي من ابليس وتفائلي بالخير

واهم شي الواحد لما يشوف حلم ازعجه ينفث على اليسار ثلاث مرات وتعوذين من الشيطان

ولازم الواحد يتوكل على الله ولايعيش مهموم بسبب حلم

وألزمي ألدعاء>>>>>>الدعاء يرد القضاء

 

[إيمي1987]

سلام عليكم ورحمة الله وبركاته


اختي صلي ع النبي واله

ودفعي صدقه عن الحلم الي حلمتيه

سواء كان شنو تفسيره

دفعي صدقه لدفع البلاء

وادعي دعاء النجاة
(( بسم الله الرحمن الرحيم، باسم الله خير الاسماء، باسم الله الذي لايضر مع اسمه أذى، باسم الله الكافي، باسم الله المعافي، باسم الله الذي لايضر مع اسمه شئ في الارض ولا في السماء وهو السميع العليم، باسم اللع على نفسي وديني، باسم الله على أهلي ومالي، باسم الله على كل شئ أعطانيه ربي، الله أكبر، الله أكبر، الله أكبر. أعوذ بالله مما أخاف وأحذر، الله ربي لا أشرك به شيئا. عز جارك وجل ثناؤك، وتقدست أسماؤك، و لا اله غيرك، اللهم اني اعوذ بك من شر كل جبار عنيد، وشيطان مريد، ومن شر قضاء السوء، ومن شر كل دابة أنت اخذ بناصيته، إن ربي على صراط مستقيم. ))


والله يحفظكم ويبعد عنكم الشر

 

[ديناا كوليكشن]

اول واهم شى لاتقولينه لاى احد واذا ما قلتيه فانه لايضرج

هذا اللى علمناه الرسول صلى الله عليه وسلم والنفث على اليسار ثلاث مرات والاستعاذة من

الشيطان الرجيم ثم تغيرين جهة النوم

وما الا العا فية ان شاء الله

 

[tolay]

اللي الله كاتبه بيصير بيصير

ولاتعبين نفسج عشان حلم

ياما حلمنا احلام بايخه وتخوف بس لازم ننسى ومانضايق

انتي ادعي انه ربج يبعد عنج المضره وان شاءالله ماكو شي

 

[am_kshaa]

ماكو صلاة حبوبه او شى ثانى ديربالج
بس تصدقى اذا كان تفسير الحلم موزين مثل ماقالولج
وادعى ربج بس
والله يبعد عنج الشر

 

[نونه العنونه_H]

لا تفكرين فيه.. ولا تقوليمه حق اي احد
اقر قرأن وادعي ما يتحقق..

 

[رووز q8]

حبيبتي ان شالله ماكو الا الخيير

تصدقي لان الصدقه تدفع البلاء واستغفري وتعوذي من ابليس

وان شالله خيـر

 

[أتعبني شمووخي]

لا تفسرين الحلم ...

وانشاءاللهـ يكون خير

 

[هنـــد]

تصدقي وايد ولا تفكرين بالحلم ولا تقولينه لا احد ولا تفسرينه

انا مره من زمان حلمت حلم مو زين اول ماقعدت خفت

بس تعوذت من الشيطان وقلت مايصينا الا ماكتبه الله لنا

وتصدقت ودعيت

 

[كتكوته ورديه]

تعوذي من ابليس الي بيصير موبيدج المكتوب راح يصير والي الله كاتبه يصير حتي لوكنتي خايفه وكلي امرك الله

 

[(كويتيه عسل)]

قولي لجتفج اليسار اعوذ بالله من الشيطان الرجيم 3 مرات

قولي دعاء الكرب والهم والحزن <<<<<اذا قلتيه راح ينعكس

ولا تقولينه لاحد وانسيه علشان لايتحقق

 

[راحيل العبدلي]

...

حبي المفروض الحلم المو زين ما تفسرينه .. و تتبعين ما قاله صلى الله عليه وسلم ..
تنفثين على كتفج اليسار و اتصلين و تدعين ..
لان الرؤيا إذا فسرت وقعت ..
بس انتي ادعي الله و استغفري لان الدعاء يرد القدر ..
و لا تقولين الاحلام المو زينه لاحد ..
.
.

 

[جفا الأصحاب]

أنسي الحلم ولا تفكرين فيه

وكثري من الإستغفار والدعاء و ان الله يكفيج شره وان شاء الله ما يضرج

 

[وهج الحب]

السلام:
اولا الحلم الزين من الله والحلم الشين من الشيطان يعني لا يودي و لا يجيب ..بس انت الله يهداك خليتي احد يفسره لك ..وبعدين احيانا اذا فسرة لك احد تفسير مش زين ..يتحقق ..كان يوم خلتي احد يفسرة رحتي ق احد من المتفائلين عشان يقلب لك الحلم لشئ زين ..
عموما مش كل الاحلام تتحقق احيانا اثغاث احلام ..بس ديري بالك اذ تضايقتي من حلم قومي من نومك واتفلي على الجانب اليسار وتعوذي من ابليس ..وبس ولا يصير لك ابدا شئ بأذن الله ...
باقولك قصة عن الانسان لازم يروح للمتفائل احنا عندنا بالمدرسة كانت واحدة شاطرة بتفسير الاحلام لان كله تفسر احلامها هذا بيطلق هذا بيموت ...وجاتها واحدة احبها وايد وكنت جالسة معاهم الا قالت حلمها ولاني شوي اعرف بالاحلام عرفت ان حلمها شوي مش زين وقبل ما تكلم صديقتنا رحت انا فسرت لها الحلم على ان شئ زين بيصير وقلبت لها الحلم ويوم فسرت صديقتي الحلم كلة مأساة ..واغتثت صاحبتي اللي احبها من التفسير ورغم اني وطمنتها انه مش صاير الا اللي قلته انا مش اللي قالته الثانية لاني سبقت بالتفسير ..وصج ما اخذت فترة الا قالت لي صدقتي صار كل اللي قلتية ...
ومرة فسرت الحلم لوحدة انها بيطيح حملها ويوم قلت لها بيني وبينها فلانه من واين جبتي ان جنينها بيطيح رغم انه ما في حلمها دليل ..وردت علي لاني ابيه يطيح سته عيال ايش تبي فيهم ؟؟؟ وصحيح طاح جنينها وهذا اللي خلالهم يسونها مفسرة المدرسة ...
وفيه مرة حلمت حلم بالله وسمك وخير وفسرت حلمي بنفسي وكنت متفائلة جدا وفرحانة ...وبعد ان تحقق والحمدلله بما ترضاه نفسي قلت حلمي لشيخ معروف عندنا بتفسير الاحلام ..ودائما بتفسيراته يقولي يمدح فيني اني مرضية من الله ..الا ذاك اليوم مش عارفة ايش فيه ما خلا تشائم الدنيا ما قالة لي واني من انا حتى احلم بالله ..وقام يفسر لي الحلم من الايات القرائنية وما خلا كلمة كفر ما قالها فيني ..الا اقوله يا يبا كل كلامك اخرطي بخرطي لاني والحمدلله ما جيتك الا بعد ما تفسر لي حلمي وتحقق وخلص ..وما تم خير بالدنيا خلال اسبوع واحد ما جاني وما كانت امنية تمنيتها من سنوات الا تحققت خلال اسبوع وانت تقول ان من شاف الله كافر ولا يؤدي واجباته ولالالا ...
وانا اورد التفسيرين عشان بس تحطون ببالكم ان تحقيق الحلم احيانا وليس دائما يكون عليكم انتم اذا شفتوه فسروه تفسير زين عشان يتحقق بزين لان الرسول يقول بما فيه ان الحلم متعلق بمنقار طير ويطح متى تفسر وبما عليه ..
حيبتي دائما ترا تقدرون تقلبون الشئ لصالحكم وما المفسيرين اذ تحقق كلامهم احيانا الا انهم اربطوا الاحداث وقالوها بس يقولونها حسب نفسيتهم هم ويقلبون حلمك لو كان زين لتعاسة ..

 

[ام جوري89]

حياتي ياما حلمنا احلام مو زينه وكان تفسيرها شين .. بس شتسوين هذا امر الله ..

انتي تصدقي .. وادعي ربج .. ويمكن يكون حلم لا اكثر ولا اقل ..

ولاتقوليييييين لحد خير شر عن الحلم .. حتى لو كان زين ..

لأن الحلم على جناح طائر من تقولينه يتحقق .. << وساعات يكون الضد يعني لو خير يصير شر والعكس ..

اهم شي ادعي ربج ولا تخافين هذا امر الله ياقلبي .. لا تحاتين ..

ولا تفكرين واجد انسي الموضوع خلاص .. صفحه وانتهـــــت ..

عيشي حياتج هع ..

وسوري طولت عليج بالحجي ..

 

[^البارونه^]

الله يبعد عنج السو ياربـ

دفعي عنهـ صدقهـ

والله يحفظج

 

[ضحـاوي]

انسيه والله يبعد الشر والبلا وموشرط كل حلم يتحقق

 

[miss_jamsheer]

طلعي صدقه حبيبتي اذا شين الله يبعده عنج واذا زين يتثبت انشالله

 

[omy nour 3any]

اذا الحلم مو زين من الاساس شحقه تفسرينه....
عليج بالدعاء >>لان الدعاء يرد القضاء...
و ان شاء الله ما في الا الخير