لف و لا يشوف عمه
الدكتور سالم : خالد ... تعال و انا عمك ما يصير تدخل
خالد : ليه يا عمي بتطمن عليها
سالم : اي بس جمانه خلاص طلعت من العده .. و ما يجوز تدخل عليها و اهي مكشوفه
خالد : بس
سالم : ميخلف و انا عمك .. هذا الشرع و ما يجوز ..
ووقف خالد بره الغرفه و اهو ميت من القهر شلون مو قادر يدخل يتطمن عليها ... الحين اهو الي صار غريب
اذا كان اهو ابو البنت ... و مو قادر يدخل عليها ..
خالد تضايق حييل دق على الريم و قالها انا ماشي و بطرش لكم السايق
و راح خالد لبيت ابوه ... خذا ولده و رد بيته
دخل البيت ... لاول مره خالد يحس ان البيت موحش و فاضي .. صار له فتره من طلعت هنا ..
بس البيت فاضي من قبل من قبل
من يوم ما جمانه مشت .. و هدت مكان كبير بالبيت و مكان اكبر بقلب خالد ..
تذكر خالد بنته .. ليش ياربي .. بجري معوق و الحين بنتي تعبانه و بتروح .. الحمدالله على كل حال
اللهم لا اعتراض ... يا رب تشفيها و تخليها .. يا رب تدري انه هذي الي بترجعني لامها .. يا رب
خالد كان تعبان حيل .. حط راسه و نام
جمانه الي من صحت و هي تسال عن بنتها ... كانت متضايقه طول الوقت .. و امها ما خلتها دقيقه ..
لين الليله الثانيه ريم ترجتها تروح و تخليها اهي تسهر معاها هل ليله ..
رضت الام بعد الحاح خصوصا انها تعبانه حيل
بين ريم و خالد كان في اتصالات يطمن من خلالها على حالة جمانه و بنته .
و من درى ان ريم اهي الي بتنام عندها اليوم .. قالها انا بي اشوف جمانه
ريم عارفه شنو جمانه بالنسبه لاخوها خالد . و ماحبت ترفض له هل طلب ..
و بالليل ريم استاذنت جمانه و قالت لها انها بتروح تطل على البنت .
شوي و طق خالد الباب
جمانه : تفضل
خالد : السلام عليكم
جمانه : عليكم السلام
خالد : شلونك جمانه ؟؟ الحمدالله على سلامتك
جمانه : الله يسلمك.
خالد كان مو عارف يفتح مواضيع مع جمانه ..و مدوده و حاس بانه مذنب
خالد : شفتي بنتي
جمانه : قصدك بنتي .. اي شفتها
خالد : اشرايك نسميها مريم
جمانه : خالتي كانت عزيزه علي حيل .. بس انا بنتي شلتها ببطني و من دريت اني حامل و انا اكلمها
و مسميتها و اناديها باسمها .. و انت الحين بتي بتسميها ...
خالد : بس هذا اسم امي و توها متوفيه .
جمانه : و لو ... ما اعتقد ان حق التسميه لك
خالد : هاه .. من له اذا مو لي ؟
جمانه : على اي اساس تسميها ؟؟ على اساس يوم شكيت انها بنتك
خالد : هذا موضوع و راح
جمانه : لاوالله ؟؟ راح ... انا دريت بكل الي صار لي .. و بنتي الي بسبتك ولدت قبل أوانها .. كل هذا راح
خالد : انا ما كنت قاصد أأذيكي او أأذي بنتي
جمانه : مو قاصد ؟؟ انت شكيت فيني .. و شكيت انك ابوها اصلا .. هذا و انا بنت عمك .. و عارف تربيتي
و يوم بنت الشوارع قالت لك حامل ركضت تزوجتها ... و هديتني و تنازلت عني تبيني انسى كل هذا ؟؟
انسى اني كنت اراجع بروحي الطبيب ؟؟ اشوف كل وحده مع ريلها و انا بروحي
خالد : انتي الي ما خبرتيني يوم عرفتي .. هذي غلطتك
جمانه : صح .. غلطتي .. لان بالاساس غلطتي الكبيره اني تزوجتك ... و ضحيت بأشياء وايده عشان واحد
باعني برخص التراب ..
خالد : عمري ما رخصتك .. و طول عمرك غاليه عندي .. بس عنادك و كبر راسك الي ضيعنا
جمانه : انا عنادي انا ؟؟
خالد : اي عنادك ... دخلتي صديقاتك حياتنا .. و صرتي تقولين لهم كل تفاصيلها
و ما خليتيني المسك او اتقرب منك حتى .. حطيتي حاجز كبير .. ما انكر اني غلطت و كنت ضعيف
بس انا ضعيف بسببك .. و الطلاق انتي اصريتي عليه و عارفه بشنو هددتي
جمانه : لو تحبني جان تمسكت فيني
خالد : جمانه نسيتي كلامك ؟؟ نسيتي كان شنو مقابل شنو
جمانه : حتى لو ... في الف طريقه و طريقه مو تطلقني ركض و تحتفظ ببنت الشوارع ..
خالد : جمانه لا تخلينا ننبش بالماضي .. خلاص الماضي راح لحال سبيلو ..
جمانه : الماضي في منه ولدك وليد .. بيضل طول عمره يذكرك فيه
خالد : الحمدالله على كل حال .. وليد ولدي .. وأحبه واعتبره احلى شي حصلت عليه من خل ماضي
جمانه : مسكين هل ولد ... كان ضحية ام و أبو انانيين .. ما يفكرون بعقلهم .. كل همهم الشهوه و بس
خالد : جمانه الله يخليك يكفي .. انا جاي اوسع صدرك مو جاي للهواش و النجره .
جمانه : سكتت جمانه و حست انها ثقلت عليه بالكلام و اهو يايها مكسور
خالد : الحين .. اشصار عل اسم
جمانه : اسمها فرح ... طول عمرها كانت الفرح بداخلي .. و انشالله بتيب الفرح لدنيتي
خالد : حلو فرح
و شوي و دخلت ريم ... و سمعت اسم فرح
و عرفت ان بيسمونها فرح .. تضايقت شوي لان كان ودها يسمونها على المرحومه .. بس يوم درت ان
جمانه مصره على الاسم سكتت و عرفت ما بيدها شي ..
جمانه بعد 10 ايام رخصوها .. على ما تعدلت نسبة دمها و صحصحت شوي ..
ام البنت ضلت بالشيشه فتره اطول
جمانه ما قدرت تسافر الكويت و تهد بنتها ... بس اهلها سافروا .. لان السالفه فيها طواله
ضلت جمانه تنام بيت عمها مع الريم ... الي كلمت ريلها و قالت له نسكن عند ابوي
لين تعدي فتره نواسي أبوي فيها ..
بهل فتره كان يتردد خالد وايد عليهم .و صار يوميا ايب الوليد بيت ابوه و يخليه مع الممرضه
جمانه تقربت منه حيل .. حست انه طفل برىء فقد بالدنيا وايد اشياء ..كانت تلاعبه و تهتم فيه
و يوميا تزور بنتها و تطمن عليها .. بنتها الحمدالله بدت تاخذ عافيه شويه ..و الدكتور قال لهم بعد
3 ايام برخص البنت لان وزنها خلاص قرب من الوزن الطبيعي
جمانه فرحت بطلعة بنتها ... و خالد زعل لان موعد سفر جمانه قرب .. كان راضي ان يلمحها ببيت ابوه بين فتره و الثانيه .
و مره دخل الغرفه لقى جمانه توكل الوليد
خالد : مشكوره .. تعبناكي معنا
جمانه : انا مو ناطره شكر .. انا اسوي شي انا حابه اسويه
خالد : امه الي هي امه ما سوت له بيوم الي تسوينه
جمانه : امه مو انسانه عشان تكون ام
خالد : اي والله
خالد : الا صحيح الدكتور قال خلاص بيرخصون فرح
جمانه و بابتسامه : انشالله بعد يومين
خالد : و بترجعون الكويت ؟؟
جمانه : اكيد .. ما يبيلها
خالد : و أنا
جمانه : اشفييك ؟
خالد : ما فكرتي فيني شلون اتواصل مع بنتي و هي ببلد و انا ببلد
جمانه : خالد يعني تبيني اعيش بالسعوديه مع بنتي ...
خالد : اي ما فيها شي
جمانه : خالد انا كل حياتي بالكويت .. اتغرب و اقعد بروحي انا و هل بنت ليش
خالد : و ليه لحالكم ... نعيش كلنا
جمانه : نعم !!!!
خالد : جمانه .. مو قادر اتحمل فراقك .. و ان غبتي عن عيني بموت
جمانه : ما ينفع الكلام الحيين
خالد : ليه يا جمانه ؟؟ انا أحبك و انتي تحبيني و عندنا بنت ليه البعد ليه
جمانه : هذا حكم الزمن
خالد : لا ماهو الزمن .. انتي الي تكابرين و تعاندين ... شلون يعطيكي قلبك تخلي بنتك تكبر بعيد عن عين ابوها
جمانه : نصيبها بالدنيا جذي
خالد : ليه هو انا مت !!
جمانه : اسمله عليك ...
خالد : جمانه الي تسوينه حرام .. و ما يرضى احد .. انا بدونك ضايع ... و ما عرفت دنيا من عقبك .. ريحيني
والله اني عايش بهل دنيا ميت .. و لا حس بطعم فيها
جمانه : صعب خالد صعب ..صعب انسى كل الي سويته ...
خالد : جمانه الله يسامح و انتي لأ ؟؟ ليه لييه ؟
جمانه : الي صار وايد علي .. و نسيانه صعب
خالد : الحب يداوي الجروح .. و انا مستعد انسيكي كل الي راح ... يا جمانه انتي اول من دخل قلبي
و من دخلتي احلف برب الكون انه ما مر يوم و انتي مو متربعه فيه
جمانه الروح تحبك و ما تشوف عيني الا انتي ... صدقيني لو بعدتي عني اموت .. ما أقدر
انا ما صدقت رجع لي الامل ... ليه تبين تذبحيني ليه .
جمانه حسن ان عنادها خلاص خلص .. و مو قادره تقاوم اكثر .. اهي تحب خالد اكثر ما يحبها
و مو حابه بنتها تكبر بعيد عن ابوها ... و الحين مافي اي عائق بطريجها ... ليش تبعده ليش ..
