حدي مقهوره من ريلي

[dehen-3ood]

السلام عليكم
بنات حدي مقهورة من ريلي والله صج صج ما ني قادره أتحمل تصرفاته

آنا بقولكم مشكلتي وياريت تساعدوني عسى ربي يوفجكم00

اليوم كنت آنا وريلي يايين عند أهلي نتغدى عندهم لانه الوالد والوالده بيسافرون

وكان فالغدى يدي وعمي وعيال عمي أكبر واحد عمره 14 سنة

آنا دشيت مع ريلي وكنت لابسه لفتي وعبايه وسلمت على يدي وعمي وطلعت سيده

خلصنا غدى

راح ريلي لانه عنده دوام وآنا تميت عند أهلي
دق علي وقالي أنتي شلون تطلعين جدام عيال عمج؟قلت له هذيل صغار جان يعصب ويصرخ يقول آنا ما أفهم هذيل رياييل قلت له والله صغار

مو راضي يفهم سكت عنه جان يقولي أنتي جدامي جذي أكيد من وراي كل الرياييل الي فعايلتكم تقعدين معاهم وسوالف

ولما بغيت أتحجى يقولي جبي جبي أكلي 000000

أمبيه أول مره يتكلم معاي بهالاسلوب
وقام يتحلف والله لوريج ما راح أخليها لج وانا مطوفلج وايد أشياء بس آنا أعلمج
وسكر

هني آنا مت من البجي آنا ما سويت شي غلط
بعدين انا قاعده أقعد مع اخوانه وما يقول شي أصلا أهو يقولي تعالي

ليش سوى جذي؟؟

آنا وايد أمور طوفتها له يسهر وما يرد إلا 2 ولا 3 وأحيانا 4 وما تقولون يوم واح ولا يومين

دايما وكله أقعد أنطره مع العلم إني حامل فالشهر الخامس

ويرد وأسويله عشى وأقعد معاه وما أقول شي

صارلنا شهرين ما طلعنا مع بعض وكل ما قلت له قال باجر باجر

حتى حق صديقاتي ما يخليني أروح الا بالحسره لا ولازم أرد حدي 9

والله يا بنات وايد تعبت أحسه ما يوثق فيني

آنا قلت بقعد عند أهلي ليما أبوي يرد ان شاء الله الخميس
ويقعد معاه

لان الكلام الي قاله وايد كبير


الشي الي سويته صح ولا غلط

ياريت تساعدوني00​

 

[تعبت اداري...~]

وعليكم السلام ورحمة الله وبركاته
الله يصلح فيا بينكم يارب ويسخر لج ويهديه يارب....

 

[سوسن1980]

مادري بس لو ينحصر الموضوع بينك وبينه احسن عشان الامور ماتكبر

 

[ام دليار]

طيب أنتي طالعة متحجبة
لكان لما تتطلعي بشارع بيشوفك كل الناس بيزعل ولا لأ

 

[توام قلبه]

بصراحه انا ما اايد دخول الاهل بين الزوجين الا في الضروف
الصعبه فياريت تحلينها بينج وبينه احسن وماتدخلين احد
والله يسخره لج ويهديه​

 

[ام شووووق]

مممم مريت بنفس تجربتج وريلي زفني زف وقوم الدنيا وماقعدها ليش ولد خالته عمره 14 شاف شوي من شعري بالغلط

هذي الغيرة تعمي القلوب والعيون لاتشيلي بقلبج ولاتعاتبيه خلج عادي واذاا اعتذر قوليله انا اعرف انه مو قصدك تزعلني

كسري عينه وخلي يحس بذنبه

 

[Cander]

امبي شصار عشان كل هذا

ردي بيتج بس اللي صار لازم ما يتكرر

وقفيه عند حدة مو هوشة وصراخ لا كلام واسلوب قوي

قوليلة في اسلوب احسن وارقى للتعامل وكنت تقدر تفهمني وتكلمنى بهدوء

وعبالك ما اقدر اقول لاهلي عن اللي صار لا غلطان بس انا مابي اكبر الموضوع

وان شاء الله يقيدونج اصحاب الخبرة

 

[Beauty is Me]

ما عندي رد غير الله يفرج عليكم ويسخركم لبعض ويقومج بالسلامه حبوبه

 

[*بسبوسه*]

الله يكون بعونج

شوفي حبيبتي جنج قاعده تتكلمين عن اختي الصغيره مسكينه حياتها نفسج واردى ومرتين تطلب الطلاق واحنا نردها

شوفي ريلج لونه حاس اللي سويتيه غلط جان اول ما دشو عيال عمج دز لج مسج او غمز لج يعني قومي دشي داخل ..مو يسكت يسكت ولما يطلع يدق عليج ويتهدد ويتوعد
مشكلة الرجال الضعيف طبعه جذي ما يعرف يواجه ويستانس ستهاوش بالتلفون وغير جذي تلاقينه عند امه وخواتي دجاجه وعندج يتفنن باساليب القهر والتعذيب النفسي

انتي طيبه نفس اختي وساكته له شنو يسهر يوميا لي 2 و3 اوكي يسهر بس مو يوميا مثل ماله حق انتي لج حق
وياحليلج تنطرينه تسوين له اكل ليش بالله ماعرفو اللي كان عندهم يوكلونه
فوق انج حامل ومحتاجه رعايه قاعد يضغط عليج

حبيبتي لاتخافين انتي ماسويتي شي عيال عمج صغار واكيد فرق بينج وبينهم 10 سنين وغير جذي انتي ما تفصختي جدامهم وقاعده بحجابج وحشمتج...انتي هدديه انج بتوصلين الموضوع لبوج يفصل بينكم ويحكم فيه واهوا راح يخاف
خليه يفهم ان دايم وراج ظهر ابوج او اخوانج..دايم هدديه فيهم

انا اختي جذي كل ماصار لها شي هددته بخواني ويخاف لي درجته قام يقولها ياويلج ان علمتي خوانج مره ثانيه .

ريلج على ماتعودينه وولدج على ماتربينه
عودي ريلج على الشي اللي انتي تبينه

 

[هذا من فضل ربي]

انا اقول لاتكلمينه ورجعي بيتكم احسن للاتكبر السالفه الرجال دايما يشوف نفسه اهو الصح
وصدقيني اهو راح يرجع لج ويعتذر

 

[اشتياق]

ميخالف كل شي يصير بين المره وزوجها
لاتدخلين اهلج ولا تكبرينها
بلحظة هدووء قولي حياتي لاتقلل من احترامي ميخالف لا تقولي هالالفاظ مره ثانيه ترى تحز بخاطري
واشيل عليك

وانتهت المشكله ..!

وانا بعد شوي بحط موضوع ان شاء الله عن عصبية الرياييل وشلون ايدورون السبه!

سايسيه وضحكي ضحكه حلوه وقولي اي تغااار علي عن العياااره قول الصج

وان شاء الله بينسحب كل الغضب اللي بينكم

 

[ارماني]

صراحه ...ماعنده سالفه
الولد توه صغير يعني الحين هو يغار من واحد صغير !!
اذا رد ابوج بالسلامه ان شاء الله كلمي ابوج وقوليله كل اللي صار بينكم ..
على الاقل يستحي شوي من ابوج ..وبعدين المفروض ماتسكتين له انه يااخر ومايجي الا لوقت الفجر ..
شكله زوجج متاثر من ربعه او الناس اللى يقعدون معاه يمكن يسولفون له سوالف مو ذاك الزود عشان جذي
هو عصبي شوي معاج ...
الله يهديكم لبعض ويخليكم لبعض ويقومج بالسلامه ...
ان شاء الله البنات المتزوجات يفيدونج اكثر













تحياتي​

 

[dehen-3ood]

حبايبي مشكورين وما قصرتوا

بس أنتوا ما تتخيلون

على أي شي يدقق واذا صار سوء تفاهم وانتهى وراضيته

والله يا بنات بعد فتره يقعد يذكرني يقولي آنا ما نسيت مع انه يكون شي تااافه

حتى بلبسي قام يتدخل

شسوي معاه هذا؟

 

[امل يائس]

الله يفرج عنج همج يارب

 

[الينبوعة]

انا ما اشوفج غلطانة دامج متسترة ولابسة انا زوجي دوم يقولي ديري بالج لان صبيان بالعائلة كانو صغار وانا اطلع بدون حجاب يقول لالا هم صارو كبار اللبسي وعادي حتى بعض مرات اجلس يم كرايب زوجي عادي وصديقاتي من يجوني مع ازواجهم نجلس سوى وكل واحد محترم نفسة ولابسين بعد وين العيب؟
وبعدين انتي من تطلعين بشارع الناس ما تشوفج؟
الصراحة تصرفة مو حلو وليش الغلط يعني كان يكدر يحجي وياج بهدوء وتفاهم ويبين انو ما يرضى او يغار عليج وكلام حلو
وخلاص انتهت السالفة
وبالنسبة للسهر انا ضد اي رجل متزوج يسهر خارج البيت يكعد يم مرتة واطفالة احسلة من السخافة واللعب برة البيت
الله يسر اموركم خلي ابوج يحجي وياة ويقولة الي يسوي مو زين واكيد يسمع من ابوج لانة رجال كبير ان شاء الله ربي يهدي زوجك ​

 

[Cute mama]

واي انا بعد حدي منقهره من ريلي ومخي مقفل حاليا
​

 

[Tom ♥ Jerry]

.


اهوة عشان معصب قام يقولج هالكلام
خليه يهدى و كلميه بالهداوة


الله يصلح بينكم

 

[DooLy88]

غيرته مبالغ فيها
لوصلت لحد الشك لما قال من وراه تطلعين شعرج حق الرياييل


الله يعينج عليه

كلميه بهدوء