السلام عليكم
اختي انا نسخت لج ردي بتجمعنا.
اقري شنو كاتبه
بنات
متى ابدا اسوي حمام مغربي
انا اليوم صارلي ٣٠ يوم
حيل يمدحون سبا اند هيلث بالمهبوله
افكر اسوي عندهم ..
شرايك متى ابدأ ؟؟
لا لا لا هالمكان اكبر حراميه وحطيت اكس عليه عقب ما نصبوا علي
وراعيته بياعة كلام الله لا يحللها ولا يبيحها ولا يحلل الفلوس اللي خذتها مني ان شاءالله
انا سالتكم بهالتجمع عن كولاجين الشعر ومحد جاوبني وقلت بغامر وبسوي عندهم
تخيلي عي راعية السبا لما كنت قاعده اسويه يتني وقالت اي حبيبتي بتستانسين من النتيجة وشعرج بيضير توب وناعم
وورتني شعرها وقالت شوفي انا مسويه بعد ورب الكعبه ما بغيت افشلعا واقولها شعرج جنه باروكة ومبين مو طبيعي
المهم يت اللي تسوي شعري وقلت لها ان شاءالله اذا عجبتني النتيجة بسويلج دعاية بالنت واشوف ويها بالمنظرة انقلب ونغزني قلبي والله بس قلت لا هالمكان له سمعته وما ظنتي شغلهم اي شي
المهم بدا تحط المادة علي مثل صبغ الشعر وريحته خفيفة وحلوة وخلتها ساعة وغسلت شعري ونشفته شوي ولمته لي وقالت لي ب٨٠ وانا شعري تحت جتفي بشوي
وقالت لا تتسبحين لمدة يوم ولا تحطين شي على شعرج مثل دهن وحنا لمدة اسبوع
المهم مو هني الكلام كله
عقب ٣ ايام ورب الكعبه شعري ردت نفشته وكلمتها عالانستجرام وهذا تعليقي وربي شاهد ما زدت ولا نقصت كلمة وانا نسخت ردي لان توقعت انها بتهاجمني وتقول كلام ما قلته
اختي انا مسويته واليوم لي ٣ ايام ولا كاني مسويته!!!احس شعري بدا ينفش وفوق هذا دافعه ٨٠ ؟ وما غسلت شعري الا مره والاخت اللي سوته تقول ان يستمر شهرين وانا ما صار لي اسبوع وصار جذي. انا شايفه بصالونات ثانيه الجلسه ب٣٠ بس ما سويته الا عندكم لان صراحه ابي اصير زبونه لكن والله غيرت رايي وقسم الشعر عندكم يحتاج له تطوير وخبيرات اكثر عشان ما تخسرين زباين. اتمنى هالكلام ما يزعلج. صراحه تضايقت اني قاطه هالمبلغ على نتيجة ما ارضتني الا يومين بس.
تدرين شنو سوت؟؟
مسحت التعليق
ولما كتبت ليش تمسحينه صكتني بلوك وهني انا عرفت انها اكبر نصابه وبياعة كلام
دشيت من حساب اختي واشوف البنات يكتبون من مجربه وقلت لهم انا وما شفت نتيجة
وصكتني بلوك بعد!!!
هي لو فيها خير جان واجهتني ولا ردت رد محترم عالاقل لكن ضعيفه ومالها حجه
الله لا يحللها ولا يحلل هالثمانين اللي خذتها
المفروض النتيجه تتم شهر الى شهرين او ٣ عالاقل لكن انا خلال اسبوع رد شعري ينفش مع ان الحمدلله شعرتي ناعمه
هذي تجربتي وعقب مرقفها هذا دريت انها خرطي ونصابه
وعلى فكرة قبل لا تسألين كنت بكتب موضوع عن هالتجربة الفاشله عشان محد ينغش مثل ما انغشيت
وكل اللي كتبته فوق ربي سبحانه شاهد علي يوم القيامه انه صار لي وما زدت ولا كلمة ولا نقصتها وماني من قطاعين الارزاق بس هذي باسلوبها خلتني اكتب هالتجربه
وترا على فكره حمامهم المغربي على ٤٠ !!!!! مادري على شنو استغفر الله. ليش هالسعر؟؟ قلنا صيري غاليه بس نصب جذي ما شفت!! النعمه زوالة استغفر الله
تبين حمام مغربي نظيف وسعره فيه عندج لافندر سبا بالبيرق
العادي ب١٥ والملكي ب٢٠ وفيه بالفراولة والجاي الاخضر
سوي اللي بالفراولة عجييييب وريحته فواحه والله تتم بالجسم يوم
وخليه بيوم طلعتج احسن
والعادي جربته بعرسي نفس التفريك بس خلطات ثانيه هم يسوونها فيها مسمار وريحتهم حلوة
بس لا تسوينه عند ريبيكا لان ما عجبني شغلها
سويته قبل سنة ونص عند وحده اذا ما خاب ظني اسمها جريس
امي قالت لها ديري بالج عليها لان صدري يتعب من البخار ويغمى علي وعطتها ٥ صدقة عنها
وحطتني بعيونها
