تهقون اوربا جم يبيلها مصرف لمده اسبوع ؟؟

[om.3omar]

تتوقعون جم يبيلنا حق ايطاليا لمده اسبوع


ابي المصرف

+

التذاكر كلشي يعني


الي راحت من قبل سواء حق اي دوله اوربيه جم قطت؟؟


ملاحظه حق شخصين بس

 

[عروسة]

حبيبتي بس ماعندي خلفيه عن ايطاليا كل اللي اعرفه عنها
غاااااااااااااليه نار نار نار وهم على حسب اللي بتروحين لها بايطاليا يعتمد
وان شاء الله البنات بعيطونج التكلفه بالضبط بس لاتنسين تحطين زياده انكيس زادت المصاريف...
تروحون وتردون بالسلامه...

 

[laura mercier]

حبيبتي بتسافرين وتاكلين من مكدونالد وستار بوكس وتردين من غير كيس واحد ...اتكفيك 2000 دينار

 

[MisS^gFf]

اهلين حبوبه انا الصيف اللى طاف رحت النمسا والمانيا وايطاليا بس رحت مع اهلي كلنا 6 اشخاص التذاكر كلفتنا 1600 اعتقد لشخصين بكون 700 او اكثر شوي احنا اخذنا شقه بزل ام سي وفلاخو مناطق بالنمسا كلفتنا الليله 25 وكانت شقق حلوه ونظيفه اما المصرف عادي يعني احنا مورايحين نشتري بس نتمشي وناكل يعني الاكل بس لج انتي وريلج اذا من ماكدونالد الوجبه بدينارين ونص واذا تبين مطاعن وكافيهات لا توصل الكافيهات 40 يورو يعني 20 دينار احنا قعدنا عشرين يوم 5 تالاف مع التذاكر واحنا عايله كبيره اتوقع بتكلفكم 2000 اذا منتو شارين شي اما اذا تبون رحلات لايطاليا فمن النمسا لى ايطاليا بتاكسي يكلفج 100 دينار واكل ايطاليا مثل فينسيا اكل بمطعم كلفتنا 70 دينار يعني اذا انتي ناويه تاكلين بمطاعم راقيه وكشخه يكلف اما اذا تبين تمشي ورحلات وبس تاكلين من ماك ولا مطعم تركي يطلع زين السعر واذا تبين اي معلومات عن زل ام سي وفلاخو حاضر واسامي الفنادق وكل شي

 

[اشراقة الحياة]

الله ايسهلكم انشالله .........

بالنسبه حق الا سعار انا وريلي وبنتي تذاكر وسكن 1450

وايحه دولتين ..........وكان مصرفنا شامل السوق 3000 وشوي ....

بس انا بدعت بالسوق وين مكان فيه sale طرت عنده

بس تصدقين حلاة السفر اكون الواحد حاط مبلغ عدل علشان لا يقصر عليه هناك....

واحنا الله خير معانا 100 ولا 1000000000 نفس شي

 

[brettey]

من غير تذاكر بس مصرف من 2000 وطالع بس ماتسوي شي

 

[بسمه الم]

بدون تذااكر مصرف اكل و طلعاات وونااسه (2000)
وتشري واسوقه ( على حسب اللي تبينه )
يعني السفره كلهاا تقريبااا ( 4000-5000)

 

[om.3omar]

شكرا بنات


في بعد غيرهم

؟؟

 

[همسQ8]

يبلج 3000-4000 اذا بتسوقين وتستانسين
غيرى روحي المانيا او النمسا او اسبانيا ترى ارخص من ايطاليا

 

[omjasim]

يمكن حول 2000 للنمسا والمانيا وسويسرا وسويتس مو فنادق

 

[أم أحلى جود]

الحين الاسعار تغيرت بعد الازمه الماليه أتوقع صارت ارخص

 

[برميتا]

حبوبتي
المصرف أكل وتمشي ومواصلات تكفيكم 500 دينار
من غير مشترى طبعاً ويكون أكلكم كله fast food
وماله داعي تروحين مطاعم غالية بإيطاليا لأن البيتزا مالتهم اتينن
وماتسوى مطاعمهم الغالية تقطين فلوس ع الفاضي
وطول السفرة قزروها بيتزا وماكدونالدز وهالمطاعم
والمواصلات إذا بين مناطق روحو بالقطار وايد نظيف ومتطور

 

[om.3omar]

شكرا خواتي

 

[الشرقية]

يا حلوات انا ناوية اروح النمسا( فينا - زلمنسي - سالزبورق) ع السنة الياية 2500 تكفي

لمدة اسبوعين انا وريلي؟؟؟؟؟؟
اتوقع التذاكر والسكن 1600

المصرف ما يكفيني 900 مع السوق.؟؟؟؟؟؟؟؟؟؟؟؟؟؟؟؟؟

شرايكم ؟؟؟؟؟؟

 

[شرطيه حلوه]

انا قعدت بايطاليا أسبوع قطيت 2000 دينار أخذتلي جنطتين وشيله ماركه وجم شغله عاديه ورحت كذا منطقة بالقطار فيرونا وفينيسيا وكومو ولوغانو

 

[versace]

حبيبتي على حسب الديرة اللي بتروحين لها يعني انا رحت ألمانيا طبعا مافيها شي بس شريت صوايغ حق الاهل كلفتني 400 دينار لا وسلفت ريلي بعد اما اذا بتروحين باريس او ايطاليا اتوقع اكثر بوايد