تعلمت من امي ؟ وانتي امك شنو علمتك ؟

[حبيب قلبي]

خووووش موضوع الله يعطيكم العافيه انا علمتني التجارب امي توفت قبل لا اتزوج

 

[أم بندر~]

الله يرحم امويمتج يا حياتي
ويوفقج بحياتج مثل ما ساعدتي البنات

حبيبتي تكلمتي عن أشياء واااايد مهم

تسلمين عالموضوع العجييب

 

[zntoosha]

ما شاءالله الموضوع روعه
تسلم ايدينج والله يرحم امج ويغمد روحها الجنه
توني باول صفحه اقرى الموضوع كله باذن الله واشارككم بعدها

 

[حياة حقيقية]

تسلمين يالغلا ، الموضوع روعة والله يرحم امميمتج ويسكنها الجنة ،
أنا أمي علمتني ان الطفل لازم يتقمط يعني تلفي جسمه بالقماش وتربطيه بالخيط العريض بدون ماتضغطي بشدة عشان تتقوى عظام الطفل ولايصير جسمه رخو
وعلمتني ان السباحة لازم ضحى وماتنفع بالليل بسبب البرد
وضع الطفل عند الشمس في فترة الضحى لمدة عشر دقائق عشان يستفيد من فيتامين د اللي يقوي العظام
وايضا لفي تمرة بقطعة شاش بعد ازالة النوى وخلي الطفل يعضها فترة التسنين تخفف من الآلام اللثة
وضع عطر خفيف مخصص للأطفال بعد السباحة
وعلمتني ان الطفل ذا رضع من الرضاعة الصناعية راح يتعود عليها ويرفض يرضع من امه لان الرضاعة الصناعية اسهل لشفط الحليب وطول حلمتها افضل للطفل من الام عشان كذا لاتعطينه رضاعة صناعية الا في الشديد القوي
ودائما خلي اسفل فراش البيبي المصحف الشريف ليحفظه الله ويبعد عن الشياطين
وعلمتني مااترك البيبي في الغرفة لحاله وانا في مكان بعيد في البيت لان صرخاته وبكائه ممكن يسبب له افتاق
الله يحفظ ل أمي وأمهاتكم ويرحم من كانت عند الله بأوسع رحمته *

 

[#تولين#]

طيب شنو أفضل أنواع علب الرضعاات

 

[وحيدة امى]

لعيون العوبه

 

[.،:"$الـعـوبــــة$":،.]

علمتني أمي الغالية الله يحفظها لي أنو إذا البيبي عندو إمساك أدهن سفل بطنو بزيت زيتون
وللمغص زهر البابونج واليانسون كتير منيح
وأعود البيبي عالاكل من عمر أربع أو خمس شهور أبدأ أذوقه بإصبعي الأكل حتى يتعود من هو صغير
في كتير شغلات بس اتذكر برجع

حلوه معلومات الماما الله يطول بعمرها ،،

بانتظارك //
​

الصراحه الموضوع وووايد مفيد حق الغشيمات

الله يرحم امج واموااات المسلمين​

حياك الله ،،

والله يجزيك خير عالدعوه ،،
​

الله يرحم امج يالغاليه

وتسلمين كل اللي قلتيه هذااا الصح فعلا

الله يجزاااااااااااج خير حبيبتي


ولي عوده ان شالله

حياك الله بانتظارك ،،
​

يرحم الوالده يارب ويغمد روحها الجنة يارب

وجزاج الله خير يا قلبي

اللهم امين يارب وياك يالغاليه ،،
​

السلام عليكم و رحمة الله و بركاته
أسأل الله العظيم رب العرش العظيم أن يغفر لأمك و أمهات المسلمين جميعا
أكثر شيء أمي توصينا فيه ان أغلب ملابس الطفل أقطان
و بالشتا المخمل الخفيف و ممنوع الصوف و نعشيه امبجر
و ممنوع ياكل بعد الساعة 8 بالليل بس الحليب
و ما انخلي الخدامه تشيله على طول
تقول خلي الارض اتربيه و ما ينام ابحضنج و أنتي قاعده
وتحط عيالنا على صدورنا تقول احضنوهم
الله يحفظها لنا​

اي والله حلوه سالفه الارض تربيه ،

فعلا الحين عيالنا من حضن لضن حتى حزة النوم !

الله يحفظها لكم اللهم امين ،​

يسلموووووو

ولكمووووو ،،
​

الله يرحم امج وامي ويغفر لهم وجميع موتى المسلمين

امممم

لاتنسون الماي يابنات امي تقول الجاهل اذا مانعطا ماي تنقلب عيونه وخصوصا اللي مايتكلم ومايعرف

انتي احرصي تشربينه ماي بكل وقت

وطبعا اللي يعمر الشهور تحلينه بسكر نبات

صحححح احلى معلومه مع انها بسيطه ،،

يعطيك العافيه ،،​

يعطيج العافيه
احب المواضيع الي جذي

حبتك العافيه حياك الرحمن ،،
​

موضوعج يهبل وحيل مفيد يعطيج العافيه

حلت دنياك وحياك الله يالغلا ،،​

 

[om webas]

ماشاء الله موضوعج عجييييييب استفدت منة وايد مشكورة حبيبتي

 

[سكريمزا]

الله يرحم امج ويسكنها الفردوس الاعلي
موضوع جدا مفيد وجزاج الله خيررررر

 

[اريج الجوري]

الله يعطيج العافيه على هالموضوع الحلو اغلب اللي قلتوهوتعلمته من امي الله يخليها لنا ويزول بعمرها يارب ،،،

تعلمت منها ان كل يوم المغرب أبخرة البيت بالجاوني وكسرة مره وكسرة علج البان ،،،

وان الجاوني الأحمر والأبيض أحسن من الاسود لان الاسود معطر ،،،

وتعلمت منها أني أحط زيت زيتون على سر البيبي لين يطيح وان طاح احطه بجيس واقطه بالزباله عزكم الله لان غير هالكلام خرابيط ،،،

وتعلمت أني امهد البيبي لين يكمل 4 اشهر على الاقل ،،،

وان الطفل لازم يشرب ماي بحت يعني ماي بدون اي اضافات من يوم ينولد واني اشربه الماي بقفشه مو مميه عشان ألماي يبلل حلجه وشفايفه ،،،

وتعلمت انه اول ما اشتري ملابس اقص اليبل اللي صوب الرقبه عشان ما يحك برقبته وتصير حمره ،،،

واني احني بناتي مره بالأسبوع وقت الظهر وبس بالصيف ،،، هذه للأسف ما اسويها لأني ما احب ريحة الحناء ،،،

والمفروض تظل الحنا ساعتين بالشعر وتكون معجونه من الليل وبعدين أغسل شعرهم بماي وانشفه وادهنه ساعتين بعد وعقب اغسله بشامبو ،،،

ولازم ليلة العيد احني ايدينهم الحنا العاديه مو النقش ،،، بس انا احط نقش عشان بالصالون أريح ،،، هع

واقص اطراف شعرهم مره بالشهر ،،،

والملابس الداخليه كلها قطن ،،،

وتعلمت شي يضحك بعد ،،، امي الله يطول بعمرها تشتري دائماً الدلاغات نفس الشي يعني لون واحد ونقشه وحده عشان اذا ضاع واحد تلبسينه مع الباجي

ما تقطينه ،،، تفكير اقتصادي هههههههه

وأسبح البيبي الضحى وبالدار مو الحمام ،،،

وما أعود الجاهل كله شايلينه او محطوط بالحضن او السرير اللي يهتز عشان ما يتعود وبعدين كله يبجي ،،،

واهم شي نفعني لما سويته وخواتي ما طاعوها وتاذوا مع عيالهم ،،،

الطفل من يكون بالاربعين عوديه ينام والليت مفتوح والتلفزيون شغال وعادي الدار فيها ناس يعني لا تسوين له جو هدوء عشان ينام لانه بعدين يتعلم على

الهدوء ويصير عسر بالنوم ونومه خفيف وياذيج ،،،

وبعد لاتهزون البيبي عشان ينام مو زين ،،،

ودايم كانت تقول لنا شيلو عيالكم ولموهم وكلموهم بهدوء في اذونهم من ينولدون عشان يعرفونكم ويحنون عليكم ،،، طولت قرقه ،،، ههههههه

والله يعطيها الصحه والعافيه ويرزقها الفردوس الاعلى يارب ،،،

واللهم ارحم ام العوبه وجميع موتى المسلمين وارزقهم الفردوس الاعلى يارب ،،،

تحياتي ...

 

[اريج الجوري]

اي بعد شغله تعرفون الخيط مال المهاده مو يكون فيه بالنص قطعه مربعه هذه القطعه امي تحطها من ورى مو جدام يعني على ظهر الجاهل مو صدره

تقول جذي يتقوى ظهره وما يقمت على نفسه ،،،

ولازم عقب ما تمهده تص ايدينها مع بعض جنها بتصفق وبعدين تحطهم على صدر البيبي وعقبها تفتحهم وتكمل تمسح على باجي الجسم من جدام

من صوب الصدر لي رجوله ،،،

بتقولون ليش ؟؟؟

بقول الله وامي اعلم ،،،

هههههههه

 

[خفايا الروح93]

جزاك الله خير
الله يغفر لأمك ويرحمها ،،
ماني متزوجة بس بيتنا ماشالله مليان بعيال أخواني الله يحفظهم وفعلا أستفدت من المعلومات وإن شاءالله يستفيدوا منها زوجات أخواني
ويارب يرزقني بالزوج الصالح والذرية الطيبة وأطبق النصايح :yaaaaaarb:​

 

[السيدةالانيقة]

الله يجزاك خيرا علي المعلومات
ويغفر لأمك ويجعل مثواه الفردوس الاعلي وجميع موتي المسلمين تأكدي أنها الحين تاخذ أجر هالمعلومات الي ذكرتيها ولج منها نصيب في حديث عن الرسول صلي الله علية وسلم <من تعلم علمااا فكتمة لجم بلجام من نار > الله يكفينا وإياكم شر النار
والله يجعلة بميزان أعمالج وكل وحدة مرة وعطت من معلوماتها الله يجزاها خير الجزاء إن شاء الله​

 

[لحظة اشراق]

الله يعطيكم العافية ويجزاكم خير على هالمعلومات الحلوة​

ويجراج ياصاحبة الموضوع الجنة ويرحم امج ان شاءالله​

انا ماعندي عيال بس ان شاءالله اذا الله رزقني اكيد راح استفيد من هالمعلومات الحلوة​

ادعولي الله يرزقني بالذرية الصالحة​

 

[أم حورية]

ماشالله موضوع روووعة

خصوصا اني توني والدة مع ان مو اول ياهل بس حييل استفدت

جزاج الله خير وعسى الله يرحم امج ويغمد روحا الجنة

 

[الفدنه]

جزاج الله خير ع الموضوع
والله يرحم امج ويغمد روحها الجنه


عودتني امي نشرب منقوع العلج لبان بالاربعين ونشرب البيبي
حق الغازات والهوا والمغص وحق النفخه
علمتني ان كثرة الادويه مالت النفاس تضر ماتنفع
وكل شي باعتدال حلو
وان الحلبه مو زينه للمره اكثر من اسبوعين
ولازم البيبي يوميا تتهوي منطقه الحفاظه عنده وتخلينه بسروال قطن
ع الاقل لو 10 دقايق
واني ما اخلي البيبي يبجي وسرته رطبه
واذا خلاص صارت زينه اخليه يبجي شوي عشان يقوي الرئه ويوسع المعده
واذا كان البيبي حنان ويصارخ او معاه أنساك ويتعصر
تحط امي خمسين فلس او ميه بحزام السره اللي ينباع بالصيدليه وتلف بطن البيبي من صوب السر
عشان لا تنقز سرته بره ولا يصير معاه فتاق او بعج لا سمح الله
واذا تذكرت شي برجع لكم

 

[حورية آلكويت]

الله يرحم امج وجميع اموات المسلمين

ومشكوووووووووووره على النصايح المفيده

 

[.:lady bug :.]

الله يرحم امج واموات المسلمين
كل الي بقوله كتبوه البنات
وتسلم ايدج ع الموضوع التحفه

 

[:: Diva ::]

التطهير يكون بأبجر وقت ممكن
و الاذن حق البنيه قبل لا تطلع من المستشفى يقضونها للترجيات
و نلف بطن البيبي بشيله قطن علشان نحميه من البرد و الاسهال و الالم



غاز بامبي لغازات البيبي
و ماي غريب

 

[كوسا]

امي تقول المريسة زين ومفيدةواعطيه الظهر واحط على السرة والتطهيرزيت زيتون دافئ واحط حق الجروح الاحمر احنا نسميه تنتريون

مدري انتم وش تسمونه والصفار سكر نبات ومويه شمس الصباح يوميا والتسبح يوميا في الضحى وبعد عندتغير الحفاض تمسحين

بالمسحة الطبية السرة لانها تعقمها والتهاب الحفاض تذوبين شحم الغنم احنا نسميه ودك بوحدة بوحدة زينه للصغار والكبار

والمهاد مرة زين علشان ينوم لانه يقوي ولازم ترضعينه وتلعبينه علشان يدوخ وينام واذا جاه الشهاق خليه بالارض لانه اعضاءة

تكبر ولازم تكلمونهم وتحضنونهم وعند لبس الحفاض لاتضغطون على جسمه مرة خليها عاديه واذا في انسداد في الانف او وجع

في العين تقطرين عليها من صدرك وتوضين طفلك بالماء انظف ودحسين الطفل مرتاح افضل من ا نك تمسحينه بالمسحات

وتواسين راسه زين والي راس طفلها مايل يقولون رفله ولازم ترضعين الطفل وتغيرينه في الفجر

الله يعطيك العافيه ويرزقك الجنان يارب