تعـــــالي قولي لنا شنو أغرب وأغبى هدية وصلتج بالنفاس :)

[*مطبخ الذواقة*]

أول موقف أتذكره رفيجتي تجهز لمولودها بالسوق

نقصت عليها الفلوس 20 دينار تقريبا خذتها من رفيجتها اللي كانت معاها

وانشغلت رفيجتي بالولادة بعد الولادة زارتها رفيجتها وحطت بمهاد البيبي ظرف

فتحتها رفيجتي والا تلاقي...





















ورقة مكتوب عليها

(العشرين اللي سلفتج اياها بالسوق ) !!!
















الموقف الثاني مع نفس البنت

مرت أخوها تحط لها ورقة بمهاد البيبي وتقول فيها

(أخوج الجعص ما عطاني شي أجاملج فيه ))

مع العلم انها موظفة ومعاشها لها!!


عجاااااايب

 

[ام محمد @الغالي]

اي والله خوش موضوع اذكر لما ولدت زاروني عمات زوجي و كلهم بهدية وحده كانت كرسي و لا يمكن اذا كنت احط ولدي عليه چان حايشه دسك بظهره و الهديه الثانية كانت من خالة زوجي والله لي اليوم و انا اضحك تدرون شنو مفرش سرير بو نفر لونه وردي و الهدية الثالثة علبة شموع ما ادري ليش ترشيد مثلا و الهدية الرابعه كانت قميص نوم مقاس xxxxxxl ليش ما ادري حسستني اني فيل الحمد لله ان كل الهداية هذي من اهل زوجي مو من اهلي *

 

[_زينه_]

ماجاني الا الزين الحمدلله

 

[أم معاذ الكندري]

لوووووووول
ليلحين ماجربت هدايا النفاس بس جربت هدايه اول زواجي
وكلهم حلوين وراقين واغلبهم فلوس
الله يستر من هدايه النفاس لووووووول
اب
اب
اب

 

[غلاتي غلا]

الحمدالله ماجتني هدايا تفشل
كلهم فلوس وكلهم مشكوريييين وماقصرو

 

[ام فهود وشهود]

امبيه ذكرتيني بوحدة هههههههههههههههه
والله عطتني هدية ظرف وهالله هالله شحلاته
ولا داخله 5 دناانير ??
اقسسم بالله صدمة خخخخخخخخ

 

[توحه1]

تحسين باذنج تصفر ودنياتفر لمن تكونين مقدره وحده والده قبلج باربع شهور ومعطيتها خمسين دينار ومجهزه معاها تقديم البيبي الكاكاوبالمقابل اهي زايرتج المستشفى ويايبتلج حلو كيلوه بو ١٠ دنانيروحاطتلج ظرف فيه 5. دنانير

 

[meen_ana]

اغرب هديه وحدة يابت لي بولادتي ببنتى جوتي حق بنت عمرها سنه ونص يعني كان حيل كبير ومو ذاك الزود شكله

 

[أم معاذ الكندري]

لا لا من صجكم يحطون لكم ٥ دنانير
لوووووووووووووووول

 

[حبيبة عز]

بالنسبة لي جتني خوش هدايا الحمد لله

فلوس وذهب وأغراض بيبي وبودي شوب

بس أنا ماحب هدايا الفلوس لأنها تروح وماحس بقيمتها المعنويه

بس أغرب شي أن 3 من رفيجاتي صادف أنهم هدوني 3 كراسي للبيبي من مذركير​

 

[Koka_alotaibi]

الصراحه بعض المواقف عجييييييبه
وان شاء الله الفال لي اقولكم المواقف ههههههههههه
دعواتكم (((((

 

[بنتي شبيهتي]

هههههه انا اتذكر هديه عرسي من وحده من بعيد كانت هديتها عطر ولوشن وحمره وشباصه شنو انا ياهل يايبتلي شباصه هع

 

[أم عزيـز]

لووووووووووووول والله انا عندي يعطون هديه ابرك من 5 دنانير
لان فشله اعطي وحده 5 دنانير حتى لو ما عندي وميزانيتي على قدي اشتري شي ب5 ولا اعطي الفلوس

انا اذكر وحده من جارات امي الله يهداها يايبه هديه حق مرت اخوي بطانية حق البيبي لونها وردي !!
مع العلم انها تدري ان مرت اخوي يايبه ولد !!

بس الحمدالله انا ما ياني شي غريب اغلب الهدايا فلوس او هدايا للبيبي

 

[أأأميرة الورد]

الحمد الله كل اللي جاني فلووووس

وهدايا حلوه

 

[أأأميرة الورد]

أتوقع مجتمعنا الكويتي الحمد الله انعم الله علينا فلوس ومعاشات وخييييير


يمكن نادرا مانشووووف هدايا غريبه

 

[*مطبخ الذواقة*]

والله صاجه بس مرات تصير هالمقالب ...

 

[سيده نفسي]

احنا طريقتنه بالعايله نحط حطيه ووحده من خالاتي ولا بناتهم

تمسكها وتغلفها فلما ولدت صارت حطتي 800 دينار وامسكتها

خالتي الي انا معاها ربع ويابتها لي للاسف بطريقه خايسه جنه

معطيه معاش خدامتها بجيس صغير وفيها ورقه صفره مالت المكاتيب

ومشخبطه ومكتوب فيها الاسامي فانصدمت بالطريقه واي بعد يايبتها

بعز القايله فصج غريبه الطريقه مو من عوايدنا

وتذكرت هديه زواجي خالتي ام ريلي اهدتني نقاااااب

 

[روح الأحزان]

هههه حلوة سالفة النقاب

الحمد لله كل اللي يوني ماقصروا سواء يابو هدايا او لا بس اغرب هدية يتلي كانت كفالة يتيم ووايد استانست منها

 

[ايمان80]

حتي انا مايتني هدية غبية ولاغريبة

كثر الله خيرهم كفو ووفو فلوس وهدايا حلوة وذهب حق بنتي

 

[جـــواهر]

لاتضحكووون ع ال 5 وحده تعرعفهم قالتلي حمدي ربح 5 لانج جايبه ولد


ترااا لو جايبه بنت عطتج دينارين ونص


@@

نعم !!!



عجااااايب