%%((تعالي وعطينا رايج بكشخة المدرسات المبالغ فيها بالمدارس))%%

[البيداء_77]

السلام عليكم ............


حبيباتي وليات الامر عندي موضوع لافت انتباهي وبما انه احنا بهالمنتدى العزيز نناقش السلبيات والايجابيات في مجتمعنا ونحاول نحلها فهالشي شجعني اني اطرح هالموضوع .....



اولا انا مدرسة وولية امر يعني من الناحيتين بس اليوم بتكلم كولية امر ..............


كشـــــــــــــــــــــــــــــــــــخة المدرســــــــــــــــــــــــــــــــــــــــــــــــــــات


بصراحة انا شايفة انه مبالغ فيها هالكبة الي شكبرها والجنز السكني اللي ما ادري شلون تمشي فية وغير اللي تكون مو متحجبة وهالصبغات ولاااااااااا اللي يعجبني بف شكبره من صباح الله خير شدعوه عليج انتي رايحة المدرسة ولا الافنيوز؟؟؟
اما المتحجبات العبي المصرصره والشباصة اللي تافخة حجابها ومسويتلها راس غير راسها ؟؟؟؟

اما المكياج فحدث ولا حرج ............. شالسالفة بنات الكويت ليش المبالغة جذي؟؟ الكشخة لها وقتها والعملي له وقته لا ويزيدون الجيلة بحفلات التخرج ويوم اجتماع اولياء الامور ؟؟؟


يا بنات يا حبيباتي الكشخة الزايدة شي مو حظاري انتو لو تشوفون الدول المتحضره الحريم عندهم مو متحجبين بس ما يبالغون بالكشخة جذي بالعكس تلقين الوحده بسيييييييطه ورافعة شعرها وفلات او جوتي رياضة اما الكشخة الزايدة والالوان والتلطخ والتصرصر حق ناس معينين عندهم( .....)

المدرسة مكان راقي ولازم نرتقي واحنا فية ونحافظ على شكلنا وتصرفاتنا


طبعا اللي انا اتكلم عنهم مو كل المدرسات بالعكس الاغلبية الحمدالله راقين بشكلهم وتصرفهم


فاللي عندها تعليق تدلي بدلوها دون تعصب :tek:​

 

[البيداء_77]

بنات شالسالفة ليش ماكو تعليق ؟؟ ما عجبكم الموضوع ولا تعتقدون اني بالغت؟؟؟؟

 

[البيداء_77]

16 دخول للموضوع ولا وحده علقت ؟؟ علقي حتى لو عندج اعتراض

 

[فطووومة]

حبيبتي انت قلتي المعلمات وبعدين بنات الكويت يعني عممتي واخر سطر قلتي ان مو كلهم

انا مو معاج الصراحة كل اللي تقولينه في كل الوظايف مو المعلمات بس ولا كل المعلمات يسوون جذي

والظاهر كل اللي دشوا مو عاجبهم الموضوع .

 

[البيداء_77]

حبيبتي انت قلتي المعلمات وبعدين بنات الكويت يعني عممتي واخر سطر قلتي ان مو كلهم

انا مو معاج الصراحة كل اللي تقولينه في كل الوظايف مو المعلمات بس ولا كل المعلمات يسوون جذي

والظاهر كل اللي دشوا مو عاجبهم الموضوع .

انا ادري انه كل مكان فية تكشخ ومبالغة بس المعلمة وضعها غير لازم تكون اكثر حشمة لانها قدوه للاطفال الي تدرسهم:eh_s(6):

 

[لوكريسيا]

في مدرسات جذي و في جذي ... صح ساعات اشوف مدرسات مبالغين باللبس و الميك اب .. و البعض لا و الله بسيطين بلبسهم و بمكياجهم و بعضهم ما يحطون مكياج اساسا .. و احس ان المبالغة مو بصالحهم كلش .. اليهال يتطنزون .. تخاف تخترب كشختها وينها وين التدريس

 

[candeya]

انا مدرسه بس بتكلم عن الموضوع انتي صاجه اول شي التدريس يبيله شي عملي حق الحركه او بعدين التعليم يوصيل رساله وابهالطريقه ابتلفت انتباه الياهل او بالتالي بحس انى ماكو قيمه بس كشخه او كل يوم طله انا اذكر كنت ادرس اصبيان والله لا يواريكم اللي يقول حق الابله اللي معاي انا بشتريله كعب او مكياج كانو وايد معجبين فيني واللي يحطلي اورقه على باب سيارتي او شفت العجايب بس الحين هداني ربي او ماكو عل عالبايه واللفه العاديه واللهم اادي الامانه او خلاص لا مكياج ولا هم يحزنون المهم شي امرتب ان كان في مناسبه او اجتماع انا هذا لبسي ابكل حالاتي في المدرسه واحسه افضل

 

[فطووومة]

المبالغة مو زينة طبعا وحتى التطنز موجود عند اليهال وعند كل الطلبة وعن المحتشمة وعن غيرها


وترى ارضاء الناس غاية لا تدرك

 

[لوكريسيا]

أوكي .. كل شي بالمعقول .. يعني لا مبالغة وايد و لا مهتملة .. خير الأمور الوسط

 

[بشوشه]

سامحيني بقول رايي بس جد سامحيني

انا مو مدرسه بس اختي مدرسه و تمووووووووووت بالكشخه اهي جذي طبعها و بريستيجها
انزين شنو تسوي ليش تحرم نفسها اذا ما راح تظر احد و بحدود الذوق العام
يعني نفس تاللي تلبسه بره مع الاختلاط راح تلبسه بالدوام مع الحريم شنو الفرق؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

 

[بشوشه]

ترى يعني المدرسه لها حق تهتم بنفسها مثل اي موضفه بوزاره او بنك او شركه وحتى الطالبت يبون شي يفتح النفس على الصبح عشان يحسون ان هالمدرسه نفس امي او خالتي او اختي (لانها مو شرطيه تلبس يونيفورم)
انتي شنو رايج خل نتناقش حبي

 

[البيداء_77]

ترى يعني المدرسه لها حق تهتم بنفسها مثل اي موضفه بوزاره او بنك او شركه وحتى الطالبت يبون شي يفتح النفس على الصبح عشان يحسون ان هالمدرسه نفس امي او خالتي او اختي (لانها مو شرطيه تلبس يونيفورم)
انتي شنو رايج خل نتناقش حبي

يا حبيبتي ليش ازعل من رايج وانا ابي اللي يناقشني هذا رايج وانا احترمة .....


بس في فرق بين الاهتمام بالمظهر وبين المبالغة بالكشخة في مدرسات من صباح الله خير ياية المدرسة وجنة عندها حفله فهمتي علي؟؟ يعني اووووووووووووفر حتى لدرجة تشتت انتباه الطلبة انا ما اقصد انة المعلمة ما تلبس عدل ولا تحط كحلة ولا حمره لكن بالمعقووووووووووووووووووووووووووووول انشاء الله تكون اوصلتج وجهه نظري

* تم تعديل الرد بواسطة المشرفه حلم الطفولة *

 

[البيداء_77]

انا يوم كنت ادرس الصبيان اجتمعت فيها ناظرتنا وقالت يا معلمات اتقوا الله في نفسكم وفي الصبيان اللي تدرسونهم لانهم يفهمون والله كنت والله انهم يعكانو يعلقون على ازياء المعلمات

 

[رفرف]

مادري يمكن انا مالاحظت هشي في دوامي .احس الكلام مبالغ فيه او يمكن انتو المدرسات اللي عندكم لهم خلق ..

احنا اغلبهم متزوجات وامهات ويقومون من فير الله مو فاضين حق زود تكشخ ..

والكل لبسه عادي والمكياج طقة وطقة يوم اي يوم لا بس مو مكياج مكياج يعني حتى اللي تحط تحط شي سريع وناعم كلش كلش مو مبالغ فيه كحل وحمرة او قلوس يعني مو الوان واوفر ..
والاغلبية عباية او مانتو او جينز وقميص طويل وفلات او تكرمون جوتي رياضة يعني شي اقل من العادي حتى ..

قاعدة اعصر مخي ابي اتذكر اذا في مدرسة عندنا تكشخ اوفر او حتى كشخة عادية بس تتسمى كشخة .. مالقيت والله .. كله عملي وعادي ..

 

[@ فدك @]

والله عدل كلامج يا قلبي

ولو تروحين المدرسه بيوم عادي يعني لا اجتماع ولا حفله تلاقين المدرسه اكثر من عاديه ويوم اجتماع الامهات تلاقينها تحورف بعمرها وترزز بهالجينز ولا الميعه مع اولياء الامور ولو تييها ولية امر وتهزئها تتكلم بشكل طبيعي

وعلي قولتج والله انا بنتي برابعه ابتدائي قسما بلله كل يوم تقولي يمااا تعالي شوفي ابله الرياضيات شلابسه ولا يماااا مكياج ابلة الانجليزي يهبل ولا ويييع يمااااا هذي لبسها يلوع الجبد

بالذمه هذيلا كفوو يدرسون عيالنا بس اشرها مو على الابلات على ادارة المدرسه والناظره على راسهم ..

وجان زين بعد يدرسون مثل الاوادم ولا اخلاقهم حلوه بعد

ما اقول الا الله يعين عيبالنا



ومشكوره حبوبه على هالموضوع الطيب

 

[البيداء_77]

مادري يمكن انا مالاحظت هشي في دوامي .احس الكلام مبالغ فيه او يمكن انتو المدرسات اللي عندكم لهم خلق ..

احنا اغلبهم متزوجات وامهات ويقومون من فير الله مو فاضين حق زود تكشخ ..

والكل لبسه عادي والمكياج طقة وطقة يوم اي يوم لا بس مو مكياج مكياج يعني حتى اللي تحط تحط شي سريع وناعم كلش كلش مو مبالغ فيه كحل وحمرة او قلوس يعني مو الوان واوفر ..
والاغلبية عباية او مانتو او جينز وقميص طويل وفلات او تكرمون جوتي رياضة يعني شي اقل من العادي حتى ..

قاعدة اعصر مخي ابي اتذكر اذا في مدرسة عندنا تكشخ اوفر او حتى كشخة عادية بس تتسمى كشخة .. مالقيت والله .. كله عملي وعادي ..

يحليلهم الظاهر اللي عندكم سنعين


عموما احترم رايج :tek:

 

[البيداء_77]

والله عدل كلامج يا قلبي

ولو تروحين المدرسه بيوم عادي يعني لا اجتماع ولا حفله تلاقين المدرسه اكثر من عاديه ويوم اجتماع الامهات تلاقينها تحورف بعمرها وترزز بهالجينز ولا الميعه مع اولياء الامور ولو تييها ولية امر وتهزئها تتكلم بشكل طبيعي

وعلي قولتج والله انا بنتي برابعه ابتدائي قسما بلله كل يوم تقولي يمااا تعالي شوفي ابله الرياضيات شلابسه ولا يماااا مكياج ابلة الانجليزي يهبل ولا ويييع يمااااا هذي لبسها يلوع الجبد

بالذمه هذيلا كفوو يدرسون عيالنا بس اشرها مو على الابلات على ادارة المدرسه والناظره على راسهم ..

وجان زين بعد يدرسون مثل الاوادم ولا اخلاقهم حلوه بعد

ما اقول الا الله يعين عيبالنا



ومشكوره حبوبه على هالموضوع الطيب

شكلج حدج منغثة منهم :dddds:


حياج الله فدك واسعدني مرورج

 

[Mazyoona]

امممم هههههههه ذكرتووني بسالفه
بنت خالتي بثالثه بالابتداائي شااافت ابلتها
حااطه مكيااج هه جان تقوول حق
الابله ابله جنج اللي بالمجله بالصالون
و الابله عاقبتها و قالتلها ما يخصج
بس طبعاً خالتي ما قصرت

 

[مزايا الصمت]

انا وياج بكل اللي قلتيه يعني نشوف عندنا بالكويت مايفرقون بين المكياج المسائي والصباحي .. تشوفينها الصبح اووفر جنها بعرس وتنسى انه مكان عمل .. انا ولية امر بصراحة اشمئز من بعض المدرسات وطريقة لبسهم ومكياجهم .... ترى حلوه البساطه في كل شي وكثرة المكياج مودليل اني سنعه واهتم بنفسي بالعكس ؟ ولو تلاحظون المدارس صارت جنها العروس والعزايم صارت فيه انواع التحدى منو احسن لبس والا اكشخ عبايه وكل وحده تقول الزود عندي ... ومايدرون انهم بهالشغله يؤثرون على بعض المدرسات اللي من النوع المحافظ او اللي تحب البساطه فتشوفونها تجاريهم وتقلدهم بطريقة الللبس بس عشان مايحطون عليها

كل مكان وكل زمان له لبسه ومكياجه .... وماننسى انه مكان حاله حال اي جهة يدخلها او يراجعها الرجال فلازم نراعي هالشي

المره حلوه باحتشامها وبساطتها
هذا رأيي واتمنى انه مايزعل احد

 

[حلم الطفولة]

الموضوع مهم وحلو فأرجو من الكل ان تكون الردود في حدود الاحترام

بالنسبه لرايي في هالموضوع انه ماعاد يخص بس المدرسات .. أظن ان احنا نظلمهم اذا تكلمنا بس عنهم ..
الحين ياخواتي حتى لما نروح للجمعيه نشوف بنات وحريم الله يصلحهم تقولون داخلين عرس مو جمعيه ..

أكو حضاره يديه دخيله عالمجتمع قاعده تأثر عالذوق العام .. واهنيه ياجماعه يكون دورنا كأمهات .. نبني ثقافة بناتنا الذوقيه في الملابس وأي المناسبات اللي تليق فيها هالأمور وأيهي اللي تحتاج العملي ..

بنات الحين لما نروح العروس نشوف أشكال غريبه .. من الفضاء الله يصلحهم ..
احنا استنكارنا عالمدرسات إنهم في مؤسسه تربويه وقدوه للعيال , لكن مانقدر نعزل المدرسات عن المجتمع ككل واللي قاعده تصير فيه هالأمور كأنها شي عادي بالتدريج..
الأمر يبيله حمله تربويه , تثقيفيه لعيالنا .. لا للمبالغه في المكياج .. لا للبف .. نعم للبس المناسب في المكان المناسب.