لو ماعنالي صاحبي بأعنيله
بقطع على شانه طوال المسافات
مانيب ادور فالبدايل بديله
وماهو يسمع في حاسد وشمات
لاطاح من جور الزمن ارتكيله
ارسم على مبدا مطيحه نهايات
صاحبه انا وشلون محتال اشيله
وانا وحيد وقاهرن لي عصابات
عباده الشهره هواه الكحيله
اللي ضمايرهم بشلقه ريالات
اكتب على ايدين الزمان البخيله
ان البخل؟ ماهو بشح الكرامات
البخل ؟ حرمان اليدين الطويله
من كسبه الافعال في عصر الاصوات
ايست من هذا الزمان وحصيله
لاني تعبت اثور واستبشر الآت
الماضيات من الليال الهزيله
لايمكن انها تصنع المستجدات
تمويت الاحياء فالعيون الذليله؟
صدقني انه مثل تمويت الاموات
لو يرفعك وقت الرخا والرذيله
سبع الاراضي تحت سبع السموات
حنا خلقنا للرذيله فضيله
نصلح أغلط الزمن بـ ابتسامات
اليا تجملنا خذينا الاصيله
واليا ابتلينا بالخطأ ؟ نصبح آفات
رجالنا يسوى لحاله .. قبيله
أستغفر الله لو بقول اننا آيات
ان كانت أغلاطي بعمري قليله؟
مجرد ان أكلمك عشر غلطات
حرام بك صرف الحروف الجزيله
وحلال في من خصني له وبالذات
اللي معايير الحلا .. تنحني له
عليه من ملح الطفوله علامات
في نظرتي كل الوجيه الجميله ؟
مخلوقه اتسوي لوجهه دعايات
ملامحه من غير حكي .. اتحكيله
تفرض على اللي تقوله وبسكات
لو قالت أن الدايره مستطيله
قلت الدواير كلها مستطيلات
يـ أخاذ لبات العقول الثقيله
أخذتني كلي ولا قلت لك .. هات
ليه أرتجي عطفك وليه أشتكيله
والهات ؟ في قاموس عشرتك هيهات
حببتني قربك .. وذاب اتعبي له
في جمر عقبه بعد عقبه وعقبات
ختمت قلبي عن عشاشيق جيله
ختم المصلي بالدعا والتحيات
الين جت ليله عن ألفين ليله
وصارت حكايه غير كل الحكايات
ذوبتني بين الدماث النحيله
وعلمتني فن الرسم والقياسات
وفجاه كذا بار الخليل بخليله
كله لعين مجمعين العلاقات
شحيت بي دمع الرموش الظليله
ووقفتني بين الامل والمحاتات
وجدي على قلبي وياعزتي له
دقات تيس به وتمله .. دقات
ينشد لك حيله .. وينهد حيله
الحزن خطوه والغرابيل خطوات
اذا الامل ؟ رمز القلوب النبيله
أنا مئيس منك .. في كل الاوقات
أن كان شوفه غرتك مستحيله
أكيد لمسك .. من سابع المستحلات
