تعالو امشوا معاي خطوه بخطوه مع ريلي واستفيدو البنت والمتزوجه والمقبله على الزواج

[3tebeya]

بالعكس انا مرتاحه ومستانسه وهالشي يسعده
الشباب مو مخلين احد بحاله انا معاه ما اسلم منهم فما بالكم بروحي

 

[HUSH~]

حبيت أسلوبج انج تتحجين بعفوية وشفافية
وتساعدين غيرج وبنات الموقف اللي مايعجبج تغاضي عنه مو شرط تطبقينه
واتوقع اختي الي فوق كتبت لج انه ممكن أحد من اهلج يعرفج من قصتج فهل هذا الشي عادي عندج وله ؟! المهم انا مايخصني لولل
وع طاري البنات اللي يلحقونن الشباب امس داشه جيليز باخذ تيك آوي
وع طرف كانو قاعدين ريال ومرته ، أول مادشيت كان اهوا مجابلني واهي عاطيتني ظهرها وانا المسيجينة ماشيه بحال سبيلي طلبت وقعدت انطر وعاطيتهم ثنينهم ظهري ويابولي اوردري وشلته وافتريت عشان بمشي جان المحها مغيره مكانها
يعني صارت اهي مجابلتني واهوا عاطني ظهره . .

ماستغربت من حركتهااا بس مالقيت لها تفسير .
لاني كنت بعباة وحاشمة نفسي وماشية بحال سبيلي .!

 

[Ro7_alwfa]

يعطيج العافيه حبيبتي ، وشي جميل معطتنا من وقتج وفاتحه لنا قلبج وترشدينا

فعلا موضوعج شي مختلف عن المواضيع اللي نقرأها او المشاكل اللي نجيبها حق نفسنا

وكل بارت فيه عظه وخبره ولاشك بان خبرتج ناتجه من تربيه أهلج واستقرارج السليم مابين امج وأبوج

ردات فعلج حلوه وإعطيها ١٠٠ بالميه لو أرجع واشوف بنص مشاكل الزوجيه هو الغباء وعدم التصرف الصحيح في مثل هال مواقف

يعني ودي أعلق بكل بارت بس اترك تعبيري للبرتات الجايه

واللي دفعني أسجل ف هالمنتدى هالموضوع الحلوو استمري حبيبتي واحنا بنتظارج الله يديم المحبه من بينكم ويحفظ لج بنوتج

 

[مني يغارون]

Hush في حريم يغارون من ظلهم تغار حتى وانتي مو يمها اصلاً اسأليني انا ياما شفت مواقف وعلى نياتي بعدين انصدم من التفكير الخايس مع اني الحمدلله عايشه ببيئه محافظه ومالنا احتكاك حتى بولد العم والخال بس نو كومنت صراحه

 

[3tebeya]

لان هالنوع من الحريم فيها خلل بتوازنها وذاتها .. ولان ما عندها ثقه بريلها وبنفسها ..
انا ريلي مو من النوع اللي يتلفتت ويخزز يمين ويسار البنات استغفرالله تشوفه ما يطالع غير زوجته ومحد بعينه يعز بعينها وتسوي حركات بس عشان يطالعها واهي ترقمه طبعا مو الكل قله قليله .. طبعا غير الكلام اللي اسمعه شوفي منقية تنقيه شوفي اثنينهم حلوين يا حظها .. يا هب يا حظها هي مزيونه وهي خشف طبعا البدويات يا كبر حظها واي واي شي يغث ولا اذا شال عني الاغراض يصير خروف بنظرهم .. ويعه على طاري الخروف صارلي موقف بسبة كلمة خروف بكتبه لكم تالي
واللي يحر اكثر بنات الكليه وييييييييييع بصراحه بصراحه قليلات ادب ومو شايفين ريايل الا من رحم ربي قلة ادب وعيون زايغه وقلة تربيه بعد

نوافيكم بعد شوي لان باااااااااااجر ما عندي دوام ههههههياااا

 

[3tebeya]

لان هالنوع من الحريم فيها خلل بتوازنها وذاتها .. ولان ما عندها ثقه بريلها وبنفسها ..
انا ريلي مو من النوع اللي يتلفتت ويخزز يمين ويسار البنات استغفرالله تشوفه ما يطالع غير زوجته ومحد بعينه يعز بعينها وتسوي حركات بس عشان يطالعها واهي ترقمه طبعا مو الكل قله قليله .. طبعا غير الكلام اللي اسمعه شوفي منقية تنقيه شوفي اثنينهم حلوين يا حظها .. يا هب يا حظها هي مزيونه وهي خشف طبعا البدويات يا كبر حظها واي واي شي يغث ولا اذا شال عني الاغراض يصير خروف بنظرهم .. ويعه على طاري الخروف صارلي موقف بسبة كلمة خروف بكتبه لكم تالي
واللي يحر اكثر بنات الكليه وييييييييييع بصراحه بصراحه قليلات ادب ومو شايفين ريايل الا من رحم ربي قلة ادب وعيون زايغه وقلة تربيه بعد

نوافيكم بعد شوي لان باااااااااااجر ما عندي دوام ههههههياااا

 

[mona q8]

ماشاء الله عليكم
والله دعيت ربي من قلبي يخليكم لبعض طول العمر ولا يفرقكم
ولايتغير طبعه معاج
لاني احب اشوف اثنين مرتاحين بحياتهم
احس اني انا المرتاحه والمستانسه
والله راضي عليج
ورضى امج وام زوجج بعد لانها بحسبة امج
وناطره تكملين قصتج
استفدت منج وايد خاصة اني ملجت ومقبله ع الزواج

 

[فروحته]

والله يا عتيبية انا بعد نفس معاناتج بس الفرق اني ادرس ثلاث ايام بالاسبوع
و امس و اليوم الدوام وايد اتعبني خاصة انه اول اسبوع
وباجر دوامي الساعة 8 الصبح قاعدة افكر شلون اقوم مبجر ههه
الله يعينا يا رب ترا ما قريت الصفحة الي قبل

برد بعد شوي للحين ما تغديت

 

[الجادل الخشف]

روعه استمري ناطره المزيدانا مشكلتي مشكله وللاسف لمن صارت مشاكل مع اهل زوجي قمت افك النت واتثقف وعرفت ان كل اسلوبي كان غلط في غلط بس عرفت متاخره لمن طاح الفاس بالراس الحمدلله زوجي يموت علي ومرتاحين بس علاقتي باهل زوجي مقطوعه وهالشي مضايق زوجي ودي اتواصل معاهم بس عشانه اهو مابي اكون مقصره باي اتجاهه ومقاطعتي مع اهله يعتبر تقصير من الزوجه وانا ابي اكون كامله بنظره وانشالله القي الوقت المناسب اردلهم بس امه رافضه ادش البيت ماتبيني اتهنا ويا زوجي وتدري اذا دشيت وردت العلاقات راح اكبر بعين زوجي واهي ماتبي هالشي
استمري ياعتيبيه والله يبعد عنج اهل السوء والحسودين

 

[ريـ’ـآنـهـ‘]

واااي الله يعييينج دوامج متعب

اشوا انا مضبطه جدولي اثنين واربعا بس من 8 الصبح لي 12 الظهر


وهم مثلج ماعندي دوااااام


عاااشووو ناطرين البااارت

 

[ليدي دانة]

الله يخليكم لبعض ويديم المحبه بينكم 00000

 

[Barbiea]

يلا وين التكمله ننطر الاحداث

انا بعد لما نطلع ونمشي ماسكين يد بعض يخزوووووونا


مره مرت وحده يمي وكنت ماسكه ريلي قالت وي شدعوه بيطير بس ريلي ماسمعها لان مرت من صوبي


بطت جببببببببدي,, كيفي انا حتى هو تعود اني امسك يده وانا امشي معاه

 

[3tebeya]

صباح الخير جميلاتي


بعد مرور يومين معتادين دوام بيت بيت دوام تقريبا بعد طلعتنا السينما بثلاث او اربع ايام ..
يت خالة ريلي ام السعلوه هههه سوري بس حدي كارهتها .. المهم
يت تبي تتهاوش معاي على حركتي مع بنتها سمعتها تصارخ على اختها الي اهي ام ريلي وشد الجدال بينهم .. جان تدزلي وحده من حمواتي لا تنزلين كلش ودقي على فلان خل اييي خالتي فيها شر عليج
جان اقولها مو مسويه شي غلط عشان اخاف وانا ادزلها اسمعها تصارخ
ام الطبول .. الساحره بنت الساحره اللي معروف اصلها .. على شنو شايفه نفسها جمالها هذا مو نافعها اعلمكم بسوالفها ولا ما تدرون تخيلووو انتو تطعن فيني وسمع اذوني مت من الحره دموعي اربع اربع احتريت انا تقول عني جذيه دقيت عليه وانا ميته من البجي قلتله شسمعت قالي نزلي وانا اعلمج فيها لمن يااا نزلت خليت بنتي عند مرت حماي

اول ما دخل اهو يطالعها بنظرات واهيا تصارخ باعلى صوتها يناديني جدامها وين حبيبتي ولمن نزلت عيوني حمر من الحره .. اهو من شافني جذيه لمني جدامهم
جان تقولي انتي هي من تكونين عشان ما تخلين بنتي اتييي معاكم .. انا سكت بالبدايه عشانه اهو بس هاذي ما تستحي .. للاسف جان اقولها بالعظم
انا شافني ويا خطبني ما كلمته ولا صارت بينا مكالمات ولا اتكشخ عشان الف نظر ريال على ذمته مره وانا بنت اصل وفصل ولو مو جذيه جان ما وافقتو تزوجوني ولدكم واذا سحوره فانتي ام السحوره مو انا .. وهذا ريلي انا وبنتج كانت جدامه ويشوفها ويعرفها لو يبيها خطبها بس شوفي بنتح بالاول بعدين طعني فيني وانا ماراح اسكتلج ولو تكونين منو انتي ماراح اسكت اتهمتيني زور وشهرتي فيني طبعا كله واهي تراددد .. ردت على خالتي راضيه عنها تغلط علي في بيتج جان تقول خالتي انتي ما قصرتي وانا عندي بنات وما راح ارضى بالغلط وهاذي شرف وعرض ولدي وحسبة بنتي ما ارضى عليها ..

اهو طبعا اول مره اشوف ساكت .. كان في قمة البرود .. قالها دموعها غاليه علي .. دامج بجيتيها وخليتي دمعتها تنزل وحريتيها عيل اخذي اللي بييج .. اذا بتعرفين بنتج ليش محد خطبها تعالي روحي سئليها اهي تقولج .. وانا ماراح ارضى انج تطعين بشرفي .. لو امي الي اهي امي ماراح ارضى وبزعل وبهد البيت بلي فيه انتي خالتي اتغلطين .. عليها واشرف من الشرف وتسوى بناتج كلهم .. حقيره الحسد والحقد مالي قلوبهم ..

قلتلها والله كل كلمه قلتيها لا ادفعج الثمن غالي وتقولي اتهددين وقلت لها اي اهدد واعلى ما بخيلج ركبيه
طلعت واهي تصارخ وتتحلف وتتوعد فيني .. انا لا ارادي دموع من الحره مت بمكاني ابي اسكت مو قاده دمووووع بدون صوت حرررررتني حرتني .. حماي كان فوق وكل البيت سمع ..

صعدت فوق وانا من الحره مو عارفه شسوي دقيت على ابوي وقلتله كل اللي قالته وقلتله ابي اشتكي عليها حقي ماراح اخليه لو تكون امه ماراح اخليها جد جد الله لا يحطكم بهالموقف ..

قلتله مابي اقعد بالبيت احس مغموته بنفجر وخذذيت ملابس حق جم يوم ورحت بيت ابوي

وقعد اهو مع ابوي وقاله عمي انا ما الومها وراضي بلي تبي تسويه ابوي مارضى يقولي فشله وعيب

يبه وين العيب
طعنت بشرفي يبه
وهم دموع ثاني مره
بجي القهر شلون يا بنات
الا اربيها واهي وبنتها
ثاني يوم الصبح سويت حق اخوي وكاله عشان يرفع عليها قضيه سب وقذف .. وفعلا سويتها
وخليتها تندم وتحولت للنيابه لانها جنحه .. وفيها حبس لا يزيد عن سنه وغرامه لا يقل عن 1000 دينار ..
زوجها واعيالها ياوو لريلي يكلمونه ويعترفون بغلط امهم وبنتهم وزوجها وواعيالها كلموا ريلي عشان اتنازل ..
بتقولون لي ابالغ .. بس تدرون ليش بثبت كلامها مو صحيح .. قالت عندها دليل وتعرف ربعي اللي كنت اعرفهم ..
شي يحر وايد
بعد رفع القضيه باسبوع في رقم تم يشكل علي مسجات حب وغرام وغزل وصلت فيها المواصيل توزع رقمي ريلي لو يرن يمه ما يطل فيه ولا يقرب صوبه ..
قلتله شوف هذا مأذيني صاكته بلوك واتس اب يدزلي مسجات ولا فايبر ..
دق كلمه منو انت والله ابي فلانه انت منو انا حبيبها
تخيلو بالوقاحه قاله والله لا ابهذلك اوريك قاله روح الخط بدون بيانات قاله ماراح اطلعك يعني وبتشوف لا اتلك من اذونك
اشتكى عليه وطلع مدزوز من بنت خالته ..
لمن عرف جذيه ياب ابوها وقاله شوف بنتك وصلت ادز لزوجتي شباب ..
اسبوعين مروا علي توتر وكره وحسد مليت .. تعبت كل ما اكلمه ابجي بجي .. وصلت لحاله اقوله خلاص احنا لازم ننفصل دام خالتك تبيك لبنتها انا تعبت الكل يبيك الكل حاط عينه عليك مالي اي اعتبار الكل حاسدني مو حياه هاذي شنو هالمجتمع اللي محد يتمنى لثاني الخير ..

تخيلو شقالي باي الحجي معاج ضايع ..
ادري غلطت وتسرعت ومتوتره ومنحره على اللي فيني .. من كثر ما انغثيت دزيتله واتس اب
انا بنام ويمكن ما اقوم من الحره اللي فيني ..
دير بالك على بنتي وما اوصيك عليها ولا اطول تزوج وحده تخاف الله ولا تاخذ اختي احسن لان ما اآمن على بنتي الا عند اختي

قرا ما رد .. بضبط نص ساعه الا اهو عندي دق علي نزلي تحت بسرعه انا تحت ..
لمني وقالي كل شي له حل بس لا تعيدين كلامج هذا انا واثق باخلاقج وعارفج وعارف انتي من بنته وشنو اصلج .. شعليج من الناس شعليج منهم ..


قالي زهبي ياالله اغراضج بنرد البيت حدي مشتاقلج ..
بس خلي البنت عند امج اليوم ليلتنا .. خواتي استانسوا لان بتم عندهم .. بطريج سيده المطار ليش شلون جذيه قالي ما عليج .. سكرنا الاجهزه وما قلنا حق احد وعلى حظنا كانت طياره لدبي 12 ونص وسيده حجز ..
يبي يونسني وننسى اللي صار بدون اي ازعاج
تمينا يومين مسكرين الاجهزه وما ندري عن احد اهو ما معاه ملابس الا اللي عليه انا ما خذيت الا عبايتي اللي علي .. على اساس بنتعشى بس بالمطار صدمني اقوله خل اييل ملابسي مارضى مناك نشتري كل شي ..
تخيلو لوول دشينا الفندق بدون جناط يسئلون الرسبشن يسئل انتو مقيمين بدبي .. قاله لا تونا واصلين بس ما ما معانا شي .. شوفو المصخره .. المهم ثاني يوم الصبح طلعنا وشرينا اللي ناقصنا .. قصدي كل شي ههههه
قالي ابيج توعديني انج تنسين اللي صار وما جنه صار شي .. وترا البيت كله محد راضي على اللي سوته خالتي ولا تتوقعين ان في يوم بصدق احد عنج بشي ..
وتم كل شي مثل ما يبي ..
وتنازل اخوي بس كتبها تعهد ان ما تتعرضلي ولا تقرب صوبي ..
ثالث يوم دقيت على امي وطمنتها لوول زفتني زف
شلون ما تقولون لنا ليش ابوج مرتفع ضغطه منج قلتلها ما صار شي عادي دام انا مستانسه خلاص


قعدنا خمس ايام صج خذينا فترة نقاهه من امور وايد
رجعت الديره مفرفشه وخالتي من شافتني دمعت وقالتلي يهون عليج كل هالفتره تغيبين عني لميتها وبست راسها ووعدتها ما يتكرر هالشي وانا موراضيه على اختها لان وايد افتشلت ومن ليومك هذا ما شفتها لا اهي ولا بنتها ،،


صارلي سنتين ونص مادري عنهم كلش

بعد فتره ..
روتين اعتيادي دوام بيت دراسه يعني جذيه

يت عطلة الصيف وكنت باخذ صيفي بس ما رضى قالي بنسافر
بيني وبينكم الاعانه ما كنت اجيسها لان اهو مو مقصر معاي بشي ولي معاش يمشي من ابوي حتى ما كان يسئلني عنها قلت هاذي اهيا حزتها
بس طبعا ما رضى اصرف منها شي بسفرتنا لندن ..
البنات صار بخاطرهم يروحون الخبر من كثر ما امدحها صج صج طحت بغرامها هالخبر جان اقترح عليه يودينا ..
قالي تم باجر نمشي البنا طارو من الوناسه ..
وديت بنتي لامي ورحنا انا وحمواتي اربعتهم اثنين متزوجين كل وحده خلت اعيالها عند خالتي ورحنا كلنا الخبر والبحرين

واي بنات صج صج صج وناسه اقوى شي ..
السوق مالهم حدا عجيب
كل مكان خلينا فيه ذكرى حلوه .. كلنا كنا كاشفين وكانوا السعوديين يخزون وحمواتي جمالهم عجيب .. بياض وعيون وجمال تبارك الرحمن ..
ريلي اكره شي عنده السوق .. بس هالمره غير تدرون ليش عامل الغيره اشتغل عنده هههههههه

رحنا محل اسمه هزاز حق المواعين وخرابيط وايد
طبيت فيه عدل
عجيييب .. قشيت حق امي وخالاتي وعماتي كل من يعز علي
ولا شارع عندهم حق عبايات بس وااااااي كل موديل يقول انا احلى .. المهم قعدنا ثلاث بثلاث البحرين حلوه وناسها احلى ..
تدرون شنو اللي يضحى من دشيت السعوديه قلبت الموجه صرت اتكلم وشو ، ذا ، كيفك ،
الحبيب كيف كيف كيف شده على الياء على كلام السعودي بحلجي هههههه
طبعا طول الدرب انا فضلت اقعد ورا لا حماتي اكبر مني فا فشله وقلت بقعد ورا عشان كل شوي اسويله مساج لراسه وجتفه


ست ايام مروا علينا حدها عجيبه
والحلو فيهم الماركات حسيتها ارخص ساعات الماس على اربع الالاف ريال حسبو كل الف ب 80 دينار رخاص حدهم وساعات سويسريه ..
وغيره وغيره ،.
حدنا استانسا وغيرنا جوو


والتكمله باجر

يا جميلاتي


سامحوني عالقصور

احبببببببكم

 

[مسكته بحلاها~]

الله يخليكم لبعض ويحفظكم ويديم هالمحبه بينكم
عجبني فيج شخصيتج ذكائج وصبرج ع ريلج
وابي اعرف الحركه الي خلته ينثول خخخخخخخ دزي لي خاص
وتقبلي مروري

 

[MisCongeniality]

صباح الخير أختي،،،
الله يهنيكم مع بعض، بس عندي كذا ملاحظه واتمنى تتقبلينها، بالأول استغربت انج احتفظتي برقمه بالمطعم و اتصلتي فيه عشان تصدينه، و لاحظت اسلوبج يميل للعدائية و كان ممكن تاخذين الي حولج بالسياسيه و تكسبينهم بدال ما تخسرينهم، ماكان فيها شي لو راحت معاكم السينما بالنهاية انتوا اهل وانتي واثقة بنفسج و بريلج، لاحظت بعد تركيزج على موضوع الجمال تقريبا في جزء تكتبينه، الله يحفظكم لكن الجمال عمره ما كان مقياس للحب أو النجاح، و تتقبلي مروري...

 

[حبي ركاده]

ماشاءالله تبارك الله

الله يهنيكم ويبعد عنكم العذال يارب


ياريت تفيديني شلون كسبتي قلبه جذي
انا ريلي الحمدلله يحبني بس مو لدرجة انه ينسى الكل علشاني
لا طبعا
بعض المرات لو تصير مشكله بسيطه بالنهايه يطلعني غلطانه
حتى لو مو غلطانه بس علشان ما ينكسر جدامي

فيديني بالخاص اذا ممكن

ومره ثانيه عسى الله يسعدكم ويبعد عنكم كل مايضركم

 

[M!ss CoLoRz]

أختي



اغلب كلامج حلو وفوق الزين وشغلج عدل ومضبوط وما شالله علج والله يهينكم ويسر حالكم دوم

بس موقفج مع اهله آسفة ما اقدر ايود روحي عن اللي بقوله .. قاطعتي اهلج ولج اسبابج مالي حق اناقشج في هالموضوع

بس سويتي مشكلة عودة عند اهله ، الموقف الأسلم كان انج من البداية ما تسوين اي شي وتخلينها تعدي دامج عارفة نفسج وريلج

بتقطعينه عن كل اهله في كل مرة يصير موقف غيرة ، غزل ، كلمة من احد معصب .... الخ.. وبعدين؟؟؟ !!! والأخير؟؟

هاي اهله اليوم راضي على الوضع باجر بيقول لج انتي شقاعدة تسوين؟؟

ليس الشديد بالصرعة ، إنما الشديد الذي يملك نفسه عند الغضب

كلنا كلنا كلنا عندنا مواقف سلبية مع اهل الزوج سواء مشاكل عودة ولا كلمة صغيرة انقطت علينا بقصد ولا بدون او حركة ما عجبتنا او حتى نظرة فسرناها بشكل غلط .. إذا كلنا بنسوي زوبعة على هالمشاكل محد بيعيش مرتاح وبس نصك على روحنا الباب احسن ونقعد بلا اهل ولا سند

لو انتي ناوية تقطعينهم ما عليج حرج ولا حساب بس هاي اهله والله بيحاسبه عليهم ولو شكثر يحبونج ويعزونج ويعاملونج احسن من بناتهم في الأخير الدم ما يصير ماي

اتمنى تتقبلين ملاحظتي برحابة صدر ويمكن احين ما راح تحسين بمعناها .. لما تمر فيج السنين وعيلتج تكبر بتعرفين قصدي

 

[3tebeya]

انا ذكرت ليش دقيت عشان اصده .. كانت مضايقته لي وايد اوفر كنت بعض مرات اشوفه واقف جدام بيتنا .. ودوامي عرف وينه ومتى اطلع وارد
دقيت عشان اوقفه عند حده واذا ما ياز بقول لاهلي
الريال شفت عكس تصرفه دز اهله لنا ..

من ناحية بنت خالته لا طبعا ماراح اخليها وانا عارفه شنو تبي توصله ..
اذا عندج انتي عادي ان بنت خالته تناشبج بريلج فانتي مسكينه وعلى نياتج ..
الاهل ما يطعنون بشرف وحده ما شافوا منها الا كل خير وريلي لي انا بس ومحد يشاركني فيه
واشكرج على مرورج الطيب


بخصوص اللي تسئل شلون ينسى الكل .. لان من يكون معاي الفت نظره وادلعه واسوي اللي يبيه قبل لا يتكلم واي د تمور اعرف شلون ادش فيها وريلب نوعه يحب الشطانه والجريئه معاه اهو بس وبيني وبينه
وشكرا على مروركم الطيب
بخ

 

[3tebeya]

بالعكس علاقتي فيهم فوق الزين ومن قال اني قطعت علاقتي باهلي من وين يبتي هالحجي !!!!! مشكلتي مع خالته اخت امه .. يعني تسبني وتطعن بشرفي وتبي تاخذ ريلي واسكت اسمحيلي للاسف انتي ما تعرفين تحافظين على بيتج وريلج .. اذا امه مو راضيه على كلام اختها تبيني انا ارضى ؟ عفوا كرامتي وين ؟؟

رجاءاً بنات اللي تبي تعلق تعلق بشي معقول مو تخالفني بحكم عيب ،، اطوف بمزاجي انا بس تتكلم فيني وباهلي وشرفي ؟؟؟ اللي مافيه خير لاهله مافيه خير لناس ..
لان ما عندج احد يناشبج بريلج ورضاكم وحتى انتوا تغلطون علي ..
مو مستعبده عند احد انا
بخصوص اللي تقول الجمال .. ريلي موظف عادي بوزاره بس جماله واخلاقه اهي البي الكل تبيه ولان مدلعني ف محسوده عليه .. والجمال مطلوب 50٪ اللي تقول غير جذيه اكيد اهي مو حلوه واللي تقول الريال عنده الجمال اخر شي هاذي مقصوص عليها وشكرا

 

[mona q8]

بالعكس علاقتي فيهم فوق الزين ومن قال اني قطعت علاقتي باهلي من وين يبتي هالحجي !!!!! مشكلتي مع خالته اخت امه .. يعني تسبني وتطعن بشرفي وتبي تاخذ ريلي واسكت اسمحيلي للاسف انتي ما تعرفين تحافظين على بيتج وريلج .. اذا امه مو راضيه على كلام اختها تبيني انا ارضى ؟ عفوا كرامتي وين ؟؟

رجاءاً بنات اللي تبي تعلق تعلق بشي معقول مو تخالفني بحكم عيب ،، اطوف بمزاجي انا بس تتكلم فيني وباهلي وشرفي ؟؟؟ اللي مافيه خير لاهله مافيه خير لناس ..
لان ما عندج احد يناشبج بريلج ورضاكم وحتى انتوا تغلطون علي ..
مو مستعبده عند احد انا
بخصوص اللي تقول الجمال .. ريلي موظف عادي بوزاره بس جماله واخلاقه اهي البي الكل تبيه ولان مدلعني ف محسوده عليه .. والجمال مطلوب 50٪ اللي تقول غير جذيه اكيد اهي مو حلوه واللي تقول الريال عنده الجمال اخر شي هاذي مقصوص عليها وشكرا

كلامج كله سليم 100٪ وانا معاج بكل كلمه ولو ساكته لهم جان تمادوا
ويمكن يفرون مخ ريلج عليج
وانا مثلج اللي يتكلم فيني او باهلي حتى لو كانت خالتي او عمتي اقلب الدنيا وعليهم
عسى ربي يقويج عليهم ولا تتنازلين عن ريلج ابد
والله يحفظه لج ويخليلج بنتج يارب
انا استفدت حيل منج وناطره منج البارت الياي