- إنضم
- 12 مارس 2011
- المشاركات
- 4
- مستوى التفاعل
- 0
- النقاط
- 0
السلام عليكم بنات
هذي اول مره اشارك ف المنتدى وانا من المتابعين له وحبيت تعاونكم مع بعض وخليتوني احس بالامان من بينكم وجنكم خواتي وهالشي خلاني اتشجع واطرح مشكلتي عليكم وانا مو عارفه كيف اتصرف
المهم خلني ادخل بالموضوع
انا مالجه صارلي 8 شهور وكنت مخطوبة لمدة سنتين لاني كنت ابي اخلص دراسه وهو بعد كان يدرس برع وخلاص خلص ومن خلصنا ملجنا .. في فتره الخطوبه كنت اشوف خطيبي ف بيتنا جدام اهلي واهله ومره كنت اسولف معاه وشليت عنه تلفونه وهو عباله اتغشمر قلت له بشيله عنك قالي شيليه عادي عندي وفعلا خليته عندي ومارضيت اعطيه وتم يحايلني يقولي ياللا بروح عطيني اياه مارضيت وهو استحى يزن علي لانه امه يمه وراحوا تم يدق علي من رقم اخوه . واخوه مايستخدم هالرقم بس مخلنه احتياط عنده لوقت الحاجه .
المهم يقولي الحين بمر وخلي الخدامه تيبلي التلفون وهو كان حاط رمز قفل ومو راضي يقولي شو هو رمز القفل .. قلت له ليش مصر انك تبي الموبايل انت تخليني اشك انه في شي وهو يقولي مافي شي بس عطيني اياه ابيه ..قلت له مابعطيك اياه لين ماتعطيني رمز القفل واذا ماعطيتني اياه مب مشكله عندي اقدر افتحه بطريقتي وهو مصر اني اعطيه الموبايل ونفس الوقت فقد الامل اني برد له الموبايل ويعرف اني شاطره بأمور الكمبيوتر والموبايلات واني اقدر افتحه بدون ما اعرف منه رمز القفل .. اضطر انه يعطيني الرقم وسكرت عنه وفتحت الموبايل وانا عادي ماكنت شاكه فيه ابدا لانه انسان محترم جدا وكل وقتي معاه يكلمني ويخبرني شو يسوي ف ماكنت شاكه فيه ابداااا بس للأسف يابنات انصدمت شفت مسجات ومكالمات من رقم غريب والمسجات مسجات كلاميه عاديه يعني قمت من النوم ولا بعدك؟ .. ومن ضمنها مسجات غزل اهي كاتبتنها بطريقتها مثل صوتك حلو وغيرها بس من طرفه مافي الا يمكن 2 مسج وعاديين وامبين انه هذيج قاطه روحها وكل المكالمات منها وجمن مكالمه منه هو ..
ولما جيكت ع التاريخ فهمت انه اللي من بينهم صارله 4 ايام تقريبا طبعا انا كنت ف عالم ثاني ولا فاهمه شو اللي قاعد يصير .. وقعدت ادور زياده شفت مسجات من رقم ثاني وفهمت انها وحده معاه من زمان وانها تبي تكلمه وهو يتهرب منها ومايبي يكلمها ومطرش لها مسج لا ادقين لي مابي اكلمج خلاص وهي ادقله حتى من ارقام خارجيه غريبه بس عشان يرد عليها بس هو حاقرنها ..
المهم انا من الصدمه ماعرفت شو اسوي انا كنت واثقه فيه لدرجه كبيره والله يابنات اذا مارديت عليه يقعد يحاتيني ويحاول يسوي اي شي عشان يطمن علي وتصرفاته جدا راقيه وانسان ثقيل ومحترم ومتواضع جدا .. المهم هو كان حارق التلفون يبيني ارد عليه وانا مو قادره ارد عليه مصدومه حييييييييل .. رديت عليه قالي فتحتي الموبايل قلت له ايه قالي لا تفهميني غلط انا بفهمج كل شي الله يخليج بس خليني ادافع عن نفسي وافهمج قبل لا تتصرفين اي تصرف ولا تقولين اي كلام لاني كنت منهاره من البجي .. اللي فهمته منه انه الاولى تصير له من اهله وانها ماخذه رقمه من موبايل اخوها لانه شافته وحبته ومن هالكلام وانها تبي تتلصق فيه غصب وهو مومعبرها بس قلت له في مكالمات منك انته متصل عليها قالي صح بس كنت اتفاهم معاها انها ما ادق علي ويمكن انا غلطت وكلمتها كان المفروض اصدها ولا ارد على مكالماتها بس كانت مجرد نزوه .. وقلت له موكافنك وحده تكلم ثنتين ؟؟ قالي لا الثانيه كنت اعرفها من ايام كنت ادرس برع وماكنت اصلا اعرف لهالسوالف وعرفتها عن طريق الشباب اللي معاي كانت تكلم اثنين منهم وعطوا رقمي لها وكانت سوالف عاديه من بينا ومن خطبنا انا حقرتها وماكنت ارد ع مكالماتها وصار بين فتره وفتره ادق و اطرش مسج بس ماتحصل مني شي لاني كنت اباها تمل وتنساني وقالي اكيد انتي شفتي مساجتي لها وها اكبر دليل .. المهم يابنات الخيانه اظل خيانه لو بنظره انا قلت له انا مابيك وخلاص اللي بينا لازم ينتهي انا اخس شي عندي الخيانه واذا مافي ثقه في العلاقه يعني العلاقه هاي من الاساس لازم ماتكون موجوده .. سكرت عنه يابنات وانا خلاص منهاره انا حبيته هالانسان وحبيت فيه شخصيته واسلوبه مش بس مجرد حب وعشق وخرابيط
يتبع ...
