srsr ترى هذي عجينه امي
اكيد انتي مسجلتها عندج
أم عزيز
الله يعافيج يارب
وان شااااااء الله من عيوني احط لكم الطريقه
عجينه البيتزا :
وطبعا هذي تصلح حق الفطاير
والكميه اللي انا كاتبتها تكفي تقريبا 4 قواعد بيتزا كبيرة ويمكن اذا ضعفتوها 6
الطريقه :
تخلطين بالعجانه :
6 اكواب طحين
4 ملاعق كبار سكر
9 ملاعق كبار حليب بودر
2 ملاعق كبار خميره
2 ملاعق وسط باكينج بودر
شويه ملح حسب الذوق
نص ملعقه صغيره محسن العجين
1 كوب زيت
2,5 او 3 كوب ماء حسب حاجه العجينه
بعد ما تنخلط عدل بالعجانه تخلينها بمكان دافي
طبعا بما ان الجو بارد فأحسن شي تشغلون الفرن جم دقيقه وتسكرونه
وبعدين تحطون العجينه داخل الفرن وفوقها فوطه
لحد ما يتضاعف حجمها يعني تقريبا ساعه او ساعه الا ربع
وبعدين تفردون العجينه بالايد بماعون البيتزا (( انا دايما استخدم مواعين القصدير المدورة حق البيتزا ))
وطبعا لما تفردونها تخلون فيها زيادة من كل الجوانب يعني تقريبا 4 سانتي
وبعدين تقصصون جبن شيدر العلبه الزرقا على شكل مستطيل
وتحطونه باطراف ماعون العجينه بكل جوانبها
وبعدين تاخذون الزايد منها (( الـ 4 سانتي الزايد )) وتردونه على الماعون وتفقصون اطرافه بايدينكم لحد ما تلصق العجينه على بعض بحيث تظل الجبنه داخل ... عسى فهمتوا الفكرة
وبعدين دهنوا الاطراف ببيض او حليب حسب المتوفر عشان تتشقر
وخلوها ترتاح شويه
على ما ترتاح العجينه سوو الخلطة اللي فوق ..
هذي عاد من اختياركم ..
انا حطيت :
صلصة طماط
دياي قطع صغيره
هلابينو
فلفل بارد
مشروم
ومن فوق احط جبن شيدر مبشور + جبن موزاريلا
الحين قبل لا تحطون الخلطة على البيتزا
حطوا العيينه بالفرن وخلوها تستوي ...وهذي مدتها عاد بحسب نوع الفرن
بس لا تخلونها لما تتشقر وايد لأنها مع البيض او الحليب تتشقر بسرعه
انزين لييييييش حطيناها الحين ؟
لأن لو حاطين الخلطه فوقها واهي مو مستويه يسيح الجبن ويسود والعجينه من داخل لي الحين ما استوت
المهم وبعدين طلعوها من الفرن وحطوا صلصه الطماط وبعدين الدياي والخضار وبالاخير نوعين الجبن
وردوها بالفرن وشغلوا بس اللي فوق وجابلوها لحد ما يسيح الجبن
وبالعافىة مقدما
_03BA:
