تصدق قد ما حنيت اشوفك في زوايه البيت .. روايه بقلم قلب^الوله

[قلب^الوله]

الــبــارت الرابع عشر ..

ابو امواج وافق على عبدالعزيز
ويااه عبدالعزيز شاف امواج وعجبته واهيا وافقت عليه
وصاروا البنات يجهزون حق ملجة امواج اللى راح تكون بعد 3 اشهر ..
بتسوي عرس وملجه بنفس اليوم
وقفت معاها نور اكثر شي وتمنت انه احمد ايي يخطبها
وتم كل شي بسرعه
تجهيز قاعه وصالون وملابس وكل شي
ومثل كل عرس هبه كانت مهتمه بالديكورات

بس في شي صار حق هبه خلال هالفتره

هبه كانت داقه علي المنسقه مالت المعرض لقت خطها مفصول
وقررت انها تحاجي صقر ثاني يوم بالجامعه وتسأله
هبه : السلام عليكم
صقر : هلا وعليكم السلام
هبه : انا دقيت على المنسقه خطها مفصول مادري بعرف متي المعرض
صقر : انا اسف مادري انه خطها مفصول بس تعالي عندي ورقه فيها كل البيانات بس موجوده عندي بالسياره والحين بروح محاضرتي تقدرين توقفين بالسيركل بعد ساعه اعطيج الورقه
هبه : ان شاء الله على خيير
صقر : اوك

وبعد ساعه

صقر : هلا هبه هذي الورقه فيها تاريخ المعرض وراح تكون اهني بالسيركل واتمني انج تعطيني رد هذا رقمي موجود بالورقه
هبه : ان شاء الله انا موافقه مبدئيا بس بشوف الوقت يناسبني والا لاء
صقر : على خيير

هبه ناسبها الوقت وقالت حق صقر انه بتشترك وفعلا سوت المعرض بنجاح وكان في اقبال عليه وايد من كلياات مجاوره لكليتها

بعد المعرض
صقر : السلام عليكم
هبه : هلا صقر
صقر : بيضتيهاا الاسبوع اللى طاف بالمعرض
هبه : اي شعبالك حركات هههه
صقر : ههه اي والله حركاات

هبه وصقر صاروا كل مايشووفون بعض بالكليه يسلمون على بعض وصارت بينهم علاقه زماله

بعد جم اسبوع
فاطمه : هبوون
هبه : هلا
فاطمه : في وايد بنات يقولون انج مضبطه صقر صج هالكلام
هبه : امبي مو من صجهم اللى بينا سلام عادي
فاطمه : عن العياره والله انتوا يالفلوس تناسبون بعض طحتي وانتي واقفه
هبه : امبي امبي شهالحقد شفيج ماابينا شي واذا مو مصدقه قومي سأليه
فاطمه : لالا مصدقه مصدقه عاد شدعوا بيقول يخاف على سمعته
هبه : امبي وااي قطييعه انا بمشي باي

هبه قررت ادق على صقر وتقوله على الموضوع وتقوله انه مانوقف مع بعض بالكليه او سلام يكون بالعيون لانه تخاف على سمعتها

صقر : الوو
هبه : الوو السلام عليكم
صقر : هلا هبه وعليكم السلام شفيه تلفوني منور اليوم
هبه : هههه شدعوا النور نورك
صقر : اي والله شفتي اشووفه من الصبح يقط الوان ويوزع ورود اثاري هبه بدق
هبه : ههههههههههه صقر بغيتك بموضوع
صقر : امري من عيوني
هبه قالتله اللى صار معاها ومع فاطمه كله وقالتله انه مانبي مشاكل وجذي
صقر :امبي رفيجتج هذي مو من صجها
هبه : والله هذا اللى صار
صقر : وانتي شنو تبين يصير الحين
هبه : يعني شنو
صقر : يعني مااسلم عليج عشان شويه بنات تفكيرهم وصخ انا اقول مااعليج منهم ولا تهتمين انتي مو قاعده تسوين شي غلط
هبه : بس انا بنت
صقر : وانا ولد
هبه : يعني شنو
صقر : هههههههههه مادري قلتي انتي بنت قلت انا ولد
هبه : ههههههه صقر شفيك
صقر : والله انبطت جبدي هههههه وقاعده اضحك اعوض
هبه : بعد شنسوي
صقر : شفتي شلون حظي خايس
هبه : هههه لا تقول جذي
صقر : لوول
وتموا يسولفوون وسكروا المكالمه على انهم يكشتون بالناس ويسلمون على بعض عادي

فــرح :--
ردت فرح من شهر العسل او بمعني احري اسبوع العسل عشان كليتها ودوامها
وعاشت في طابق في بيت اهل ريلها وحيل مستانسه مع ريلها

فرح : طلوووول
طلال : عيوون طلوول
فرح : بعد شهر عرس امواج بنت عمي
طلال : يعني شنوو
فرح : يعني ابي اشتري نفنوف
طلال : يعني شنو
فرح : اوووه شنو يعني شنو
طلال : يعني شنو يعني شنو
فرح : يعني ابيك توديني السووق
طلال : بس السووق ماتبين اسفرج اوديج تشترين نفنوف وتردين
فرح واهيا معصبه : تطنز
طلال : ههههههههههههه اسف حبيبتي انتي اوديج وين ماتبين وبأي وقت تبين جم فروح عندي
فرح بدلع : وحده
طلال : والله يخليها لي ان شاء الله



نور : -----

تعبت واهيا تشوف احمد بالكليه وبينهم الصمت وتعبت حياتها بس في شي واحد ملهيها انه امواج كل ماتبي تروح سوق وتاخذ نور معاها
انوار واهيا قاعده بروحها الظهر بعد شهر ونص من مكالمة احمد
قاعده تفكر فيه جان تقرر تدزه مسج شعر
دزت
يحاكوني وانا سارح ولا اسمعهم يحاكوني
اجاملهم وانا عقلي معاك وخافقي سرحان
رغم كل العيون اللى معي وادري يحبوني
احس بغيبتك كني وحيد ولا معاي انسان

رد عليها بعد 5 دقايق

احن لك والشعور يخونه التعبير
ماعلموك ؟؟
اشكثر ضايقني غيابك


دزتله عقبها
خذني بحضنك ابغفي يااااااااه مبطي ماغفيت
وان لمحت دموع عيني سو نفسك مالمحت
خذني بحضنك وفتش عن جروحي وان قضيت
هز لي كتفي وقلي : عيب تبكي لو سمحت

قرر انه مايدزلها مسج والا اهوا عنده كلام وايد وده يقوله لها


روان :-
طول الوقت مع ميس بالشقه
فجأه ومو موعد وصول وليد حق الشقه
طق الباب
جان تقول روان منو الا وليد
روان : حبيبي شفيك مو وقتك
وليد لمها : قالها ليش ماتبيني ايي مبجر
روان : امبلا حبيبي اكيد ابيك بس خرعتني خفت فيك شي
وليد : مافيني شي بس مشتاقلج
روان : انا اكثر حبيبي
وليد : روان تقدرين تخلين ميس عند اماني ونطلع بروحنا ... ( اماني ساكنه يم شقة ميس واهيا كويتيه وتدرس بالجامعه واغلب وقتها بالشقه وصارت رفيجة روان وتحب ميس وايد )
روان : اخاف مو موجوده
وليد : انتي جربي يمكن اهني
روان دقت على اماني وقالتلها وكانت اماني برا بس قالت ربع ساعه واكون بالشقه يبوها وانتوا روحوا
روان :قالت بعد ربع ساعه ترد
وليد : خلاص عيل روحي بدلي على ماترد وانا بقعد مع ميس
راحت روان تسبحت وبدلت وسوت شعرها
ولبست نفنوف لي تحت الركبه لونه مشمشي وفوقه بالطوا لانه الوقت حيل برد
وسوت شعرها ويفي كبار
وخلاصت بعد ساعه
روان : انا جاهزه
وليد : الله حبيبتي تهبليين بس وايد زرعتيني
روان : ههههههه انت بعد ماقلتلي انه ناوي نطلع
وليد : يلا انا 5 دقايق واجهز على ماتودين ميس عند اماني
روان : اوك قلبي
ودت ميس عند اماني اللى استانست وايد من وجود ميس عندها وفي احد يسليها وحلفت على روان انه كل ماتبي تطلع تيبها حتي لو كل يوم ماعندها مشكله وراحت حق وليد
وطلعوا يتمشون واهما ماسكين ايد بعض وراحوا يتعشون بمطعم ويسولفوون ويجددون حبهم و وليد قدم حق روان هديه وشكرها لانه يدري انها وايد تعاني بس روان قالتله انه انت ريلي وانا ماسويت هالشي عشانك عشان منو اسويه وردووا وخذوا ميس وراحوا شقتهم

امــوااج
صار معاها شي مختلف عن فرح
انه اهيا تكلم خطيبها فترة الخطوبه
وكاان حيل متفهم وحيل هادي وزين
بس كان حيل مشغول وقالها انه هالشي ماراح يصير ورا الزواج لانه اهوا مشغول بتجهيزات وجذي
ومايقدر يكلمها كل وقت واهيا بعد كانت مشغوله ومرتاحه انه عبدالعزيز طلع زين

 

[UNiQe^PRiNceSs]

ثانكس حبيبتي

كملي ناطرييين​

 

[طماطه وبطاطه]

ثااانكس على البارت ..

ناطرينج:>

 

[♥ الــزيــن ♥]

مشكوره حبيبتي على البارت

ناطرينج

 

[قلب^الوله]

ان شاء الله والله بكمل بس المنتدى بط جبدي امس وقبل امس مو قاعد يبطل معاي اليوم بكتب مابقى شي على النهايه واذا مادخل المنتدى باحاول اخذ لاب اختي انزلها اهني بس الحين بكتبه :>

 

[قلب^الوله]

ان شاء الله والله بكمل بس المنتدى بط جبدي امس وقبل امس مو قاعد يبطل معاي اليوم بكتب مابقى شي على النهايه واذا مادخل المنتدى باحاول اخذ لاب اختي انزلها اهني بس الحين بكتبه :>

 

[* ملآك الروح *]

روووعه ..

يعطيج العافيه حبيبتي ..

ناطرين البارت ..

 

[قلب^الوله]

البارت الخامس عشر ..
يـووم عرس امواج

البنات تجمعوا في بيت امواج الصبح
روان راده قبل يوم من لندن وبترجع بعد يومين ( اهيا وميس بروحهم)
فرح مستأذنه من ريلها لانها راح تكون طول اليوم مشغوله مع امواج
نور حيل مستانسه برفيجتها واهيا تحلم بعرسها
هبه كشتت بمحاضراتها كلهم

امواج حيل مرتبكه بس البنات هدوها وصار نفس اللى صار بعرس فرح !!

قــاعة الشيرتوون .. ليلة العرس
طبعا القاعه لا تقل رقى من قاعة الرايه ومصممتها هبه بذوقها
كانت كل القـاعه بلون التفاحي والاسود ..
نفس ديكورات عرس فرح بس بألوان غير

دخلوا بنات عم العروس مع بعض
كانوا ياين شوي متأخر

روان : لابسه نفنوف قصير لون احمر فيه شريطه على الخصر سودا و مسويه شعرها كبه
فرح : لابسه نفنوف تايقر طويل وفاله شعرها
نور : لابسه نفنوف فوشي وفيه درجات الوردي طويل ومسويه شعرها ويفي
هبه : لابسه نفنوف اسود فوق الركبه وفيه سحاب من الخلف ذهبي ومسويه ذيل حصان

دشوا ووقفوا يم ام امواج
وقاعدين يرحبون بالمعازيم
ونفس عرس امواج كانت هيا موجوده
هيا كاانت لابسه نفنوف بصلي تحت الركبه ومسويه شعرها كبه
وسلموا عليها البنات بحراره

وقت دخول العروس ..

دشت العروس على زفة بغناء راشد
ياشيخه البيض من مثلج ومن قدج
كم غارنا القيد من زينج ومن خدج
واليوم كل العذاري في فربج احتارن
من حطت ام الشيوخ الدبله في يدج

كانت الدخله روعه

وحطوا اغنيه الجسمي اسمها الطير حق بنات عمها يرقصون عليها
وكانت المفاجأه انه هبه قامت ورقصت معاهم واهما حيل استانسوا

وخلص يوم العرس وراحت امواج الفندق وبعدها بتسافر اسبوع حق ايطاليا








اليوم الثااني ..
عبدالرحمن مع ابوه بالشركه وفاتحه بموضوع هيا
ابو عبدالرحمن : والله ياوليدي زين مااخترت وهيا انسانه محترمه وطموحه وانا موافقه
عبدالرحمن : صج يبا !!!!!
ابو عبدالرحمن : صج وانا بقول حق امك ادق عليهم بس لازم تطلع رقم بيتهم
عبدالرحمن : صار اليوم اييبه
ابو عبدالرحمن : مستعيل هاا
عبدالرحمن : هههه اي
واخذ عبدالرحمن رقم بيت هيا من هيا وام عبدالرحمن دقت علي ام هيا وححدوا موعد الخطبه

روان حيل تأثرت انها ماراح تكون موجوده بخطبة اخوها بس باركتله ووصته انه تخلي العرس بعد اكثر من شهر عشان لا يمل وليد من ردتها وروحتها
روان : حمني امبييي ماابي مابي
عبدالرحمن : شنو ماتبين
روان : خل الخطبه اليوم قبل لا ارد
عبدالرحمن : اي مو على كيفي صح
روان : هههههههههه
وسافرت روان على امل ان ترد على عرس عبدالرحمن



صار وقت خطبة الحريم

كانت هبه ونور وفرح رايحين مع امهم حق بيت هيا
وام هيا استقبلتهم احلا ترحيب وطلعتلهم هيا كانت بقمة اناقتها
وهيا لابسه نفنوف بنفسجي وسلفر فلو لي تحت الركبه مع كعب بنفسجي وفاله شعرها اللي يوصل لي جتفها
واتفقوا الحريم على الخطبه والاشياء الرسميه
يوم طلعوا من بيت هيا بالسياره
ام عبدالرحمن : يلا تحجوا
فرح : شنو يما !!
ام عبدالرحمن : البنت كانت ترقص معاكم بعرس امواج يعني من متي تدرون انه حمني يبيها
فرح : انا ماادري عن شي
نور : ولا انا ماادري
ام عبدالرحمن : هبوون ليش ساكته
هبه : يماا خلاص يبيها من زماان بس يت سالفة عرس فرح بعدين عرس امواج واخترب الموضوع والا اهوا مقرر من زمان وقايلي انا وروان
ام عبدالرحمن : الله يستر منكم بس

حددوا الملجه والعرس بعد 3 اشهر
كلمن انشغل بالتجهيزات حق العرس
كان العرس على هيا فهبه ارتاحت من ترتيب وتجهيز القاعه وتفرغت حق نفسها
عبدالرحمن اخذ طابق في بيت ابوه كان طابق حق الخدم والغسيل بس عدله وافرشه اثاث يديد
كان حقه الطابق الرابع من بعد ماكان له نص الطابق الثالث

كانت هيا مخليه مسؤولية الاثاث كلها علي عبدالرحمن لانها وايد مشغوله وابو عبدالرحمن عطاها هديه عباره عن اجازه 3 اشهر تبدي قبل العرس بشهر وتخلص بعد العرس بشهرين
قبل العرس بشهر
دق عبدالرحمن على هيا
عبدالرحمن : الوو شلونج هيوونه
هيا : الحمدلله بخير انت شلونك شلون تجهيز الطابق معاك
عبدالرحمن : امبي لو مو معاي هبه ومرات نور وامي جان مو ملحق بروحي وااي اكتشفت انه ماعندي ذوق بالاثاث
هيا : هههههههههه انا بعد تعبت من التجهييز شكلي بين
عبدالرحمن : ههههه اسمله عليج .. هيوون بقولج مفأجاه
هيا : قول حبيبي شنو
عبدالرحمن : شهر عسلنا راح يكون شهرين
هيا : يعني شنو !!
عبدالرحمن : يعني شهريين عسل بأمريكا
هيا : اللللله ونااسه احلف
عبدالرحمن : اي والله وانا بمرج وبنروح نسوي الفيزا
هيا : خلاص قولي اي وقت اروح معاك

كـان عرس عبدالرحمن اخر 3
ردت امواج من اسبوع العسل حق دراستها والكد وكانت سنه 3
ونور بعد نفس مااهي تدرس وتشوف احمد وكان احمد يخلص دراسته بعد شهرين
وفرح ردت حق جامعتها واهيا كورس تخرج
وروان بلندن وحايسه كل يوم سوق تبي بدله كشخه حق عرس اخوها لانها كانت بترد قبل العرس باسبوع وثاني يوم على طول بتكون بلندن

خلصوا البنات التجهيزات وكان الوقت نص شهر 3
عبدالرحمن وهبه ونور قاعدين بجناح البنات
عبدالرحمن : انا بروح امريكا شهرين عسل
نور : الله اخذنا معاك
هبه : تستعبطيين يقولج شهر عسل
نور : هههههههههه
عبدالرحمن : ههههههه ماتقوليلي شسوي فيكم
هبه : ظلينا بروحنا انا ونور
عبدالرحمن : شدعوا بروحكم
نور : روان بلندن و فرح ماتزور الا من خميس لي خميس تقعد ساعتين او 3 ساعات وتروح وامواج اشوفها بالكليه بس كله لما اقعد عندها تقول بدرس ماادرس بالبيت وماادق علي كلش
هبه : وميس بعد مو اهني وانت بتسافر شهرين وبعدين بترد تلهى مع مرتك
عبدالرحمن : ويي ويي ليش قلبتوها غم ان شاء الله انتوا تتزوجوون بعد وانا اقعد بروحي مع امي وابوي بالبيت
هبه : انا ماراح اطلع من بيتنا
عبدالرحمن : هو وليش عااد
هبه : بسس مابي
وقعدوا يسوولفوون لين قام عبدالرحمن عشان يكلم هيا .. عادته كل يوم يكلم هيا قبل لا ينام

قبل العرس بأٍسبوع ردت روان
وكلمن استفبلها بالمطار حتي ام عبدالرحمن راحت معاهم المطار
وردوا البيت وكلهم لموا ميس وهم قررت انها تقعد الاسبوع في بيت امها
روان حيل استغربت من حالة نور حيل شافت فيها حزن واهيا تطالعها نور ماكانت هاديه بهالشكل
فقررت بعد مانومت ميس تروح دار نور تكلمها
دشت على نور وسلمت عليها وبدت بالموضوع
روان : نور شفيج
نور : شبيكون فيني يعني ؟
روان : امبلا امبين عليج مهمومه قوليلي شفيج
نور : شنوو اكثر من جذي بيصير فيني امواج ماادق ولا تسأل عني فقدتها حييل وانتي مسافره وفرح مااتزور الا الخميس ساعتين او 3 تقول لاهيه بالدراسه وبريلها وانا وهبه بروحنا .. ( وقعدت تبجي )
روان : تعوذي من ابليس ليش تبجين ان شاء الله انتي باجر تتزوجين وتنشغلين مع ريلج
نور : كل مااكلمت احد يقولي جذي روان تعرفين شعور الوحده وانتي وسط ناس هذي انا ( نور انبطت ماقدرت تغمت اللى بقلبها )
روان : انتي قاعده تقصدين شي ثاني
نور : انا قاعده اقصد الغربه داخل الوطن تعرفين هالشعور
روان : اعرف شعور الغربه وحافظته بعد
نور : انتي تعرفين شعور الغربه وانتي بلندن بس ماتعرفينه وانتي بالكويت
روان : انتي فيج شي اكبر من موضوعنا انا و امواج وفرح
نور ( استوعبت اذا قالت شي روان راح يصير سوالف ) : شنو الاكبر من موضوعكم امواج رفيجتي وكل يوم اكلمها فجأه بين يوم وليله ماكو امواج ! صج اشوفها بس مانسولف كلش مااقولها كل اللى بقلبي نفس قبل .. شنو اكثر من جذي .. فرح كل يوم معاي بالبيت وكل يوم نسولف فجأه بين يوم وليله فرح مو في بيتنا ! انتي كل يومين عندنا بالبيت وميس كل يوم عندنا فجأه بين يوم وليله ماانشوفكم الا كل 3 اشهر .. في شي اكبر من هالشي
روان لمت نور وقالتلها : هذي سنة الحيااة ماانقدر نسوي شي هذا امر الله بس صبري وان شاء الله بأييج نصيبج

وتمت نور على حالها تبجي لين الصبح
وقبل لا تروح الدوام كتبت مسج حق احمد بس امسحته
بس قررت انه ادزله مسج شعر يعبر عن اللى بداخلها

احتجتلك في ضيقتي مالقيتك !!
وقضيت همي بين ليلي وفرقاي ..

وقبل لا تنطر رد منه قررت ادز حق امواج مسج

يافراقها توني شعرت بقسوتك بداخلي
يافراقها توني احس اني بديت احن لايامن مضت واشتاقها
بديت احن لشوفها وشراقها واشواقها
رغم انها اللى روحت وبكل عمري طوحت حتي بكف فراقها ماودعتني ولوحت
يافرااقها .. يافرااقها

رد عليها احمد بعد 5 دقايق

الصمت افضل حل لا ضاق صدري
بعض السوالف تزيد الضيق ضيقه

ردت عليه بمسج

تعبت اكابر الجرح واخفى طعون الاه فيني
تعبت اكتم العبرات وجروح الليالي تهد فيني
تعبت اقول مافيني شي وانـــــا ,,,, ؟؟
وانا كل شي فيني !!

مارد عليها ونطرت رد امواج بس ماردت عرفت انها نايمه ليلحين
وخذت كتبها وراحت الجامعه واهيا مو نايمه شي

يتــبع

 

[UNiQe^PRiNceSs]

ثانكس حبيبتي ​

 

[MeeMeeYoo_2]

ثنكيوووووووو

 

[قلب^الوله]

البـــــــــــارت الاخــير :>

داومت نور بالجامعه وشافت احمد وتألمت زياده بس صبرت روحها انه كلها شهرين وبيخطبها وتروح معاه

قبل عرس عبدالرحمن بيوم كلهم تجمعوا وقعدوا يسولفون

عبدالرحمن : واي مو مصدق
فهد : عقبالي قوول اميين
اموااج : امييييييييين
روان : اي والله امين ونفرح فيكم بس هيي مو اقل من سنه
فهد : ليييييش ان شاء الله
هبه : عشان الاستاذ وليد تعب واهوا يروح ويرد
وليد : هبه ماتاكلين هوا
فرح : اقووول حدك اختي هذي

نور كاانت سرحاانه وساكته
فهد : نووووور هييييي ويين وصلتي بابا
نور : هاا كاني معاكم وين وصلت
فهد : لا انتي موضوعج جايد
نور : اي موضوع
فهد : هههههه لا تشكين بنفسج
نور : واي ملاقه انا بروح انام
فهد حس انه نور بالها مع احد ثاني بس يبي يتأكد

راحت نور فوق واول مانسدحت على فراشها
جان ادز حق احمد مسج

هااك جرح .. وهاك خيط .. وهاك ابره
وشفني مسلمك الامر ,, انت وضميرك !!
جيت لك .. ماعاد لي بالحال دبره
لانه مايقدر يخيط الجرح غيرك

رد عليها

حبيبتي مابيج تضايقين باجر عرس اخوج ابيج تكونين احلي وحده وتكونين حيل مستانسه

ردت ..
ان شاء الله

يووم عرس عبدالرحمن

البناات راحوا الصالون الساعه 12
وخلصوا من الصالون وراحوا العرس
العرس كان بقاعة سلوى
منظم تنظيم رائع وكان على مستوي كبير من الرقي
لون الديكورات اسود باحمر بأبيض

اول اللى واصلين العرس البنات
كانت روان بقمة الروعه
لابسه نفنوف ذهبي مع ابيض طويل ومعاه حزام سخيف ومسويه شعرها كبه
اما فرح .. كانت لابسه نفنوف بيج في اخضر معااه حزام على الخصر عريض وفيه فيونكه على جنب وفاله شعرها
نور لابسه نفنوف اسود طويل وفيه حركه علي الصدر باللون السلفر ومسويه شعرها كبه علي ويفي
هبه لابسه نفنوف عنابي طوويل ولابسه فوقه شال ومفاله شعرها
امواج لابسه نفنوف تركوازي مع سلفر طويل

كانوا البنات مستانسين ويرقصون وفرحانين في اخوهم
واهل وليد واهل طلال واهل عبدالعزيز كلهم موجودين

دخلة العروس كانت علي زفة
هب السعد مالت فطومه
هيا كانت لابسه نفنوف ابيض ناصع البياض وفي شك صوب الصدر سلفر نفس لون القصدير
وماسكتها لون احمر فاقع وحاطه مكياج حلو وناعم وحمره حمرة فاقعه
دخلت وقعدت علي الكوشه ورقصولها البنات ورقصوا اهلها ورفيجاتها
ودخل عبدالرحمن مع ابوه وعمه وفهد و وليد

وقعدوا البنات يرقصون جدام عبدالرحمن ومستانسين
وطلعوا العروسين على اغنيه
انت كافي ومابي غيرك احد انت كافي وانت بزياده علي

وراحوا الفندق ومن باجر بيسافرون شهرين عسل حق امريكا
ردوا البنات البيت مبجر
امواج وفرح كل وحده راحت بيت ريلها
وهبه ونور وروان ردوا بيتهم

روان : هبوون تعالوا ساعدوني
نور : شفيج
روان : مايمديني انام الساعه 1 ولازم اكون بالمطار الساعه 7 وبنزل جنطتي وبسوي اغراضي
هبه : لا ناامي يمدييج لين 5ونص بعدين سوي اغراضج مو وايد
روان : ماادري محتاره
هبه : عطييني ميس بنومها عندي وانتي روحي نامي واقعد 5ونص
روان : اوك
هبه خذت ميس وراحت دارها
وصارت الساعه 6 وقعدت روان ووصلتها المطار بس نور قالت مالها خلق
وتعبانه وماراح تداوم هبه قالت حق نور حتي انا ماراح اداوم بس بتوصلهم وترد

نور دشت دارها وانسدحت على فراشها دقت على احمد
احمد : الوو نور فيج شي
نور : تعبت
احمد ( ناوي يقولها اللى صار ) : مو ذنبي والله
نور : شتقول احمد ؟
احمد : نور حياتي بقولج شي
نور عيونها غورقت : اهلك مو راضين فيني ؟
احمد : اهلج اللي مو راضين فيني !
نور تجمدت دموعها : شتقول احمد انت متي يت عشان يرفضون
احمد : حبيبتي امي دقت قبل ملجة فرح بس امج قالت ماكو نصيب
نور ( واهيا تشاهق ) : احمد من صجك ليش ماقلتلي ليش
احمد : هدي حبيبتي اول شي ابيج تستانسين والمناسبات الحلوه كلها صارتلكم ورا بعض مابيج تتضايقين بعرس فرح ولا بعرس امواج ولا بعرس عبدالرحمن
نور تبجي
احمد : حبيبتي لا تسوين جذي انا بتقدملج مره ثانيه وثالثه وعاشره لين ابوج يرضي
نور : احمد خلاص حلمي راح احمد انت تدري لما الحلم ينكسر
احمد انت تدري لما كل اللى حولي يسألوني من عيوني شفيج اقول مافيني شي
احمد تعبت اقولهم مافيني شي محد صدقني
احمد تسكرت الدنيا بعيني الحين مابي شي
احمد : حبيبتي تعوذي من ابليس الدنيا جدامج وان شاء الله مااراح اخليج
نور : احمد بسكر التلفون بكلمك بعدين تعبانه
احمد : اوك حبيبتي انطرج ادقين علي
نور : اوك باي

نور حست بقمته طلعت من غرفتها واهيا تبجي
حست انها فقدت حبيبها
فقدت احمد اللى رسمت معاه احلامها
فقدت اعز الاشخاص بالدنيا بوقت واحد
فقدت امواج واحمد بوقت واحد
قعدت بالصاله جان تشغل التلفزيون تبي تنسي
ولا على دشت هبه الجناح
هبه : نور شفيج تبجين
نور ماردت بس طولت على التلفزيون حيييييل

ذبحها صوت الجسمي واهوا يقول

فقدتك يا اعز الناس فقد الحب والطيبه
وانا من لي في هالدنيا سواك ان طالت الغيبه
رحلت ومن بقى وياي يحس بضحكتي وبكاي
وحتي الجرح في بعدك يغزيني واهلي به
انا من لي في هالدنيا سواك ان طالت الغيبه

تصدق قد ماحنييت اشوفك في زوايا البيت
واسولف معك عن حزني واحس انه انت تدري به
انا من لي في هالدنيا سواك ان طالت الغيبه

شسوي بالالم والاه ولكن البقا لله
يصبرني على بعادك وذا حظي وراضي به
انا من لي في هالدنيا سواك ان طالت الغيبه


انصدمت هبه من اللى تسمعه وتشوفه
بجت نور ليين شبعت وهبه ماتدري شتسوي فيها
واقفه جدامها ماتعرف شفيها ولا عمرها حست انه اختها اللى معاها بالبيت فيها هالحزن

نور قالت حق هبه : هبه لا تحبين الا ريلج احد ثاني لا تحبين بتندمين
هبه : شفيج ليش تقولين جذي نور ترى مابقالنا احد انا وياج بروحنا قوليلي اللى بقلبج
نور فتحت قلبها كله حق هبه
نور : وهذي كل سالفتي ..


روان : عقب عرس عبدالرحمن ماقامت ترد الكويت الا كل 6 اشهر ومستانسه بحياتها بلندن وصار عندها رفيجات بلندن وميس كبرت ودشت حضانه
فرح : تخرجت من الجامعه وسافرت بالصيف مع ريلها راحت اسبانيا ولما ردت اقعدت سنه بالبيت بعدين اشتغلت
امواج : ليلحين بالجامعه وخذت صيفي وعلاقتها مع نور تحسنت شوي
نور : هذي اهيا تنطر محاولات احمد اللي قالها انه لما يتخرج يبي يتزوجها .. وتقدم حق ابوها مره ثانيه ومارضي
وعايشه حياتها بهم وتتمني اليوم اللى تكون مع احمد في بيت واحد
هبه : حياتها جامعه ومشرووع تطورت بمشروعها وصارت تقضي اوقات فراغها فيه ومع رفيجاتها وتقعد مع نور يوميا
عبدالرحمن : طاير من الفرحه مع هيا ويلبي كل اللى تبيه وحيل مستانس
هيا : اهيا بعد حيل مستانسه معاه ومع اهلها وقاعده تتقرب من نور اللى تحس انه فيها شي غامض
فهد : حس انه نور في بالها احد ثاني وامه اخطبتله وحده كان يبيها من العايله


تمـــت
21- ابريل -2010

 

[MeeMeeYoo_2]

يعطيج العافيه حبيبتي

 

[قلب^الوله]

بنـات اشكركم وحده وحده اللى شجعوني اني اكتب واكمل القصه

وحيده غريبه
MeeMeeYoo_2
وام مرمر
توتا كويتيه
So_what
يونيك برنسس
اميرة العود
شانيل
كويتيه
Lulu q8
سويت سنفوره
كويتيه والنعم
رفيف الورد
ابتسم لدنياك
طماطه وبطاطه
ملاك الروح

نورتوني وشرفتوني

 

[♥ الــزيــن ♥]

عورت قلبي نور

مشكووره واايد حياتي

 

[كويتية و النعم]

مسكيينة نور تعوور القلـــب
عالعمووم مشكووورة حيااتي على هالروااية الروووعة
واايد حلوووة ...
ما قصررتي قلبي ... و يعطيج الف الف عاافية و مووفقة ان شاء الله ...~

 

[قلب^الوله]

عورت قلبي نور

مشكووره واايد حياتي

ايي مسكيينه حياتي

العفوو قلبي :>

 

[قلب^الوله]

مسكيينة نور تعوور القلـــب
عالعمووم مشكووورة حيااتي على هالروااية الروووعة
واايد حلوووة ...
ما قصررتي قلبي ... و يعطيج الف الف عاافية و مووفقة ان شاء الله ...~

اي حدها تعور القلب

العفوو حبيبتي والله يعافيج وعيونج الحلوه

 

[أميرة العود]

يعطيج العافية حبوبة

 

[UNiQe^PRiNceSs]

مسكينه نور

يعطيج العافيه حبيبتي ​

 

[قلب^الوله]

الله يعافيكم حبايبي