ترقية المعلمات القدامي عندي الحل العادل والمنطقي

[om halaa]

lolowawa1234

هلا فيج ويا مرحبا
بصراحة استانست لما شفت ردج :aha:
أكون فعلا شاكرة اذا استطعت توصيل الفكرة وانشاء الله نقدر نكون ايد وحده شكل ما قلت لج احنا
رايحيين نتفاهم نبى نعرف شنو النهاية

أحس إني بروحي ما أدري شفيهم المعلمات القدامي بصراحة بديت أشك اذا كان الموضوع يهمهم من صج
لكن أنا متأكدة إن اللى تعطي بكل ذمة وضمير شي أكيد تتأثر من واقع حالنا ( محــلــك ســـر).

ملاحظظظة مهمة جدا جدا ...لو تفكرون بالموضوع تلاقونه مرتبط بكل معلمة روضة
مثلا اللى سنوات خدمتها 10 أو 7 وتشوف حال القديمات يصيبها اكتئاب وتفكر شنو راح يصير معاها بالمستقبل
بالعربي اذا نبي نواجه الموضوع محتاجين لجميع معلمات الروضة لأن مستقبلهم انشاء الله يعتمد على اسلوب
تعامل الوزارة مع المعلمات القدامي ....يعنى المصلحة واااحدة .

لاحظوا معاي الكل ياخذ نتيجة تعبه ما عداااا معلمة الروضة:lkmnkl:
ليييييش ما أدري... موووو منطق اللى قاعد يصير يا جماعه...... شوية احترام لسنوات خدمتنا
كل بنات عمي وصديقاتي اللى اشتغلوا وراي ( طبعا بغير وزارة التربية) في مراكز قيادية الحين
هذا شنو معناه ....وزارة التربية اصلااامستانسين ان المعلمات ساكتين ولاهين بالدروع وشهادات التقدير:016:

يا معلمات شوية حركة من كل وحدة منا ...أعيد وأقول اللى عندها اقتراح نسمعه أو خل يناقشون اقتراحي بالترقي
سبحان الله يمكن تضبط ونحرك جموووود الوزارة ترى والله موحاسين فينااا لأنا سااااااكتين واحنا بكل وضوح اخر همهم.
أكرر شكري لج أختي والله يعينا.
شكرا​

 

[نورمينا]

حبيت أشارك معاكم وأقول تعبنا تعبنا

 

[* @ * كرستال * @ *]

معلمة كرف .. مشرفة كرف
وين قبل اللي المشرفة دورها تدخل عالأبلات وبس
الحين المشرفة تعد ورش ، تشارك بتقديم الورش ـ تجهز للمعلمات الورش تروح للورش بالروضات
مو جني قلت ورش أكثر من مرة
صار تركيزهم على الورش أكثر من الطفل نفسه
بس تبون الصج هيبتنا راحت صرنا نكسر خاطر المعلمات الجدد يسمونا أهرامات الروضة ​

 

[lolowawa1234]

هههههههههههههههههههه
كرستال الوضع مأساوي
الورش مبادره من المعلمه ومن المشرفه
محد ملزم بالورش
اللي تبي تبدع تسويهاا ولازم ينحسب لها بملفهاا وتتقدر على هالشي
واللي ماتبي موو لازم
المشرفه دورها اشراف وبس
وحلقة وصل بين الاداره والمعلمات
لاكن
كل شي
مقلوووووووووووووووووووووب بوزارة التربيه

الهرم مو بس صااير مقلووب
الهرم صار يسوي شقلبه كل كورس

 

[عهود الحب]

الورش صحيح بمبادرة فردية من المعلمة
لكن عدم عمل ورشة عمل يخليج حيل متأخرة
درس نموذجي
مبادرات الى ما لانهاية
لكن
بالنهاية
مافي مقابل
تعبنا تبين الصج



يمكن عشان السنين تركض والعمر يركض

انا افضل التقاعد عالاشراف وخرابيط التسلسل الوظيفي
حتى لو بعد عمر طويل جنه عمر ديناصور وصلنا للاشراف مثلا
هل فينا شدة ؟ خاصة الجيل الجديد مومثلنا احنا
احنا كنا جدا مطيعين < بالاخر شنو استفدنا ؟
حتى لو كانوا المعلمات قمة بالتعاون احنا ما نرضى نكلفهم باشياء ما لها معنى
بالاخر


خلينا معلمات افضل
الى نهاية خدمتنا
ونتقاعد ونرتاح من الهم كله



اذا كان في حل مرضي بنظري
انه يكون للمعلمة الي وصلت للـ 15 سنة و فوق خدمة
يكون لها ميزات بجدولها المدرسي يخففوووووووووون عنها الفترات حالنا حال باقي المراحل
و يكون صفها ثابت موكل سنة شاقلة اغراضها ومبدلة صفها ماصارت جنه قش مطلقة ؟
ويخففوووووووووون عنها الدخول
شحقه تدش عليها الموجهة الفنية بعد ان وصلت بالخدمة لهالمرحلة ؟ يعني بتعلمها ؟ احيانا الموجهة تكون اقل كفاءة من المعلمة
لكن حرف واو خلاها موجهة فنية على المعلمة
حتى المشرفة الفنية ممكن تكون اقل منها بالمستوى



انا بنظري هذا حل مسكن للألم وبشكل مؤقت الى نهاية الخدمة والتقاعد

 

[مادمزيل]

:e3:

انا صار لي 14 سنه ومالقيت الاشراف الله يعين لا حول ولا قوةالا بالله شبعنا من التدريس وحفظنا المناهج وخلصت الافكار
انا بس عندي اقتراح اللي لها 10 سنين وماخذا امتياز خلاص لحد يدخل عليها ذبخونا الموجهات والناظرات حالج حال ام سنه وسنتين ​

:dfgl:

 

[طيرشلوا]

طبعا تعرفون أن معلمة الموسيقى في رياض الأطفال بعد 12 سنه أو حتى أقل يحق لها دخول مقابلة وكالة
( مديرة مساعدة) في الروضة شلون ما أدري على أي أساس هم بعد ما أدري بس اللى اعرفه ان المديرة
المساعدة لها دخول على المعلمات وتقيمهم شلون معلمة موسيقى ما شافت ولا مارست ولم يتم توجيهها من قبل
موجهات بالتدريس تقيم >>>>>>>>

شلون جذى ؟؟؟؟؟؟؟؟؟؟؟؟؟؟؟
من صجههم !!!!!!!!!!!!!!!!!!!!!!!!!!!!!!!!!!!
منو الخبل الى حاط القرار:rgewrg::rgewrg::rgewrg::rgewrg::rgewrg:
حسبى الله ونعم الوكيل شنو التعب الى تعبوة وشنو الحصص الى مسكوها ماتقارن بربع تعبنا
بس صج وزارة التربية عندنا صج هرمهم مقلوب وملعون خيرة بعد​

 

[راقية باخلاقي]

لكم الله

 

[معلمة روضه]

معااااااااااااااااااااااااج صار لي 11 سنة وشهادتي ماجستير من جامعة الكويت أعلى من ناظرتي و الوكيله والموجهه والمشرفة بعد...ولا زلت مكانك سر!!

انا قدمت اقتراح برسالتي مالت الماجستير وهو اطلاق مسميات على المعلمات اللي يستحقون الترقيه ويصرف لها البدلات وتعامل المعامله اللائقه لمكانتها لان كثير من المعلمات ما يبون يصيرون مشرفات او وكيلات ويفضلون التدريس فا ليش ما تحصل هالمعلمه على المسمى المناسب لها بناء على خبرتها وتقاريرها وتكون لها هيبتها بالروضه ...اوكي توصل الي مسمى مديرة روضة ومصروف لها جميع البدلات ولها مميزات لكن ماسكه صفها مادام مافي شواغر او ماعندها الرغبه للممارسة المسؤوليات
طبعا هالفكره انا مو يايبتها من راسي لأ هالنظام مطبق في بريطانيا والمعلم يوصل لمرحلة المستشار او الوزير وهو لازال على راس عمله كمعلم واعتقد ان هذا حق معنوي ومادي يفترض ان يكفل للجميييييييييييييييييع


انا اول وحده اوقع لج عالعريضه

 

[lolowawa1234]

معااااااااااااااااااااااااج صار لي 11 سنة وشهادتي ماجستير من جامعة الكويت أعلى من ناظرتي و الوكيله والموجهه والمشرفة بعد...ولا زلت مكانك سر!!

انا قدمت اقتراح برسالتي مالت الماجستير وهو اطلاق مسميات على المعلمات اللي يستحقون الترقيه ويصرف لها البدلات وتعامل المعامله اللائقه لمكانتها لان كثير من المعلمات ما يبون يصيرون مشرفات او وكيلات ويفضلون التدريس فا ليش ما تحصل هالمعلمه على المسمى المناسب لها بناء على خبرتها وتقاريرها وتكون لها هيبتها بالروضه ...اوكي توصل الي مسمى مديرة روضة ومصروف لها جميع البدلات ولها مميزات لكن ماسكه صفها مادام مافي شواغر او ماعندها الرغبه للممارسة المسؤوليات
طبعا هالفكره انا مو يايبتها من راسي لأ هالنظام مطبق في بريطانيا والمعلم يوصل لمرحلة المستشار او الوزير وهو لازال على راس عمله كمعلم واعتقد ان هذا حق معنوي ومادي يفترض ان يكفل للجميييييييييييييييييع


انا اول وحده اوقع لج عالعريضه

--------------------------------------------------------------------

بارك الله فيج
ايي هذي العقوول اللي نبيهاا
حل منطقي مبني على دراسه ورؤيه
يعني انا مثلا يصيبني احباط لما ادري انه ماراح اتحوشني الترقيه لو اوصل السما الا عقب 10 سنوات بحد اقصى يعني الغير ماوصل للترقيه الا عقب 14 سنه وهذي الاغلبيه
وغيري 5 سنوات ويترقى
بصراحه بصراحه
انا من الجيل الجديد اللي اتحجون عنهم بس عطوني دافع ابدع
لاكن مدام الوضع مثل ماهو موجود اغلبية جيلي تفكيرهم
ادرس حصتي ومالي شغل بغيره معاشي ماشي ماشي
انا من رايي الوضع تغير والجيل الجديد مو نفس اللي قبل عطونا دافع خلونا نحس انه ورى التعب اكو مكافأه ليش هالظلم؟؟؟

موضوعنا لازم يتفعل ويحتاج وقفه..
من منو؟؟؟

ترى محد بيوقف وياكم يا ابلات الرياض

انتم بنفسكم بايدكم تتغيرون الوضع
ترى محد بيغيره لكم

تقبلوا مني كلامي وفعلا شي يحرق الاعصاب

 

[om halaa]

بنات وحدة قالت لي شوفي موضوعج في منتدى جمعية المعلمين الكويتية

احدى الأخوات قامت بنقل الفكرة مع الموضوع كامل للمنتدى

ودار فيه نقاش راح أنقل لكم أهم ما قرأته

**********************

بصراحه نظام الترقي فيه مظلومية للكثيرين حسب ما رأيت من زميلات المهنة

يعني معلمة رياضيات ثانوي لا تترقى وتظل تدرس رياضيات ثانوي 14 سنة واهي بنفس مكانها

ومعلمة تربية بدنية مع احترامي ممكن بعد 5 سنوات اتصير وكيلة

هذا ظلم

على الجمعية ان تضع شروط تحفظ بها ترقي الجميع وهذه الشروط توصلها بطريقتها للوزارة

حتى يتم انصاف الجميع

والله يوفقنا لكل الخير يارب

******************
بصراحة أنا ما كنت أعرف ان معلمة التربية البدنية

تترقي بسرعة في المراحل الأخري

حتى الموسيقي ما دريت عنها الا بعد ما قريت هذا الموضوع

معقولة ؟؟؟؟؟

يا جماعة هذا يثبت كلام صاحبة الموضوع

1-أن من يضع قرارات الوزارة

2-ومن يوافق عليها ويوقع

3- والقانوني اللى يعطيهم الضوء الأخضر بالتطبيق

.................هو انسان جااااهل...........................

معقولة ما انتبهوا لغباء... وظلم...و عدم منطقية هذه القرارات

شلون ما فكروا بالمعلم اللى يتعب ويحرص على الدوام

ويجتهد ويتميز بعمله

أن القرار هذا ياكل حقة أشكرررره ....

يعنى الواحد فينا يوصي أهله وعياله يتخصص

موسيقي وتربية بدنية .

شالسالفة يا جماعه هالوزارة ما فيها شيء صح

ويقولون معلم اليوم غير الأمس طبعا لما يعيش بالظلم شلون ما يتغير

ما أقول الا ....لا حول ولا قوة الا بالله

***********************

صدقيني أنا مقتنعه بكل كلمة قالتها صاحبة الموضوع

وكلامها صح الوزارة مستانسه على سكوتنا عن حقنا شفيها اذا

تجمعوا معلمات قديمات بالمشاركة مع جمعية المعلمين وقابلوا الوزيرة وقالوا

لها ليش ما تترقي المعلمة القديمة

الى وظيفة مدير مساعد أسوة بمعلمة الموسيقى

( مع انه من الظلم مساواة جهد معلمة الفصل مع معلمة الموسيقي بالروضة)

فمن حق معلمة الروضة اللى درست فوق 17 سنه

والترشيح ووووووواقف وووووواقف

يحترمون سنوات عمرها و (( خبرتها )) و جهدها طوال سنوات

ويساوونها بمعلمة الموسيقى ترى المؤمن القوى خير من المؤمن الضعيف

وما فيها شي اذا الانسان طالب بحقه

ترى الوزارة ما يهمها اذا احنا مظلومين ولا لأ

بس يهما لا تجيبون لنا عوار راس ولا تطلعون أخطائنا

وطبقوا قراراتنا الذكية جدا جدا والعادلة جدا والمنطقية

اللى عفست المدرسات والتدريس وما فيها طبعا ريحة العدالة أو المنطق

بس اذا هم اذكياء ويدخلون منتديات ويقرؤون ردود افعال المعلمات

راح يعرفون ان فترة صمت المعلمات وسكوتهم عن القرارات الخاطئة انتهت

واضح ان صاحبة الموضوع طلعت اللى كنت أفكر فيه من غير ما اتكلم عنه

شكرا

**************

السلام عليكم

كل المطلوب منكم أخذ خطوات عملية ،،، تبدأ بوفد يمثل المعلمات لمقابلة السيد عايض السهلي ، رئيس جمعية المعلمين الكويتية

أقترح عليكم التحرك مباشرة بعد انتهاء إجازة التحرير ،،، وبسرعة

فالكل سيدعمكم ،،، وحقوقكم مشروعة

توكلوا على الله

***************

بصراحة أنا متفائلة لأن جمعية المعلمين يعرفون القوانين أكثر منا احنا المعلمات

وواضح انه فيه أمل شرايكم معلمات​

 

[:: عائشه بقلبي ::]

توكلى على الله واحنا معاج

 

[دلع الشيخة]

عسى الله يعين الجميع

والله كل الي بهالمجال وبهالوزارة يعانونن الظلم

وماكو فايده من مشكلة لي اكبر منها

بس شاطرين يطبقون قرارات من غير دراسة

بس الله يعين الجميع يا رب

وانشاءالله تترقون كلكم وانا وراكم هههههههههههههه

وفكرتج حلوة بس منو يسمع ويطبق انسييييي

الله يعين الجميع