تحبين تسافرين مع زوجج ولا اهلج؟ ليييييييييييش؟

[الكرملين]

كيفكن صبايا المنتدى

السؤال واضح لو خيرتي بين سفره مع اهلج وخواتج او سفره مع زوجج شنو تفضلين؟


واذكرو الاسباب لاتنسون


بايات

 

[امون حبيبة زوجها]

مشاركة: تحبين تسافرين مع زوجج ولا اهلج؟ ليييييييييييش؟

انا للحين ماجربت السفره مع الزوج انشالله اذا سافرت اقولج
بس انا اغلب خالتي يقولون السفر حلاته بجمعه موبس انتي وزوجج يعني معاج بنات يروحون السوق طلعات مطاعم وهم يكون زوجج موجود مايمنع
وفي ناس يحبون مع ازواجهم
انا اتوقع مع بنات وجمعه واهلي اونس

 

[رفرف]

مشاركة: تحبين تسافرين مع زوجج ولا اهلج؟ ليييييييييييش؟

والله كل سفرة ولها مميزاتها ...
احب اسافر مع زوجي لأن السفرة لها طعم غير ...
واحب اسافر مع اهلي علشان اليمعة ...
بس ماظن راح اسويها واهد ريلي بروحه خخخخ علشان ياخذ راحته مع ربعه ويطلع ويرد بدون مسئولية ولا مواعيد وطلعات وقز لا ويمكن يسافر بعد يالهويييي لالالالا
انا اقول اسافر مع ريلي وايد احسن

 

[نفيشه]

مشاركة: تحبين تسافرين مع زوجج ولا اهلج؟ ليييييييييييش؟

احب اسافر مع اهلي طبعا
بس مايهون علي اهد ريلي

 

[brettey]

مشاركة: تحبين تسافرين مع زوجج ولا اهلج؟ ليييييييييييش؟

لا طبعا افضل السفر مع زوجي لان كل سفراتي مع اهلي تضيق الخلق نجره وصيحه لكن يوم جربت السفر مع زوجي وكانت معانا خالتي ام زوجي وحماتي كانت قمه بالوناسه لان ام زوجي تونس تحب الطلعات والاسواق وزوجي متفهم اي مكان ابيه يوديني له الله يخليه لي

 

[جكورة]

مشاركة: تحبين تسافرين مع زوجج ولا اهلج؟ ليييييييييييش؟

والله كل واحد له ميزته.. بس أنا أحب مع أهلي لأن زوجي مايحب السفرواذاسافر مايحب يتسوق أما أهلي أحسن لأن جمعه وتسوق...

 

[MaYoOoma]

مشاركة: تحبين تسافرين مع زوجج ولا اهلج؟ ليييييييييييش؟

انا ماحب اسافر مع اهلي لان مايحبون اليمعه والطلعات والاسوقه بس ياحبهم حق الاكل والمطاعم سفرتنا بس من مطعم لي مطعم جنى مجاعه هههه
احب اسافر مع زوجي لان اروح كل مكان واشوف كلشي واخر شي نفكر فيه المطاعم
يعني فرق بين سفرت اهلي وسفرت زوجي

 

[مي الحلوة]

مشاركة: تحبين تسافرين مع زوجج ولا اهلج؟ ليييييييييييش؟

بصراحة السفر مع اهلى حلوووو وناسة وجمعة مع خواتي واخواني وسوالف وضحك..
ونفس الوقت السفر
مع زوجي شيء حلووو..وطلعات وروحات..بس ما اقدر اترك زوجي واسافر مع اهلى لان زوجي بيتوتي وما يحب اكل المطاعم..

 

[bnt q8 in usa]

مشاركة: تحبين تسافرين مع زوجج ولا اهلج؟ ليييييييييييش؟

والله سفرة الريل غير ولها نكه جنج عروس
وسفرة الاهل وناسه ويمعه
والاحلي سفرة الربع صج وناسه مشكوره حبيبتي

 

[غدير^الجنان]

مشاركة: تحبين تسافرين مع زوجج ولا اهلج؟ ليييييييييييش؟

احب اسافر مع ريلي لانه بعمره ماسافر كلش ملش... فاستانس لما اشووفه مستاانس بالسفره

واحب مع اهلي علشان اصرف بلا حسااب هههههههههههههه

 

[زهور علي]

اكيد السفرة مع الريل احلى اثنين ومتفقين وين بنروح بس الاهل وايد وكل واحد يبي يروح مكان فتمصخ السالفة

 

[brettey]

طبعا مع زوجي الله يحفظه ويخليه اقدر اشتري كل الي بخاطري بعكس روحتي مع الاهل الي كلها مشاكل وصيحه ويقعدون يحاسبوني على كل شي اشتريه خصوصا الوالده الله يهديها ادري عكست النظريه بس والله يمكن اقولكم ماتصدقون عمري ماسافرت مع اهلي سفره استانست فيها كله نكد وصيحه بعكس سفراتي مع زوجي الحمدلله استانس معاه وناسه مو طبيعيه وساعات ايوون معانا خالتي وحماتي الصغيره تصير السفره اونس خصوصا انهم مو من النوع الي يفرضون رايهم والله سوري على كلامي عن اهلي بس بفضفض ومالي الا هالمنتدى

 

[gumasha]

رد: مشاركة: تحبين تسافرين مع زوجج ولا اهلج؟ ليييييييييييش؟

والله كل واحد له ميزته.. بس أنا أحب مع أهلي لأن زوجي مايحب السفرواذاسافر مايحب يتسوق أما أهلي أحسن لأن جمعه وتسوق...

نفس اللي تقوله جكوره
مع زيادة ان زوجي ما يحب السفر للدول الاجنبية، واذا سافرنا نغص علينا باللبس وغيره

احسن شي يا انا وعيالي او انا واهلي ... وخليه اهو مع الدوام​

 

[مُــنية]

كل شي و له مميزاته و عيوبه ..

يعني ما عندي مشاكل اسافر مع اهلي او زوجي بس مثلا اهلي مو نوعهم سفر و لا يحبونه و اذا سافروا ما يباعدون ..


زوجي يحب السفر الحمدلله و يحب التغيير و لو انه ما يحب السوق بس مو شرط يتسوق معاي ما عندي مشاكل . احسن الوحده تتسوق بروحها

 

[سبائك]

الصراحه كل واحد فيهم له ميزه

يعني مع الاهل وناسه ويمعه حلوه

بس لما صار عندي يهال صرت افتشل اروح معاهم

فشله يبتلشون باليهال لو واحد منهم يستمرض لا قدر الله ولا يصير فيه شي

ومع الريل بعد وناسه تصير الرحله بتخطيط مني انا وياه والاماكن على كيفي ههههههههههههههه

 

[شهدQ]

انا مع سباكه الاهل مايتحملون اليهال وواغ وويغ

سفرة الريل احلى بالنسبه لي ع الاقل احس انه مسئول عني وانا مالي شغل بشي عكس لو اروح مع اهلي لازم اكون انا المسئوله وابلشهم معاي !! ولا اليمعه ماتنعاف بس تكونين خفيفه بجنطة ملابسك بس من غير عيال !!

 

[الشايعية]

مع أهلييييييييييييييييي اكييييييييييييييد ولووووووو
نطلع ونستاس للفجر
وماهمنا احد صج تحسين انج مسافره مو مع زوجي حاط راسه ونام الساعه 10بالليل!!!!
يقولي ماكو طلعة كله خطف وحراميه... جان قعدنا بديرتنا ولا نخسر روحنا بفلوس التذاكر!!!!
اسكتي بس عالني عله

 

[محتارة]

مع اهلي .......

 

[لوكريسيا]

كل واحد له ميزاته
مع اهلي لان اليمعة حلوة و يتحملون عيالييي واااايد

و مع زوجي لان احب اسافر معاه و احس اني عروس حتى لو عيالي معاي .. بس هم ما يمنع لو تكون السفرة مع أهلي و برفقة زوجي

 

[ياسمينا]

مع الاهل احلى والجمعه احلى من تكونين بروحج
واذا كانوا يشجعون عالفراره والتمشي حلو
لكن الزوج اذا مايحب التمشي والتسوق تصير السفره غلقة وتضيق الخلق