تجمع مواليد ( مارس & ابريل ) 2014 الله يحفظهم

[لما ضاقت]

بنات منو مجربة تركب اسنان بورسلان ووين وكم كلفتها و شكلهم حلو و كم ضلوا معاها ادري اسئلتي وايدة بس اسناني منتهية على كثر الحمل و الولادة ما بقى فيهم شي ودي اسويهم كلمت ريلي و قالي ليش لا على يوم انسويهم انا مو مصدقته بس بنطر و اشوف فاللي عندها تجربة تقولي

 

[لما ضاقت]

بنات بسالكم عن شغلة اذا في فتحة بين الاسنان هل الحشوة التجميلية تسكرها و شكلها شلون يكون طبيعي و الا واضح خاصة من ناحية اللون

 

[Q8_QT]

عاد انا اصلا اسناني حساسة من غير شي بس ودي اسويهم ابي تبييض بسيط طبيعي



لما بالاسنان انا حدي ميح بس اللي اعرفه انه التركيب مكلف

 

[glby7sas]

مادري لما مااعرف والله

بنااات اللي سوت رجيم تقولي شنو كان رجيمها لاني قاعده انتفخ

 

[MOOON&M]

قلبي حساس

اول شي سوي تحليل هرمون الحليب قبل الرجيم انا كنت انتفخ بدون سبب واخرتها من هرمون الحليب

 

[baa6aa]

لما انا شفت بعياده ابتسامه كلينك ان يشيلون اقل من 1 مل من الضرس و يسوون لج طبقه قشره من ماده معينه و عقب يركبونها و يسكرون الفراغات و يسوونها لج ابتسامه هوليوود على قولتهم

ناويه اجرب ان شاء الله لان من الحشوات قالولي ماينفع لي تبييض راح يصيرون مرقعين الوان

وبالنسبه للتبييض في الليزر يكون مدته ساعه وخلاص
وفي القوالب تسويينهم بالبيت بس ياخذون مقاساتج و يسوون لج قالب على مقاساتج نفسها و يعطونج الماده على طريقه ابر انتي تفرغينهم بالقوالب و تخلينهم لمده 6 ساعات و ماتاكلين حزتها
وتكلفته 80 مع فتح ملف عندهم

هذا اللي اعرفه صراحه

وبالنسبه للرجيم اشتركت مع دايت كير و الحمدلله نزلت معاهم و مكمله على نفس النظام عقب ماخلص الاشتراك

 

[مآيكبرني نك]

مسآء الخير يآحلوآت

 

[baa6aa]

مساء النور ام منوعي

 

[لما ضاقت]

مشكورة بطة بس انتي مسويةًحشوات تجميلية اذا مسوية صج يصيرون نفس لون الين يعني ما تفرقين بينهم جنه سنك

 

[لما ضاقت]

اهلين ام منوعي وين غاطة انتي و منوعي

 

[لما ضاقت]

بنات بنتي تبي تزحف اسم الله عليها بس شايفين المجندين شلون يزحفون على بطنهم قامت تسوي جذي و ماذيتني كل شي تلاقيه بحلجها على طول

 

[baa6aa]

لا والله لما ما سويت
بس ودي اسوي
والدكتور قال في اللي لونهم طبيعي مو حيل بياض
عليج انتي و اي درجه تبين


بنات ابي افكار سهله حق ريوق و غدا ما عليكم امر
خصوصا اني ارجع من الدوام و لازم اسوي الاكل فابي شي سهل ما يطول .. و الاشياء الطويله اخليها حق الويك اند عشان يكون عندي وقت

 

[fofowa_q8]

مساء الخير بنات شلونكم؟

مون قصدج زيادة هرمون الحليب تمتن؟

انا قاعدة امتن ضايق خلقي

وايد ايوع بالليل وآكل فوزني زايد

 

[fofowa_q8]

بطه عندج اكاونتات الطبخ بالانستغرام

ضيفي افنانيتو عندها اشياء حلوة وخفيفة

الاشياء اللي تتسوى بسرعة اللي بالفرن

تبلي الدياي او اللحم او السمج قبل الدوام وحطيه بالثلاجة

بس توصلين البيت حطيه بالفرن وسوي عيش مشخول مايطول

والدقوس سويه من الليل وعندج الباستات هم ماتاخذ وقت

وهم عندج الخبز الراب انواع بمركز السلطان سوي فاهيتا

دياي او لحم او حسمة برجر مع مشروم وجبن

وبعد كلوب ساندويچ سريع توست وبيض وتيركي ومايونيز وخس وجبن سلايز

 

[حمرة الورد]

أهلين ام منوع شلونج

فوفو وينج جم يوم ماطليتي

افنانيتو لا مو حلو طباخها كله تخبص في طباخات شكثر بالانستقرام

 

[baa6aa]

مسويه لها فولو و مرات اسوي اشياء من شغلها و تضبط
وهم مسويه حق وايد اكاونتات طبخ
بس قلت يمكن عندكم شي غير

خصوصا اني عليميه توني ابلش بسوالف طبخ و جذي فبعدي ماتهورت بالعيوش و جذي
وهم انا ببيت حمولتي و طباختهم مناشبتني كل ماحطيت شي بالفرن خربته لي وعفست الدنيا لان ماعندي فرن بشقتي والحين بسويلي مطبخ كامل حقي
لان شاريتلي جولة عالكهربه كل شغلي عليها بمكاني من كثر ماطفرت من طباختهم

 

[fofowa_q8]

ليش حمره بالعكس في جم اكلة جربتهم من اكاونتها

طلعو حلوين عطونا الاكاونتات اللي عندكم

بطه الله يعينج انا مااحب اطبخ الا بمطبخي

ماتاخذين راحتج احس والطبخ يبي له مزاج

زين سويتي حطيتي لج مطبخ بروحج

 

[glby7sas]

لوول انا مو سالفه هرمون بس احس صايره مشفوحه عالاكل مو قادره اسكر حلجي خصوصا عالعيوش


بطه شوفي انا اطبخ بليل واحطه بالثلاجه واول ما ايي من الدوام اطلع الاكل وبس ايي ريلي اسخن الاكل وطعمه جني توني طابخته جذي احسلج

بالنسبه للطباخ وايد في طبخات سهله اذا تبينهم حق نفس اليوم عندج دياي بالفرن تبلي ديايه وحطيها بالثلاجه ووقت ماتبين طلعيها قبلها بساعه دخليها الفرن واهي بالفرن سويلج عيش مشخول معاه او عيش شعريه اسرع واسهل


عندج بعد قلي بطاط وفوحي ديايه ونتفيها مثل الشاورما وقصي بصل وثوم

بالقلايه ححطي البصل والثوم شوي ذوبيهمً مو يحترق البصل بعدها قطي الدياي المنتف لين يتغير لونه وحطي عليه فلفل اسود اشوي كركم اشوي بهارات مشكله وشوي بهارات الدياي وخلطيهم بعدها حطي فوقهم مشروم وذره وحمسيهم لين تحسين استوت الاكله صبي فوقهم اشوي كريمه مو وايد وملح
بعدها اباديه مالت الفرن حطي شوي زيت وصفي البطاط اللي قلتيه وفوقه حمسه الدياي وبقلاص حطي ثلاث قفشات جبن قلاص وخلطي الجبن مع الكريمه وصبيه فوق الدياي والبطاط خلصي قوطي الكريمه ونثري فوقه جبن موزاريلا غطي البايركس بالجين ودخليه الفرن بس يذوب الجبن طلعي ونثري فوقه زيتون وطماط الصغيره وردي دخليه لين الويه يتحمر وبس بالعافيه

 

[Q8_QT]

عندي اكاونتات طبخ اكل صحي آخذ منهم افكار

diet_factory@


my_diet_diary@


just_do_it_healthy@

 

[حمرة الورد]

ليش حمره بالعكس في جم اكلة جربتهم من اكاونتها

طلعو حلوين عطونا الاكاونتات اللي عندكم

بطه الله يعينج انا مااحب اطبخ الا بمطبخي

ماتاخذين راحتج احس والطبخ يبي له مزاج

زين سويتي حطيتي لج مطبخ بروحج

ممكن جم طبخه بس قصدي ماينفع حق الي تبي تتعلم الطبخ غير عن الاكاونتات الثانيه وشكثر صراحه عندها تخبص وخاصه انها أختي لووووول بالاسم بس