تجمع للي نفسيتهم تعبانة من تاخر الانجاب

[البيداء_77]

قوة بنات انا اكتب الموضوع وانا ويهي ناقع من الدموع ... نفسيتي اتعبت حيل مو قادرة كل ما تنزل الدورة ينقلب حالي

ولا يقولولي وحدة اولدت ومسوية استقبال ما اقدر اروحلها ولا اقدر اطنشها ... احسن انة موقفي خايس

واللة مو عارفة شسوي والي ينشفون ريجج بالاسئلة ويحرجونج

خلا احس اني فقدت الامل .......

فياريت يا بنات كل وحدة تدش اهني وتفش خلئها ونأزر بعضنا البعض ونرفع معنويات بعضنا البعض وكل وحدة تقول شنو اكثر شي يضايقها


اشرايكم؟

 

[q8q]

نا مومتزوجه بس حيت ادش وادعيلكم الله يرزقكم بالذريه الصالحه يارب ويفرح قلوبكم

لا يأسيين من رحمه ربج

 

[جبنة بيضة]

لا حول و لا قوة الا بالله لا تايسين من رحمة رب العالمين هو القادر على كل شئ اوصيج بالحاح بالدعاء

كلنا اكيد نزعل بس ما ننسى انه رحمة رب العالمين فوق البشر الله يرزقج و يفرحج و يرزقنا

 

[bnt_kwt]

ليش يا البيداء ليش اليأس ؟
توكلي على الله رب العالمين وحطي املج فيه واهو وحده كفيل فيج وفي حالتج

يا بنت الحلال تعوذي من ابليس ولا تخلينه يتغلب عليج بزرع اليأس لانج لا صرتي انسانه يائسه وما عندج غير الحزن والدموع والتذمر حتى ريلج بيمل منج وحياتج تصير رتيبه وممله

اختي me دعتج انج تشاركينا بتجمعنا وترا عادي يا وخيتي انتي مو اول وحده ولا اخر وحده ما عندها عيال انا حالي من حالج بس بصراحه احاول كثر ما اقدر اني اكون قويه واصبر واقول هذا اختبار والحمدلله على كل حال

ويا معوده على سالفه الناس ومغثتهم سمعي انا الاسبوع اللي طاف اشصار معاي
والله والله والله انه قلبي تقطع بس ما باليد حييله الحمدلله على كل حال

كنت زايره بيت يدت ريلي وكان عندهم ناس وانا وريلي رايحين واهناك كانت مرت خاله جدام الكل ما احشمت احد تقول حق ريلي ها مافي شي بالطريج قالها لا الحمدلله جان تقوله اخاف مافيك عيال ما اتييب عيال مثل خالك مع العلم انه ريلي ما فيه اي شي والحمدلله طبيعي وما عليه الا العافيه

تدرين اشقال لها ريلي قالها عادي حتى لو ما فيني عيال شنو يعني بموت عادي عايش ومرتاح ومستانس مع مرتي الله لا يغير علي اهو رد عليها ابرود اعصاب دقرها
بس انا احترقت رديت البيت ودمعتي بعيني وطبعا ما بينتها حق ريلي علشان لا يتضايق يا معوده لو بتهتمين بكل كلمه تنقال والله ماراح تعيشين من المغثه

الله يرزقج اختي ويفرح قلبج بس نصيحتي لج تبين الضنا والحمال لازم ما تيئسين وتفقدين الامل

 

[درر في مكانها]

الله يرزقنا يا البيداء الحمدالله على كل حال ترى الواحد ما بيده شي هي ارادة رب العالمين
وانا حالي من حالج والله ان قلبي يتقطع كل يوم بس الحمدلله احاول استغفر واتصبر لا وازيدج
زوجى معاملته مو اوكى ولا يدري عن هوي داري واحساسي واهو الي المشكله عنده وما يبي
حتى يعالج عندمستشفي خاص قاعد عالحكومه وشوفي المواعيد ولا يبي حل طبي انابيب او
غيره بالعربي قافل
والحمدالله علي كل حال واسفه علي الاطاله

 

[ღALNOoOoryღ]

حبيبتي البيداء مثل ماقالوا لك خواتي لاتيأسين ابد
ادعي ربك انه يرزقك بالذريه الصالحه ان شاء الله
والله يالبيداء فيه وحده من صديقات امي اعرست قبل امي ب3 ايام
تقول امي مابينا الا ثلاث ايام
امي ماشاء الله حملت عقب زواجها بسنه(( وجابتني)) وصديقتها قعدت 20 سنه ماحملت
ويوم ربك كتب لها الذريه حملت واللحين ولدها عمره 5 سنوات
كان اللحين ولدها كبري
تقول صديقتها مايوم قطعت الامل الحمد لله
كنت كل يوم اطلب ربي وادعيه
نصيحه يالبيداء صلي ((الشفع والوتر ووقت الدعاء ادعي ربك وانتي ساجده)) والله والله هالصلاة مفعولها عجيب
وبقولك سالفة وحده من معارفنا قعدت 15 سنه ماحملت وماخلت شي ماسوته ولافيه فايده
ويوم ربك اراد حملت وجابت ولد ومن طلعت من نفاس حملت بالبنت والله والله عقب البنت يمكن ب6 شهور حملت بتوم ولد وبنت ويوم طلعت من نفاس حملت في بنت ثالثه وهذي آخر شي
شفتي شلوووون حكمة ربك 15 سنه ماشافت العيال وتالي تبارك الله صار عندها خمسه ماشاء الله
صدقيني لاعلاج ولا غيره يفيد اذا ربك مو كاتب
مالك الا ربك تشكين له وتدعينه عسى الله يفرجها عليك وعلى جميع بنات ((تجمع الامل))وجميع بنات المسلمين..آمين يارب العالمين

 

[هندااا]

انا حاسة فيج يالبيداء لاني انا نفسج بالضبط.....وعلى سالفة استقبالات الولادة نفس حالتي أحس نفسي بين نارين ودي ماروووووح بس بنفس الوقت ماقدر لان الي يولدووون قرااااااااب حيل حيل حيل....وانا ماودي اروح موعشان انا محترة لاوالله ...بس اذا مارحت بيقولون محترة..انا ماودي اروح عشان هالناس الي مايحسون لا وتييج وحدة تقعد تفضحني بصوت عالي واتقول يالله الله يرزقج بعيال(( اوكي صج دعوة حلوة)) بس كل الموجودين راح يعرفون اني ماعندي عيال وتعالي عاد الاسئلة...الي اتقولي صارلج جم سنة متزوجة والي اتقولج ماعالجتي وغيرها من الاسئلة البـــــــــــــــــــــــــــــايخة الي اجاوب عليها واحس بغصة وإخذي عاد نظراات الشفقة والرأفه ...
:eh_s(2):
..اهما عن حسن نية بس موفاهمين ان الموضوع حساس ومايحس فيه الا الي مجربه..

عاد ولا المواقف الثانية الابيخ....فيه وحدة قتلها عطيني بشيل ولدج جان يصير ويها اصفر وتعطيني اياه وقلبها يرقع وقرت كل القرآن:eh_s(20):

مادري ليش كله عبالهم بننظلهم وبنصكهم عين....يعني صج الله مارزقنا بالعيال بس لوشنو مانحسد ولاانحط عينه على عيال احد....الله يسامحهم:eh_s(16):


والله لايحط احد بموقفنا لان المواقف هذي تحرقج حراق......:eh_s(4):

بس في ربي سبحانه ماراح ينسانا بس قاعد يختبر صبرنا مهما الوقت طول أكييد بيرزقنا من اوسع ابوابه....قولوا آمين عاجلا غير آجل:eh_s(8)::eh_s(7)::eh_s(8):

 

[^DanaH^]

ماقدرأعلق لان نفسيتي تعبانه .....

 

[البيداء_77]

me مشكورة يا قلبي كلامج مثل البسلم اللة يرزقني وياج الذرية الصالحة





q8q مشكورة على المشاركة واللة يرزقج الزوج الصالح






لين برايتن اللة يرزقني وياج الذرية الصالحة






bnt-kwt اللة يعينج على الموقف الي انحطيتي فية هذي صج ما عندها احساس بس لا تخافين الحوبة ما تتعدها اهم علبالهم انة سالفت الحمال بيدنا ويحسبون انة الي اللة يبتلية بسالفت التاخر بالانجاب عيب شرعي فية لاكن اللة يسامحهم عيل انا مرة ام زوجي قالت حق زوجي انة في وحدة ما تحمل جان يتزوج عليها ريلها جان تغار وتحمل
اللة يرزقني وياج وجميع البنات الذرية الصالحة بس ما تدرين شكثر رفعتي معنوياتي







درة في مكانها اللة يسخرلج زوجج ويعوض صبرج خير يا بعد عمري واللة قلبي معاج







سعودية ودمي عسل مشكورة حبيبتي على مشاركتج اللة يجعلة في ميزان حسناتج








هندااا من المواقف الى مريتي فيها جنج تسولفين عني لا هذا غير الي تكبر لا شافتني واللة ما ادري انها حامل الا اذا ولدت والي تشرب ولدها من قلاصي الماي عقب ما اشرب منة عشان ما انظلة اللة يسامحهم وكل واحد يرى الناس بعين طبعة









ام عبدالرحمن شدي حيلج انا واللة احس انة كلام البنات وايد ريحني وحسيت اني مو بروحي
ويا رب يجي اليوم الي اشوف كل البنات احملوا بالذرية الصالحة

 

[أحلى عيون]

شوفي يالغلالالا يمكن مثلي مافي وحده تعذبت ولكن ربي الحمدلله يبي يختبر العبد المؤمن يمكن كلامي شوي طويل لكن ابيج تقرينه كله للموعظه

شوفي يالغلا انا تزوجة وعمري 16 سنه امي توفت قبل زواجي وعشت عند مرت ابو الله يوريج وبعدها ربيت اخواني عندي 2 بنت وولد وطلعت من المدرسه علشانهم ولكن بعد ما جاني ولد عمي تدرين ابي افتك من العذاب على طول وافقت بعد ما خلصت من عذاب المرت الابو جت عذاب الخاله

انا ماراح استحي منج ولا من خواتي والله الشاهد اني ما قلت لاحد الا لكم اول زواجي ومثل ما تقولين بليلة الدخله قالي زوجي شوفي انا ماابي عيال ابي اكمل دراستي قلت له يعني شلون وانا كنت بنت ياهل ولا ام علمتني شي ولا اعرف شي يعني دخلت عمياني قلت له كيفك قالي راح اعطيج حقج كامل ولكن ما انزله داخل اطلعه بره شوفي غضبنا رب العالمين باول ليله من زواجنا وقعدت بعد هذي الشغله كل ما تتأخر الدوره علي زوجي يزعل وما يكلمني تخيلي وبس تجيني الدوره تعالي شوفي الهدايا والويه المبسوط

بعدها عشت عذاب ومرار 8 سنوات ما شفت الضنا حملت 3 مرات وما يكمل الجنين واجهض وبعدها عرفت انه معاي التابعه ومسقيتني مرت ابوي وكل مااسوي تلقيح صناعي 12 مره ولا ينفع احمل شهر وبعدها احلم بزوجه ابوي تجيني على هيئة ثعبان وتضربني وبعد يومين اجهض

عقبها جت خالتي تقول لزوجي ما تموت قهر لو تسمع واحد من اخوانك جاه ولد ولا بنت ولا خواتك زوجي ولله الحمد كان معاي ولا يرضى بسوالف امه تخيلوا يا بنات اهدتني خالتي بطانيه(كمبل) وخالتي مو من عادتها انها تجيب لي هديه استغربت وبعدها كل ماافرش الكمبل اتهاوش انا وزوجي ويضربني قلت له قالي توقعي من امي اي شي ، تزوج حماي وحملت مرته بعدها بيومين قاعده اشرب شاي انا وخالتي وزوجي تاخذ باقي الشاي من قلاصي ويوم عرفت قلت لها ليش يا خاله ما غسلتي قلاصي انصدمت اخذت منها القلاص وغسلته وبعدها اسمع من الحريم يقولون اني انا حاسده مرت ولدها وتبي تشربها من بقى الشاي الي شربته

لي رحنا للجمعت حريم يجون حريم غرب ويشوفوني كاشخه تساله وحده منو هذي تقول لها هذي مرت ولدي العاقر الي ما تخلف تخيلوواااا


وبعدها بعشر سنين ربي رزقني ببنتي كنت متينه والدكتور يقولي لازم تسوين رجيم وضغطت على نفسي والحمدلله نزلت 16 كيلوااا وبعد ما سويت العمليه التلقيح 12 رزقني ربي ببنتي الله يخليها ان شاء الله


وتعالي شوفي خالتي تهلي وترحب وانا الغاليه

وبعدها بثلاث سنوات رحت سافرت والله كان ما عندنا شي تسلفت ألف دينار من زوجة اخوي الله يطول بعمرها وزوجي كان عنده طراد وباعه ورحنا ولا علمنا احد وقلنا لهم سافرنا لسوريا واحنا بالاردن وسويت عمليه اطفال الانابيب وربي رزقني بولدي الله يحفظه لكن ولدي اتعبني حيل تخيلي خالت زوجي تقول والله عجيبه انج جبتي الولد وبالاربعين انا ويا ولدي بالمستشفى ارتفع عليه الاصفار ونمت معاه 8 ايام وبعدها بست شهور ترقد ولدي بالمستشفى نزل دمه وصار فيه انيميا والحين اعالج عليه لانه مافيه دم الله يشفيه يارب


اختي الغاليه ادري غثيتج وطولت السالفه ولكن كنت ابي اقولج والله انا يتيمه الاب والام وعانيت اكثر ومثل ما تقولين ما خليت شي ما سويته عمليات مناظير وحريم وتمريخ ولكن مااقول الا الصبر ثم الصبر ثم الصبر ومن صبر ربي يعطيه والله شوفي ربي رزقني ببنتي وانا كنت في المسجد الكبير وكان يومها ليله القدر والله والمطر على راسي بساحه المسجد كنت اصلي ورا الشيخ العفاسي واقسم بالله حماتي تقولي الحين تمرضين وانا ماارد عليها ادعي وابجي بالمطر وربي خالتي اسمعها تقول لها مالج شغل فيها خليها تدعي يمكن الله يرزقها بالضنى


وعليج بسوره البقره كل يوم كامله واقسم لج بالله انه كنت بالاردن العطله هذي وسويت عمليه اطفال انابيب وكنت كل يوم اقرا السوره كامله اخر الليل وربي اعطاني بويضات تبارك الرحمن ولكن قدر الله وماشاء فعل حملت واجهضت


اسفه يا بنات على الاطاله ولكن مالك غير الصبر ولا تحسسين زوجك اهتمي بنفسك وانسى سالفه الحمل انا كنت حتى ليما احط راسي على المخده كنت اتخيل نفسي شلون بطني ولكن قررت اني اهتم بنفسي ونسيت اني ابي عيال وقعدت 3 شهور نزلت وزني 16 كيلوااا وبعدها قالي زوجي يالله الحين نروح نسوي اطفال انابيب وربي رزقني بعد 12 مره


واخر شي اقول الصبر مفتاح الفرج

 

[senderela_78]

السلام عليكم اختى بيدا77
عاد انا ماصارلى سنه متزوجه ومن اول شهر وانا ينقط على كلام لراسى بدت بأن ام زوجى تبى اتزوجه وانا سج بجالى سنه متزوجه بس كل الى جعته مع زوجى 4 أشهر لانه يسافر وايد هدا غير الكلام الى ينجط اتصدجين ان اعز اعز صديقاتى كنت واقفه معاها بولادتها بالمستشفى ولما اولدت وطلعوها من غرفةالعمليات جالت حج السستر لاتيبين الجاهل وبعدها جالتلى سورى علشان العين بس :eh_s(11):ماجدرت ارد عليها وخليتها ومشيت وقلت حتى صديقة عمرى اتسوى فينى شدى صج خساره
على العموم هدا رزق من عند رب العالمين واذا ماعطانا هدا راح يكون بميزان حسناتنا انشاء الله:eh_s(9):

 

[irresistible]

لا حياة مع اليأس ولا يأس مع الحياة التفاؤل حلو الله يرزق الجميع انا صار لي 6 سنين متزوجة وما حملت و يوم حملت من شهر طرحت من 4 ايام صج ضاق خلقي بس الله مو كاتب

 

[الغــ مرت ــالي]

[frame="1 50"]يا بنات تفائلوا

وخلي شعارج في الحياة لا حياة مع اليأس

وإن كرهتموا شيئا فهو خير لكم

والله كريم يارب يرزقكم كلكم وبالاخير انا [/frame]

 

[البيداء_77]

زهرة^ربيع يا بعد عمري وايد تاثرت بقصتج ووايد زعلت واللة يشفيلج اوليدج يا رب العالمين وبدعيلة بصلاتي وصج اللي يسمع مصيبت غيرة تهون علية مصيبتة بس اسال اللة العظيم رب العرش العظيم انة يرزقنا كلنا ولا يحرمنا الذرية الصالحة


اميييين


سندريلا اللة يرزقج ولا يحرمج الذرية الصالحة



توتا اللة يعوضج خير بالمرة الياية


مرت الغالي مشكورة على المرور

 

[أحلى عيون]

الله يسلمج يالبيداء ويارب يا كريم ما يصير رمضان الا وانتي حاملوباقي الاخوات

 

[@الياسمين@]

والله انا بعد تجيني حالات احس اني صج تعبت
بس الامل بالله موجود ..... والحمد لله يمكن هذا اختبار من الله الله يصبرنا ويعوض صبرنا خير ...............
انا حملت ثلاث مرات بس الله ما قسمهم لي ,, والحمد لله على كل حال
وريلي راضي بقضاء رب العالمين
بس اسألة الناس اللي ما تخلص ... تخلي نفسيتي ميييييييييييييييح
ليش ما حملتي ؟؟واذا حملت وطرحت ؟؟؟ اكيد فيج . كيت وكيت ....

الله يرزقنا ويرزق كل محروم