&&>>تجمع لاولياء امور طلبه مدارس المستقبل <<&&

[البيداء_77]

يعطيكم العافيه وماقصرتوا والله..

ومبروك لجميع الطلبه المتفوقين..

انزين انابمشرف وقريبه من جنوب السره لوووووول مايصير ؟!

اسجل بنتي او واسطه مني مناك نييبها؟


ومشكورين ماقصرتوا

الله يبارك فيج يا عمري

لازم يكون عنوانكم على السلام في البطاقه المدنية علشان يقبلون تسجيل ولدج

 

[لوكريسيا]

السلام عليكم

شلونكم بنات

ألف مبروووووووووك تفوق عيالكم و عقبال الدكتوراه

طبعا ليلحين لا عرفنا موعد الحفلة و لا توزعت الشهادات !!!!!!!

أدري قاعدة أحن بس مو مني ملينا و احنا ننطر

 

[@ الرسامة @]

كل عام وانتم بخير حبايبي



بقى اسبوع ونخلص من التدريس ان شاء الله

 

[أم^تركي]

اللي تبي تسجل ولدها اخذي لامانع من المنطقة التعليمية التابعه لها قسم التخطيط
بغيت اسال عن عبد الكريم السعيد منو يفيدني
مشكورين

 

[مالفينيا]

الحمدالله يعني مو بس انا الي قعد اعاني من مدرسة ابو الفضل ماكو التزام كلشش مليت وانا اسالهم عن الشهايد والحفله ولا ااحد يدري
والناظره الللللله بالخييييير كلش مااتابع المشكله تقطج على صخرر ماتسمعلج الا اذا دزيتي ريلج
بصراحه ماتوقعت الاداره جذيه

سندريلا امبيه نفس ملاحظتي ريلي كله يقول انتي ليش ظالمه المره بالعكس تسمع وتحاول تعالج المشكله وتدور حلوول
بس انا ولا مره رحت خذت كلامي بجد كله مستعيله وتكلمني وانا يم الباب او يمها ترس ابلات وعلى الماشي تقول اوكي ولا يهمج خلاص عرفت الموضوع

انا مستغربه بعد:eh_s(1)::eh_s(1):

 

[النور الهادي]

بغيت اسال عن عبد الكريم السعيد منو يفيدني
مشكورين

نفس السؤاااااااااااااااااال

 

[ghadeeralnashi]

السلام عليكم
إعلان
إذا كنتي شارية كوبونات وامصوره يوم الحفل تقدرين اتراجعين المدرسة تستلمين الصور
مدرسة شيخان الفارسي

 

[مالفينيا]

امهات الفضل

خلاااااااص واخيرا قالولي الحفله بالنسبه حق اولى وثانيه وثالثه 1 /6

بس الشهادات عقب مادري ليش يقولون بنعطيكم شهادتين مع بعض لان في غلط في المهارات وهذا من الوزاره طبعا مافهمت شي

بس الي قدرت اعرفه موعد الحفله

 

[ساندريلا]

حبيبتي مالفينا امس سالتهم عن حفله اولى قالولي ان الحفله 13-5؟؟؟؟؟؟؟؟؟ انا سألت الوكيله
وبالنسبه حق الشهاده مليت وانا اسألها كله تقولي حبيبتي اسمحيلي احنا مانوزع الشهايد غلط يعني كل مدااااااااارس الكويت غلط الا مدرسة ابوفضل اهم الي صح عيني عليهم بارده
انتي متأكده انها 1-6؟؟؟

 

[مالفينيا]

شلون قالتلج 13 طاف هذا التاريخ

انا اليوم رحت وكلمتها وقعدت في بلعومهم ودشيت معاهم التدريب بعد وسويت لهم سالفه عن القميص والشعار ولدلاغ الي طالبينه ومخلينه مقطوط بالف محد سال عنه مادري ليش طالبين منهم

وسالفه الشهاده نفس الجي فيها غلط وقتلها الكويت كلها صح بس انتو قالت احنا دازين علاماتنا غلط وراح يعطونا عقب الحفله يمكن 22 / 6
يعني نستانس بالحفله وبعدين نكفخهم بالشهاده ههههههه

 

[ghadeeralnashi]

السلام عليكم
إعلان
نحيطكم علماً أن الداوم المدرسي مستمراً . ويمنع الغياب بدون عذز مقبول ومن يتغيب تطبق عليه لائحة الغياب
إدارة مدرسة شيخان الفارسي

 

[أم عزيـز]

بسم الله الرحمن الرحيم
السلام عليكم ورحمة الله وبركاته
قبل كل شي اكيد اللي عيالهم مدرستي ( مدرسة شيخان الفارسي ) أعرفني لاني ضمن القروب اللي موجود من تأسيس المدرسه الى الأن4 سنوات
معاكم ابله غدير الناشي معلمة صف 2-3
ودي ارد على بعض النقاط اللي اطرحتها أم عزيز ( اشمعنه أم عزبز ) لاني ادرس ولدها
1- في كلمة كانت كاتبتها إن تبي اتحفظ ولدها جدول الضرب من الحين عشان الابلات ((( الله بالخير )))
الرد: مو مدح بنفسي الحمد الله اولياء الامور كلهم يطلبوني بالإسم والكل يشهد لي وإذا كان في خلل مني تقدرين اتقابليني واتفهميني شنو قصدج بكلمة الله بالخير.
2-بالنسبه للمسجات
الرد: أنا المسؤوله عن خدمة المسجات في المدرسه يعني كل أولياء امورالمدرسه امخزن أرقامهم عندي , مدرستنا تتعامل مع شركة أسمها smaet2group من السنه اللي فاتت وأغلب مدارس الكويت بعد
هذا الكورس في خلل عند الشركة ( الخلل انه في قضية بين شركة زين والوطنيه) يعني الخلل مو منا وتقدرين تدخلين على موقع الشركة وتقرين عن هذا الخلل , وانا أعتقد إنه خلل المسجات بس هذا الكورس , وخلال الاسبوعين اللي طافوا تم ارسال مسجات للمسجلين بالخدمه ,ومدرستنا تحملت مصاريف الخلل وادفعت دبل اللي دفعتوه , وهذا لو اتلاحظين انه بالمدسجات نكتب اخر المسج مدرسة شيخان الفارسي.
بالنسبه لتأخر الشهادات:
الرد: احنا من اخر شهر3 تم تدخيل درجات الطلبه ولكن الخلل من النظام في الوزاره (يعني أمر الطباعه غير مفعل ) الخلل من الوزاره وليس(( مافي ميزانيه))
بالنسبه لأوراق المتابعة
الرد: إذا كان في خطأ في الورقه فإنه المعلمة تنبه الطالب عليه أثناء الحصة وإذا كان الطالب غيرمنتبه مع المعلمة كيف سيعرف أن هناك خطأ
وبالنسبه للتأخير في توزيع أوراق المتابعة , مافي انسان بالعالم مايمرض ومعلمة الاداب كانت مريضه لمدة 4 أيام وعندنا رجعت وزعت الاوراق , وكيف تقوم معلمة العلمي بتوزيع أوراق متابعة الاداب والمعلمة بالاساس لم تشرح الدرس!! مايصيرطبعاً
بالنسبه لموظفة الأستقبال :
الرد : الموظفة نادرة الغياب وإذا لم ترد على الهاتف فهي مشغوله مع أولياء الامور الموجودين عندها وإذا لم ترد في أوقات متفرقه يمكنك الحضور إلى المدرسه أما قبل الطابور أوقبل الهدة بربع ساعة
الواجبات
الرد:إلى الآن نعطي واجبات ويمكنك الرجود إلى الأجندة
بالنسبه لحفل التفوق
الرد:الميزانيه موجودة وشكر خاص لأولياء الأمور المساهمين بالحفل ولكن التأخير كان بسبب ارتباط المدرسة بندوات ومحاضرات وبرامج مدرسية والحفل يحتاج إلى جهد كبيرعشان يطلع بالصوره الحلوه اللي نفس كل سنه
والسلام عليكم ورحمة الله وبركاته

اول شي مشكوره اختي على التوضيح والتواصل وشرح بعض النقاط اللي كانت غايبه عنا
واللي كنا محتاجين نعرف تفاصيلها علشان نتأكد ان التقصير مو منكم
وهالشي كان لازم يوضح من البدايه والكل يعرفه علشان ما تنظلمون وينظلمون عيالنا

على العموم سالفه ان بعض الأبلات الله بالخير اقصد لأن اولى وثانيه وثالثه مافيها سقوط فبعض المدرسات ماياخذون الموضوع بالجد
والدليل إن الصف كله متفوق !!! بالله هذا كلام يدش العقل ؟

وعلى فكره انا لما تكلمت عن جدول الضرب لأني اعاني يوم كنت احفظ بنتي جدول الضرب الحين وهي بالصف الثالث في أسماء بنت عمير وفعلا الأبله مالتها ما تكتب في الأجنده الا مره بالاسبوع
والا بس تحط نجم فما اعرف نقاط الضعف او شنو المطلوب !!!

عشان جذي قلت بحفظه جدول الضرب من الحين لأني ما اضمن السنه اليايه
واكيد انتي معاي في إن بعض الأبلات مو كلهم كفائه !!! وهالشي محد يختلف فيه

اما انتي اختي ابله غدير فشهادتي فيج مجروحه لأن ولدي بالفعل دايم يمدح فيج واشوفه فاهم الدرس ويحل بروحه من غير اي مساعده مني

نروح حق نقطه ثانيه اذا أبله المواد العلميه غايبه تقدر الأبله الثانيه تاخذ مكانها
والله هذا الكلام اختي غدير مو انا اللي قايلته اول ما سووا لنا لقاء تنويري عن مدارس المستقبل اهم قالوا لنا هالشي وقالوا ان الأبلات يتساعدون في الفصل واذا وحده غايبه الثانيه تكون عارفه وين واصله وتقدر تراجع معاهم او توزع عليهم اوراق عمل يعني انا ما قلت هالكلام من فراغ ما ادري اذا اهم بالغوا علشان يقنعونا في نظام مدارس المستقبل لكن هذا اللي صار

وحفل التفوق فعلا تم لكن للأسف بعض اولياء الأمور ماكانوا متعاونين وبدال لا تصير الدعوه لشخصين صارت الدعوه ل4 أشخاص ومافي كراسي وزادوا الكراسي ما قصروا صراحه بس المسرح صار وايد متروس واكرر الخلل كان من أولياء الأمور وليس المدرسه

لكن انا اشوف ان تكريم اولى وثانيه ورابعه واااااااايد والدليل ان الحفله خلصت الساعه 1 الظهر تقريبا
يعني انا في هاليوم أخذت أجازة علشان اقدر احضر الحفله وما اضيق خلق ولدي
والحمدالله الحفله بشكل عام كانت حلوه واليهال استانسوا

بس في سؤال اختي غدير
انا غيبت ولدي هالاسبوع بناءا على كلام أبله مصريه كانت واقفه عند باب المسرح سألتها متى يغيبون اولى وثانيه قالت خلاص يقدرن يغيبون !! وهم اخوي سأل أبله صف ولده في 2/5 وقالت له يقدرون يغيبون

وخذوا الكتب من الصف وغيبتهم !! الحين توهقت يوم وصلني أمس مسج يمنع الغياب
يعني شنو الحل لأني عمري ما غيبت ولدي الا بعذر وهالمره يوم سألت وقالوا خلاص يقدرون يغيبون غيبته
يا إن الابله تقصد ان غيبيه عن يوم الخميس اللي فيه حفل تفوق خامسه
يا انها تقصد صفها !! ما ادري لأن الأبله ما تدرس ولدي بس أنا سألتها بشكل عام عن غياب المراحل اولى وثانيه وثالثه

 

[مالفينيا]

الله يعينا على هالمدارس الي يننونا وخسبقو اليهال والله ان ولدي زهق ويقول مابي حفله مابي هديه تعبنا كل يوم تدريب وتدريبهم صعب ويقول واي واحد يغلط تعالي شوفي الزف والصراخ ويطلعونه من بين الصبيان ويهزاونه وكل هذا بفلووووووووووسنا ههههههههههههههههه

والي اكتشفته ترى اليهال ملبسينهم بدلات راح يصيرون زلمات يعني لاروب ولا بطيخ وسالفه الورقه الي فيها دفعو حق روب التخرج طعت اي شي

 

[booba]

هاي بنات
شيخان متى نغيب عيالنا مللللللللللو الصراحه
انا بخليه يداوم لي الخميس بس

 

[أم عزيـز]

هاي بنات
شيخان متى نغيب عيالنا مللللللللللو الصراحه
انا بخليه يداوم لي الخميس بس

اليوم اخوي راح راجع المدرسه وسألهم

يوم دزوا لنا مسج امس لا تغيبون عيالكم
وقالوله ان في نسبة غياب نوعا ما كبيره لكن ما يبون يقولون لهم لا تغيبون عيالكم تدرون مسؤوليه عليهم
بس يقول فهمت من كلامهم ان باجر اخر يوم

لأن المنهج خلص وعلى فكره في حفل التفوق مال شيخان الفارسي سأل مدرسات الصف وقالوله خلص المنهج
بس تدرون في مدارس ماشاء الله عليهم يحبون يكون عندهم نسبه كبيره في الأنتظام
ومنهم مدرسة أسماء بنت عمير
اخر مدرسة تعطل مع اني اشوف هالشي مرات يضر في الطلاب خاصه اذا المنهج خلص ماله داعي حضورهم وقعدتهم من الصبح وخاصه الجو بدا يصير حار غير الغبار والسموم

انا بنتي في اسماء بنت عمير قالوا لهم تدامون الاسبوع الياي كله
عاد بخليها تداوم الأحد وبشوف اذا في نسبه غياب وايد بصفها بغيبها اذا في نسبة حضور بخليها تروح وامري لله

 

[مالفينيا]

الفال حق مدرسه الفضل


هااا امهات وصلت الدعوات على البركه اليوم وزعوهم بس مادري ليش بالانجليزي انزين احنا نعرف نقرا مساكين والي مايعرفون؟؟؟؟؟

وبعدين وقت الحفله عز الظهر شحقه حده الوقت مو شي من 11 لي 1 الظهر بعز الحر

 

[أم عزيـز]

الفال حق مدرسه الفضل


هااا امهات وصلت الدعوات على البركه اليوم وزعوهم بس مادري ليش بالانجليزي انزين احنا نعرف نقرا مساكين والي مايعرفون؟؟؟؟؟

وبعدين وقت الحفله عز الظهر شحقه حده الوقت مو شي من 11 لي 1 الظهر بعز الحر

مبرووووك عليكم وان اشاء الله تكون حفلتكم حلوه وتستمتعون ويستمتعون عيالكم
بس انا اشوف وقت الحفله زين الساعه 11 على الأقل تخلصون تاخذون عيالكم مره وحده
واكيد الحفله بالمسرح يعني ماراح تحسون بالحر ان شاء الله
وهم اذا بغيتي تستأذنين من الدوام تروحين الصبح والساعه 10 وثلث او 10 ونص تستأذنين وتروحين المدرسه

انا صراحه يوم حفلة ولدي في شيخان الفارسي اخذت أجازه
لأن الحفله كانت من 10 وانا دوامي بالأحمدي عاد قلت ما يسوى اطق درب وأستأذن
قلت اخذ اجازه وارتاح واروح الحفله على راحتي وفعلا ما كنت مستعيله لأن ما وراي شي

وماشاء الله عليهم شيخان كل مره يطلعون في فناتق العام خامسه مخرجينهم بلبس كباتن طياره كانت الفكره حلوه وحاطين لهم اغنيه حمدالله على السلامه صايره لايقه عليهم وعلى فقرتهم
وهالسنه روابع لبس بحاره حده زووغه ومرتب
وعجبتني فقره برشلونه احس اليهال مستانسين وايد بلبسهم

ان شالله بعد حفلتكم تكون حلوه ومستواها يليق فيكم وفي عيالكم

 

[مالفينيا]

مشكوره حبيبتي ام عزيز

انشالله مع اني حدي مو متفائله مادري ليش يمكن لاني اول سنه هناك وما عرف مستوى حفلاتهم

 

[Um Hasan]

محد يدري متى راح يعطون جدول الإمتحانات حق رابعة وخامسة ؟؟؟

 

[البيداء_77]

بنات انا ما اقدر اغيب ولدي لانه عليه انذارات وايد واخاف يفصلونة ومالي خلق اسوي مرضيات