هلا حبيبتي قصص شتي .. ومشكووره على الدعوه الحلووه والله يجزاج خيير ويوفق بناتج يااارب ..
انا راح ارد واتكلم بموضوع ولدي .. انا مو زعلانه لانه مو متفوق لا ياقلبي مو هذا السبب .. وارجع واقول انا برد سابق قلت لوانه مهمل وكسلان جان انا بنفسي وديته للحفل عشان يشد حيله ويشوف ربعه متكرمين .. بس ولدي اندرج تحت الفئه الي انظلمت بهالقرار التعسفي ( انا شرحت وضع ولدي بردي على سر )
وبصراحه انا لو احط نفسي مكاانج راح اتضااايق وااايد ومالومج والله .. بس الموضوع انتهى والحلفه خلصت والكلام ماعاد ينفع .. هني دورج انتي مع بناتج .. ابداااا ماحسسهم ان هالشئ الي صار ناتج عن قصور منهم ,, بالعكس اشجعهم اكثر واكيد انتي كتربويه راح تعرفين شلون تستغلين هالنقطه حق بناتج عدل
وارجع واقول انا معااج 100% بسالفه ان التكريم المفروض للكل اولا على جهوودهم طول السنه وثانيا يتكرمون المتفوقين ,, اهم شئ عندي الكل يتكرم .. والله العظيم كاااسرين خاطري هاليهال واعليه .. خصوصا اولى ابتدائي .. كرف وتعب ودروس وانهد حيلهم طول السنه وداوم للساعه 2 بهالحر ومواظبين لاخر لحظه واخرتها بحححح لاتكريم ولا هم يحزنون .. يعني لااهما الي كرمومهم عدل وبطريقه صحيحه ومافيها ظلم لاحد ولا اهما الي فكونا من هالتكريم كله .. للاسف هذي بالنسبه لي تعتبر كبوه في حق الرساله
لمن كلمتهم وقلت لهم ليش مو الكل متكرم .. على الاقل على جهودهم .. ترا هذيلا صغار توهم مايعرفون سالفه منافسه ومادري شنو .. هذا شئ ياثر على النفسيه يقولون لا بالعكس ..
انا استغرب من هالتناقض .. طووول السنه واهما يقولون اهم شئ الطفل اهم شئ نفسيته .. واخرتها اهم بتصرفهم هذا اتعبوا نفسيه اليهال وسببوله الاحباط ..
وانا همن كلمت مس سميه ,, انسانه اخلاقه عااليه .. بس همن ماعطتني حل مريح .. ونفس ماقالت لج قالت لي .. بس انا عطيتها اقتراحاتي والي بخاااطري كله قلته .. وطلعت وانا مرتاحه ..
وبالنسبه حق سالفه الفوضه والتقارير .. والله ياقصص انه امهات لمن توصلين وتنطرين دور يسالونج ام منو .. خوفا من انهم يدشون قبلج او شئ جذي .. وانا قبل لا ادش اسال فيه احد مسجل اسمه قبل اسم ولدي ( عامل الناس كما تحب ان يعاملوك )
بس مثل ماقلت وارجع واقول فئه قليله تكونين واقفه وتنطرين دور ,, والله جدام عيني واقفه وتووها توصل الاخت .. قلت يمكن كانت تفر على الصفوف مثل حالتي ,, دشت ولا تسالها المساعده اسم ولدج او بنتج جان تقول ماسجلت قالت لها مايصير الناس تنطر .. قالت لا عادي سؤال عالسريع ومادري شنو ؟ وين قاعدين !! هذي انسانه من الفئه الي اتكلم عنها .. يعني مالها شغل بالدور وحتى لو كان تحت تنظيم شخص الي اهو المساعده .. الي براسهم يسوونه
ثاني شئ .. فيه ابلات ماعندهم مساعدات بالصف .. مو معقوله كل شوي بتنط الابله وتشوف اسم منو عند الباب .. اهي كمدرسه تتوقع من اولياء الامور التصرف باسلوب تربوي وحضاري .. يمكن اهي كانت في مدرسه او دوله متعودين على القوانين والكلام الي ذكرتيه بردج .. فعبالها الكل مثلها ..
ومثل ماقلتي انا وليه امر .. حالي حال اولياء الامور .. بس بنفس الوقت مانرضا بالغلط .. وكلنا نحاتي عيالنا وننطر متى يوصل دورنا عشان نستفسر عنهم وعن مستواهم ومشاكلهم .. وارجع واقول انا قلت فئه قليله .. وللامانه فيه امهات قمه في الاخلاق والبقيه الله يهديهم
وكل مكان بالعالم فيه الزين والشين ,, وبنفس الوقت مايصير احمل المدرسات مسؤليه تصرفات اولياء الامور .. هذيلا كبار ومتوقع منهم انهم على درايه بكيفيه سير هالشغله واحترام الدور ..
واخيرا وليس اخرا...
كلمه لاولياء الامور :
الحمدلله الي شفنا عيالنا ينتقلون من مرحله لمرحله ,, وعسى الله يوفقهم ويرفع شأنهم ,, ويكتب لهم الخير ويجعله من نصيبهم .. والله يحفظهم ويخليهم لنا ويهديهم ويقر عيوننا بشوفتهم باعلى المناصب والمراتب اللهم امين
كلمه لمدرسات المدرسه :
بااارك الله فيكم وجزاااكم الله خير ,, على جهودكم وتعاونكم .. ومحاولاتكم المستمره في تحسين مستوى عيالنا ,, للامانه فيه ابلات ,, والله حسيتهم امهات لولدي ,, وغلاهم بقلبي كبير ,, والله من يطرون على بالي ادعيلهم .. والله يجعله بميزان حسناتهم ويوفق عيالهم ..
لكل معلمه ساهمت في تعليم ولدي حرف .. او كانت سبب في رسم ابتسامه على وجهه .. او ساعدته في وقت كان في اشد الحاجه للي يوقف معاه .. جزاكم الله خير الجزاء ورزقكم الجنه ,, وفقكم لما يحب ويرضاا .. والله ان اللسان يعجز عن شكركم .. ومهما اتكلم ماراح يوفيكم من حقكم الا القليل ..واسال الله ان يجمعنا واياكم على خير السنه الجايه وتكون سنه خير وسهاله باذن الله
كلمه لمدرسه الرساله:
اشكر كل شخص بذل جهد ولو بسيط عشان تكون المدرسه في قمه عطائها او ساهم ولو بالقدر القليل في راحه عيالنا .. واشكر الاستاذه سميه .. واقولج انتي الخير والبركه وعساج على القوه يارب .. ونتمنى السنه الجايه تكون احسن وافضل لعيالنا ولنا ولكم .. ويكون ولي الامر بالصوره بشكل افضل
والله يسامح الكل ان شااء الله .. انتهت السنه على خير باذن الله .. كافي طلعت اليوم من المدرسه وولدي معاي والابتسامه على ويهه واهو متعافي ومرتاح وابلاته مستانسين منه .. هذا بحد ذاته يسوى عندي الدنيا ومافيها ,, الله يحفظه ويشفيه يارب واشوفه السنه اليايه من احسن مايكون باذن الله .. والله يوفق الجميع لما يحب ويرضا ..
وسامحوني احبكم كلكم وكلنا خوات 
