تجمع اولياء امور مدرسة الخليج الانجليزية في السالمية

[ملكة بيتها]

شلونكم أمهات يعطيكم العافيه وأتمنى لكم عطله قصيره سعيده والأهم إنكم تسعدون نفسكم وتاخذون وقت لكم للراحه والمتعه ...
زوزو الحلوه ..الله يعافيج حياتي أنا خيرتها طلعتلها صور الشخصيات وملابسهم من النت وعجبها إنها تكون ice queen وبصراحه أنا إستانست لأنه نقدر نتخيل فيه أكثر وممكن يطلع معاي شي حلو وإنتي شنو قررتوا ؟؟وشنو الشخصيات عندكم ؟؟

الفرسان الثلاثه ؟؟؟ربي يوفقج بالقرار ويكتب لولدج الخير فيه ويوفقه آمين

 

[mr000]

سلام أمهات الخليج اشلونكم.. ملكه اشلونج شخبارج.. الفرسان الله يوفق وليدج وين ماقررتي تودينه والله يسهل أموركم وتقدرون تكملون معاه بالمدرسه..! والله ملكه بنشوف وين الله يكتب ونودي الصغيره.. عاد والله أمس شفت مرت حماي عندها عيالها 4 الله يخليهم بالخليج مابين الكي جي 1 وغريد 5أو4 وايد تمدح المدرسه ومستواها وتأسيسهم

 

[ملكة بيتها]

هلا مروو شلونج يالغاليه أمس كتبتلج رد وعلق المنتدى عندي وتوقعت وصل الرد بس طبعا ما وصل ..الله يسهل وتتوفقون بمدرسه زينه للصغيره سواء بالخليج ولا غيرها ..ودايما تطمنيني أكثر وأكثر من ناحيه المدرسه ربي يوفقج وين ما كنتي وبصراحه أنا وبنتي بعد مستانسين من المدرسه أنا لمست فرق وتحسن كبير باللغه عند بنتي

 

[mr000]

سلام أمهات الخليج.. شخباركم..موفقين ان شاءالله.. ملكه والفرسان اشلونكم.. أم مشعل ماقلتيلي عن اللي سألتج..وين باقي امهاتكم عزيزتي وروحي تحب...

 

[الفرسان الثلاثة]

وعليكم السلام هلا فيج الحمدلله انا بخير قررت اخلي ولدي بالخليج لين الله يقدرنا لان بصراحة مو متبله نظام الحكومه كتعامل مع الطفل و لا عندهم اسلوب للتدريس خيلي اليوم بيمعتنا نع خالاتي يسولفون عن عيالهم ان المدرسين بالاساس مو فاهمين المنهج و قاعدي بالامتحانات يصطرون الباب و يغششون الطلبه عشان تطلع درجاتهم زينه و طبعا هذا غير ان مافي اسوب يحبب الطالب بالدراسة عفية اتلوموني اني مابي ادخل ولدي الخاص؟؟؟؟

 

[الفرسان الثلاثة]

كلامي نصه بدليات لا تلوموني تالي الليل
خيلي = تخيلي
نع= مع
اسوب= اسلوب
قصدي لا تلوموني اني بدخله الخاص بعد ما جربتهم
وشكرا

 

[mr000]

عادي هذي بدليات تالي الليل..الله يوفق وليدج

 

[الفرسان الثلاثة]

الله يسلمج و الله يوفق ولدج يارب و بنت ولدج يارب اتحصلين لها احس مكان حقها ....
عيال حماج جم سنه صارلهم بالمدرسة؟؟ شتقول عن غالبية المدرسين فيها؟

 

[باونتى]

السلام عليكم .. شلونكم أمهات الخليج .. بنات ان شاء الله ناويه انقل ولدى من مدرسته اهو بكى جى 1 ومفكره بمدرسة الخليج بغيت أسألكم عن المدرسة ومعاملة المدرسات والشى الاهم شنو راح يسألون ولدى بالمقابلة بما ان اهو بيروح كى جى 2 ؟؟؟؟

 

[mr000]

سلام أمهات الخليج أشلونكم.. الفرسان مشكوره حبيبتي عالدعوه الحلوه والله يوفق عيالج.. الله يسلمج عيال حماي وحده بكي جي 1 وولد بغريد1 وبنتين أعتقد بغريد 3و4 أو 5 وكلهم داشين من الكي جي 1.. هي ماقالتلي بالتفصيل عن مدرسينهم بس تمدحهم بشكل عام وبتدريسهم وتقولي عن الولد لما كان بالريسيبشن كلش ماكان يتجاوب معاهم ولايكتب بالصف والمس وايد ركزت عليه واهتمت فيه وهالسنه بغريد 1 الحمدلله يشارك ويكتب وشاطر والمس وايد تشجعه بالصف!!يعني هذا دليل على اهتمام المدرسات بمستوى اليهال!!

 

[زوزو الحلوه]

شلونكم امهات شخباركم وحياج الله باونتي معانا وانشالله سهالات مع ولدج كله شغلات خفيفه مثل اسماء بعض الاشكال الهندسيه وتسولف معاه شوي تشوف مستواه بالانجليزي والله ما اتذكر وايد بس هالسوالف هذي والله المدرسه حلوه ونظامها وايد حلو والمدرسات ممتازات الصراحه المدرسه قويه من كل النواحي انشالله والله يوفق ولدج انشالله وتنظمين معانا انشالله.

 

[زوزو الحلوه]

ملكه بيتها شلونج شخبارج الصراحه وايد حلوه فكرتج واعتقد انج راح تبدعين فيها لان الشخصيه شويه صعبه الله يوفقج انشالله والله انا محتاره شنو انقي وولدي يقول ابي snow manوانا الصراحه حبيت فكرته واشوف مادري.

 

[الفرسان الثلاثة]

مشكوره يالغاليه مرو الله يوفق الجميع يارب انا الحمدلله مرتاحه من الكي جي والريسبشن و وكيلتهم وايد مهتمه ومتابعتهم وعلى طول موجوده وإذا عندج اي ملاحظه او شكوى تتعاون معاج .ولدي دخل من الكي جي فما عندي فكره عن مقابلة اللي بيدخل الريسبشن

 

[باونتى]

بنات انا قريت كل الصفحات وعرفت من خلال كلامكم ان المدرسة واايد تأسيسها قوى .. تتوقعون ولدى ينجح فى المقابله ؟؟؟؟

 

[mr000]

شوفي آنا عندي بنت ولد أختي كانت يايه من روضة حكومه مخلصه أولى روضه ودشت عندكم كي جي 2 مادري تسمونها ريسيبشن أعتقد المقابله مو صعبه وعادي انقبلت مع أنها ماكانت تعرف انجليزي ألا شي بسيط جدا جدا بس قالوا حق أمها حاولي تدخلينها معهد انجليزي علشان تتقوى أكثر وماحصلت معهد يقبل عمرها كلهم قالولها لازم 6 سنين ومشت معاهم بالريسيبشن.. بس حسافه أمها ردت طلعتها حق غريد 1 ودتها الحكومه وألحين متحسفه متحسفه حدها تقول فرق كبير بين الحكومه والخاص.. البنت حتى مو حابه المدرسه وترجع تبجي كل يوم!!

 

[الفرسان الثلاثة]

تنقبلين ان شاء الله لاتحاتين بس اتكلمي بالانجليزي وياه بالبيت عشان ياخذ عاللغه واتوقع يسألونه عن الألوان والأشكال - الكي جي بسيط و الريسبشن فيه شغل اكثر وايد- ولدج من وين ابتنقلينه؟

 

[باونتى]

مشكورييين : مروو , زوزو الحلوه , الفرسان , يعطيكم العافيه .. أنا ولدى بنقله من التكامل

 

[الفرسان الثلاثة]

العفو باونتي الله يكتب لج اللي فيه الخير حق ولدج

 

[mr000]

موفقه ان شاءالله

 

[ملكة بيتها]

السلام أمهات شلونكم ما شاء الله اليوم التجمع عامر
باونتي ..حياج الله بالتجمع ويانا وإن شاء الله نباركلج يوم قبول ولدج بالمدرسه معانا بالنسبه للإمتحان أنا بنتي إمتحانها لليير ون وكان عن أسماء الأشكال - الأوان - بعض الحيوانات - الأرقام وتعدهم طبعا
وعطتها بزل تسويها - عطتها ورقه تقراها - وورقه ثانيه فيها قصه وتأشرلها وتسأل عن الشخصيات في الصوره وشنو قاعدين يسوون - وورقه فيها أشياء وبنتي تكتب أسمائهم أو تكمله الأحرف الناقصه - قالتلها أسماء أشياء وسألتها شنو الصوت الأول واللي بالنص والأخير
وهذا كان بالنسبه لليير ون

زوزو الحلوه ... شكرا حبيبتي وترى سنو مان فكره حلوه بعد ويطلع معاج أشياء حلوه وإذا تبين مساعده بشي أنا حاضره وإنتي بعد إذا عندج فكره لشخصيه بنتي قوليلي ..