تجمع امهات 2008 حياكم

[الاستاذة]

هلا ام وجيه شنسوي والله مع هالجو الله يعين احنا يمكن انسافر مو اكيد يمكن نروح جم يوم لبنان اذا اهلي راحوا بس انا ماودي عشان زيونه توها عالسفر

مس شوقر الحمدلله على سلامة شوشو اي والله مرض الحمدلله على كل حال زين تسوين الله يتقبلها انشالله

 

[- ToTa-]

سلامون عليهم
اشفيها الديوانية مستمرضة الله يكافينا الشر مو قاعدة تتحرك خير شر يله يا بنات نبي همتكم شدوا حيلكم و شاركوا

الاستاذة حبيبتي الشر ما ييج... شفتي اشلون هالوليد اسم الله عليه ما ادري اشفيه امي تقوللي هذا كله من التسنين و يا ما لج بالحوسة و التعب الله يعين بس

شوغر تقبل الله مقدما و لا تنسينا بخالص الدعاء و عييلنا و اهالينا معانا ---وحدة طماعة هههه

 

[إستبرق]

اهلين الاستاذه والله المنتدى كله طاااااااااخ مو مثل قبل ما ادري شفيهم انشاءالله يكون خير والله يحفظ لج زيونه يارب



ام وجيه انا شكلي بعد ماكو سفره عاد والله في سفره خخخخخخخخخخخخ لانا كنا حاطين ورى الاربعين بس عشان استبرق لانها كانت تعبانه اسم الله عليها فقلنا خلاص شهر 4 بس طلع كل شهر مني لمده سنه عندها مراجعات وحتى زوجي الحين مايقدر ياخذ اجازه لي شهر 9



شوقر حبيبتي انشاءالله تروحين وتردين بالسلامه يارب وعيل روحي جده جم يوم مجمعاتها حلوه


الاستاذه هم اليهال الي رابطينا الله يحرسهم



توما والله المنتدى كله صخه والله يحفظ ولدج يارب انتي ارقي عليه

 

[- ToTa-]

هلا والله استبرق
والله اني دايما أرقيه و اقرا عليه و ربي يحفظه انشالله

 

[إستبرق]

هلا فيج حبيبتي انشاءالله مافيه الى العافيه يارب

 

[كويتيه وافتخر]

السلام عليكم


اشلونكم


شاخبار الصغار

شوقر حمدالله على سلامة شيوخه

تتكلمون عالسفر ماكو سفر ها السنه العيال صغار بس بروح عمره اسبوع وراده ان شاء الله

 

[- ToTa-]

هلا والله كويتية
والله انا اللي ود ودي اسافر و الف الدنيا لف هههه
بس شكلي مالي امل اليوم بلشنا صيفي و على ما اخلص ريلي يبلش دورته وييييييع

 

[إستبرق]

اهلين كويتيه وتوما شكلنا بس دوانيتنا بتقعد بالصيف بس عشان خاطر بيبياتنا يهون وانا بعد ما اقدر لان انشاءالله اذا الله كتب بطلع بشقه على هالشهرين فبخلي المصاريف لها لان انشاءالله ودي اخذ دور واكيد يبيله شغل واثاث والله كريم نعوضها انشاءالله السنه اليايه

 

[- ToTa-]

اي والله استبرق على قولتج كل شي لعيون هالكتاكيت يهون
و انشالله تلقين الشقة اللي تعجبج و تيي على هواج يا ربي

 

[إستبرق]

الله يحفظهم وامين يارب

 

[كويتيه وافتخر]

هلا
اي والله كل شيء علشان الصغار يهون

انا بس عمره وقلبي معورني بس شسوي خاطري بالعمره زوجي يقول خل نروح تايلند اسبوع ودبي وبعدها نعتمر قلت من صجك
مااقدر اخليهم اكثر من ها اليومين بس ان شاء الله السنه الجايه تتعوض مع ان السفر يشوق اشتقت للسفر

تهيء تهيء

يا الله الحمدلله عندي اللي احلى من السفر <<تهون على نفسها

 

[إستبرق]

كويتيه ويييييييييييي تايلند بس اسبوع عذاب الطريج يكفي كلش روحي دبي اسبوع اي ولا لبنان لان تايلند يوم الروحه راح يضيع ويوم الرده راح يضيع حسافه
وانشاءالله نعوض السفر
ووالله كل ما افكر اسافر قلبي يعورني بس ما اقول لزوجي لان هو بعد على طريف ما ادري شلون اخلي استبرق

 

[كويتيه وافتخر]

اقول استبرق ماكو الا نسافر سفره بالخيال
كل يوم حطي ببالج انج بديره لحد مايخلص الصيف قال سفر قال خل نقعد نربي ها العيال


بنات
انا زوجي هاب بالافلام وانا ما احب الافلام اللي فيها رعب وقتل مدري شسوي لوعت جبده كل يوم امنعه يشغل الافلام

يقول شسوي يعني تبين اروح دوانيه واطالع هناك ؟
اكره الافلام الحربيه والرعب وهو يحبها وعنده ستين فيلم مكتوب علي يتابعها يوميا وع
ابي شيء اجتماعي رومانسي <<عشتوا يا الرومانسيه
مسرحيات قبل
بس ذوقنا مختلف

خل اجابل النت وهو يجابل افلامه
وعاشوا المتزوجين خخخخخخخخخخخ

 

[إستبرق]

لووووووووووووووووول كويتيه عشان اموت قهر خخخخخخخخخخخخخخخخخخخخخ زوجي يقولي تبين نروح البحرين يومين قلت له لاااااااااااااااااااااا اقعد بالكويت احسن على الاقل هني حر مو حر ورطوبه


وي انتي عكسي انا احب افلام الرعب وقبل لازوجي يلتزم ويصير مايشوف افلام كنت ادوخه اقوله السينما رعب وهو نروح فلم رعب ولاهندي خخخخخخخخخخخخ تناقض والبيت اخليه يشتري افلام رعب وهو يخاااااااااف يظل يفكر فيهم خخخخخخخخخخخ
بس والله خليته قبل يحب الافلام الهنديه اذكر رحنا فلمين انا قعدت ابجي وااااااااااي احلى فلمين ويبجون لما شفته ولا هم هو فيه البجيه خخخخخخخخخخخخخخ لا ولقينا بواحد منهم اخوي ورفيجه بالسينما يوم طلعنا يقول لزوجي ها شكلكم اثنينكم حاطين الكننكس وتمشون بالدموع مثلنا
اي انا جذي ترى هو عندي يشوف القنوات الرياضيه ومباريات وانا اون لاين

 

[إستبرق]

واحسن خليه هو يشوف عندج
لا للدوانيات

 

[كويتيه وافتخر]

اي والله لا للدوانيات

بس ياختي ذبحنا بالخرعه كل شوي مصرخ ايه اذبحه حيلك فيه ويصرخ ويطق بيده عايش الدور


ماعلينا المهم مايطول بالدوانيه <<نحيسه



ماقلت لكم عن ولدي


لالالالازعلت عليكم ليش ماسالتوني عنه



ماراح اقول ليما تتحمدون لي على سلامته بعد عمري الحمدلله راحت الحراره بس لوتعرفون شسبه الحراره

 

[إستبرق]

لوووووووووووووووووول حده عايش الدور مسكين عيل لو الفلم ثلاثي الابعاد شنو يسوي خخخخخخخخ الله يخليكم لبعض

وي الف لاباس عليه والحمدلله على السلامه يارب وليش شنو سبتها ؟

 

[الاستاذة]

صباح الخير بنات شلونكم وشلون عيالكم

توما الله يعينج على الصيفي متى تخرجين؟

واي لا تكلمون عن السفر لاني انقهر( اهلي بروحون لبنان مادري شبسوي بروحي اهني

لوول استبرق وكويتيه انا دم ضروسي افلام الرعب ماحبهم كلش لا اخاف ولا شي انام مسكين ريلي كل مارحنا سينما انام بدعت

 

[أم وجيه]

صباحوووو
شلونكم بنات وشخباركم مع هالجو ديرو بالكم على البيبيات لا تطلعونهم خير شر

شقورة ان شاء الله مقبوله وتروحين وتردين بالسلامة آنا بعد بخاطري العمرة بس يا ربي الجو مرض

بس ان شاء الله بروح بأول 7 شكلي وأخلي فطوم ووجيه مع انه قلبي ما يطاوعني أبيهم وياي

الأستاذه شخبارج وأخبار زينه بهالجو

كويتية شخبار ولدج ان شاء الله تمام شصار عليه

توما الله يعينج على الصيفي

استبرق ان شاء الله تلاقين طابق زين ويكون خير عليج وعلى ريلج وبنوتج

باقي البنات شخباركم

همامة شخبارك وأخبار البيبي

 

[كويتيه وافتخر]

هلا

صباح الخير للكل والجميع واحلى صباح صحي وطيب وحلو بمثل حلاتهم لعيالنا الصغار


الاستاذه اشلونج سكتي طلعتي مثلي بالافلام ابدع
ام وجيه لا للسفر وراج عرس اخوج لي خلص العرس ميخالف روحي يومين ثلاثه الحين لا بيكون بالج مع العرس

وباقي البنات اشلونكم


وعلى ولدي حمدلله راحت الحراره والمضاد عطيته مره وحده جرعه وبس جان تقطعه امي
قولولي ليش ؟
الله يسلمكم ذبحته الحراره مو راضيه تنزل كلش ورحت الطبيب ماكو شيء سليم الولد لا التهاب بول تكرمون ولا شيء قال يمكن من التسنين ؟؟؟ مو معقوله
واروح لامي حبيبه القلب خذته ودته لوحده تعالج الصغار صراحه شعبي المهم اول مادخل عليها وكانت تسمع صوت بجيته من الصوت عرفت اشفيه قالت هذا طايح يمه المهم مسكته وسوت له حركه جان تقول ايده ممصوعه في حد شايله غلط وطايح الولد فايده انمصعت المهم رددته الله يجزاها خير يومين ورى بعض والله وارد البيت وينام ولدي نومه عدله وراحت الحراره وثاني يوم الا بقعه بظهره وقالت لي شفتي هذي دليل الطيحه

الحمدلله الولد الحين زين ورد لطبيعته يضحك ويلعب وينام مو مثل قبل بجي متواصل وحراره ماتنخفض

الزبده حرمت اخلي حد يشيله الا انا وناس اثق انها تعرف مو مثل قبل كل من هب ودب يشيل فيه مسكين ليما مصعوه وسلامتكم توته توته خلصت الحدوته