تجمع امهات مواليد شهر 7 و 8 لسنة 2010

[AVE.NJ]

ماشاءالله ام زاكي تبارك الرحمن
الله يرزقج انشاءالله
وانشوفج بكل القنوات

 

[AVE.NJ]

انه اليوم وديت فهود دكتوره سحر غنام
تعبت من الحساسيه اللي فيه وكله دكاترة الاطفال يعطونه كورتزون مليت
من كثر ماايحك يطلع دم
واكثر شي فيه حنجه ورقبته وتحت ركبته
دقينا على العياده وجان يقولون لي انه الدكتوره عندها مؤتمر
جان اقولها ضروري حالة خاصه جان تعطيني يومين
جان اقولها ماانطر قالت لي تعالي 12 الظهر وطلعت ريلي من الدوام ورحت
اففف على السكرتيره نفس جني رايحه ببلاش مو بفلوس
تقولي نطري كل اللي بالصاله وشافتني عصبت جان تقولي امشي اثنين وامشيج
جان اعصب زياده اقول لها انه ماارضى احد ياخذ دوري انه ماارضى اخذ دور احد
جان افضل النطره ولا اخذ دور احد
ملل
جان ادخل عند الدكتوره وايد نفسها حلوه وفهود اول مره يبتسم حق احد
ومارضت تفحصه قالت لي مدام يخاف خليه بحضنج
فقام يسولف وياها وعطته منظره ارتاح
جان تقولي حساسيه مزمنه اجزيما بس مايروح يخف مع الوقت
وانشاءالله يصير زين هالمره

 

[sara_77]

مايشوف شر فهود

 

[كتكوته22]

قوه بنات شلونكم ما شالله شغلج وايد حلو ام زاكي الله يوفقج حبيبتي
ايفا ما يشوف شر فهودي وكل البنات الي حملو الف مبروك والله يتمم عليكم بالسلامه

 

[ام زاكي]

حبايب قلبي مشكورين والله تسلمون لي

ايفا ولدج داري عليه كلل سبحه دهني جسمه بفازلين حتى لو خفت الاكزيما لانها تزيد مع الجفاف
والحين احنا بالصيف والله على الغبره الي كل اسبوع
حبيبي مايشوف شر

 

[AVE.NJ]

مشكورين بنات ماقصرتو

 

[فلافل وبطاط]

احلى مساء واحلى باك لاحلى تجمع

الف مبروك للحوامل ربي يتمم عليكم .. ويسهل ولادتكم
وولادة اللي واصلين شهرهم ..

والحمدلله على سلامة الوالدات والف مبروك ما ياكم ..

والف شكر للي اسألوا عني فديتكم ..

شلونكم وشلون ربع شيوخه بنتي ..؟؟

رديت شقتي ولله الحمد .. بس البنات شيخه وشهد خذوا
كل وقتي ..

وتو قبل اسبوع كانت ليلة دخلتي من بعد الولاده لاسباب
صحيه وتأثير الولاده والخياط الدكتوره عطتني بعد ٣ شهور
ضوء اخضر ..

زوجي يبي عيال وانا مابي الله يخليهم خل يكبرون وتالي افكر ..

شيوخه للحين ماعلمتها على روحت الحمام تكرمون ولا قطعت المميه

اخذت لها ايبود .. وميننتني فيه ..

وتموت على مسرحية ليلى والذيب ( هدى حسين ) ..

واتقلد واتردد الكلام وتلقط وبدت اتميز بين خوالها وعمامها واساميهم ..
وقاعده اعلمها الالوان و abc ، ما افكر ادخلها حضانه احسها صغيره
والروضه قالوا ياخذونها ٣ سنين ونص .. والله كريم ..

وحشتووووووووووني

 

[فلافل وبطاط]

ايف حياتي سلامته فهود

جان تذكرين شيوخه ما خليت مكان الا وديتها

اطلعت الاكزيما من المانجا ..

في وحده قالت لي ككاو موز مانجا ربيان بيض سمج
عطيها كل مره شي وشوفي يوم اللي تعطينها يحمر
مكان الاكزيما واتحكه واتعرفين من شنوو ..

والحمدلله منعت المانجا عنها وخفت خشونة الاكزيما والاحمرار
وارتحت ..

 

[كتكوته22]

هلا والله بفلافل وبطاط. توما تنور التجمع الحمدلله علي سلامتج ومبروك ما ياكم. ولهنا عليج وعلى سوالف يختي علي شيوخه الله يحفظها نفس فطومه بنتي ما علمتها علي الحمام ولا قطعت المميه احسها بعدها علي الحمام لان ما تتكلم عدل واما تقولي حزه الي فيها والمييه ودي اعلمها بقلاص بس مره وحده عطيتها وتلفتنا بالحليب تمشي وتكببه وتوها بدت تكرر الكلام الي ينقال بس طبعا الحروف كل بالمقلوب�� وتموت علي دورا. وصايره تعاندي اذا ببدلها اهي بتختار ملابس علي كيفها الحين جذي الله يعني عليها لي كبرت ويحلوهم بناتج حلو يصيرون ربع بنفس العمر ويلهون بعض الله يحفظهم ويرزقج بالولد ان شالله لا تقاطعين انتي تنعشين التجمع بسوالفج

 

[فلافل وبطاط]

يابعد قلبي منور فيكم التجمع .. ربي يسلمكم ويحفظ
عيالكم يارب ..

فديتها والله .. العسوله .. انا الله يسلمج الحروف مأساة

لدغه بالراء تصير ياء
والفاء كاف

 

[فلافل وبطاط]

بنات كرشتها مأزمتني تختووووخ .. كل شي اقدر اضعفه
الا بطنها هههههههههه فديتها ابي البسها حركات نفس
اليهال ماقدر ..

يا الله اعوض بشهوده ..

 

[برميت]

قوه بنات اشلونكم و شخباركم

فلافل الف مبرووك يا عروسه .. واي حدي احاتي الوضع اليديد

للحين ما هيأت نفسيتي
الحمدالله هالحمله اخف ..بس الحين دخلت السابع و بدا الثقل و الحارج و التتفخ

همي كله النيو لوك ..و من الحين انا مبلشه قاعده اسوي اسناني ..و شريت خلطات قاعده افرك فيها
باقي الطامه الكبرى الي اهي الوزن ..الله يقومني بالسلامه و استرد رشاقتي الي خذاها مني الزواج


شيوختي حدها كلبه تيسه ..صايره اتين و حركاتهم تذبح ..والله ابي بنيه بعد و بعد بنيه ثالثه ..يا حلوها ما ينشبع منهم

عليها حركات عياااره و تجامل

ذاك اليوم ابوها طرشها تييب جوتييه تكرمون ..و لما لحقتهل ي الغرفه علشان اطلع لها الجوتي ..جان تشمه ..و تعفس ويها و تقول وييييييييع ... انا غشيت عليها من الضحك ..و لما ودت الجوتي عند ابوها ..قلت حق ابوها قولها تشمه ..جان تشمه ..تااخذ شهيييق قوي و خشمها داخل الجوتي و تقول اللـــــــــــــــــــــــــــــــــــــــــــــه
واي متنا عليها من الضحك الكلبه

و ترقص بداوي .. بس تشوفها يدتي تغني لها يا غزال المها طبي تعالي ..و اهي على طول من تسمع الصفقه تركض و تنقز على ريل وحده و رافعه ايدها تشاوح فيها ...يمه يمه كلبه صايره اتينن

بس طبعا لا حفاضه و لا مميه قطيتها
مع انها تفهم و تعرف ..بس فيها فوبيا من الحمام .. حتى السبوح تبيج بجي علشان نسبحها

 

[sara_77]

بنات كرشتها مأزمتني تختووووخ .. كل شي اقدر اضعفه
الا بطنها هههههههههه فديتها ابي البسها حركات نفس
اليهال ماقدر ..

يا الله اعوض بشهوده ..

يقولون الياهل لما يكرش لما يكبر يصير طويل هههه

 

[sara_77]

برميت زين قطعتى بنتج انا بنتى الدلووووعه تخيلى لما الحين تبينا نمسك لها المميه عشان تشرب حليب تشوفنى اشرب اخنها الصغيره تبى نفسها حتى الفير تقعد تبى حليب نفس اختها وانا اشربها اذا قلت لها مسكيها تقطها تعصب وتبجى الغيره وماتسوى

 

[فلافل وبطاط]

سارا الله يسمع منج يااارب ..

وعندي وعندج خير الغيره عالمميه الفير تقوم اكثر
من اختها اذا طلت من سريرها شافتني ارضعها تقولي
ماما مميه ..

برميت فديتهم والله عسل الشيوخات .. وماعليج الصعوبه
شوي اول الايام بالاربعين لان خوختي مرتبطه فيني حيل
لا خدامه ولا شي .. وابوها مشغول ما كان يطلعها فجابلتني
وتأزمت ..
انتي حاولي يلهونها اللي عندج .. ودايم حطي بالدرج يمج حلاو
او ككاو او اي شي تحبه وكل ماتييج شيليها وعطيها .. واهتمي فيها

بعد الاربعين رديت شقتي وفديتها تساعدني على اختها عادي ..

ان شاءالله مافي تعب .. ربي يسهل ويهون عليج ..

 

[sara_77]

انا بنتى وايد تغافلنى وتعظها حبيبتى مريوم وكلا تطقها على راسها تخرعنى

 

[فلافل وبطاط]

سارا عيل شوفي اللي عندي .. فديييييييتها واذا عطتها مصاصه او مميه
وما اسكتت تناديني او اتييني ركض ..

طبعا انا اكون واقفه اراقب الوضع بس منخشه ..

 

[AVE.NJ]

فلافل ولهنا عليج
يختي يحلاة البنات الله يحفظهم ويخليهم

 

[AVE.NJ]

برميت انشاءالله انتي قدها
تضعفين وتحطين لنا صورة قبل وبعد
بس ارادة يبيلج
ولا تخربطين الا بالويك اند

 

[AVE.NJ]

بنات منتو ناوين تسافرون؟
انه نويت اروح بالصيف بس غيرت رايي وحجزت ثاني يوم العيد
بس احاتي اشلون استانس يوم كامل اشلون اكل فهود ونومة الظهر وماادري محتاره