تجمع امهات العالمية الامريكية

[bella bambina]

خوش تجربة ريمان عشان تحسين بمعاناة المدرسات والله أرد البيت مالي خلق عيالي مع ان عيال المدرسة مدلعتهم ووايد يحبوني

 

[Fouz]

مشكورة ريمان و انتي بألف خير ان شاءالله بس ترا اهو عيد ميلادي ال 20 لا فوقه ولا تحته

بيلا عيالج اسم الله عليهم بأي مراحل؟

 

[حضاره]

مساءالخير امهات العالميه00اشلونكم00

مرووو حبيبة قلبي عورتي قلبي على درجات ولدج00وبعدين الماث؟؟؟؟ يعني لا المدرس الاساسي يعرف يشرح ولاالتيوترينج؟؟

مادري شقولج00ضيقتي خلقي

 

[mr000]

سلام أمهات اشلونكم! فوز يحليلج صغيره حسبتج أكبر من 20 أنتي بعدج بالجامعه؟؟ العمر كله ان شاءالله الله يخليلج بنيتج ويهون عليج بالسلامه!آنا عندي مرت حماي كبري بس ليش متزوجه كبيره وبجرها عمرها 16 سنه وآنا ولدي عمره 26 فدايما تشوف نفسها أنها صغيره وآنا أكبر منها بالعمر بس عادي آنا بالعكس كله أقول أشلون لها خلق ألحين تحمل وتولد وتربي وهي فوق ال40!هلا والله حضاره... والله شقولج المشكله انهم اييبون امتحانات صعبه ومو كل المدرسين مستواهم قوي بالشرح يعني ولدي لو تدرسه مالت العام جان من أحسن مايكون والله كان ماخذ سيرتيفيكيت أنه Top on Mathالعام مو معقوله فجأه هالسنه ينزل مستواه جذيه ألا من هالمدرس الخواره! والله آنا لو ماكنت ناقلته توني العام وتوه تكيف وعرف نظام المدرسه وتعرف له على أصدقاء جان نقلته سنه اليايه الدوليه لأني صج أحاتي الهاي سكول أذا جذي مستوى مدرسينهم!

 

[Fouz]

صباح الخير أمهات و جمعة مباركة على الجميع

مرو 20 سنة هذا العمر الداخلي هههههه و الا الصجي عدا الثلاثين " هذا سر لا تقولين حق أحد"

انا كل رفيجاتي تزوجوا بالجامعة فماشاءالله عيالهم كبار، عاد كله اطفرهم جدام عيالهم اقولهم انا رفيجة امج بس ترى أمج وايد أكبر مني شوفي بنتي مادشت الروضة و انتوا بالمتوسطة هههه بس غشمرة مو صج، و صاجة كل ما كبرتي مالج خلق اليهال بس النصيب اذا تأخر ماكو حل الا الحمل بالاربعين، عندي اخت رفيجتي تزوجت عمرها 39 سنة عاد ماشاءالله يابت 3 يهال ورا بعض تقول قبل لا اوصل ال 45 بس ماشاءالله مجابلتهم عدل و اكو بنات على 20 و 22 ما يدرون عن العيال يا اما عاى الخدم او امهاتهم و يالله نفسهم ووناستهم


مرو بقولج شي، تذكرين سالفة الويب سايت و التلفونات اللي ما يردون عليها، و موظفات الاستقبال الدايخين، ما اقولج الوضع صار بيرفكت بس للأمانة اللي بالاستقبال الحين نفسها تهبل و الويب سايت قاموا يحطون فيه اخر الاخبار و حتى البدالة قامةا على الاقل يردون، ليش ما تكتبين رسالة حق المديرة و طلبي تقابلينها اذا ما حصلتي نتيجة من المسئول عن مرحلة ولدج،، ودي معاج شهادة ولدج العام و هم شرحي لها سالفة التدريس بالعربي ترى هذا من ابسط حقوقج، يمكن تحصلين نتيجة، لان مستقبل العيال وايد مهم و اذا ما تحسين ان في تطور هالشي ما يشجع بعد

 

[mr000]

سلام أمهات اشلونكم! هلا والله فوز سرج في بير لاتخافين بس آنا واللي يدشون المنتدى الأعضاء والزوار درينا وألا الباقي محد دراهههههه! وصاجه والله آنا استغرب من اللي من أول ياهل مالها خلقه وقاطته عالخدامه أو عاليده يعني ماربت 3 أو 4 يهال علشان تمل منهم وتتعب والمشكله مو بس باللي كله تطلع وابتستانس وألا بتسافر وتهد الياهل في نوعيه ثانيه اللي تظل على نفس طبعها وهي بنت يعني نوم لي المغرب ونوم لي الظهاري والياهل هذا بالطقاق عالخدامه !يابنت الحلال والله آنا وحده ماأشجع الزواج المبكر هذي مرت حماي ماتزوجت ألا عقب ماخلصت الطب وتخصصت وصارت استشاريه يعني والله انفعت روحها وبالتالي عيالها وبيتها بس هني بالكويت هالتخلف والنظره حق اللي من توصل 25 وماتزوجت بعدها والله خسبقت البنات خلتهم مساكين كل وحده ركض تتزوج من 17 و18 وسعيدة الحظ اللي الله يوفقها بزوج يساعدها أنها تكمل دراستها والا وايد منهم تضطر تطلع من الجامعه وتروح معهد وألا تروح دورات وألا أي شي بس تاخذ أي شهاده تتوظف فيها والمشكله بعد فوق هالتنازلات ومستقبلها اخترب وهم مومرتاحه ومشاكل مع الريل أو أهل الريل! والله الشهاده أهم شي وياريت النظره عندنا تتغير ويخلون البنت تدرس على راحتها وتحقق طموحها ولاحق عالزواج والشقى!

 

[mr000]

على سالفة المدرسه والله آنا بنطر هالريبورت اللي قبل الكريسمس بشهر 12 يعني أعتقد أكون نطرت 5 أشهر كافي علشان لما أتكلم لايقولون استعيلتي وتوه أول شهر أو شهرين هذا راح نص السنه ماشفت تقدم وانتي ذكرتيني بسالفة أني أكلم نوره الغانم ان شاءالله ماراح أخلي الموضوع! للأسف الظاهر أنه المدرسه تعودوا على أن في وايد من الأهالي مايهمهم تفوق الطالب المهم ناجح وينتقل للصف الأعلى ويمكن حتى مستعدين تالي يودونه يدرس على حسابهم سواء بالكويت أو بره المهم جدام الناس أنه تخرج من مدرسه أجنبيه ويعرف لغه!لأنه كل ماأقول حق ولدي قال والله الصف كله درجاته جذيه أعلى شي c بس 2 شطار ياخذون B! ويقولي أنتوا كله تخانقوني اذا نزلت درجاتي والصبيان معاي كل واحد يايب نفس درجاتي وأقل ويحصلون هدايا من أهلهم اللي نقال يديد واللي كمبيوتر أهلهم مايعصبون عليهم المهم موساقط!يعني يشوفني جني ظالمته وقاسيه عليه مو أنه شي موزين لما ياخذ درجه ضعيفه!

 

[Fouz]

أهم شي السر الدفين مرو كلش محد درى

كلامج عدل و اتفق معاج 100% انا كلوووووووووووووووووووووني لاني ما تزوجت، اصلا انا ما تزوجت الا لما خلصت الماجستير و ووضحت حق زوجي ان دراستي عندي بالدنيا و اني ماراح اوقف على الماجستير بس و بالعكس تفهم وضعي لان الاغلب كانوا ينحاشون ههه و يحسون ان شخصيتي قوية و بتصيربينا مشاكل، الغرق بين الزواج المبكر و المتأخر عندنا بالكويت 25 خلاص يالله يمديها تلحق مادري ليش هالنظرة ، يعني بالنسبة لي عشت حياتي مثل ما اتمنى قبل لا اتزوج، درست اشتغلت سافرت طلعت ماكو شغلة بخاطري ما سويتها ضمن الاصول، فلما تزوجت صدقيني عفت كل الاشياء اللي كانت اساسية عندي قبل لا لتزوج يعني صارت الطلعة اخر همي و رفيجاتي أشوفهم على فضاوتي يعني بيتي و زوجي و بنتي قبل كل شي، بس اللي تتزوج صغيرة تشوفينها عقب فترة تزهق من المسئولية ( مو كلهم طبعا) و تبي ترد حق حياتها قبل و شوفي شيصير بالعايلة ماتدري عن اليهال و الريل و حياتها حق نفسها ما جنها متزوجة، المشكلة يبون كل شي مع بعض يعني زوج و عيال و يكون عمرها صغير و تبي رفيجات و حرية و كل شي و تنام و تقوم على كيفها،، هالشي مستحيل يعني اكيد الخلل راح يبين حتى لو بعد فترة يا تشوفين مستوى العيال بالدراسة مو زين و الا اخلاقهم اختربت و السبة ماكو متابعة و غيرها من المشاكل

على سالفة المدرسة ان شاءالله اذا استلمتي الريبورت كلميها على الاقل تشوفين ردة فعلها خلها تعرف جوانب التقصير، اذا محد اشتكى ماراح تعرف و على قولتج اكو اهل ماشاءالله ما يهمهم شي المهم ينجح و كل شي يتدبر بس اللي يجابل عياله والله ينقهر على كل درجة، و ان شاءالله يارب تكون تقاديره زينة و يطمن قلبج


هاااا ماكو لندن؟؟ اذا لج نية اخذيني معاج محتاجة اكسجييييييييييييييييييييييييين و هوا نظيف،، قلت حق زوجي خلنا نروح اول الصيف خاصة ان رمضان هالسنة بنص العطلة، بس جنه متردد لان اذا الله قومني بالسلامة البيبي يكون وايد صغير، عسى الله يسهل مني الى الصيف نشوف شيصير

 

[Fouz]

يالله مرو الغالية انا رايحة زوارتنا

اتمنى لكم اجازة سعيدة و ان شاءالله نشوفكم على خير مع السلامة و لي عودة ان شاءالله

 

[bella bambina]

هاي أمهات اشلونكم واشلون عيالكم ؟
فوز بنتي الكبيرة بقريد 5 وولدي بقريد 1 ودلول كي جي 1
آنا تزوجت وعمري 23 بس ظلينا جم سنة نفكر نييب عيال ولا لأ والكل يقول حق زوجي يمكن مرتك ما فيها عيال ودها الطبيب تأكد مو مصدقين ان احنا مأجلين بس تحسفت الحين عمري 36 وعيالي صغار و ما أتحمل مثل أول وأغلب رفيجاتي أصغر مني وعيالهم أكبر من عيالي وافتكو مبجر من التدريس والتأسيس ووحدة منهم كبري والعام ماشاء الله زوجت بنتها وآنا لما أفكر اني لما أزوج عيالي أكون عيوزة يظيق خلقي غير الجيل اللي قبلنا يشوفون أحفادهم وعيال أحفادهم

 

[mr000]

سلام أمهات اشلونكم! فوز عذريني توني أرد عليج لأني طلعت من الظهر مارديت ألا المغرب ورديت طلعت مره ثانيه رحت الجمعيه! ماشاء الله على العيال يعني مجمع واحد مايكفي لا اشلون تردينا البيت من الساعه 4 أو 5 لازم نكمل بمجمع ثاني لي 7أو 8 أوف أكره عمري بهاليوم ماأحب أروح المجمعات بالويك أند! والله فوز هي النيه حق سفرة لندن على طول موجوده بس بنطر لي الأيستر وأشوف بس راح أييب أكياس أكسجين نقي أبيع عليكم! ومن ناحية سفرتج عقب الولاده والله آنا مرتين سافرت ومعاي بيبي عمره 3 شهور وأخوانه كلهم ولاريلي معاي ولاخدامه وعادي والله استانست بس مارحت مناطق بره لندن تالي بسفراتي الثانيه لما كبروا عيالي بديت أطلع بره لندن! فشوفي نفسج تالي وقرري والله يسهل عليكم!

 

[Fouz]

الله يخلي لج عيالج بيلا، و بالعكس انا اشوف عمرج وايد مناسب على عمر عيالج و بصراحة عمرها 36 و مزوجة بنتها جنها كبرت بسرعة و الشباب شباب القلب شوفيني انا واقفة على العشرين و على طاري التأجيل عاااادي انا ما فكرت احمل الا لما كملت بنتي 4 3 سنوات و نص تدرين شنو نغزات !!! اكو دكتورة نس وايد زينة و رفيجتي خذت كلوميد علشان تحمل لان مبايضها ضعيفة و انا ادري الكلام لي بس طناااااااااااش، انا حمالي وايد ثقيل زلال و ضغط و اخر الاشهر تسمم حمل و بنتي طلعت روحي على ما كبرت و طبيعة دوامي صعبة و قاعدة اكمل دكتوراة فكلش ماكو وقت بس شرهتج على اللي تشرح لهم اهما ينغزون و انا ابتسم طااااف

 

[mr000]

بيلا ليش يضيق خلقج ماراح تكونين عيوز بعدج صغيره يعني لو بنتج اسم الله عليها تتزوج عمرها 20 انتي توج 46 اشفيج لاتخافين ترى ال40 موعمر كبير والله آنا ماأحس أني عيوز والحمد لله عالصحه والعافيه متفرغه حق بيتي وعيالي ومجابله بنت ولديso don't worry! بالعكس والله الزواج مبجر يهد الحيل مسؤوليه وتعب آنا تزوجت عمري 17 اشحقه مادري كلش موسن زواج!

 

[mr000]

فوز زين تسوين هذي السياسه اتبعيها على طول بكل شي موبس بالحمال وراح ترتاحين وتسوين كل اللي تبينه ولاتعورين راسج بكلام أحد على طول ابتسامه وطااااااف!والله يوفقج بدراستج يارب وتاخذين الدكتوراه وجان أكو بعد شي أعلى أخذي حتى لو ماتبين بس نكاية في اللي محترين!!

 

[Fouz]

هلا والله مرو، عذريني المنتدى يعلق معاي قاعدة اقرا ردج و كل ما بغيت ارد يطلع لي ايرور

اي والله مرو بيعينا اكسجين انا شراية يا حلاة الهوا النظيف و ان شاءالله ربي يكتب لي سفرة حلوة و اذا مو هالسنة ان شاءالله يعطينا عمر و نروح السنة الياية

على سالفة الطناش والله الدنيا علمتني اذا بقهر اللي قاهرني أضحك لأني وااايد عصبية و كنت بسرعة استنفر و اللي يكرهج يتمتع يشوفج جذي تالي قلت لا والله الزم ما علي صحتي و انا اسوي اللي يريحني دام مو قاعدة اضر احد فابتسم و أطوف و أسوي روحي موفاهمة ههههه فاللي يبي يقهرني تلاقينه شب نار و الله يسمع منج و أخلص من دراستي و افا عليج نكمل ابحاث لما اصير بروفيسيرة

 

[caramella]

سلام أمهات
المنتدى عامر عامر الله لا يغير علينا
فوز الله يتمم عليج جنج تتكلمين عني ما طخوا الأوادم عني إلا يوم حملت حنه حنه ليش ما تحملين و تيبين إخو حقه و هم و آنا حامل ليش جذي مخليه فرق كبير بين العيال
والحين لما توفت بنتي ردت إشتغلت الحنه مره ثانيه توه صار لي شهرين وين يمدي أحمل مره ثانيه
لو قطوه ما يمديها تحمل قطع الأوادم ما عندهم إلا اللقافه
وما يراعون النفسيه كلش يعني آنا حالتي حاله نفسيتي صفر و هذيل إحسبون لي متى أحمل :eh_s(14):
آنا و زوجي مقتنعين ووجهة نظرنا إنه نخلي فتره بين كل ياهل و الثاني
أحب إن كل ياهل ياخذ حقه يعني يوم صار عمر ولدي 3سنوات و نص إهني فكرت أحمل بس عاد وين اللي يفهمون!!!!!!!
عقبال ما تكملين و تصيرين بروفسوره
زين سويتي إنج كملتي دراستج و منها للأعلى إنشالله
ومرووو حبيبتي تزوجتي صغيره شوفي نظرة هالمجتمع اللي ما ترحم شتسوي أغلب اللي تزوجوا صغار حرام الحين متحسفين إن ما شافوا دنيا ما تمتعوا بمرحلة الجامعه طلعه و بنات يالله بترد تركض حق بيتها و ريلها
آنا تزوجت عمري 22 الحمدلله يات على جذي مو أصغر لأن كانوا لما يتقدمون لي قبل عادي إني أتزوج بس كان عندي شرط إني ما أشتغل مدرسه و أغلب اللي يتقدمون لي يبوني مدرسه و آنا أرفض الوحيد ريلي اللي رضى مو إلا مدرسه بس خيرتي إشتغلت مدرسه سنتين و طلعت من التدريس فكه
الله يساعدج بيلا المهنه جدا متعبه
وبزواجي حيل تمغطت فيه
خطبه 4 شهور ملجه 3 شهور6 شهور يالله فكرت أحمل بولدي كنا مخططين على سنه بس تالي من حنة الأوادم شغلوها فيني و إشتغلت بالحنه على ريلي أبي أحمل لووول حريم ما منه فايده
لندن يا لندن إتصدقون إشتقت لها وايد شيشتوني
والله اليوم حدي حدي محتره من كثر ما شريت أغراض من لندن ما أدري وينهم أمس تذكرت شحاطه اللي الكعب مالها مفتوح ما لقيتها وهم شاريه قطار منظر حق الصاله ألوانه ألوان كرسمس وايد حلو و بعد ماغنيت بورد تتعلق بالمطبخ
عيزت أدورهم ما لقيتهم إهئ إهئ عاد آنا لا يضيع مني شي حيل إضيق خلقي
ما أدري خدامتي اللي كانت وياي بلندن كانت حاطه عينها عليهم و خذتهم و راحت بس أخاف و أقول ما أبي أحط بذمتي

 

[Oregon]

الله يخلي لج عيالج بيلا، و بالعكس انا اشوف عمرج وايد مناسب على عمر عيالج و بصراحة عمرها 36 و مزوجة بنتها جنها كبرت بسرعة و الشباب شباب القلب شوفيني انا واقفة على العشرين و على طاري التأجيل عاااادي انا ما فكرت احمل الا لما كملت بنتي 4 3 سنوات و نص تدرين شنو نغزات !!! اكو دكتورة نس وايد زينة و رفيجتي خذت كلوميد علشان تحمل لان مبايضها ضعيفة و انا ادري الكلام لي بس طناااااااااااش، انا حمالي وايد ثقيل زلال و ضغط و اخر الاشهر تسمم حمل و بنتي طلعت روحي على ما كبرت و طبيعة دوامي صعبة و قاعدة اكمل دكتوراة فكلش ماكو وقت بس شرهتج على اللي تشرح لهم اهما ينغزون و انا ابتسم طااااف

ماشاء الله حلمي اكمل دراسه شنو تخصصج و وين اتكملين الدكتورااه .. انا احس ماكو ارقى و لا احسن من ان الوحده اتكمل دراسه زين اتسوين وعسى الله يوفقج ..

 

[Fouz]

صبحكم الله بالخير ، الجو لندني اليوم عسى الله يتمم علينا، انا فاتحة الدرايش شحلاة الهوا ما شاءالله،، شفتوا كل هذا علشان عيد ميلادي هههه

كاراميلا شخبارج حبيبتي، و بقولج شي اذا يتسمعسن من الناس والله ما تخلصين، انا اسوي اللي مقتنعة فيه و عساهم عمرهم ما رضوا، و على الحمال اهما شكوا ياربي هالشي بين الوحدة و زوجها، انا حتى أمي ما تدخلت أعوذ بالله من هالبشر، و ان شاءالله ربي يرزقج بالذرية الصالحة اخو أو اخت حق وليدج الله يحفظه و يمكن توم و صدقيني ما يرحمون، انا نوعي ازيد بالحمال 20-25 كيلو من الزلال و الماي فوالله القومة و القعدة علي بالحسرة، الاسبوع اللي فات وحدة شافتني جان تقولي وااااي شفتج اخترعت!!!!!!!!!!!!!! قلت لها ليش فيلم رعب؟؟؟ و للعلم صار لها سنين متزوجة و ما الله رزقها عيال عاد يوم مصختها جان اقولها لو حاصلج تصيرين درام علشان تييبين ياهل ماراح تمانعين و شكلها زعلت، بصراحة ما احب اجرح احد بس اكو خطوط حمرة اللي يتعداها يتحمل اللي اييله، الوحدة بالحمال بروحها حساسة يعني يا تقولين كلمة سنعة يا سكتي
و المشكلة الثانية،، هااا جم لج متى ولادتج بنت والا ولد بتسوين استقبال وين بأي مستشفى ....الخ، اسئلة المفروض ما تيي من احد بعيد، بس ماكو فايدة يموتون و يتدخلون، و انا لاني اورم علبالهم باجر بولد و قاعدة اجذب، الحمدلله و الشكر ناس فاضية، تعلمي تطنشين كاراميلا بس اللي يجرحج لا تقصرين فيه عطيه المقسوم
أغراضج ان شاءالله تلاقينهم، تذكرين الملف الصحي مال ولدج دورتيه و لقيتيه، دوري مرة ثانية و ان شاءالله تلاقينهم و اعرف هالشعور ما احب يضيع مني شي و خاصة يديد أنقهر

شوفوا يبيلنا تجمع امهات العالمية في ربوع لندن شرايكم يا حلاتها هالديرة لها مكانة خاصة ذكريات عجيبة و ان شاءالله تنكتب لي روحة لها



Oregon صباح الخير عاد مادري عندج صبح والا ليل
انا تخصصي Analytical Chemistry و أكمل بجامعة الكويت العصر Part Time Student و ان شاءالله يتحقق حلمج صدقيني دامج تبين راح تكملين، تخيلي انا يوم ملجتي عندي امتحان لي الساعة 6، و قالي الدكتور اجليه قلت له مابي ، ابي افتك و استانس على الاقل شهر قبل الكورس الثاني، يعني اللي ما يبي اكيد بيطلع له عذر انا تزوجت و حملت و ما عندي وقت بس الحمدلله الله يعطي الواحد على قد نيته و ان شاءالله ربي يسهل لج و تحققين اللي في بالج

 

[mr000]

سلام امهات اشلونكم!!قلت اسلم عليكم قبل لا اروح أغوص بالملابس والكبتات بشيل الصيفي واحط الشتوي اليديد! عندي ولد كلما يدش البيت بايده اكياس هدوم يدد هذا غير اللي يايبهم من سفراته دبي والبحرين والله مالوت العام مالبس نصهم لا واخوه يشجعه يقوله استانس بمعاشك باجر تاخذه المره تحطه كله على جنطه وانت تطالع وتسكت! والله حرام جذي عيالنا مايعرفون الاقثصاد بالمره!كراميلا اشلون ولدج مع المدرسه؟ آنا ببتدي آخذ جوله بالحضانات حق الكورس الياي ان شاءالله! وعلى سالفة الحمال ماعليج خل يحنون لي يتعبون شنو جسم المره مو من حديد ارتاحي شويه لما الله يكتب لج ان شاءالله تحملين! ياربي صج العرب مانيوز عن طبع التدخل بخصوصيات الناس بس لي قلتيلهم كملوا دراستكم والا دشوا دورات والا ثقفوا نفسكم قالتلج ويين جانزين ماعندي وقت بس عندهم وقت حق التلفونات والحجي والنتبش بحياة الناس!

 

[Fouz]

هلا مرو ،، انا اشوة امس افتكيت من أغراض بنتي و وديت اللي يبيلهم دراي كلين، لاني ابي وقت أجهز اغراض البيبي قبل الثقل فقلت ارتاح من شغلها تالي اتفرغ حق السوق شوية

و التدخل في شئون الغير احد المقومات للحصول على الجنسية، ناس فاضية عسى الله يلهيهم في روحهم