تجمع المسافرات الى اوكرانياا للعلاج الطبيعي(دمج جميع المواضيع المشابهه)

[الذوق]

الله يعين ... هذا اللي خلاني ما اروح لها النفسيه تلعب دور .. العام كنت بلندن ولندن سياحيه وتمشي ومطاعم على كيفج والعرب شكثرهمما تحملت ما قدرت اقعد اكثر من شهر ونص مع انهم قالوا لي من 3 الى 4 شهور بس ما قدرت شلون هناك يمكن ارجع من اول اسبوع ..

 

[MALAAK22]

هلا والله بالذوق تمام بخير دامج بخير انتو طلبتو تغير الدوله ولا اهم وقفوا اوكرانيا؟!!
بنوته 1 انا معاج انه وايد ناس قالو اوكرانيا احسن من التشيك كعلاج وكمده اسرع بس بالنتايج خنكون صريحين التشيك واوكرانيا نفس الشي وانا كنت اتمني الدوله تشوفلنا مستشفي او مصح في فايده كبيره لعيالنا لو حتي وين مايكون مو يختارون الارخص او دول معينه فقط لاغير؟!!
او عالاقل يدرسون كل حاله طفل غير ووين العلاج الي يشوفونه مناسب له!!
مو كل الحالات علاجهم نفس الشي مثل ماشفته باوكرانيا وبصراحه نصدمت من هالشي!
الي مايحبي او مايقعد او مايمشي كلهم نفس العلاج مو معقوله!! وانا ما انكر محد شاف فايده بس عددهم قليل وفايدتهم بنسبه بسيطه لاتذكر!
يعني خساره حق الدوله مطرشه قروب كامل والاغلب ماستفاد لو انهم دارسين عدل وين كل واحد علي حسب حالته كان افيد للدوله وللمريض
غير هذا ماسألتي نفسج ليش ماقالولكم عن البدله؟؟؟! ومحد ياب الطاري الا لمه شفتي بالمجله وسالتيهم وسواو روحهم مايدرون وماردو عليج؟؟؟!!!
لا تعليق بس لو كانو يبون الفايد لعيانا جان اختارو المكان المناسب والعلاج المناسب
انا مابي اطلع كلام اكثر من جذي لانه الكتاب مبين من عنوانه

 

[الذوق]

تمااام والله الحمدالله ... احنا طلبنا نغير الدوله ... لانا كلش ما ارتحنا لاوكرانيا اصلا ابحثي عنها بقوقل محد يمدحهااا كلش .. وصاجه خساير عالفاضي .. بس عالاقل التشيك من زمان بهالمجال ومعروفه بالعلاج الطبيعي اما اوكرانيا تو هبوا فيهااا ... ما كانت معروفه ..

 

[بنوتة 1]

ملاك 22 والله ما ندري شنو ورا المسؤليين خلينا جذي واايد اريح مانفهم بهالامور يمكن كلامج صح ما اقول غير حسبي الله ونعم الوكيل والله مو عارفة اتكلم بالموضوع لانه يتعب حيييل اذا صارت التجارة بالمرضى

 

[ورود11]

اهلين اختي الذوق الله لا يهينك بغيت اسئلك انتي على الصحه ولا الداخليه
ووشلون طلبتي التشيك؟يعني هم يعطونكم اختيارات؟
وابي اسئلك ماتعرفين كم مده يعطونك للعلاج في التشيك؟ لن صراحه لجنة بنتي الاربعاء وانا صراحه ابي التشيك لني مرجبتها من قبل علاجهم مره ممتازبس خايفه لايكون المدة قصيره ؟؟
بنات الله يجزاكم خير اللي مجربين العلاج الطبيعي في اي دوله وشايفين انه ممتاز يقولون لانا لن بنتي مالها الاا العلاج الطبيعي لن حاله اعاقتها ناااادره مره
وهم عندي استفسار الله يعافيكم حبيت اعرف فيه احد منكم جرب مركز الامبر سلطان با الرياض؟؟
ولا سمعاو عنه؟انا صراحه رحت اه السنه اللي فاتت وسوو لبنتي فحوصات وقالو يلا دخول وتكلفة العلاج مع مرافق والا اكل 45الف ريال لمدة شهراناصراحه انصدمت قلت لاماراح ادش لن ها المبلغ يقعدني با التشيك 3شهور وعلاج انا مجربته وضامنته
بس الحين ابي اسئل احد عنده خلفيه عن ها المستشفى؟ولا شلون العلاج الطبيعي فيه اذا الله سهل ومشت موافقة بنتي اروح له ولا اروح التشيك؟؟
الله يعافيكم اللي عنده معلومه لا يبخل علينا تكفون

 

[ســلطانه]

اختى وروود شلون العلاج فى التشيك

والله يشفى بنتج

 

[الذوق]

هلا والله اخت ورود ... انا عالصحه لا ما اخترت اهم عقب اللجنه بلغوونا انهم وافقوا وبيودونا اوكرانيا لان حتى انتي لو بيوافقون بيودونكم اوكرانيا لان هابين فيها هالايام ..بس احنا بعد ما ضمنا الموافقه طلبنا لجنه للتغير الدوله وطلبنا التشيك ووافقوا عليها الحمدالله .. انتي كنتي باي مصحه هناك .. والمركز اللي تقولين عنه ما سمعت فيه والله ..

 

[ورود11]

اهلين اختي الذوق-
انا كنت اعالج بنوتي في لتشيك بمدينه تبليتسا واسم المستشفى- نيوفي لازني-للاطفال وفيه للكبار مستشفى الحجري ومستشفى دوبي واخر مره جيته كان سنة2004بس صراحه علاج علاج بس انج تكونين منتبهه وتختارين الا خصئايه الممتازه ورحت بعده المانيا وامريكا والحمد الله على كل حال على الاقل عرفت ان بنتي مالها الا العلاج الطبيعي وهلحين احاول امشي اوراقها على التشيك والله يسهل يارب لني المرات اللي فاتت كنت على حسابي اسافر بس كانت التشيك رخيصه مو نفس الحين يقولو طارت الاسعار ياليت تقولين لنا عن الا سعاراختي الذوق ووين ساكنه وبجم السكن اي عماره ساكنه وتبع اي مكتب
وبا النسبه عن مدينة الامير سلطان الطبيه لا ياقلبي هي معروفه وكبيره وفيه ناس يمدحونها بس المشكله انهم سعوديين وفيه بعضهم ماجرب العلاج با التشيك عرفتي فماادري هل اهي احسن او التشيك
على العموم اختي الذوق اتمنا تردين علي وانشاء الله ايمشون اوراق بنتي واجيج هناك=


الله يعينج عليها بتولاج بااسئلتها تراها دقيقه>>>>>>:eh_s(6):

 

[الذوق]

لا عادي شدعوه انا توليت ناس قبلج بعد لاني اول مره اروح .. اشوى الحمدالله انا بنفس المصح نوفي لازني ..انا للحين ما رحت بعد اسبوعين انشاء الله بروح ... اذا وافقوا عليكم متى بتروحون تقريبا ... ترى انا مقدمه من شهر 2 وتو وافقوا عليهااا شوفي كم شهر نطرناا ... ومن الاخصائيات الزينات هناك اللي توصيني عليهم انا ولدي بعد ماله الا علاج طبيعي ... واخذي راحتج اختي بالعكس انا ارتاح لما احس اني ريحت غيري ..

 

[ورود11]

اهلين اخت الذوق الاخصائيات والله ناسيه اسماهم وبعدين يمديهم تغيرو قبل5سنوات اذكرهم
يعني انتي للحين با الكويت يعني ماسافرتي؟

اذا بعدج ماسافرتي ياالغاليه يلغيني باقول لج على احسن سكن ويكون قريب من المصحه وباقول لج عن المكتب اللي نتعامل معهم من سنه 200 للحين ولاالامانه معاملتهم طيبه مع الناس وخص الكويتيين وارقمهم عندي اذا تبينها وتوني مكلمه عليهم قبل سبوع تكلمينهم قبل تسافرين وتبلغينهم بموعد وصولج وتلاقينهم ينطرونج با المطار مطار براق ويودونج يدورون بج على الشقق لين تختارين اللي يعجبج
على العموم اذا انتي لسه با الديره بلغيني ولا بعد يمكن نتخاوا احنا وياكم

 

[بنوتة 1]

هلا والله اختي ورود11 انشاءالله يوافقون على لجنة بنتج بس ما عرفنا شلون اعاقة بنتج نادرة وكم عمرها الله يخليها وانشاءالله احنا بنروح مع بنتي شهر 7 ومنكم نستفيد بس بغيت اسال شنو الافضل السكن داخل المصح او شقة خاصة

 

[ورود11]

هلا اخت بنوته1
اعاقة بنتي الله يسلمك رخاوه باالعضلات وهي حاله نادره
وعمرها12سنه

واحنا نتمنا يوافقون على علاجنا ونسافر بشهر7 لني باخذ عيالي معاي وابي الحق على العطله من اولها

وبا النسبه للسكن ياقلبي اذا انتي بتروحي تبليتسا فا المركز اللي فيها الي اهو مركز الاطفال نيوفي لازني

مافيه سكن للمرضى لازم تاخذين شقه وانا ياقلبي انصحك تدورين سكن قريب من المركز عندك العماير اللي قريبه من المركز الي اهي عمارة رومان قبال المركز او عمارة مارتن او عماره البوسني كلها حوالين المركز واي استفسار يابنات ابشرو من عيوني تراني حافظه المنطقه شارع شارع :eh_s(1):

 

[الذوق]

انشاء الله نتخاوى .. ايه انا للحين ما سافرت .. يا ليت تفيدني بكل شي تعرفينه وتعطيني جميع الارقام واكون شاكرتلج ..

 

[ورود11]

هلا الذوق شنو حابه تعرفين؟؟
با النسبه للاما ن الحمد الله الديره اماااااااان وسبق وصمت رمضان هناك وكنا نزور بعض ونطلع حتى الساعه12 الليل وبروحنا حريم والله امان والحمد الله
المعيشه كل شي متوفر معاد البهارات والقهوه واللهيل والباجي كل شي موجود نصيحه لا تاخذين معج مونه

الجو معتدل بس من العصر وورى يصير برد بس مو برد مزعج بس الجهال لازم جم طويل او جكيت والكبار شال خفيف يكفيهم
فيه حديقه كبيييييره جدام المستشفى يسمونها حديقة العرب يتجمعون فيها كل العرب اللي هناك يعني با النسبه لنا ياالخليجيات كل وحده تاخذ قهوتها وتجي:082502bye_prv: ونتجمع ونستانس والجهال يلعبون وحتى الرجال يجون بمكان شوي بعيد عنا ويتجمعون
لبعد الساعه9 الكل يمشي لنه يبرد الجو
المكتب اللي نتعامل معه لواحد يمني اسمه ابو اصيل واحنا اخترنا فلسطيني متدين اسمه مرعي اهو اللي يقوم بكل شئونا من ترجمه وسكن وكل شي انشاء الله باطلع لج رقمه من جهازي الثاني وانزله لج
الجمعيات وايد السنتر قريب نتجمع ونروح له مشي العيب اللي فيها اذكره ان المطاعم قليله بس يقولون انهم فتحو مطعم عربي بس اسعاره غاليه ---وارد اقول اذا في خاطرج شي اسئلي ---

 

[بنوتة 1]

احنا كانت معاناتنا باوكرانيا ماكو خبز ولا اي نوع من الفلفل لادقوس ولاغيره فهل التشيك متوفر هالشي حبيبتي وشغلة ثانية هل الشقة متوفر فيها الالكترونيات مثل الغسالة والنشافة وغلاية الماي والخلاط وغيره وعفوا نبي نعرف يعني ما فقدتي شي هناك واحتجتيه

 

[الذوق]

هلا والله ورود .. انا مو مفكره من الاساااس اخذ مونه لاني يكفي اترس جنطه كامله من حليب ولدي ووين احط المونه ... بس القهوهوالهيل والتمر والبهارات هذي شي اكيد حتى لمن رحت لندن اخذتهم معاي مع ان لندن كل شي متوفر فيهااا ...

انا مشكلتي ما اعرف اتدخل مع الناس يعني اذا محد جاني وقعد معاي وفرض نفسه علي ولا اتم مكاااني ... استحي ... واحاتي هالنقطه اخاف اروح وارد وانا بروحيي ..

وبعد ورود واللي يعافيج قولي لنا شنو الاماكن الحلوه اللي تستاهل نروح لها انتمشى لاني انا فيني عقده ما احب اقعد بروحي ...الاكتئاب صديقي اول ما اقعد بروحي اكتئب عشان جذي ما احب اقعد فالبيت احب اطلع على طول ... يعني قولي لنا وين نروح اسواق حدايق اماكن تستاهل نروح لهاا ... بالاضافه الى اسأله بنوته ..

وشاكرتلج سعة صدرج وما تقصرين ..

 

[MALAAK22]

الاخت الذوق احنا للحين ناطرين موعد اللجنه بس ابي اسالج بعد الموافقه اذا بنسوي تغير دوله وين نسويه؟؟
بالطب الطبيعي ولا العلاج بالخارج؟

 

[الذوق]

لا بلجنه العلاج بالخارج ..

 

[بنوتة 1]

اخت ورود11 ناطرين الرد
الذوووق : لاتحاتين حبيبتي انا بس اشوف كويتية اتعرف عليها يعني لا تحاتين حبيبتي بس ترى قبل كم يوم تقابلو مع سفير التشيك وقال انه هالسنة اول مرة درجة الحرارة عندهم بهر 6 13 درجة وبلدهم الحين كله امطار يعني حطي ببالج الشمسية والجاكيتات الله المستعان

 

[UP TO THE TOP]

--------------------------------------------------------------------------------

السلام عليكم ورحمة الله وبركاته
انا عندي بنت اخت مصابه بالشلل الدماغي حبيت اسالكم هل فيه احد منكم جربت العلاج بالتشيك وهل فيه تحسن بالحالة انا كنت منزلة موضوع لوحده اسال عن المراكز والعلاج فيه واسال هل موجودة البدله الفضائية اولا لانو معورف عن التشيك دولة متطورة في العلاج الطبيعي بس ليه مادخلوا البدلة الفضائية طيب احد منكم توه راح لها السنه هذي يمكن دخولها وحبيت اسالكم عن الاسعار هل هي دولة غالية او رخيصة