bnt_kwt قال:
بنات منو راحت مركز اطفال الانابيب
عفيه ابيكم تقولون لي اشكثر يطولون على ما يدقون علينا اول مره ؟؟
لانه انا حولني الدكتور وقالت لي الموظفه اندق عليج
هالحجي الاسبوع اللي طاف
حبيبتي bnt_kwt مادام انج رحتي اهناك يبيلج صبر وطولت باااال لأن المواعيد اتطول عندهم من الزحمه..
آنا بقولج القصه بالتفصيل:
بالبدايه طبعا بعد واسطات ودنيه عطوني موعد وحولوني للأخصائية اللي بمستشفى الصباح تسويلنا مقابله آنا وزوجي .... والله لا يراويج الاسئله اللي يسئلونها 1)- هددج زوجج بالطلاق؟ 2)- يسئلون الزوج: هددتها بالطلاق 3)- تواجهون مشاكل وضغوط نفسيه؟ 4)- زوجج ما قرريتزوج عليج؟ واااااااااااااااااااااااااااااااااااااااااي اسئلتهم مسخررره وبعد في سؤال : 5)- تواجهين مشاكل من اهل زوجج لأنج ما انجبتي؟ لا وكل هذا جدام زوجج .... اشهالغباء يعني حتى لو اهل زوجج طاقينج بتقولين جدام زوجج واهو قاعد!!!!
ويوم قلنا ان كل شي طبيعي قالت لا جذي الموعد راح يتأخر ... لازم اتقولين ايه زوجي بيتزوج علي علشان الموعد يصير ابسرعه! واذا شافوكم عادي وكل شي طبيعي يأخرون الموعد.
ثاني شي : الفحوصات اللي من بره كلها ما يعترفون فيها حتى لو كانت التحاليل يديده وتوج امسويتها ما يعترفون فيها ويقولونلج سوي التحاليل من يديد انتي وزوجج وكل هذا مضيعة للوقت من الزحمه اللي عليهم!
ثالث شي : بعد مقابلة الاخصائيه يعطونج موعد ثاني وبالموعد الثاني اتقابلج السستر وتسئلج من يديد واتسجل اجوبتج والاسئله : من شنو اتعانين يعني شنو فيج انتي وزوجج بالتفصيل.
رابع شي : يعطونج موعد رابع يقابلج فيه الدكتور حازم رئيس القسم وطبعا هالموعد راح يطول وايد وبالمقابله راح يسإلج بعد الدكتور نفس اسئلة السستر.
بعد كل هالمراحل يقولونلج تعالي سوي تلقيح صناعي ولازم لازم وضروري انج اتسوين تلقيح صناعي 7 مرات (7 محاولات) واذا ما نجح عاد نطري دورج في ( طفل الانبوب ) واذا قلتيلهم متى الموعد يقولونلج : احنا تونا بادين ابمواعيد سنة 2002
يعني نطري دورج بعد 5 اسنين واتييبلج دفتر اكبير وفيه جداول وصفحات مليانه اسماء واتسجل اسمج آخر شي لكن في استثناء اذا كان عمرج 40 سنه يسوونلج طفل الانبوب ابسرعه قبل لا توصلين حق سن اليأس.
ادري ضاق خلقج
بس شنقول غير الله يكون في عونا بس.
