تجمع أولياء أمور مدرسة التكامل(صباح السالم)للعام الدراسي2009-2010

[رفرف]

شلونكم امهات ؟

احنا ريبورتنا خواره حده ضاق خلقي بس متوقع على سواد ويها بالصف والتشير اللي تشيره بالكلاس وورك شيتس والخرابيط اللي تكتبها ..
وباجر الصراحة بكلم ابلة العربي اذا اليهال كلهم بالصف يكتبون 3 او 4 جمل وبنتي ليلحينها بالجملة الاولى ما تيي تشوف شلي املهيها ؟ ما تطل بدفترها ؟ تنطر لي نهاية الحصة علشان تقولها ليش ما كتبتي ؟؟؟ مو معقوووولة البنت طول الحصة تكتب وماخلصت اعرف بنتي تسرح لازم احد ينبهها وين دور المدرسة ؟؟ ولا شلون قاعدة تكتب عندي بالبيت صج بطيئة بس تكتب ؟ والصراحة مو حالة غير الهوموورك نرد نكتب اللي ما كتبته بالصف يعني هاذي مو غلطتي اتابعها بالصف بعد !!

انزين بنات الموعد اللي حطيناه حق ابلة الانجلش بس وين يكونون ابلات العربي ؟ ولا لازم اخذ موعد ثاني ؟ انا على خبري بالمسرح صح ؟؟ بس السنين اللي فاتت ماكانت عندي مشكلة بالعربي الا الحين !!

 

[manarah]

يعني قالتلج شي غير عن كل يوم انا كل يوم اسال المس وبعدين ماقالتلج عن المعرض مال الكتب

لا ما قالتلي شي غير عن مستواها لاني انا ولا مره سألتها عنها .. الصبح اودي بنتي امبجر ما اشوف المس والطلعه مو انا اللي اييبها .. بس انتي روحي احسن اخذي اوراقها عشان تعرفين شيسوون بالكلاس وهم عشان تسألين ابله العربي ... ومري المعرض اللي امسوينه لان مرات تحصلين قصص حلوه ومناسبه حق عمرها .

 

[manarah]

رفرف ... شخبارج (ادري مو زينه ) بس بعد شنسوي اعيالنا يبيلهم وقت على ما يعرفون ان الدراسه جد وعليها قريد ومو لعب .. عزوز ليلحين ما يعرف هالمعلومه وماشي عالبركه ... المهم ابلات العربي بالمسرح ولا ما تاخذين موعد بس الله يعينا عالزحمه عند ابلات العربي والاسلام .

 

[رفرف]

مناره ..
اي والله مو زينه .. بعد شنسوي .. اول شي زفيت بنتي بالسيارة لين بغت تبجي تالي كسرت خاطري قلت ياربي شنو تسوي اكثر قاعدة اهلكها بالبيت لين تنام خلاص يبا طقاق يطق الريبورت .. ورحت حجزت لها مسرحية حق العيد قلت لها لأنج هارد ووركر .. واليوم حطت لها دفتر ومسكينة بروحها تكتب جمل العربي تقول قاعدة اتدرب علشان الأبله ماتقولي بطيئة وخطك وحش .. وبالماث مادري ليش جذي تسوي لأني لما اسألها حتى وانا بالسيارة تجاوب بمخها حتى ما تعد باصابعها واجاباتها كلها صح ماني فاهمه ليش حلها كلللله غلط بالصف !! بعد اذا تحل غلط الابلة شتحط لها ؟؟ هم مو ذنب الابلة ..


تايقر ..
لا والله مافيني شيب بس الحين بيصير فيني !!!

 

[Baby^Bop]

السلام عليكم بنات شلونكم عساكم بخير وشلون الحلوين اعيالكم عسى ربي يحفظهم ويخليهم لكم


بنات الحين الاجتماع بالصف والا المسرح ؟

ومعرض الكتب وين بيكون موجووود ؟ واااي احس نفسي ضايعة الله يستر

 

[بشوشه]

السلام عليكم
حبيباتي الريبورت الاول لازم يكون متوسط بالنتايج عشان يبينون لكم بالريبورتات اليايه مدى تقدم الطفل
ربي يشرح صدورنا و اولا يحفظ لنا عيالنا و ثانيا يوفقهم اجمعين

 

[manarah]

السلام عليكم بنات شلونكم عساكم بخير وشلون الحلوين اعيالكم عسى ربي يحفظهم ويخليهم لكم


بنات الحين الاجتماع بالصف والا المسرح ؟

ومعرض الكتب وين بيكون موجووود ؟ واااي احس نفسي ضايعة الله يستر

الاجتماع بصف ولدج بس ابلات العربي بالمسرح ... المعرض بساحة المدرسه

 

[ام حسون وفطومه]

صباح الخير شلونكم
انا بعد شوي موعدي منو راح الاجتماع حق كي جي 1 انا بنتي متغيرة وااايد وصايرة وحدة ثانية وبس تعاند وشكلي بقول حق ابلتها

 

[Miss_Tiger79]

شخباركم بنات

انا اليوم رحت الاجتماع
والصراحه اكثر شي ماعجبني فيه انه في اولياء امور اييون متأخر عن موعدهم ويقعدون يمكن ثلث ساعه واكثر وعادي ما جنه في احد بره ينطر

والهم كلمت ابلة العربي وقتلها حرام عليكم شنو هذا يعني اكثر وقت للواجب
وعلى المنهج
تقولي ان المنهج بروحه صعب واحنا قاعدين نحاول حتى بوسط الدرس نعلمهم الحروف الي بالكلمه عشان تركز بمخهم
تقول ميخالف تعبو معاهم الحين وراح تشوفون شلون بيصير مستواهم زين تقولي والله احنا معاهم ونحاول معاهم انهم يتمكنون من الماده وقاعدين نشوف تقدم كبير فيهم
والله كريم

وطبعا عند ابلته شفت الدرجات استغربت
يعني اشياء توقتها زينه طلعت اقل من توقعاتي والي مو متوقعته طلع زين فيه


مناره
العلامات مثل a-b-c تشوفينهم بالصف عند ابلته


والله يعينكم على النتايج اليوم


المعرض خذيت منه شغلات تفيدني بهالعطله
منها مراجعه ومنها يدرس حق عقب العطله

 

[باونتى]

شلونكم يا امهات يا مثابرات .. ربى يعطيكم الصحه والعافيه وخصوصا لامهات القريد الله يعينكم .. انا رحت الاجتماع ومس جاكى تمدح فى ولدى بس ابلة العربى تحفه طول الوقت واهيا تمدج بنفسها وتمدح بتدريسها .

 

[ام حسون وفطومه]

انا رحت الاجتماع حق بنتي والحمدالله امدحوها بس ان ماتعرف تقعد اكيد لانه شي يديد عليهامو متعودة حتى بالحضانة ماعندهم قوانين ونظام وابلة العربي بعد تمدحها وقالت لاتحفظينها لانه ما نسمع بس اهمه بروحهم يحفظون مع التكرار وسالتهم عن المعرض قالو ماعندهم وقتلهم اهمه معطينه اوراق امس قالت ابلة العربي ما عندنه خبر فما رحت انتو رحتو اللي عياله بكي جي1

 

[Miss_Tiger79]

انا رحت الاجتماع حق بنتي والحمدالله امدحوها بس ان ماتعرف تقعد اكيد لانه شي يديد عليهامو متعودة حتى بالحضانة ماعندهم قوانين ونظام وابلة العربي بعد تمدحها وقالت لاتحفظينها لانه ما نسمع بس اهمه بروحهم يحفظون مع التكرار وسالتهم عن المعرض قالو ماعندهم وقتلهم اهمه معطينه اوراق امس قالت ابلة العربي ما عندنه خبر فما رحت انتو رحتو اللي عياله بكي جي1

زين اشوه اطمنتي على بنتج

المعرض كان بالساحه
بس ترى اهيه مكتبه عارضه كتب والمكتبه اسمها مكتبه البراء تكون جدام المطافي الي عند ستي سنتر السالميه
واذا على كتبهم والله زينه شفتها
انا خذيتلي كذا كتاب على كذا لوحه حق غرفتهم

 

[ام حسون وفطومه]

يعني يستاهل امر المكتبة واشتريلها شي....انا مشكلتي ان بنتي ماترضى تقعد واذا قعدتي تدرسنها يا تتكوكس او تناقز او توقف على ايدها ميننتني

 

[Miss_Tiger79]

اي والله يستاهل
وترى في ببرووي انا من زمان ماخذه منهم
بس الي بالمكتبه اشوفهم احسن

 

[Baby^Bop]

شكلها ابلتهم العربي ضايعة اسالها خذيتوا حرف الالف بس تسال الي يمها والي يمها قالت حرف الباء بعد جان تنقز الابلة مالت العربي وتقول وحرف الكاف كعبة جان الابلة الي يمها تقول لا ما خذو الحرف بس كلمة كعبة كخبرة ويييي ما ارتحت لها حسيتها لوية مع انها امدحت ولدي والابلات كلهم تيمعوا علي بس قلت اسمه اخترعت عبالي فيه شي طلعوا يانين عليه ليش اسم الله عليه وااااااااااااااايد نتفة
ومس جاكي قالت لي ما يعرف يمسك قلم بحاول اعلمة بالعطلة ان شاء الله
والمعرض خذيت منه جم كتاب وبعد في واحد فوكابلري ما لقيته بمر مكتبتهم ان شاء الله

 

[manarah]

شلونكم يا امهات يا مثابرات .. ربى يعطيكم الصحه والعافيه وخصوصا لامهات القريد الله يعينكم .. انا رحت الاجتماع ومس جاكى تمدح فى ولدى بس ابلة العربى تحفه طول الوقت واهيا تمدج بنفسها وتمدح بتدريسها .

باااااونتييييي شفتج _03BA: ... انا دخلت الصاله اللي فيها ابلات العربي وقعدت عند ابله مروه هذي امدرسه عزوز بالكي جي واسولف معاها وكان في وحده تكلم ابله إنعام ولما قامت هالوحده قعدت مكانها جان تقوللي ابله إنعام نفس الكلام اللي بأووله لسه لأم أحمد .. يعني اهي عرفتني عليج :dddds: بس الابله صج نكته وعلى قولتج بس تمدح بنفسها لا وانا تفختها زياده بعد

 

[manarah]

بيبي بوب ولدج طبيعي ما يغرف يمسك القلم لان عمره صغير .. انا من الحين احاتي ولدي هالسنه حضانه والسنه الياي انشالله يدخل الروضه بعمر صغير ..

مس تايقر .. احنا ابلتنا مو حاطه تقادير حتى عندها يعني حسيتها وايد ضااايعه وبجداره .. انا هقيت بتكون مزهبه شغل كل ياهل عشان نعرف اهم شيسوون بالكلاس بس ابد سلامتج انا طلبت منها اشوف درجاته بالماث لانه مهبب فيه وفعلا ولا درجه امتحان ماث عنده كامله لان اهو وايد يستعيل ويحل بالفهلوه ... تفاجأت ان ماخذين امتحان ساينس وامتحان reading comperhension مرتين والريدنغ بعد مو هين امتحانهم حتى اهي تقول ان صعب عليهم الحين شي جذي بس لازم يتعودون ... اللي عرفته ان الريبورت الياي راح يكون فيه تقادير .

 

[رفرف]

شلونكم امهات عقب الاجتماع ؟؟

انا الحمدلله نفسيتي واااااايد احسن عقب ما كلمت المدرسات .. بس ما مريت المعرض كنت مستعيلة اولا .. وثانيا مكتبتي بتنبط من الكتب والقصص ..
اول شي رحت مبجر قبل موعدي وجيكت ماكو موعد عندها بهالوقت كانت فاضية فاستأذنتها اني ادخل وقلت لها بكلمها عن مستوى بنتي بالماث جان تقولي شفيها بالماث ؟؟ ممتاااازة .. قلت لها وين ممتازة الله يهداج جان توريني درجاتها ولا في تيست اهيه غايبه فيه وانا ما كلمتها ولا ادري ان كان عندهم تيست اصلا .. اهوه اللي منزلها والباجي تمام والله ارتححححت .. وورتني باقي درجاتها حق هالفترة والفترة الياية انشكحت بغيت ابوس راسها ..

رحت حق العربي وقالتلي لا اهيه مو وايد بطيئة بس تسرح شوي قلت لها اي نبهيها مو تهدينها طول الحصة سرحانة ما تكتب شي .. وهم كلامها كان زين وطبعا كان عندها املاء مادري عنه غايبة فيه هم اهوه اللي منزلها (البنت غابت يومين !! شهالحظ اللي طلع عندها تيستين مادري عنهم !!) .. وبعدين رحت كلمت مدرس الاسلامية وهم قالي كلشي تمام ..
عورت قلبي على الزف اللي انزفته امس حسيت اني ام مجرمة .. جان ادق عليها واقولها شقالو عنها وانتي شطورة وانتي اميرة وبيضتي ويهي وخليتها تلبس واطلعها واونسها وما ردينا البيت الا تونا ..

 

[كويتيه ذربه]

اشلونكم امهات
صج نفسياتنا ارتاحت الحين بعد الريبورت والاجتماع
وطبعا الكتب اللي خذيناهم قاعده تضيع وقتها وتحلهم

 

[رفرف]

ذربة الحمدلله كل البنات ارتاحو عقب الاجتماع وانا كنت متشائمة من اول ريبورت مو شي بس طمنتني الحمدلله ..
جان زين الريبورت الياي يكون فيه درجات او تقادير خل نعرف مستواهم عدل .. انا لما شفت درجاتها عند المس وااااايد استانست مع ان الريبورت حده سد نفسي ..