تجمع أمهات أطفال التوحد

[الصابرة المحتسبة]

السلام عليكم​

الرجاء من الأمهات التعاون والتواصل​

من أجل أن تعم الفائدة على الجميع.​

وهذه روابط مواضيع قديمة للإستفادة منها:​

هل لديكم طفل يعاني من التوحد- خلونا نتجمع​

خاص بأطفال التوحد​

 

[manoooram]

الصابره المحتسبه قواج الله
جزاج الله ألف خير وبميزان حسناتج اللهم آمين

 

[زيـــنــه]

الصابره المحتسبه،، مشكوره عالموضوع
وان شاالله نتواصل ونستفيد

انا ولدي عمره ٣سنوات و٦ شهور
لاحظت عليه من عدا السنتين لانه ما تكلم وتركيزه مشتت جدا وصعب التعامل معاه

راجعت الدكتوره عبير العوض بالبدايه قالت احتمال يكون فيه توحد بس التشخيص المبدئي لا مافيه
وسوت له حميه لمدة ٦ شهور مع فيتامينات >> والنتيجه سلبيه ما فادته نهائيا
فقالت وقفو الحميه خلاص! و يحتاج جلسات تخاطب وتعديل سلوك لان الطفل يرد علي لما عطيته الالعاب واخذ الكره مني!
والطفل التوحدي ما يسوي جذي!

الصراحه يا الغاليات انا وزوجي شاكين بتشخيصها لان حالة ولدي واضحه

المهم رحنا بدينا مشوار المستشفى الحكومي وفحوصات وتحاليل واشعه وطلع الحمدلله كل شي سليم بالنسبه لاعصاب المخ والسمع والهرمونات
وعطونا تحويل للطب التطوري لان الدكتور قال اشخص ان اللي فيه توحد

موعدنا يوم الاثنين ان شاالله ما بقى شي >> الله يكتب الخير

وهذي قصتي ومشواري مع ولدي حبيبي

اتمنى تفيدونا بتجاربكم

 

[الصابرة المحتسبة]

يعطيكم العافية


واخت زينة يارب يطمن قلبج على وليدج وتبلغين فيه

 

[مسس وايت]

يعطيج العافيه عالتجمع

 

[زيـــنــه]

يا امهاااات وينكم،،

انا سمعت عن جلسات الاوكسجين للتوحد
في اطفال نفعهم ولاحظو تركيزهم زاد واهدى بضوره واضحه
قالو بالمستشفى العسكري في جلسات اوكسجين وبراجع لولدي وابلغكم ان شاالله*

 

[عاشقة البيداء]

جزاج الله خير اخت الصابره

الله يعينج اخت زينه

انا عندى بنتى شخصتها دكتوره عبير انه توحد وباديه معاها الحميمه صار لى شهرين واحسن تحسن بشى بسيط جدا

اما ولدى نفس حالتج زنينه مو اعراض توحد بس مادرى شنو المشكله مايتجاوب معاى لمن اناديه ولا يلعب مع الاطفال

ابى خد موعد مع الدكتوره عبير

اممم بس بنات انا عندى مشكله فى الفحص الكبيوتر للسمع يبون اعيالى نايمن لانه حركتهم حيل

وسويت كل الطرق وعجزت سهرتهم الليل كله شربتهم دوا منوم بس من يدشون غرفه الفصح يقعدون يبجون

منو عندها حل والله تعب

اسمحولى طولت عليكم

 

[cutaaa..]

بنات مو كل اطفال التوحد نفس الشي طفل عن طفل يفرق ممكن اللي نفعت معاه الحميه ماتنفع معاه جلسات الأكسجين واللي نفعت معاه عملية ازالة المعادن من الجسم ماتنفع معاه الحميه والعكس
افضل شي جلسات العلاج النفسي والوظيفي وبرامج تعليميه للأطفال

 

[حوري2004]

مرحبا يا بنات
يغية اسالج زينه وين سويتي تخطيط المخ والاعصاب عند منو ودي اسويه لوليدي
انا وليدي عمره الحين 5 سنوات وان شاء الله انه احسن من قبل بكثييير بنات اعيالنا يبيلهم اهتمام اكثر واحتواء منا لعيالنا والله احسه صار احسن صح شوي عصبي وايده الله يصلحه حيييل مو شوي طويله علي وعلى الكل
بس وين كان ووين صار والله فرق ولا تنسون الرقيه الشرعيه يا بنات قبل ما كان معانا بتاتا ولا يحس فينا ولا نحس ان فيه ادمي موجود بالمره

وبغيت اقولج اخت عاشقة البيداء انا ولدي نفس الطريقه ولما رحنا لمستشفى سالم العلي عطوه دواء لونه برتقالي ودشيت معاه وانا شايلته بحظني ما حطيته على سريرهم علشان ما يحس لان الدوا ما يخدره حيل
وعسى الله يشافي عيالنا وعافيهم واي سؤال انا حاظره بحكم ان سعودي اكبر واحد بين عيالكم

 

[زيـــنــه]

هلا حبيباتي

اخت عاشقة البيداء
نفس المشكله صارت معاي بس بفحص اشعة الرنين، يابنات تخيلو عطوه الدوا وبعد صراع يبي يقط ابرة المغذي اللي ثبتوها بايده نام لكن سبحان الله من دخلوه غرفة الاشعه قام يتلفت يمين ويسار براسه ويطقطق وهو نايم لين تعب الدكتور وقال مايصير خلاص وكتبلي موعد ثاني بس بتخدير عام وانا الصراحه خفت عليه وماسويته.

اخت حوري2004
سويت تخطيط المخ والاعصاب بمستشفى الصباح(البنك الوطني) اهو اللي حولني عليه مستشفانا.

وبالنسبه للرقيا وقرأة القرآن هالموضوع كنت بطرحه من زمان وان شاالله بنزل موضوع عنه
بس بسألج انتي كنتي تقرين على ولدج والا تودينه شيخ يقرا عليه؟

 

[حوري2004]

انا اقرىء عليه
فدية عيونه بنات احد مثلي والله وبالله لما يجي يبي قولي شي وهو يبجي احس نفسي مخنوقه وببجي معاه ومرات احسه حاس اني ما ارضي عليه احسه يتنيحس على اخوه فديته والله ياناس مرات احسه فاهم ومستغل هالنقطه لصالحه ومرات احسه لا خاصتا لما يكرر معاي الكلام ومو فاهم شنو قاعد يقول فدية عيونه

 

[زيـــنــه]

الله يشافيلنا عيالنا يارب
اخر اخباري ان شاالله عزمنا نسافر ونشوف برا شنو عندهم من علاج ومراكز توحد
لان هالعمر افضل عمر للعلاج وفي نسبه كبيره للشفاء باذن واحد احد

والفتره ندور على افضل مكان
اللي عندها معلومه او سامعه عن مركز توحد اة عارفه اي ديره فيها متخصصين للتوحد ياااريت تفيدنا

 

[& الذاهبه &]

عدنا والعود احمد
واخيرا شريت لاب توب
من بعد اخر واحد اخترب ولهيت بالجهاال بس والله في بالي ومانسيتكم

 

[& الذاهبه &]

مرحبا

اليوم سويت تحليلين لبنتي
فيتامين دال لانه كان ناقص وعطتنا دكتوره عبير مكمل له
وحديد من زمان ماجيكت عليه

وراح اوافيكم بالتفاصيل وموعدي مع الدكتوره

 

[رحمة ربي]

مررحبا حبيباتي كل الشكل للاخت الصابره ...انا تجربتي مع التوحد ولدي ناصر عمره 3سنين ونص تشخص بالطب التطوري

طيف توحد... وديت ناصر لدكتور جوزيف اهو دكتور داان لبناني ومشيت علي الحمية والمكملات الغذائيه والحمد لله انا ويااه

من تاريخ شهر 8-2011وبعد نتايج التحاليل طبعن مشينا علي الحميه والمكملات الغذائيه من فضل ربي ناصر تغير بعد الحميه

وقام يلتفت علينا اذا ناديته وتحسن التواصل البصري عنده احسن من اول توه العلاج في بدايته بس الحمد لله مرتاح حيل لان

الدكتور جوزيف اب لطفل توحدي وشلل دماغي ويحس فينا وفي معانات عيالنا ....

 

[الصابرة المحتسبة]

السلام عليكم

شلونكم امهات الصبر والتحدي


وعسى ربي يبلغكم بعيالكم

 

[ضحكة الدنيا]

مرحبا بنات

انا ولدي اربع سنين ملاحظه عليه انه غير عيالي الباجين
اهو اول ماأنولد لا حظت ان عنده حول بالعين ولما كمل سنتين سوينا له
عملية الحول وقال الدكتور ان وحده من عيونه نظرها ضعيف وبعد فتره لا حظت انه مايسمع
مهما انادي مايرد عليه وديته دكتور الاذن والحنجره وشخص حالته ان في ماي علي الاذن مخليه مايسمع عدل
مع العلاج تحسن وصار يسمع ويرد عليه
بس من فتره ملاحظه عليه اشياء ماأدري اقدر اقول عنها توحد اولا لأني موفاهمه معني التوحد وشنو الاعراض
بس الي لاحظته علي ولدي انه يكرر الكلام يعني لما اقوله شلونك يقول شلونك لما اقول شسمك يقول شسمك ومايعرف يعبر عن نفسه
لما يبي شي مايقول انا ابي لا يقول خالد يبي يشرب خالد يبي ياكل
ويخاف من الاطفال يعني يكش منهم بس يفرح لما يشوفهم ويلعب معاهم بس يخاف يسوون له شي
مرات اقول عيونه وأذونه مأثره عليه وعدم اختلاطه بالأطفال دايم بالبيت اهو مأثر عليه ومرات اقول لا ولدي في توحد
ماأدري بنات ياليت تفيدوني

 

[الصابرة المحتسبة]

هلا وغلا باختنا العزيزة وجعل ربي يبلغج بوليدج معرس

الافضل تاخذين موعد عند الدكتورة عبير عوض بالسلام او تودينه للحكومة قسم الامراض الوراثية علشان يسوون التحاليل اللازمة ويارب يطمن قلبج عليه.

 

[زيـــنــه]

السلام عليكم

انا غبت فتره ورديت قلت اشوف اخباركم

انا اللي عندي اني الحين غير ولدي حبيبي اللي شخصوه توحد شاكه ببنتي حبيبتي انها مثل حالته

اولا واخرا الحمدلله على ما قدر وشاء

سؤالي شنو السبب ممكن تتكرر حالة التوحد؟
عمرها سنتين الحين لكن خايفه لانها ماترد اذا ناديتها وماتكلمت ولا كلمه ليلحين ولا تناديني ماما

التطوري قالو بعد الثلاث سنين نشخص الحين ماكو شي اكيد

 

[زيـــنــه]

اللي عندها خبره افضل مدارس الاحتياجات الخاصه شنو

انا سويت لولدي شهادة اعاقه وعلى حساب الحكومه بس بغيت اعرف وين احسن مكاان للتوحد؟؟

ولدي عمره 4 سنوات