تجــَـــمـُّــع فـِــرَق ~:~(البيَــــض المسْلــــــُوق)~:~

[قــل مـا تـشـاء]

اورنجيا
عوافي على قلبج يارب
وعظم الله اجوركم الله يرحمه ويغفر له ويصبر أهله على فراقه
بروووقه
عوافي حبيبتي واكلي عدل خلي اكلج صحي ولاتخافين بتضعفين ان شاء الله
ام فجورة
بالعافية قلبوو وماتشوفين شر ان شاء الله
ومشكوووورة عالنصايح حبيبتي وان شااء الله نطبقها ونستفيد منها
وان شاااء الله كلنا نوصل اهدافنا اللي نبيها وويوومه ترجع بالسلامة
وتوووووته بعد تهون ماتختفي

 

[قــل مـا تـشـاء]

يومياتي
الفطور
بيضة وخبز رقاق وشاي
الغدا
عيش ودياي وعصير
سناك
قهوة عربية ونتفة كيكة
العشا
برتقالة وشوي عنب وكورن فليكس

 

[ريم خانم]

مراحب بنات اشتقتلكم :eh_s(2):
آسفه ع القطيعه بس انا مححححببططططططه بقوه بقوه بقوه مررره مرره متحطمه لدرجة قعدت افكر اهون عن الدايت وكل شي تدرون ليييييييش ؟
وزني ماينزل ماينزل معلق ع 72 و73 سواء اكلت اكل دايت ولا عادي وترى من اسبوع وانا اكل من اكل البيت واخربها وماتغير شي الكل ينزل وزنه وانا لااااااا ليش طيب كم شهر وانا احاول اوصل ع الاقل 70 طفشششششت وقلت برمي الميزان ع جنب واغير نظام حياتي وانززل بالراحه ماابي افكر ان مانزلت هالاسبوع اتحطم واحسه هدفي بعيييد والله صرت احس مستحيل اوصل لحلمي
ادري انا غبي تفكيري بس مدري شسوي مليت من كل شي
وآسفه مره ثانيه قاطعتكم حبيت اجي وافضفض عشان ماتقولون سحبت بدون سبب

 

[om_fajer83]

بالعافية ليلو
ريووووم عادي لا تنسحبين ولا شي كلنا مرينا بثبات الوزن
لو تردين ورا الصفحات انا حاطة كلام عن ثبات الوزن
يقولج لاتخافين من ثبات الوزن لأن نتيجته راح ينزل الوزن
أضعاف
لاتنسحبييييييين واحنا معاج ليييييما ينزل وزنج لاتحاتين
ترى المحاتاة تزيد الوزن

 

[بريق أنثى]

ام فجر
ماتشوفين شر
بالعافيه عليك ومشكوره ع النصايح
ليلو
اهلين
قليبي وشو الكيكه اللي كليتي منها نتفه ؟؟

ريم خانم
لاااااااااااااااااا خلك قويه عادي يصير كذا وبعدين ينزل بسرعه
وشوفي سوي رجيم عذاري ولاتخبصين راح ينزل وزنك بسرعه البرق صدقيني
روعه الرجيم لانه مجاعه سويه اسبوع
انا نزلت تقربيا كليو ونص
​

 

[بريق أنثى]

يومياتي ليوم الامس
الفطور
موزه حليب سبع تمرات
بعد ساعتين
حبه توست وشرحتين جبن
الغداء
بسكوت بالقمح مع حليب
العشاء
6 ملاعق خضار مسلوقه مع 2 بيض عيون
وتستمر المجاعه
ابي اعدي هالاسبوع هذا يمكن الاسبوع الجاي اخرب
احس طااااااااااافيه ماافيني طااااقه
والمشكله الى الحين مااحس اني وصلت للي ابيه من نظره عيني
ابي انحف ​

 

[om_fajer83]

الشر ما يجيكم بنات

بالعافية بريق

أكلي اليوم
الريوق صمونة بلبنة لايت وزعتر وعصير أناناس
الغدا صمونة مع شريحة جبن لايت وعصير
السناك الاول ٣ حبات بسكوت المطاحن
السناك الثاني اصبع ككاو
ابي اعود جسمي عالككاو مع قلته لأن
ع نظامي التخفيف بعد ٣ اسابيع راح
أرد عالأكل الطبيعي عالخفيف فأبيه يتعود عشان
إذا أكلت مايزيد وزني.

 

[قــل مـا تـشـاء]

مررررحبآ بنات شلووونكم .,,
ريووووووومه .,,
هلا والله بهالطلة حيااااج قلبوو .,, لآتغيبيين فجأة تخلينا نحاتيج .,,
وسالفة الوزن احمدي ربج أنه مو قاعد يزيد أضمن لج عشان إذا تركتي الدااايت ماتمتنين .,, وعاااادي شوفيني شهر ونص وزني 68
وهم عاادي حبيبتي مافيها شي لي فليتيها الى نهاية هالأسبوع اهم شي تنتبهين له لآيزيد وزنج
واسبوع الياي تبدين من جديد وتبدين صححح وتشوووفين النزول ع أصوووله .,,,
حبيبتي شوفيني أنا الآسبوع اللي راح كنت في الحسا اسبوع لوفاة عمي الله يرحمه
وهناك مااكو آكل دايت أكل من الموجود الحمد لله .,, ووزني مثل ماهو حمدت ربي وشكرته انه مازاد
وهالأسبوع بديت من جديد والنتااايج بصرااحه مشجعة عندي وبقوووة ومستمرة بأذن الله الى يوم الجمعة
وبشوف وزني جم يصير يوم السبت .,, وأتمنى أني أنزل نزووول حلوو وآهم شي أنه مايكون أقل من كيلو .,,,
وبالتوووفيق حبيبتي .,,
توني أدقق في الكلمة الأخيرة ؟!!@@ شنو تنسحبييين ؟؟؟
نقول تاخذين لج راحه من الدايت اي بس تنسحبين ؟؟ أتمنى تتراجعين عن هالقرار وتتواصلين ويانا من يديد .,,
لآنج أنتي الربحااانه وأحسن لج دامج بديتي بالدايت واصلي وبتشوووفين الرشااقة تالي .,,
أنا مثلج جم مره اقول بنسحب وبهون من الريجيم غير الانقطاع بس ألحين بصراحه عقب مانقصت جريب الـ 10 كيلو
أطالع في شكلي أقول والله فرررق .,, مع اني اوول موو حااسه باني متينه واقول جسمي حلوو بس الحين لا والله
فرررق جسمي انرررسم وترتب وشكلي صار احلى .,,, واقول لو اني منسحبه ومو مكملة جان لي ألحين وزني في السبعينات ولا افكر أنزله بعد .,,
تراجعي عن هالقرار لآن مو من صاالحج أبــــد .,,
وأرجعي لجداولنا القديمة شووفي البنات شلوون مو بس يثبت اسابيع وزنهم الا يزييد وماشاااء الله مايأسوا وقالوا بنترك الدايت لآن وزنهم زااد لآ زادت عندهم العزيمة واستمروا وفي منهم اللي انسحب بسبب الضرووف .,,
آلحين عقب المحاضرة اللي عطيتج اياااهااا اقوول اتررركي الدلع وواصلي الريجيم قبل ماتحملين ثانيه ويصير بدل لآتفكرين بـ 10 كيلو تفكرين بـ 20 وبدل الياهل عندج أثنين .,, شتجابلين تالي ؟؟ تفكرين في دايت يرمم جسمج والا عيالج والا نومج والا والا .,,
تعااالي بسسسس ووسعي صدرج وياااناا وشاااركينا الفررحه يوم الميزاان ولاتخافين دامج ريحتي جسمج من الدايتات بترجعين بحماس ونشاط وبنفسية حلوة بدون شد أعصاب وبينزل الوزن .,,,,
ننتظرررج حبيبتي .,,,
آم فجووووورة .,,
يقولج لاتخافين من ثبات الوزن لأن نتيجته راح ينزل الوزن أضعاف
ممتــــــــــــــاز جدددا وكلام سلييم 100000000%
ياا ريووومه ان شااء الله إذا واصلتي بتشوفين شلووون تأيدين هالكلام
وبتنصحين غييرج بعد بالدايت وشلووون يبدوون فيه .,,
أم فجووورة حتى لو دخلتي من هالأسبوع الكاكاو في أكلج اكليه مرتين بالأسبوع مويوميا لأن مثل ماقلتي
بعد 3 أسابيع بتاكلين من أكل البيت يعني بيشمله الكاكاو .,,, وان شاااء الله مااتزيدين يااااقلبي .,,,
بروووووووقه .,,,
حبيبتي .,, كيكة من بررره
تبين طريقة كيكة يديده مااابعطيييج
ههههههههه ابي اشوووف وزنج 60 وابي وزني يصير 65 وابشررري بطرق الكيك اللي عندي
وبالسر اللي يخلي الكيكات هشششه وفااايق الطرااوة .,,,
ياااقللللبي اكللللي الدنيا ماابتطييير واحنا قلنا اهم شي انه نووصل الأوزان اللي نبيها في عطلة الصيف
حبه حبه يااااحلللوة وتووصلين للوزن اللي تبينه .,,
وللمره المليون أقوول يومياتج مقسمه ( فطور سناك غدا سناك عشا ) السناك فاكهة والعشا خفيف جددا وتشوفين شلون ينزل الوزن وبدون مجااعه ع قوولتج
الااا صج بروووق وين وحش الطعام ههههههههه
.,.,.,.,.,.,.,.,.,.,.,.,.,.,.,
أوووووووورنجيآآآ .,,,
وييينج حبيبتي ماااتنفستي لي ألحين ؟؟!!! ههههه أنتي قلتي بتجين عقب ماتتنفسين
تووووووووووووته .,,
قلبوووو ترا إذا ماشفت مشاركتج هاليومين ماااابطرش وزني لآورنجيا يوم السبت > ترااا اسويها > تكفين .,,

 

[قــل مـا تـشـاء]

يوميآآتي لليوم .,,
الفطور .,,
جبن أبيض وزيتون وشوي مربى وخبز وكآفي
سناك .,,
3 تمرات
الغدا .,,
دجاج مشوي ونتفة خلطة طحينية وخبز وعصير
العشا .,,
كورن فليكس وتفاحة

 

[ريم خانم]

اهليييييييييين بنات
لا ماقلت بنسسحب قلت اخاف تحسبوني سحبت كذا بدون سبب لا ماراح انسحب ان شاء الله بس يخلص البريك النفسي ارجع بقوه ان شاء الله
الله يسعدكم رفعتوا معنوياتي

 

[قــل مـا تـشـاء]

ريوومه زييين جذيي .,,,
ارررتااحي أد مابدك حتى تجمعنا لآتدخلينه لووول
إذا تعدلت النسية حياااج الله الباب مفتوووح على مصراعيه .,,
ان شاء الله ماتطولين .,,,

 

[قــل مـا تـشـاء]

**النسية = النفسية

 

[Orangiya]

صبااااااااااااااااااااااااااااااحووو حبوباااات عزوووزااات ،،،،


سوري امس ما دشيت ،، ولدي اول امس الاثنين طاح من السلم و لوى كاحله شوي ... الحمدلله مو كسر بس رضة لفوها بشاش وقال ثلاث ايام ونشيله .... وانا قلت اييييه ودي اصدق ولدي يخليه لي الليل .. وفعلاً بس ركبنا السيارة بدا يشيله ههههههههههههههه ...
ووو رحنا نودي تلفوني التصليح ،، ووو رحنا الجمعية بعد ... نسييت اشتري زيت الكانولا اللي ام فجوور حطت صورته !

×××

ليليي .. تسلمين حبيبتي ،، هههههههههههههههههه سنة على ما اتنفس احتاج خياشيم الظاهر xD ...

وياختي انا الحمدلله صحية ومحافظة عالاكل الصحي واحرص اني انوع بالاكل ومهتمة بالخضار والفواكه و الروب والحليب و منتجات القمح وشوية بروتين ..
بس ال5 كيلوااات حييل عسرة موو راضية تتحرك بسرعة >_< ...

امس تكيسلت مارحت النادي مع اني كنت في بيت ابوي .. مادري اذا اليوم اروح او لأ ... بشوف الاوضاع~


××

ريووووم حبيبتي لا تتضايقين ... شدي على نفسج بالرياضة اكثر ،، يمكن جسمج من النوع اللي يحتاج الحرق اكثر من تقليل اكل ..

××

بروووووووق يالمجررررمة شوي شوي على نفسج خلااص والله انتي رشيقة لا تموتين يووع وتعب وصفار و ارهاق وووووو ... صدقيني راح تتضرين حيل بالنهاية ... البشرة تخترب و الشعر والاظافر و العظام ... بعدين شيفيد الندم يا حلوة .... اهتمي بصحتج اكثر من شحومج ودهونج وخليها مع الايام ترووح بس لا يزورج وحش الطعام !!!

وسوي مثلي كل يوم شمندر مغلي وشربي الماي ماله بعد ما يتبرد بالثلااجة ويصير مثل العصير ...

ان شالله ناوية اشتري حبوب اوميغا 3 قريباً ...حيل ممتازة للبشرة والشعر والاظافر ... بس ان شالله ما تكون تفتح الشهية ..

××

يومي امس ...

ريوق .. توست اسمر مغمس بالبيض .. وحليب حار
غدا .. رطب وروب و حبتين موز و قفشتين عيش ..
العشا .. عصير اناناس ،، و واحد بار القمح بالككاو والبرتقال حق الريجيم .. مثل النوع اللي حطته ام فجر قبل فترة ..

××

والف عاااافية عليييكم كلكم وجباااتكم حبووبااات ~~~

 

[بريق أنثى]

ام فجر
اذا انتي تحبين الكاكاو استخدمي البودره الخاليه من السكر المره الخام بصراحه مرات
احطه مع الحليب روعه
ليلووو
ههههههههههههههههه ياابعدي عطتني دافع اوصل ال60 عشان طرق الكيك
هههههههههههههه اجل بحفط بقووه
قلبو وحش الطعام مدري عنه الله يبعدني عنه ويفكني منه الحمدلله الشهيه معدومه والاكل قليل لو اكل زي ماتقولين احس كثير
اورنجينا
سلامت ولدك مايشوف شر
صادقه ابي اشتري فيتامينات ومجاعه صدق الا امس اكلت لاني البطاريه خلصت
وصرت مااشتهي اكل
ريم خانم
جربي رجيم عذراي رووعه ينزل وزنك بسرعه البرق
بصراحه الاسبوع هذا ماتقيدت فيه بس عرفته وجباته
​

 

[بريق أنثى]

يومياتي حق امس
صحيييييييييييييت واكلت فواكه مشكله اكلت ليييييييين شبعت
موزه برتقاله تفاحه كيوي جحه وبعد وشو بس الكيوي صغاااار اكلت اربع
وبعدين
حسيييييييييييييت بجووووووع
وانزل المطبخ واشوف رز مندي دجاج
بصراحه اكلت يمكن 10 ملاعق وشوي دجاج
العشاء
طلبت من البوفيه سندويش كبده وسندويش لحم مفرووم
يعني امس يوووووووووووم الطعام
لاني بجد ماافيه طااقه
بنات
جات ع بالي فكره وش رايكم احط فيش الكهرب بخشمي او شاحن الجوال
يمكن يمدني بالطاقه ولا تزيد سعرارتي الحراريه
هههههههههههههههههه
اليوم
الفطور
كوبان من الماء
الغداء حبه علك
ماابي اكل اليوم لان امس اكلت
بس بشووف العشاء بااكل اكل قليل
الميزان السبت ماابي وزني يزيد بصبر
توووووووووووتي وينك الو ​

 

[om_fajer83]

بالعافية عليكم ما كليتوا
ريم أخذي لج فترة نقاهة وبعدين ردي
أورنجيا مايشوف شر ولدج سلامات
بريق لاتهلكين نفسج بعدين تنفجعين عالأكل
قسمي يومج ع ٥ أو ٦ وجبات
متوازنة ٣ رئيسات و٢ سناك وبس

توتة ردت تغيب الله يكون بعونها ..

 

[بريق أنثى]

هلا ام فجر
لا انشالله مايجيني شي بس ابي اوصل الستين واخذ بريك اسبوع عشان ليلو تعطيني طريقه كيكه دافع قوي اموووت ع كيك البيت
احلى من حق برى
وخلاص صار اكلي قليل ونفسي مسدوده عن الاكل يااشيخه خليني كذا
اخاااف انفجع يعني الحين مااحس اني محروومه زي الاول عشان كذا نفجع​

 

[om_fajer83]

بنات أنا محبطة

اسمعوا أمس ماكنت فاضية اطبخ
فكان أكلي الغدا والريوق والعشاصمون
أسمر يعني أكلت ٣ حبات صمون أسمر باليوم

وقلت بختبر وزني أكلت أصبع ككاو

مع نص شريحة أناناس والسناك ٤ حبات بسكوت

توقعوا اشصار ؟؟؟؟؟؟؟؟

زاد وزني ٦٠٠ غرام @@ !!!

يعني بعدين لو بجرب نظام تخفيف
ماراح يكون تخفيف بالنسبة لوزني
راح يكون نظام تسمين

والله مقهورة قبل آكل اللي نفسي فيه
وزني مايزيد بالعكس كنت آكل خلطات
واعشاب وحبوب عشان أمتن!!!!!!

ليش الحين أي زيادة معقولة يزيد الوزن ؟!؟!

 

[om_fajer83]

إن شا الله بريق توصلين هدفج بصحة وعافية

 

[توووووتة الحلوة]

هايو بنات

وحشتوووووووووووووووووووووووني موووووووووووووووووووووووووت، فديتكم

انا اعتذر على غيابي المتكرر، بصراحة انا ما ادري اشلون انتو مستحمليني في المدرسة حقتكم ... اوه اقصد تجمعكم هههههههههه

انا استاهل الطرد مع تسليمي ملفي ابو علاق لوووووووووول

اكيد حفظتو اسطوانتي المشروحة ان السبب الرئيسي لتغيبي النفسية الاكس مكس ... اسفه بنات لكن هالشيء مو بأيدي ... قلت لكم انا عندي هم ... الله يفرجه

و لا انا مستحيل اترك التجمع لاني احبكم واااااااااااايد، انتم من دايم تخلوني استانس كثيرررررررر بالرغم من ظروفي بدون ما تحسون اذا قريت تعليقاتكم

انا اليوم مشغولة، بصراحة كان ودي اترك تعليقات على ردودكم لكن بأذن الله لي باك قريبا مع تعليقاتكم