تجربتي مع تحويــل المعدة ..

[ام سلطانوه]

موجود اسمة بالجرايد بقسم الجراحة باي جريدة والله كل الي مسوين عنده يمددحونة انا دقيت علية بس المبلغ الي طالبة بصراحة وايد علي بس احسن من 3600

 

[mariam k]

مشكوره حبيبتى

 

[ام سلطانوه]

انا الي اعرفة لازم يكون وزنج فوق 100 بس هم على حسب الطول ياخذون الكتلة ويقولولج إذا يصير ولا لأ

 

[mariam k]

حتى اذا بعطى فلوس انا طولى 157 ووزنى مثل ماقلت لج

 

[ام سلطانوه]

لا ما اتوقع يسويلج لانة الي زايدته انت تقريبا 25 كيلو مو صح

 

[mariam k]

اى صح يلا الله كريم اروحله واشوف شكلى بجرب حبوب خل التفاح حلو الموضوع دشى عليه

 

[ام سلطانوه]

دربالج من الخل ترى يسبب قرحة

 

[ام سلطانوه]

مريوم إن شالله باجر انكمل موضوع الخل لانة باجر عندى دوام تصبحين على خير

 

[تونه الكويت]

مريم حرام عليج وزنج مو وايد عشان تسوين تحوير معده

وبعدين ليش اسعارهم غالية جذي انا توني مسويتها قبل 3 اسابيع كلفتني 2600 دينار بس وسويتها عند اسنشاري سعودي د. سلطان التمياط بدار الشفا لان له زيارات للكويت

 

[el.hwawi]

رجعت لكم بعد الفاصل ..الصراحة قريت ردودكم واتشجعت أكمل ..

الله يخليكم .. انتوا ماخذين فكرة غلط عن العملية .. انا بكل أمانة وصراحه قالها لي الدكتور يوم شاف وزني قال انه الريجيم ما ينفعني ماشي حل غير الريجيم .. هو راواني 3 اختيارات نحن بالاصل كنا سايرين عشان تدبيس المعدة .. بس قال اذا سويتها لج ما بتقدرين ابدا تاكلين سكريات منعا باتا .. اما التحويل ف بقدر .. اما عن اللي قالوا لكم انه حفاظات ما حفاظات صدق ما عندهم سالفه يبون يخوفونكم ..

اول شي لازم تسوينه يالغالية سألي عن الدكتور مب انتي بس .. خله أبوج او اخوج يسأل عنه ف وزارة الصحة هذا اهم شي .. ثاني شيالتحاليل انا قاللي اياها بالحرف الواحد لو كانت تحاليلج شي مرتفع نقطة وحدة او نازل بكنسلها العملية فيه ذمة هالدكتور .. وبعد صلاة الاستخارة هي اللي بتدليج اذا هذا خير لج .. وبعد بيني وبينكم اذا قررتي تسوينها لا تعلمين غير اقرب قريب يعني امج وابوج واخوانج بس لأنه كلام الناس ما يرحم ..وحدة من اهلنا سوّتها في لبنان من سنة .. وكل الناس قامت اتكلم عنها وصدقوني على الضعف اللي ضعفته البنية لين يومكم محد ياء خطبها مع انها غاوية الله يحفظها ..وقاموا ياكلونها الناس بعيونهم ما يذكرون الله ولا يردون الشهادة .. لين مرضت ويتها المرارة .. وبعد نصيحه يوم بتسوينها سويها في بلادج ديرتج .. لأنه لا سمح الله حصل شي يكون الدكتور قريب منج وبيعرف على طول الغلط من منو .. واللي تسألني عن الشوربة .. الله يعافيج شربتها ل 29 يوم .. ويوم افرجوا عني قالوا لي اللقمة الوحدة لازم أعلجها (امضغها ) لين تذوب لانه المعدة مب متعوّدة .. تخلصين اللقمة صبري شوي لا تستعيلين .. حتى اني علقت على الدكتور اقوله حشا لو لبانه (علج ) جان ذابت واستسلمت اعنبوا بيأذن علينا المغرب لين يخلص غدايه .. بس طبعا اول فترة ما بتعرفين قياسج في الاكل ف بتسيرين وانتي بكرامة عالحمام على طول وبترجعين اللي كلتيه .. هني اقولج انا اهنيج هههههههه نزلتي كيلو .. وانا قبل ما ادخل غرفة العمليات كانوا يطالعون وزني نزلت كيلوين الصراحة من الخرعه تميت زايغه ..

اووووووووووووب نسيت اقول شي قبل ما يسوي لي العملية يشاورني كيف تبين شق العملية 6 فتحات متفرقة حول السر ولا خط طولي .. وانا اقولكم طولي احسن برأيه من غير اذا متفرق بيبيّن مثل المشوّة ولا تنسون انه بالمنظار .. وأقول لكل بنية بعافية اذا تبين سوي العملية وقوي قلبج وصدقيني انا روحي ما اتوقعت انه نفسيتي تتغير توقعت بتم طول الوقت كارهه عمري بس لا صدقوني انا واااايد مرتاحة ومستانسة ..احينه احس بالحياة

بخبركم بموقف استوالي عند الدكتور كنت يالسة وانتظر السيستر .. دخل علية في المكتب واحد ماشاء الله عليه غطا على حسين الجسمي اكبر عنه ما يروم يدخل من الباب قاللي السموحة وين الدكتور .. انا : بيي .. هو : محمد أشرف ؟ .. انا : هيه احينه بيي .. هو :هذا يعالج المتن .. انا : انزين انته شو يخصك .. هو : نحن اندوّر علاج عشان نضعف وانتي يالنخلة (شفتوا قلة أدبه دفش الهرم ) تبين تضعفين شو خليتوا لنا؟
(انا انصدمت وطلعت بنفس الوقت كنت مستانسة في الجلسة الثانية يخبرني الدكتور انه هذاكي الريال يتحراني اجذب عليه وانا صدق لو قالوا لي ما بصدق .. وسواها العملية وتشجع ..

وبخبركم عن شي خخخخخخخخخ الخلفية نحن في العايلة نسميها فريدة فرودة لانها بصراحة فريدة اختفت .. قبل كانت تبيّن وبشع شكلها الله ياخذها فكني الله منها .. اما الحينه لو ألبس عباه ما تبيّن مرات اقول انا احلم .. بس والله مب شرات قبل .. اما يوم اروح السوق انسى عمري وأدوّر أكبر مقاس .. اتعرفون انه المتن عاش ويانا ولازمنا سنين.. كيف تبونا ننساه بين يوم وليلة .. يعني ان اتوقعت اني اخف لكن حجم ريلي والله زغت انا دومي ألبس 40 و 41 الحينه 39 او 39 ونص وقبل الصيف ماماتي مفصلتلي عند المخوّر جلابيات والله اني يوم ألبسهن الحينه غرقانه أكون مبهدلة لا وأتخرطف بهن بعد ..

اما من ناحية شد الجسم اسير عند السيستر وهي تسوي لي جلسات ومن غير يوم شفت جسمي يتغير روحي قمت أسوي رياضه في شي فادني اني احط ال مجابل المنظرة حتى السيكل وأسوي رياضة أحس أقدر أسوي حركات جدام المنظرة وألتهي .. المشاية أسويها فيها نص ساعه .. اما السيكل ربع ساعه وبعد تمارين الزنود وهو اني اشل الاثقال الصغار وأعّد لين 10 بكم من طريقه محد علمني عشان ينشد الترهل انا اباه ينشد طبيعي بدون ابر بنصبر لين شهر 2 وبنشوف .. أي سؤال انا حاضرة اتمنى ما اكون لعوزتكم


والاخت اللي تسألني عن تحويل اسمها تحويل المعدة او تحوير المعدة نفس الاسم .. والاخت اللي تسأل لازم حبيبتي تشيلين الحلقة وبعدين تسوين التحويل ما يستوي اثنينه فنفس الوقت .. ومشكووورين

 

[ام الجميل ناصر]

ماشاء الله لاحول ولا قوة الا بالله
الله يحفظك ويوفقك

 

[el.hwawi]

ماشاء الله لاحول ولا قوة الا بالله
الله يحفظك ويوفقك

تسلمين وما تقصرين الغالية والله يحفظج

 

[ام سلطانوه]

يالغالية انت متى سويتى العملية ابى التاريخ وكم ضعفتى للحينعلشان اتحمس واسويها بسرعة بس انا اخاف من الترجيع لاني عانيت منه يوم سويت عملية الحلقة

 

[el.hwawi]

يالغالية انت متى سويتى العملية ابى التاريخ وكم ضعفتى للحينعلشان اتحمس واسويها بسرعة بس انا اخاف من الترجيع لاني عانيت منه يوم سويت عملية الحلقة

حبيبتي انا مسوتنها 28-4-2008

انا كنت 125 والحينه 93

في حدود 32 كيلو خافة

اول شهرين ترجيع بس بعدين بيختفي على فكرة احينه ما ارجع وقف عني:tek:

الله يخفف عنج وتردين بصحة وعافية انتي كم وزنج؟

 

[@ دهن العود @]

الهواوى انا موعدى جريييييييييييب للعمليه بس بسالج

عقب ما صحيتى من البنج شلون الالم ؟؟؟ تحسييييييييييين انه فى شى يعورج من داخل او فى شى مقصوص منج المه واضح او الم ما تتحملينه بانتظارج على احر من الجمر

 

[تونه الكويت]

الهواوى انا موعدى جريييييييييييب للعمليه بس بسالج

عقب ما صحيتى من البنج شلون الالم ؟؟؟ تحسييييييييييين انه فى شى يعورج من داخل او فى شى مقصوص منج المه واضح او الم ما تتحملينه بانتظارج على احر من الجمر

اسمحيلي الهواوية بجاوب بعد اذنج حبيبتي

دهن العود حبيبتي انا توني مسويتها ما كملت شهر والله العملية سهلة سهلة ولله الحمدلله ومافيه عوار يذكر سبحان الله دام يحطونلج كل شي مسكن انا كنت اتدلع كل شي اقولهم ابي مسكن حتى لو حسيت بغازات هههههههههههه

عليج بالاستخارة حبيبتي لاتخلينها والله انها ريحت قلبي وطمنته فوق ما تتخيلين دشيت المستشفى وانا اضحك واسولف عااااادي ولله الحمد

 

[بنت بن فهد]

بصحه وعافيه ان شاء الله

 

[el.hwawi]

اسمحيلي الهواوية بجاوب بعد اذنج حبيبتي

دهن العود حبيبتي انا توني مسويتها ما كملت شهر والله العملية سهلة سهلة ولله الحمدلله ومافيه عوار يذكر سبحان الله دام يحطونلج كل شي مسكن انا كنت اتدلع كل شي اقولهم ابي مسكن حتى لو حسيت بغازات هههههههههههه

عليج بالاستخارة حبيبتي لاتخلينها والله انها ريحت قلبي وطمنته فوق ما تتخيلين دشيت المستشفى وانا اضحك واسولف عااااادي ولله الحمد

ههههههههه هلا حبيبتي كلامي نفس الغالية تونة نحن نتحرى انه بنحس بجرح العملية ... اصلا ايدا ما نحس ..ولا حتى الجرح بتحسين فيه بس انتي اول ما تقومين من البنج تبين تقعدين وما بيخلونج اما عن الويّع ماشي ابدا ..:tek: الله يوفقج ان شاء الله

 

[el.hwawi]

بصحه وعافيه ان شاء الله

الله يعافيج اختيه ويزاج الله ألف خير

 

[ام سلطانوه]

والله خايفة موت من العملية لانة مثل قلتلج يبون يشيلون الحلقة اول شي وبعدين يسون العملية الثانية