تجربتج تهمني :)

[MagiCEyEz]

بسم الله ابدي موضوعي
انا انسانه احب اليهال قبل ما اتزوج كنت اموت فيهم الحين عيالي طقتهم ابيزة و صراخي مالا والي عندي اربع صبيان اسم الله عليم من شهرين الي 6 سنين و شعري شيب كرهت نفسي قمت احس مقصره بحقهم مالي خلق اغسلهم البسهم متكله عالخدامه بالاكل باللبس مليت و مساكين لو يقولي نكته اضحك بطريقه انه هو سخيف و نكتته ما تضحك و عندي والله شاق القاع من شطانته اطقه مسكين و مرات احس اني من كثر ما اعصب اكره و انا احبه ماكو ام تكره ولدها انا مو محتاجه نصيحه من احد بس انا محتاجه حياتكم انتو تشاركوني فيها كل وحده شلون تعامل عيالها تطق او لا شلون تعاقب شلون تعامل ابي اشوف هل انا مكبره الموضوع و الا الوضع طبيعي عندي لاني مرات احس بالذنب اني ماقعد معاهم وايد بسبه صراخهم و شطانتهم الله يحفظهم شاركوني تجاربكم

 

[مناير ...!]

من ست سنين لشهرين ضغط مشاء الله تبارك الله
كلهم تحت بعضهم فيخلي تربيتهم صعبه الله يكون بعونج
الطق والضرب غلط ماكو ناس اتطق الحين
عاقبيهم احرميهم اشرحي لهم غلطهم زعلي منهم
والله يكون بعونج ويحفظهم لج

 

[ماني من الناس]

شوفي برنامج سوبر ناني حمليه باليوتيوب او شي

مسلي ومفيد وواقعي وتشوفين بيعينج شلون تعامل الاطفال

 

[أكذب عليك]

توني اتناقش مع اختي بخصوص هالموضوع
اول شي انا توني حامل ووبجر فمااااااااااااااعندي اي خبر بتربيه الاطفال
بس ناقشت اختي من منطلق اني بيوم من الايام كنت طفله
اختي تمووووت ع عيالها بس تزفهم وتكسر فيهم قدامنااومالومهااا مرات يبطون الجبد
بس قتلها احنا يوم كنا صغااار امنا ربتنا احسن تربيه وكنا مجننينهاا بس بحياتهااا ماخلتنا انام متضايقين منها
او نايمين ومنكسر خاطرناا الطفل طفولته يتذكرهااااااااا بكل تفاصيلهااا في دكتور يطلع ع الوطن الكويتي اللي
يعلم شلون طريقة التعامل مع الابناا (ماعرف اسمه) كلااااااااااااااااااااااامه روعه ونصايحه تفيد

والله يخليلج عيالج وترى الصبيان خصوصا انهم ورا بعض بتكون شطانتهم دبل لانه يساعدون بعض

 

[لمى الهاجري]

انا مو متزوجة ولو اني نفس بلدج جان خذيت واحد من عيالج لووول الله كريم

 

[رنا 2012]

احمدي ربك موكلتهم على الخدامه
اضبطي اعصابك اكثر وممنوع الضرب بها السن انا احب اتفاهم معاه اما الضرب نادر
لاني اتحسف لما اضربه
هم يتعلمون منا لما نكون عصبين رح يصيرون عصبين
اوعدي نفسك انك ماتمدي يدك عليهم
الله يعينك ويهدي عيالك وعيال المسلمين يارب

 

[Tame]

الله يعينج لان صغار وكلهم صبيان
انا عند ولد عمره 7 شهور ومينني وهاي توه صغيره اسمله عليه وانا اهتم فيه مع ان كان عندي شغاله بس مقرره ماحمل لي مايصير سنين او 3 وعقب اوقف لي يدشون المدرسه عقب اذا ابي ممكن لان وايد اهتم بالتفاصيل بدقه واحب اعطي كل طفل حقه
بس قبل لما كنت صغيره اهتم في اخواني وادرسهم مع ان امي ماتطلب مني وانا اكبرهم وعقبي 3 بنت وولدين واخوي الصغير كان ابداااااع فالشطانه واللحين والله صار اعقل اخواني ماشاء الله وكنت اطقهم بس مارضى عليهم بس اللي يشوف تعاملنا اللحين يقولون الناس شنو مسويه حق اخوانج اللي يحبونج ويحترمونج بس لما اتذكر اني اطقهم اقعد اصيح قلبي يعورني وخذيت عهد على نفسي ماطق عيالي الا اذا مسوين مصيبه بس صج اسلوب العقاب والحرمان وااااااايد احسن وحاولي تخصصين وقت لهم بروحهم بس لعبو طلعو بس قبل عطيهم الارشادات واذا هددتيهم بالعقاب نفذي لان اليهال اذكيه بقولون تهدد وبطقنا وخلاص عقب ويتعودون على الطق احضنيهم بوسيهم سولف وياهم حطي لعبه لعبو كلكم ويا بعض شركيهم بنشاطات عشان تفضين حق عمرج واهمه يطلعون طاقتهم

 

[MagiCEyEz]

مشكورين عالنصيحه و التجارب بس اللي يقول جربي طريقه سوبر ناني مع واحد من عيالي فاشله يطنشني و يمشي لين افقد اعصابي و اصرخ ما يهتم اطق و مرات اسمع طق مطاقق ماما طقني ارد عليه طقه ههه يطالعوني انتي من صجج اقول بس تعبت و اعتقد ان الزواج المتاخر للبنت ياثر بحكم العمر لو انا اول العشرينات راح اكون حيويه بس اكبر من جذي و صبيان اركض ورا صيده مصيده عشان اطقه و يطنزون علي ما تقدرين تصيديني فاعصب مسكين ياكلها عدله اذا صدته الله يهديهم قبل ما تحوشني جلطه :x

 

[زوجة عزيز]

الله يكون بعونج

 

[لمى الهاجري]

مشكورين عالنصيحه و التجارب بس اللي يقول جربي طريقه سوبر ناني مع واحد من عيالي فاشله يطنشني و يمشي لين افقد اعصابي و اصرخ ما يهتم اطق و مرات اسمع طق مطاقق ماما طقني ارد عليه طقه ههه يطالعوني انتي من صجج اقول بس تعبت و اعتقد ان الزواج المتاخر للبنت ياثر بحكم العمر لو انا اول العشرينات راح اكون حيويه بس اكبر من جذي و صبيان اركض ورا صيده مصيده عشان اطقه و يطنزون علي ما تقدرين تصيديني فاعصب مسكين ياكلها عدله اذا صدته الله يهديهم قبل ما تحوشني جلطه :x

يالله الحمد لله على كل حال ياليت انا نفس بلدج جان خذت عيالج يوم كامل وما ارجعهم الا لما ينامون للوول بس انا من قطر وعزابية

 

[جنى ولمى]

الله يعين الجميع يااارب اجل البنااات اهدأ مع اني مااقصر بضربهم الله يهدي عيال الجميع ويصلحهم

 

[كوكتيل عسل]

الله يعينج حبيبتي

حماتي عندها بنتين مورينها الويل ماشالله عليهم شياطين لاخر درجة

وانتي تتكلمين عن نفسج اشوفها جدامي

حاولي ترخين كثر ما تقدرين وكل شي يصير من مواقف سويها لهم قصة
ولعبة شاركيهم بلعبتهم وبصراخهم وبضحكهم


والله يهديهم لج ان شالله


انا عندي ولد جريب بيكمل سنتين وما شالله عليه تعلم من بنات حماتي كل انواع الصراخ والشطانة
ايام تشوفيني من احسن ما يمكن وساعات اين واوصل حدي منه بس مادري شلون اتعامل معاه وهو ياهل ما يفهم لانه الطق والصراخ مامنه فايدة غير عوار قلبي انا

 

[Gifts&Occaions]

الله يعينج

 

[المرتاحة]

شوفي أختي عاقبيهم عقاب بدون ما تفقدين اعصابج وتصارخين. ديري بالج ترا الياهل ذكي ويشوف هالشي نقطة ضعف فيج ويستغلها ويطفرج اكثرخليج حازمة بس مؤ عصبية وتصارخين وسوي لهم عقاب مثلا تحطينه بغرفة تحبسينه فيها خمس دقايق لا تتعدى الخمس دقايق وقولي له يفكر بغلطته واهو محبوس
وبعدين هذيلا صبيان لازم الابو يشاركج بتربيتهم وتتفقون مع بعض بأسلوب التربية بدون طق
اشتري لهم لعبه تشاركينهم انتي وأبوهم فيها اشتري لهم دفتر تلوين وعلميهم اشلون يلونون منها اشوي يطخون وترتاحين و بنفس الوقت يتعلمون

 

[*آسوومه*]

الله يعينج صراحه @_@
و طبيعي بتفقدين اعصابج و بتطقين لانهم اسمله عليهم 4 و الشطانه دبل الدبلات
بنت عمتي عندها 6 الله يحفظهم اكبرهم 15 و اصغرهم 4 سنين
ف متخيله شلون الوضع ؟
و الله حالتها مأسويه صج الصبيان يجيبون الهم
لان الشطانه كلهم يتعاونون فيها
و يتطاققون
و يناحسون و و و
ف لازم تتبعين معاهم اساليب التربيه الصحيحه
و ترى الطق عمره ما غير شي
بيردعهم عن الغلط قدامج بس اذا رحتي بيردون يسوون الغلط
لازم تفهمينهم بكلام ع قدهم
ان هالشي غلط و هذا صح
و استعملي اسلوب الثواب و العقاب
مثلا يا فلان لو درست ولا لو قعدت شاطر و لعبت مع اخوك
بشتري لك كذا كذا < بس هااا لازم تكونين صادقه معاهم لان لو طاعج
و ما يبتي له الي وعدتيه ما بيطيعج مره ثانيه ! بيناحس ولا بيثق فيج
و اذا غلطوا
عاقبيهم بأنج تحرمينهم من الي يحبون
سواء كان نوع اكل
او يحبون يطالعون شي فالتلفزيون < لا تخلينهم يشوفونه
او اخذي الايباد جذي يعني
لان هالاسلوب ينفع وايد اكثر من الطق
و نتايجه طويله الامد ان شاء الله
صحيح بتلاقين صصعووبه فالبدايه بس شوي شوي
بتتأقلمين معاهم
و نصيحه لوجهه الله اسلوب الطق وقفيه
حرام توهم يهال
لا تربينهم على العصبيه و الطق
باجر يطلعون حرتهم ف بعض ولا يكرهونج !
ترى تصير
ف انتبهي
و حاولي تسيطرين على اعصابج
و الابو بعد لازم يتدخل فالتربيه مو بس انتي تربين
خليه يطلعهم يعلمهم يسولف معاهم
جذي يعني لا تغيبين دور الاب عنهم
عشان يكون فيه توازن
و يحسون بوجودكم انتوا الاثنين
وووه قرقت وايد ههههههههههههههههه
الله يوفقج و يعينج ع تربيتهم
و ان شاء الله يكبرون و تشوفينهم معاريس و تشوفين عيالهم ان شاء الله

 

[MagiCEyEz]

لمي الهاجري شفيج مصره تاخذين عيالي والله تعبانه فيهم ههه ما يهون علي من يروح واحد مكان قلبي ينشلع لين يرد كوكتيل عسل و المرتاحه و اسومه مشكورين علي ردودكم اهم شي الصبر و تقولون الابو له دار هذي الايام لو تقولين حق ريلج شوفه سوا جذي يكلم ولده ابرود ليش بابا جذي لا تسوي مره جذي و هذاك يقوله انشالله و تطلعين انتي المو زينه اللي ما يحبونج بس تزفين و تطقين و هو يطلع الزين الحنون و طبعا ما ترضين بالغلط و تحاولين تكونين حازمه لكن الابو ما يساعد يخليج بدور الظالمه و يقوي شوكتهم مشكله الصراحه !!

 

[MagiCEyEz]

بعض الكلمات في الجمل عندي سقط سهوا عاد انتو حاولي تفهمون شكاتبه

 

[ام خدود ورديه]

محد قالج كودي 4ورى بعض دامج مو قد المسؤوليه اتييبينهم واتعذبينهم ليش مو حرام عليج ؟؟؟
وبعدين اتطقينهم تعاقبينهم انقول لحظه غضب بس يسولفون معاج وينكتون تدقرينهم
انتي حرام اتكونين ام
الله يهديج

 

[نشيج الروح]

مساكين ينحاشون عنج يبونج تصيدينهم حتى لو بالطق
باي طريقة يحاولون يخلونج تلعبين معاهم

 

[ياغروري]

الله يعينكك

ويهديهم ويخليهم لكك