تاثير فرق العمر

[Kocheko]

سمحي لي

بس ما عندها سالفة ترفض عشان شهور!!!!!!

أنا دايما اقول يعني شنو فرق جم شهر؟؟!!!!! طلعت ضروسها قبله وتعلمت تمشي قبله!!!!!

العمر مو مقياس للعقل .. اكو في رياييال دشوا الأربعين وللحين الحمدالله والشكر ودج ترفسينهم على عقولهم التنك

شخصيا انا اكبر من زوجي بسنة واربع شهور وصار لنا 5 سنين ... انا اكثر شبابا وحيوية وصحة منه ... اهوه من احين طالع له شيب والحمدالله على كل حال بس بسرعة يمرض وكل من يعطيه أكبر من عمره بواااايد وانا يصغروني "بس مو وايد لوول" يعني من ناحية الشكل لا تعور راسها

اما من ناحية العقل والتفاهم فالحمدالله الحمدالله الحمدالله متقاربين من التفكير مع طبعا اختلافات بس هالاختتلافات كانت بتكون موجودة حتى لو كان اكبر مني بعشر سنين

والريال ما تقدم لها الا واهوه عارف انها اكبر منه "بشهور!!!!!" بعدين بيعايرها؟؟!!!! محد جبره اهوه اختار واهوه شاق حلجه من الوناسة

هدي كلام الناس على صوب اهيه شنو بتبرر حق روحها لما ترفض ريال زين وطيب وكل من يمدحه .. بتقول حق روحها لو بس عيد ميلاده قبل!!!! لا تظلم روحها عشان هالشي اللي اهوه اصلا مو شي !!

كل وحدة قبل ما تتزوج تفصل وتخطط وتفضل وما تفضل بس لما الصج يكون غير ومو سيء الا احسن واحسن مستحيل تقول لا

قالت اللى كنت بقولة .. لا ترفضه لسبب بالنسبة لي سخيف ولا توقف نصيبها عشان العمر .. لو الريال زين وشاريها خل تتوكل على الله وتتزوج :eh_s(15): ترا في هالزمن مافي ريايل سنعييين

 

[فتاة الكوخ]

اهم شي فكره وعقله مو سنه
عليك بالثقيل الرزين ولو هو صغير واتركي الخفيف ولوهو كبير

 

[حبي حبيبي]

حبايبي مشكووورين عالردوود

وما يندرى شصار اللحين عليها

انا قلتلها وجهات النظر

وكل شخص له رايه و اسبابه

 

[حبيبي مالكني]

انا بالنسبة لي
يفضل يكون الزوج اكبر من الزوجة
حتى لو شهر
بس موحلو اصغر منها
والعمر ماله علاقة بنضوج الشخص
وتفكيره
وثقافته

 

[عاشقه رويشد]

احس العمر ماله شغل والريال سواء كان نفس عمر المره او اصغر بجم سنه يعني ب2 او 3 كلش ما ياثر بالعكس يمكن اللي اصغر منها يكون فاهمها اكثر والعكس وكل شي بنهايه يعتمد علي النصيب والله يوفق ااجميع

 

[Pinky -cat]

فعلا الفرق الكبير مو شي حلو، احسن شي فرق اكثر شي خمس سنين عشان الفوجه الزمنيه تاثر في العلاقة والرغبات
والميول والتفكير .

 

[أميرة-]

مادري اصغر منها مو حلوة

بس اذا فرق اشهر يعني اهو اصغر منها بجم شهر عادي لكن بالسنين

 

[mrs.abk]

شوفي ,,

أنا من النوع اللي ما أحب الحرمة أكبر من الريال ,, القصص اللي شفتها حولي كلها ملخصها : كل ما كبر عمر الحرمة عن الريال كلما كانت المشاكل أكبر .. لو العمر فرقه سنة مشاكل بسيطة ولو العمر فرقه 5 سنين مشاكل عودة ولو العمر فرقه 10 مصايب ..


أولا الحرمة تبا عيال لأن فيه مرحلة معينة لازم تييب فيها عيال ,, الريال في هالوقت يكون صغير ,, فرضا وحة عمرها 30 تزوجت واحد عمره 25 .. هي تبا ولد ورا ولد لأن عندها 10 سنوات بس للانجاب السليم .. وهو عادي عنده وموب مهم لأن بعده عنده فرصة 30 أو 40 سنة إييب عيال !!

الحرمة في عمر 30 تكون مكونة نفسها غالبا ,, عندها سيارتها ، موظفة ، وعندها رصيد بالبنك ..
الريال في هالعمر توه يشطب ويحط رتوش على مراهقته .. وعلى عمر 35 يكتشف انه نضج ويقول نفكر بالمستقبل !!


الحرمة في عمر 30 يكون جسمها بدا يفقد 5 % من الكتلة العضلية كل سنة، ويقل معدل الحرق وتزيد معدلات السمنة .. وخاصة مجتمعنا لا رياضة ولا يحزنون .. الريال في هالعمر لو قطع الكولا ينزل 3 كيلو !!

أنا من أنصار إن عمر الزوج يكون أكبر من الزوجة 3 سنين على الاقل ,, وما أشجع وحدة ترتبط بأصغر منها .. هي تبا استقرار وهو توه ما شبع مراهقة ..

 

[قلب طفـــله]

ضحكتني والله من كثر الرياييل ترفض !! علشان جم شهر الله يهديها

حبيبتي في ناس متزوجين وفرق العمر بينهم 10 سنوات مو شهور ! وعادي

المهم الانسجام والأخلاق والموده والحب والتعامل !

خليها تستخير وتتوكل على الله اهي ضامنه بييها احد غيره يخطبها ؟

 

[برستيجي مآركة]

العمر مو مقياس لكبر العقل بس الاحسن يصير الرجال اكبر من المراة او كبر بعض عادي بس اهم شي مايصير اصغر منها
بكرا بعد يعايرها ويقول لها انتي اكبر مني كل شي والا العمر عند المراه لكذا حلاته اهو يصير يكبرها بالعمر
بس حلو فرق 3-4-5 سنين اكثر احس مافي توافق مرات
بعضهم رجاجيلهم كبار عليهم تحسين مافي توافق فكري بينهم خاصة في وقتنا الحين البنت العشرينيه من احلى مراحل عمرها كل شي فيها خبال ومرات ركاده وشقاوة ف تحب اللي يكون معاها على جوها لما يكون بعمرها بس لما تاخذ واحد اكبر يطفي هالشي فيها
اعرف وحده رجلها اكبر منها بثمان سنوات تقريبا وكله يشوف نفسه الفاهم واهي الغلط ويحسسها انها بزرة باافعالها يحبط كل شي حلو فيها وهي تعاني من هالشي

واااي قرقت واجد وكنت بكتب بعد بس استوعبت الجريده اللي كتبتها خخخخخ
والله يوفقها اللي بتتزوج ويرزقها بالرجال اللي يناسبها في كل شي