تأخر حملج ؟؟ كثرت الأسئلة ؟؟ مريتي بمواقف هدت حيلج .. حيآآآج نفضفض ونتشارك همومنآ ..

[orchidia]

يااااااااااااااااااااااااااااااااااارب ياواحد يا احد ارزق كل محرووووووومه عاجلاً غير اجل 

آآآمين يارب العالمين ولج بالمثل حبيبتي :yaaaaaarb:

 

[orchidia]

شكثرر الموااقف اللي مرريت فيها مالنا الا الدعاء والصبر

ربي لاتذرني فردا وانت خير الوارثين

مانقول الآ يآآآآآآآآآآآآآآآآآآآآآرب :yaaaaaarb:

 

[رووح ابووها]

وحده تصيرلي من بعدين (( ماعندها شغل الا انا ))

سالتني ثاني شهر من عرسي ها ماحملتي ؟؟ قلتلها بسم الله تو الناس .
خامس شهر قالتلي ترا فلانه ( وحده تزوجت بعدي باسبوع ) حامل وبالثاني وانتي ماحملتي ؟؟ طبعا ضيعت الموضوع


وقبل اسبوعين اصعقتني بالسؤال ...........
((( منج ولا منه ؟؟ ))) انا التفتت منصمه شنو منج ولا منه !!
قالت ماسويتوا تحليل تشوفون ليش ماحملتي !!
قلتلها لا ماسوينا ولا مفكرين نسوي وبعدين ترا ماصارلنا سنه
وتونا صغار متى ماجا حياه الله


>>>> الزبده ان محد يسالني هالاساله الا هذي المره وخدامة امي ههههههه

 

[نورة2010]

مرت اخوي تاخرت بالحمل ست سنين وتوها هالسنه جايبه بنيه الله يحفضها
بس كانت والله تعاني من كلام الناس لدرجة انها مرة هي واخوي راحو يزورون عمي بالبيت وكانت مرت عمي موجودة وكل شوي تقط كلمه عليهم وتقول لاخوي اللي تزوجوا معك الحين معهم درزن عيال الا انت شكلك بتبطي مقابل وجه هالعيوز اللي معك تصبح وتمسي عليه ولا انت سامع صوت الياهل ومرت اخوي ماتمالكت نفسها وقعدت تبكي قدامهم طبعا مرت عمي مقهورة من اخوي ليش انه ما اخذ وحده من بناتها

 

[lovemyself]

اه والله شقول بس شكثر مرت على هالمواقف شكثررررررررررررررررررررررر ليما ياتنى حرة بقلبى وحسرة واكثر شى يعورر القلب لما تحمل وحدة والكل يدرى الا انتى وانا اعرف بس اطنش
الكلام بهالموضوع يطوووووووووووووول وانا الحين تاقلمت مع وضعى الدورة متاخرة على يومين بس اعرف انها بتنزل ولا صرت انطر وقت تبويض ولا افكر احلل ولا غيره خلاص مو حابه اتعب نفسى بالتفكير بهالامور خلاص طاف على زمن طوووووووويل والناس فقدت الامل من حملي وانا بعد صرت ااقلم نفسى انى راح اعيش طول عمرى جذيه واحاول ما افكر بهالموضوع انا ما قصرت كل شى بايدين الله انا كان قلبي يتقطع مليون قطعه لما اسمع حجى الناس وخصوصا لما اتييلج وحده تدعليلج جدام الناس والله اعلم بنوايا الناس ولو كانت نيتها طيبة فاهي قاع تسببلج احراااااااااااااااااااااااااااااااااااااااااااااج وكانها تثير شفقة الناس عليج والله اتضايق من اشيا وايدة بس شنو اسوى انا ما بايدى شى خللاص والله انى قطعت علاقتي برفيجتى لانى انصدمت منها حامل بالشهر السادس وما كنت شايفتها من زمان وانا على حسن نية اسالها مافى شى بالطريج بشرى؟ تقوللى لا مافى شى وطبعا هالشى بلتلفون وبعد 3 اشهر طرشتلى رسالة بارطيلى اانا ولدت واعذرينى ترى ما كنت عارفه انى حامل الا بالشهر السابع ونسيت اعلمج
عقبها طاااااااااااااااااااااااااااااااااااااااااااااااحت من عينى ومسحت رقمها

 

[! بــدويه وآآيــد !]

،



انا صار لي سنه و3 شهور ماحملت واصلا كنت اسوي شغلات تمنعني من الحمل وزوجي بعد يقول توا الناس
فـ محد يسألني لان الكل يدري اني ما ابي الحمل
الا اهل زوجي طبعا ماقلت لهم ما ابي الحمل بس ماسألوني الا مره حماتي قالت الحريم يقولون انج تاكلين حبوب حمل < انزين منو الحريم وشكو فيني ؟؟

بالعيد ام زوجي توزع ع الخدم والجهال عيادي دنانيز قال لها زوجي عن ضحك يمه يمه عطي ساره عيديه قالت اي الي ماتضني نعطيها مع الجهال اصلا !! خزيتها خزه وزوجي وعليا تحسف انه تغشمر ولما ركبنا السياره قال ان امي دايما جذي ترى مو قصدها شي قلت له اصلا امك دايما لسانها مفلوت عادي

بس ماحب احد يدعي لي بوجهي يوو عسى الله يرزقج ومادري شنو ؟؟ تبين تدعين لي ادعي لي بينج وبين نفسج مو جدام الناس ويصوت عالي

مره وحده من اهلي قالت بصوت عالي وهي تلعب بيبي يوو عسى الله يرزقج مثله قلت لها لا انا مابيه الحين !! قالت اختي قطيعه جنج شاكيتلهم خليت ويهها ينقص عشان يعرفون يدعون بصوت عالي


انا وزوجي مو مستعجلين ولا راجعت للحمل ولا مره توا الناس على هالموضوع

الله يرزق الي تبي الحمل

 

[Pippa]

’

اعرف وحدة احملت بعد 3 سنين بس اهيا الي مأجلة الموضوع لانها توها صغيرة :$

واعليا من كملت سنة طلعوا حجي الناس عنها انها ماتحمل وكل ماقعدت بمكان حشوا فيها : ليش وليش ماتبي @@؟؟

وسوالف واااايد ...

ماادري يعني اذا يابت البيبي اهما بيربونه والا بيصرفون عليه .. الناس عليهم لقافة موصج >>> ان شاء الله ما اشتط لوووووووول

 

[رووح ابووها]

واعذرينى ترى ما كنت عارفه انى حامل الا بالشهر السابع

امبيه هذي قويه حيل
شهالناس المعقده مو لهالدرجه عاد !!
لوف ماي سلف ياحياتي عسى الله يرزقج ويرزقني ويرزق كل وحده تبي الحمال

 

[سوسو الأموره]

الله يرزق كل محرووم
وعادي عالمواقف خذو وخلو بس اهم شي تكون عندكم الثقه بالنفس عاليه
وانه الله مااخر الحمل الا لحكمه منه واختبار منه

والحمدلله على كل حال انا عندي بنتين واللحين اعالج من التكيسات وعادي اذا وحده اسالتني اقولها ماعندي اشكاليه مع العلم اني تاخرت في بداية زواجي ماحملت على طول يعني سمعت تعليقات وكنت اضحك منها ومااخذ بخاطري يعني لا كلمتهم بتقدم شي ولا بتاخره
اللي الله كاتبه الله بيصير
واللي خاشه حمالها لا تحرون نفسكم عليها دامج لا انتي عمته ولا خالته خلاص مالج شغل فيهم

والله يرزقنا بالذريه الصالحه عاجلا غير اجلا يارب

 

[أبلة أم سعود]

انا صارلي سنة و ما حملت، الحمد لله على كل حال، ذاك اليوم وحدة من رفيجاتي بالدوام اهي حامل الله يتمم عليها، ماشاء الله، و كانت شارية مسند و مسنده ريلها و قلتلها واايد حلو المسند من وين ، جان تقولي شتبين فيه خو انا اللي حامل مو انتي !!!

استغفر الله

 

[رووح ابووها]

^ ^

استغفر الله على هالناس

 

[orchidia]

مشكورين حبيباتي على المرور وربي حلو نتشارك همومنا

محد بيحس فينا غير الي عايش هالتجربة واحنا كلنا عايشينها وقلوبنا على بعض ...

مااقول الا يااااارب العالمين بدل مايكون هالموضوع مكان للشكاوي وبث الهموم يكون مكان تبريكات ويباب على الحمال ..

ويارب ماتدور علينا سنتنا الا معنا يهال الله يرزقكم ويرزقني ويرزق الجميع

ورب البيت أحبكم

 

[حبيبة حمد]

انا وحدة معاي بالدوام واهي رفيجتي تزوجت بعدي
وماحملت وصارت تعالج وماحملت
ودليتها على وحدة تعالج وراحت لها
وحملت على ادويتها وصارت بالشهر الرابع
ولا صدفة اسمع ثنتين يتكلمون ان فلانة حامل
وانا انصدمت ان الكل يدري الا انا خاشة علي
حتى كانت لما تمشي ترفع عبايتها يعني قاعدة تعدلها علشان ما اشوف بطنها انها حامل​

ومرت حماي بعد حملت وصارت بالشهر الخامس هم كل اهل ريلي يدرون الا انا
ومرة كانت موجودة ببيت حمولتي ولا مرت حماي الثاني تسألها شلون الحمال
انا انصدمت يعني الكل يدري الا انا ..... اشمعنه يعني راح احسدج مثلا !!!
الله يتمم عليهم ان شاءالله ويرزقنا بالذرية الصالحة​

 

[orchidia]

اي حبيبتي هم جذي ع بالهم بنحسدهم


ورب البيت ان افرحه لهم بس بنفس الوقت انقهر منهم على تصرفاتهم ليش يكرهونا فيهم كل هذا خوووف

بيوم من الأيام كنا مانخبي شي عن بعضنا نحب الخير لبعضنا

والله هالناس مرضىىىىىىىىى اتعب وانا اقول مرضضىىىى

 

[حالة حنان]

لا حوله ولا قوة الا بالله شنو هذول هذول بشر الرسول صلى الله عليه وسلم قال (قل خيرا ام تصمت )
ليش جذيه حرام بس تدور الدنيا عمت اختي كسفت باختي طولت سنه ونص ما حملت وكلوها بالحجي
وساكته ولا مره تكلمت ولما حملت يابت ولدين وبنت وكلت مانع والكلام مابغينا نصير عمات مابغينا نصير جده وووو
وبعد ماقطت الحبوب المانع الحين طولت سنه ونص ما حملت بعد عيالها وهم كلوها ليش ماحملتي ومشاكل مالها نهايه تزوجت وحده من بناتهم
وسبحان الله الحين ثلاث سنين ماحملت وللحين ادور العلاج سوت تلقيح كذا مره وعمليات واايد ماصار حمل وتقول حق اختي ادعيلي
مع ان اختي ذاقت المر منهم بس هم تدعيلها وبعد سالفتها انها ماحملت ما قامو يتكلمون على اختي بالعكس اختي تقول انها مستانسه مع ريلها واااايد سبحان الله حتى هم قامو يحبون اختي وعيالها كما تدين تدان لا اله الا الله

 

[orchidia]

صاجة كما تدين تدان بكرآ الدنيآ بتدور عليهم وبتذوقهم المر الي ذوقونا إياه

مأأدري ليش هالناس قلوبها سسودا مادري من وين يجيبون هالحقد والكره والحسسد

وترى على هذا كله لو حملتي باجر وولدتي ولا وحدة منهم تجي تسأل عنج او تتطمن عليج مشششفح حسبي الله ونعم الوكيل

مابي أدعي عليهم وأقول جعلهم يذوقون المر الي ذقته سلمت أمري لربي وربي أعلم بعباده

الله يرزق خواتي ويرزقني ويرزق الجميع يارب

 

[توفـــا]

خوش موضوع


اللهم لا تذرني فردا وانت خير الوارثين


عسى الله يرزقنااا يارب

 

[Maha2012]

الحمد الله. مامريت في ها المواقف

الله يرزقنا يااااااارب

 

[أدري طيبتي غلطه]

يووووه المواقف واجد

واللي ينرفز اللي تدعيلك قدام العالم الله يرزقك انا اتنرفز اذا بتدعين لي ادعي لي في سرك مو قدام العالم

وحماي تزوج وراي وبعد 6 شهور زوجته حملت المهم وراحت تجهز للبيبي في الشهر الثامن والا ام زوجي تشوف

تجهيزاتها للبيبي وتقولها شهيتينا على البيبي وتطالع فيني استغربت من نظرتها يعني عشان انا ماحملت

واحس صااايره حساسه مره انا الحمدله راضيه باللي الله كاتبه بس مااحب اللي يقط قطات


والله يرزقنا

 

[شكريه81]

كنت توني حامل ورايحين بيت جدة زوجي ما قلنه حامل بعد تقول لنه الجده يالله حملو لا يسبقونكم الزغار ( الصغار ) قاله زوجي عليهم بالعافيه