بنطلع مكان عام و كل شي انا اسويه انقذوني 

[خوخة الكويت]

السلام عليكم


بنات زوجي قرر انه يطلع اهله مكان عام و احتمال نروح حديقه عامة ..

ابيكم تساعدوني شنو اسوي راح اسوي جاي و قهوة و عصاير ابيكم تعطوني ارائكم باكلات تصلح للجاي و القهوة و للعصاير

بسرعه ما بقا شي تكفون بنطلع يوم السبت 

 

[ام الدرر]

حبوبة كيك (خلطات الكراتين الجاهزة مثل العلالي وروبن )
اختاري الخلطة البيضا وحطي معاها هيل وزعفران مع الشاي لذيذة
اذا كنتو وااايد اشتري صواني فطاير مشكلة 2 او 3
خلي معاي مطاطير ماي حار عشان تزيدين للشاي وللي يحب يشرب نسكافيه او حليب
مكسرات ومخلط
صواني حلو للقهوة
اكواب بلاستيك صحون ملاعق ​

 

[خوخة الكويت]

يعطيج العافية اختي ام الدرر فديتج

بس مشكلتي ما عمري جربت اسوي الكيك الجاهز اخاف ما اضبطها و الطلعه قريبه جدامي يومين بس 

 

[خوخة الكويت]

شدعوه وينكم بنات

والله حدي متوهقة و متوترة 

 

[بـ سـ كـ وتـ ة]

حبيبتي الكيك وايد سهل ويضبط معاج إذا اتبعتي الخطوات اللي عالعلبة بالضبط

احنا دايما حق البحر عندنا اختيارين على حسب وقت الطلعة

يا إما امموش أو كلب ساندويتش

الطلب ساندويتش 3 طبقات توست تدهنينهم بمايونيز أو جبن كرافت عالتوستة الأول مرتديلا بعدين توست بعدين جبن سلايس وتوست

ونقصها بالنص تصير أسهل بالأكل

أو اخذي سندويتشات جاهزة من أي مطعم وانتو رايحين ولا طلبوا فطاير

وهم إذا تحبون اخذوا بطاط وبفك وككاو وهالخرابيط تصير حلوة عالبحر

 

[ريح الصبا]

اسمحي لي اقترح عليج
انا افضل بالطلعات هذي اسوي كب كيك واحسن نوع ولذييذ حده بيتي كروكر وزينيه باللي تحبينه
او حطي عليه نوتيلا وتقدرين تسوين بسبوسه بالكب كيك بعد
وسوي سلطة فواكه وحطيها بعلب بلاستيكيه صغيره لها غطا او علب زجاج صغيره تلقينها عند ابو ميه
وتقدرين تسوين سندويشات من الخبز العربي الخفيف وتحشينها بحشوات مختلفه وتلفينها بقصدير وتحفظينها بالحافظه دافيه
او تسوين توست انج تقصصين اطرافه وتدخلينه بالكب كيك وتحشينه باللي تبين وتدخلينه الفرن واقولج طريقة اختي كانت تحشيه دجاج او خضار وتحط فوقه بشاميل وجبن مبشور وتدخلينه الفرن طعمه لذيذ
وطبعا ما اظن انج راح تنسين المكسرات توزعينها بالسفري الصغير او تعبينها بالعلب اللي قلت لج عنها قبل
ولا تنسين الكلينكس فيه علب تنباع في الجمعيات كرتون صغنون حلو حق هالطلعات وملاعق صغيره سفري
هذا اللي اذكره الحين اول ما اتذكر شي جديد راح ارد اكتب لج وموفقه يارب
*