بنات محتاره شورو علي اقبله ولا ارفضه ماعرف اقرر مستقبلي

[Ga6wa_7elwa]

Queenleo


والله قمت اتضايق من الحجي اللي اسمه عن دوامي مع اني مو لاقيه وظيفه ثانيه اضطريت اقبلها عشان ما اقعد كفايه كانت قعدتي 6 شهور بالبيت ،،،
دوامي مكان حساس بس الحمدلله ما امدح نفسي الكل عارفني اني انسانه ماشيه سيده و بحالي ومحد يرد لي طلب بدوامي والكل يمدح فيني
هذا مو كلامي انا بس كلام الناس يضايق ماقدرت انقل يعني افنش واطلع بالبيت منو يصرف علي انا عارفه نفسي اني ماشيه عدل وحتا صديقاتي القراب مختارتهم عدل بالدوام وماشفت من احد بالدوام مو زين بنفسي اسمع من بره ،،

دوامي شفتات ومريح ماداوم كل يوم ،،مو متعقده من اني ماتزوجت كثر ماعقدوني من دوامي الله كريم،،


انا اخوي مسافر انطره يرد واخليهم يسالون عنه،،، وخل اشوفه ،، بس المشكله شنو اسأله اذا شفته
امي واختي كله يقولون لي عيب ولاتتكلمين ،،لمايشوفونج ،، وانا استحي اتكلم
انا ساعات افكر شلون ريل لي عمر 39 ماتزوج شلونى استحمل ادري انهم حارين سوري علا هالكلمه شلون كان عايش كان يخربط والا شنو،،
انا اكيد رضيت عشان شهادته بس بشوفه وانشالله اتخذ قرار صح احاول اني انسا انه جامعي لما اشوفه واكلمه عادي عشان اعرف كلامه

المهم شنو يلبسون لما ايدش يشوفني نفنوف والا بنطرون محتاره وانا باخذ كلامكم كلكم بعين الاعتبار

 

[الزين 85]

حياتي الحل افرشي سجادتج وصلي استخاره واذا ارتحتي توكلي وشوفيه شوفه شرعيه

ربي يرزقج بالنصيب الصالح

 

[Tutti-Frutti]

امممممممم والله مادري
احسن شي لمن تشوفينه تقررين
هل ارتحتيله او لا وهمن لازم تعرفون سالفه طلاقه

والاهم الاستخاره
الله يوفقج ويرزقج بالزوج الصالح

 

[قاهره عذالي]

حبيبتي
دام مطلق ومافي عيال
مافيها شي حبيبتي تزوجينه

بس اسالوا عنه عدل وعن اهله عدل

 

[عتيبيه رزه]

استخيري واقري على طول سورة يس وكثري الاستغفار
ومنو قالج انه كبير لا بالعكس زين احلى شي اييج واحد اكبر منج ب10 او 15 سنة
انا عن نفسي احب جذيه واتمنى جذيه بس مو كل مانتمناه يصير ويتحقق
وشنو يعني مطلق عادي مافيها شي يمكن صج من مرته ويمكن مو منها ليش ماسألتي امه وسإلوا ييرانهم عنه

والله يوفقج وربي يكتب لج الي فيه الخير والصالح يارب

 

[ساره 101]

الله يوفقج حبيبتي
اول شي استخييييري اكثر من مره
وثاني شي اسالي عن سبب الطلاق يمكن يطلع سبب سخيف من زوجته تعرفين دلع وسخافت بنات هالوقت
لو يقولها كلمه قالت طلقني حبيبتي لا تطوفين هالفرصه من ايدج اذا هو موافق على دوامج
ترى بالهوقت الرجال ينشرى خصوص اذا كان مثقف وعنده شهاده محترمه
والله يوفقج ويكتب لج كل خيير ويستر عليج
ويوفق جميع بنات المسلمين والمسلمات

 

[مــلاك]

حبيبتي سمعي نصيحتي اول شي لاتردين ولا تعقدين روحج يبي ورقه وقلم وكتبي شنو المميزات وشنو العيوب شنو اللي مشجعج وشنو اللي مخرعج وقارني وشوفي اللي مخرعج شنو بالضبط ساليه عنه عادي من حقج ومنها بتشووفين شخصيته وفكره واسلوبه والعمر بالعكس ماشوفه كبير وايد زين واذا عالطلاق ابدا مو عيب مو مثل في بنات ينظلمون بطلاقهم همن في شباب وبصراحه بعض البنات الحين صايرين ماديين ومتطلبات ومايبون مسؤوليه فتلاقينها ماتقدر عالزواج وتنفصل يعني موم سبب قوي ترى والحين اشوف اكثر الشباب والبنات منفصلين اناا كبرج وتحملي كلمتي يمكن تكون قاسيه لكن انا اكلمج بعقل صدقيني اللي كبرنا واكبر الحين نادر جدا تلاقين مو متزوج ولا مو منفصل ناادر واذا لقيتي شلون بتضمنين انه عنده شهاده ومركز وشخصيته حلوه وخايف ربه؟ انتي قابليه قعدي معاه ساليه لاتستحين وسالو عنه اذا كل شي اوكي توكلي على الله اي ونسيت على سالفه انه شلون كان عايش وصابر لي هالعمر قلبي انتي الماضي له انتي لج حاضره ومايندرى كل واحد وظروفه وخوفه من الله وعسى الله يوفقج يارب

 

[لازال انفاسي]

استخيري يالغاليه وبصراحه الرجال مايتطوف وعمرك يعتبر منا سب له والكبر كبر العقل والحكمه يما ناس كبار وعقولهم رديه...
الله يوفقك ويسر امرك.....

 

[ƒédaîtn¥ ZoO'3a]

يعني المطلق ماله رب ؟؟ استخيري حبيبتي وان شالله الله يكتبلج كل الي فيه الخير

 

[جوري 2007]

كبير حبوبة عليج ،، فكري واستخيري

 

[جيرازksa]

حبيبتي العمر مو مهم ابدا والفرق مو كبير 10 سنين

واذا عالموافقه سوي استخاره حبيبتي وربي يكتبلك الخير يارب

 

[قطوة@@]

اذا ريال يعرف الله و يخاف الله و مصلي استخيري

و قعدي معاه شوفي انتي ترتاحين لا و لا لا

و اذا لج نصيب بتاخذينه

 

[~{Danon}~]

حبوووبة لا اتغرج المظاهر و لا اتحبطج وظيفتج و وصولج لهـ العمر بدون زواج ,,,درسي الريال عدل و سألي عنه و عن اخلاقه و طبايعه ,, هذا زواااج طول العمر مو يوم و لا يومين ,,, و استخيري و الله يكتب لج اللي فيه الخير

 

[ام زهقانه]

استخيري راي ربج مهم بالزواج وبعدين اش فيها المطلق اكثر الشباب الحين مطلقين

 

[كيآن روحي]

آولاآستخيري ومآخآب من آستشآر الخآلق والله يقدم لك اللي فيه خير
وبآلنسبه للعمرموشرط آختي آذآ استخرتي ومرتآحة العمر عآدي والله آخوي وزوجته فرق بينهم7سنوآت
وآنآ وزوجي6آو7سنوآت فرق آول آنصدمت بس الحمدلله موعيب00 وكنت مثلك رآفضه مبدآ انومتزوج سآبقآ يعني مطلق بس رضيت لانه صآر نصيبي الله اللي كآتبة لي00والله كنت آدعي ربي يتقدم لي شخص اكبر مني لان آغلب اللي تقدموآ لي آصغر مني ورفضت0وآحسن لك آيكون فآهم وعآقل ومآشآء الله درآسته حلووة
بالتوفيق لك آختي 00

 

[أماني عمري]

أول شي انتي مو كبيرة بعدج و عمر الريال مناسب و لا تغرج الشهادة، أهم شي دينه، الاستخارة مثل ما قالوا البنات و ادعي رب العالمين ينور بصيرتج و يهديج للخير و ما عليج من كلام الوالدة عيب لا تتكلمين، تكلمي و شوفي اسلوبه يمكن ما عنده اسلوب يمكن دفش ما تدرين، سئليه شيشتغل جنج ما تدرين و من متى مطلق و شنو السبب، اذا كثر شرح بمسألة طلاقه عرفي إنه مو سنع لأن الناس السنعة ما تطلع عذاريب بأزواج سابقين و الطلاق مو عيب، رب العالمين حطه رحمة لنا و الله يوفقج و يصلح حالج لما يحبه و يرضاه

 

[(كويتيه عسل)]

صلي استخاره وخل اهلج يسألون عنه عدل واذا زاركم مع اهله شوفيه

 

[أإلع ـشق دلع ـهـأإ]

.





تبين نصيحتي ..


توكلي ع الله ووافقي ..

فكري بعقلج .. عمرج 28 العمر كله ان شااء الله ..

اللي كبرج تزوج وودج اكييد يكون عندج عياال ..

وانتي قلتي دواااامج حسااس صعب يوافق فيه الرجل ..

جااج واااحد عمره زين كبير ومهندس .. وماااعنده عياااال ومطلق وهذا الاهم ..

فكري بعقلج هل تظمنين بيجيج وااحد زين ؟! مو متزوج ؟!

استخيري وتوكلي ع الله ووافقي .. وادعي ربج يكون خيره لج وادعي يسسر امرج ..


والله يوفقج

< حبيتج ماادري ليييش






.*

 

[الوفى عنواني]

استخيري ياقلبي وتوكلي دام الريال شاريج ومتقبل وضعج ومتفهم طبيعة دوامج توكلي على الله بس شوفي عن خلقه ودينه واستفسري عن طلاقه ماتدرين يمكن تطلع اسباب ماتدرين عنها
اما من ناحية عمره زين ومناسب وهم سالفة انه مطلق ترى موقضية بالعكس الخوف اكثر انه يكون متزوج انا ارمل ولامطلق اشوفها عادي جدا انتي توكلي على ربج واستخيري وعسى ربي يكتبلج اللي فيه خير لج يارب

 

[جوري ابيض]

اختي الغاليه اول شي اطلب منج تستخيرين ربج بركعتين
وبعدين شوفي انتي مرتاحه ولا لا وبعدين هو صج مطلق بس ماعنده عيال
اذا اهلج سألوا عنه وطلع زين وانتي مرتاحه توكلي على الله والله يوفقج ويريح بالج
ادري احنا بمجتمع يغث بكلامه ونظراته اذا شاف وحده مو متزوجه ماجنه هالشي قسمه ونصيب
ما اقول الا الله يريحج ويبعد الحيره عنج ويعطيج اللي ببالج ان شاء الله