بنات محتاره شورو علي اقبله ولا ارفضه ماعرف اقرر مستقبلي

[Ga6wa_7elwa]

السلام عليكم



بنات انا عندي استشاره ومحتاره بموضوع تكفون شورو علي،،، مااعرف اتخذ قرار بهالسالفه،،

بنات ابدي السالفه ،، انا عمري 28 حاليا طبعا مو متزوجه لظروف شخصيه ،،توظفت في مكان صعب يتقبلونه الشباب لانه فيه مراجعين وايد وعملاء ودوامي شفتات بس ماقدر اقول وين
،،، المهم اللي قبل لا اتوظف يوني رفضتهم لان كنت ادرس ومابي اتزوج قبل لا اخلص دراستي اغلبهم وكان عندي ناس تتقدم لي بس توظفت بلشت السالفه،، ونه الكل يرفض دوامي من اللي يتقدم لي
المهم عقب ماتوظفت وصار لي 4 سنين مشتغله رفضت واحد،،مع انه كان يبني،،بس نصيب
وكان عندي حاله وفاه في ابوي عقد الدنيا خصوصا سافر علاج بالخارج وتم سنتين فهذا احد الاسباب،
انا مو مسبب لي مشكله كوني ماتزوجت لي الحين مع انه كلام العايله يغث والحمدلله اني دلوعه اهلي ومرتاحه يعني ماكنت متضايقه عشان افكر بتزوج بسرعه،
=====
مشكلتي
انا عندي مبدأ ما اخذ متزوج ولا مطلق حتى لو مادخل على مرته،،واللي متقدم لي الحين مهندس ومخلص ماجستير تزوج 3 شهور وطلق مرته عمره كبير 39 تقريبا او 40 ،ماعرف الاسباب لي الحين راح اعرفها لما اشوفه
شالحل انا عمري 28 ارفضه لانه مطلق طبعا ماعنده عيال منها بس اللس سمعت انه زوجته اذته وراعيه مشاكل ،،

امي تقول ماله علاقه انه طلق من قبل مو زين واهو جامعي مهندس مو اي شي ولاترفضينه عشان طلق
شرايكم بالسالفه وشنو رايكم مو كبير 39
وبنات محتاره ارفضه وانطر والا ابتعد عن المشاكل،انا دوامي صعب يرضون فيه

 

[LuLiTa]

اهو مو عن عمره و لا عن وظيفتج ,,, المهم اتكونين مرتاحتله و مرتاح لج ,, فاهمته و فاهمج ,,, اذا شفتيه شوفه شرعيه و ارتحتي فـ استخيري و ردي عليهم ,,


و حتى لو كان مطلق فـ هذا مو سبب ترفضينه لانه بـ الاساس ما عنده عيال و لا عليه نفقه و قضايا مع طليقته ,,,

 

[هــنــوف]

توكلي على الله وشووفيه واستخيري يااابنت

ومدام انتي طلبتي راينا انا بنصحج نصيحت اخت الزمن هذا الواحد عنده 3 حريم والرابعه ياخذ ام 18 سنه شووفت عينج البيت فيه اكثر من بنت مستعدين للزواج وانتي عمرج مناسب للزواج مو صغيره بس مو معناته كبيره بس لاتخلين ف بالج انه مطلق ماتاخذين لان يمكن صج السبب من مرته مو شرط يكون منه بس هذا مايمانه انج تسألينه وتعرفين سبب الطلااق


واهم شي استخيري ياقلبي وعسى ربي يوفقج

 

[Tulips]

امج كلامها صح ماله علاقه

ماتدرين شنو اللي صاير بينه وبين مرته البيوت اسرار

وانتي قلتي انه ظروف شغلج صعبه ومو اي احد يقبل فيها

ومدام هاللي ماتقدملج راضي بكل ظروفج فمافيها شي حبيبتي

اهم شي تسوينه انج تستخيرين وتدعين ربج انه اذا فيه خير ايسر امورج معاه واذا فيه شر لج يبعده عن طريجج وسبحان الله بتشوفين هالشي بعيونج

توكلي على الله واستخيري

 

[Ga6wa_7elwa]

كلامكم على راسي واتقبل اكيد بس شدراني الفلط مو منه يعني مو مستوعبه مره تخلي ريلها واهو مافيه شي ومهندس،،
انا يهمني يكون محترم وخلوق اخاف انصدم بعدين منه ،،كنت حلمانه من جم شهر 6 شهور عاد انه بيتقدم لي مطلق وراح اخذه واتطلق مادري ماكنت مصليه استخاره لما حلمت بهالشي صدفه وقبل لايتقدم لي اصلا بس مادري انا وايد خايفه يكون منه والا يكون صعب ،،يعني شلون اعرف منه والا من مرته ،انا مااتشرط بس تهمني الطبايع والاخلاق يعني في طبايع ماحبها العصبيه والصراخ والنجره مو طبيعي انا خجوله مااتحمل هالسوالف وافضل اللي مايدخن طبعا بس صعب هذا الشي فتنازلت عنه ،ولا احب البخيل شلون اعرف هالاشياء انا ماشفته بصراحه لي الحين بس احاتي لان كل اللي يوني مطلقين رفضتهم هذا وافقت اشوفه عشان شهادته قلت في بالي يمكن مايكون تافه مثل الريايل يفكر بمستقبله لا تخلوني شورو علي ادري قرقه وماعندي سالفه بس فكره توديني وفكره تييبني

 

[Ga6wa_7elwa]

اكيد هنوف نصيحه اخت وانتو اعتبركم خواتي والا جان ماكتبت موضوع جذي وهالسالفه محد يعرفها بالصج لي الحين غير امي وانا وانتو لانه ماتعرفوني واول مره انزل موضوع اجتماعي يخصنني قلت بشوف راي البنات اكيد عندهم خبره اكثر وفاهمين عدل مو كل يوم يتقدم لي احد بسبب دوامي الزفت اللي ماقدر انقل منه بس ضروفي الوظيفه مو سهله القاها مثل مابي ولو بيدي جان نقلت بس ماقدرت وراح اخذ رايكم بالاعتبار

 

[قمرالبيت]

استخيري وماخاب من استخار والله يكتب لج الخير

وفكري مره ومرتين وعشر لاتستعجلين

 

[meme>the best]

زين ليش ماتسالون عنه قولي لخوانج لخوالج لعمامج خل يسالون عنه عدل عشان ترتاحين واستخيري بس لا تظيعينه من ايدج الله يوفقج حبيبيتي

 

[um khaled]

حبيبتي وايد شغلات ما تبين الا بالعشره

كلميه قعدي وياه سأليه بكل صراحه وبطيها بويهه قوليله كل اللي في قلبج وهذا من حقج

بعدين حبيبتي ترى ااستخاره مو بالاحلام كلللش وهذا شي وايد ناس فاهميه غلط

الاستخاره انج تصلين صلاه الاستخاره وشوفي ان تسهلت امورج معناها هذا نصيبج الله كاتبه

وان ما تسهلت يمكن يصير شي ما ايون لكم مره ثانيه من هالامور .. يعني مو نصيبج

انتي استخيري و خل رياييلكم يسألون عنه وان حصل سألو جيرانهم وجيران طليقته

والله يكتب لج اللي فيه الخير

 

[شوشو الشقيه]

يسلمو انا احس الرجل لا يقاس بالعمر ولكن عقليته
اهم شيء عقليته
ومدي تفهمه للمراه
ما انكر هو عمره كبير
بس اذا هو براعيج وبيهتم فيك ما فيها شيء
بتلقين صعوبات في الزواج بسبب اتفاوت في العقل
سنكم مناسب لبعض على فكره
بس اهتمي من امور قبل لا تاخذينه
اولا هل هو يعاني من امراض نفسيه او شاذا او عقيم
لان مساله طلاقه من زوجته بعد 3 اشهر
يجلب الشك له ولها
اذا هو سليم اخذيه
بعد هل يفكر في زوجته السابقه لانه هذه النقطه تاثر في زواجكم في المستقبل
هل هو مراهق في الاربعينات
يحب النساء وعلاقتهم فيهم
حاولي تكتشفين هذا فكل هذه الامور تاثر

لانه ياثر في علاقتكم بعد الزواج

والحمد الله انه ليس عنده اطفال ما فيها شيء رجل مطلق

 

[Tulips]

كلامكم على راسي واتقبل اكيد بس شدراني الفلط مو منه يعني مو مستوعبه مره تخلي ريلها واهو مافيه شي ومهندس،،
انا يهمني يكون محترم وخلوق اخاف انصدم بعدين منه ،،كنت حلمانه من جم شهر 6 شهور عاد انه بيتقدم لي مطلق وراح اخذه واتطلق مادري ماكنت مصليه استخاره لما حلمت بهالشي صدفه وقبل لايتقدم لي اصلا بس مادري انا وايد خايفه يكون منه والا يكون صعب ،،يعني شلون اعرف منه والا من مرته ،انا مااتشرط بس تهمني الطبايع والاخلاق يعني في طبايع ماحبها العصبيه والصراخ والنجره مو طبيعي انا خجوله مااتحمل هالسوالف وافضل اللي مايدخن طبعا بس صعب هذا الشي فتنازلت عنه ،ولا احب البخيل شلون اعرف هالاشياء انا ماشفته بصراحه لي الحين بس احاتي لان كل اللي يوني مطلقين رفضتهم هذا وافقت اشوفه عشان شهادته قلت في بالي يمكن مايكون تافه مثل الريايل يفكر بمستقبله لا تخلوني شورو علي ادري قرقه وماعندي سالفه بس فكره توديني وفكره تييبني

انا فاهمه قصدج ومن حقج تخافين واي وحده ترتبط بمطلق راح يكون عندها هالشك شي طبيعي

بس شمالها فترة الملجه ؟؟ مو عشان تدرسين الريال وتشوفين اطباعه و تعرفين شخصيته واشلون يغكر ؟؟ اذا ماصار نصيب كل واحد يروح بطريجه قبل العرس وكان الله غفور رحيم

شوفي اذا بعايلتكم عادي تكلمين الريال قبل الملجه بفترة الخطوبه يكون احسن واحسن عشان اذ خايفه لا تتدبسين ولا شي طبعا ماراح تمصخينها وتطولين بس مجرد انج اتعرفين شخصية الريال وطريقة تفكيره اذا اعجبج توكلي على الله واذا لأ الله يسعده مع وحده غيرج .. وبما انه الموضوع بينج وبين امج فخلي الموضوع بينكم لايطلع احسنلكم

ثاني شي حبيبتي انا شايفه انج معلقه حياتج وزواجج على حلمج .. ما اقولج انه حلمج غلط بس انتي بذلي الاسباب لا ترفضين منيه والطريج بس لانج حلمتي .. وبعدين انتي ماجربتي الاستخاره ترا والله سحححححر صدقيني انتي جربيها وبتشوفين بنفسج انه الامور راح تمشي بصالحج بدون ماتحسين

وانا مع ام خالد ترا في وايد أشياء ماتبين الا بالعشره ..

لوووول مادري احسج متعقده من الرياييل .. عموما حبيبتي اذا مو مرتاحه للريال ماكو شي يغصبج .. وسئلو عدل مدل عن الريال

والله يوفقج

 

[F A R A W L A]

الله يكتب اللي فيه الخير
ودام انه ماعنده العيال
ليش لا
واذا مرتاااحتله اي شفيها
استخيري ربج والله يكتب اللي فيه الخير

 

[Queenleo]

انتي نفس عمري
وانا نفسج للحين مو متزووجه
وودوامي بشركه خاااصه ومع ريايييل فمعظم الشباب مايحبوونه وخصوصا اني اتاخر بالطلعه
فانا مقدره الي تحسين فيه

مساله انه مطلق عادي حبيبتي ترى وايد اللحين المطلقين من البنات والرياييل
مو شرط يكون فيه عذروووب بس ساعات القلووب ماااتتألف ووالطبااع مختلفه
حلووو بالي متقدملج انه متعلم ومثقف
يعني انسااان عنده طموووح ووهدف ماشاء الله
وهذا اهم شيء بالرياال بعد الاخلاااق
لان الغالبيه همها البلعه والديوواوين
انا والله بخاطري ريال طمووح ووشقردي
ومو شرط يكون العيب منه ولا من مرته ممكن مااتفاهموا وتصير باحسن العائلات
انتي قعدي معاااه وشوووفي عقله وتفكيره
وووقولي شرووطج لاتصيرين نفس البناات تتنازلين عن الي اكو وماكووو وبعدين تتحسفين بعد الزوواج
اذا تبين شقه بروووحج تحجي
ووشرحيله ضرووف دووامج
وواهم شيء استخيييييييييري
لان سبحان الله ووحده بوووحده
ووانا مجربتها واااااااااااااااااااااااااااااااااااايد
وكل ماستخير يختفي الرياااال لوووووول ووبعد فتره اكتشف ان كان خيره لي لان في اشيااء اطلعتلي تااالي

مووفقه ان شاء الله
ووخلج قوويه وووجريئه ولاتحااتين ولاتخاافين الزواج يبيله ووحده واثقه ووعارفه شنووو تبي

 

[الوردة الرقيقه]

حبيبتي لازم تأكدين من أخلاقه ولاتنبهرين بالشهاده وظيفته آنا
أعرف وحده قريبه مني حيل ركزت على وظيفته ولما تزوجت أكتشفت بلاوي
والله الناس ماتعرفينهم إلا بالعشره بالنسبه لعمره زين وأسألوا عنه عدل
وبعدين أستخيري وراح تشوفين إذا خيره ربي راح يسر أمورج وإذا موخيره لج
راح يوقف الموضوع لأي سبب وأدعي ربج أنه يسرأمورج

بالتوفيق أن شاءالله

 

[Om eL'3aLe]

بالنسبة للعمر عادي انا بيني وبين زوجي 10 سنين المهم
الاخلاق وقبل اي شي استخيري وصلي قيام ليل وادعي
وخل اهلج يسئلون عنه وايد وقعدي معاه وشوفي نفسج
اهم شي تكونين مرتاحتله

 

[Lemon Juice]

انا نفسج تقدم لي شخص من فترة قصيرة

ملج وعقب أسبوع طلق وما دخل عليها طبعا

وهو كبير ٣٦ سنة وانا ٢٤ داشة بال٢٥ ، ما مريت بتجربة زواج من قبل وما علي قاصر الحمد لله مرتاحة

يعني الزواج أبيه يطور حياتي ويريحني زيادة

وهو كان دارس وفاهم وكلامه رزين ، بيوم الشوفة سألته عن سبب الانفصال قال اهي والنعم فيها وبأهلها بس يوم الخطبة ما كلمتها ولا شفتها عدل واملجوا وبهالأسبوع مارتحت وقلبي مقموت باختصار حاشته نفس

وسألته اشلون اهي تقبلت الانفصال؟ قال اهي وأهلها كانوا متفهمين وطلعنا بالمعروف

هذا اللي قاله اهو مع أهله بالضبط

وعقبها كنا نسأل عنه والناس تمدحه

بس أهلي خايفين من موضوع انفصاله وكنا نبي نوصل حق البنت ونسألها بنشوف شنو بتقول نفس كلامه والا لا

أما انا صاحبة الموضوع ما كنت خايفة وايد ومفوضة أمري لله سبحانه واستخرت..

ما صار نصيب خيرة من رب العالمين

نصيحتي لج لا تردينه من أول شي ، شوفيه قبل وتكلمي معاه

وسألوا عنه عدل ، واستخيري أهم شي الاستخـــارة

مرات تكونين مو حابة الموضوع وسبحان الله يمشي بسهالة ويكون فيه خيره لج والعكس..

كل شي خيرة

شوفي الريال وشوفي طريقة كلامة وتفكيرة وقوليله عن نفسج ونوع وظيفتج لا تستحين خليه يعرف شخصيتج..

وسأليه عن سبب الطلاق

الطلاق مو شرط يكون بسبب المرا أو الريال ، يمكن ماتفقوا ومارتاحوا وما توالموا عقب الزواج وشافوا الحياة صعبة تستمر على هالوضع فيكون الانفصال اهو الحل الأنسب..

لا تخلين هالشغلة سبب أساسي للرفض من غير لا تشوفينه

موفقه يا رب..

 

[Lemon Juice]

نسيت اقولج بالنسبة حق عمره مناسب لج مو كبير وايد

 

[noorq8]

حبيبتي سمعي هالسالفه


دكتور طبيب تزوج من بنت أوادم الناس مدحوها له , لي الحين الوضع أوكي .


السالفه ان البنت بااازع وتعرف واحد ثاني ويوم تزوجت شهرين وطلبت الطلاق عشان تتطلق وتروح تتزوج رفيجها .


لما يتقدم لج هالدكتور , أمانه مارح تقولين ليش مرته انحاشت عقب شهرين !!

يمكن اللي متقدم لج نفس الوضع , تأني واستخيري وسئلي عن البنت اللي انفصل عنها وحاولي تعرفين أسباب الانفصال , وعلى العمر في شباب يكونون ملتزمين مع أهلهم بديون وقروض فما يكونون مستعدين ماديا الا بعمر كبير ويمكن يكون كان دبلوم وعقب مااشتغل راح كمل بكالريوس , تأني وسئلي والله يوفقج.

 

[al3sooola]

بالنسبة للعمر عادي
بس اهم شي الاستخاره

 

[كبرت قبل اكبر]

استخيري الله وادعي واسالو زين زييييييييييييين عنه جيبو الاول والتالي عنه اسالو عنه بالدوام واهل الفريج اللي هو فيه
وبعدها قرري والله يبكتب لك الخير