بنات فكرة الطـــــلاق تراودني .. وهالمرة بقوة

[شمسه]

قعدت من النوم .... بس قعدتي من النوم كانت مو عاديه لأني كنت حلمانه حلم غريب نوعا ما .... حلمت جني متزوجة واحد ثاني مو ريلي وعلى أمل إني أحمل ...... والفرحة كبيره كبيره وحسيت الهم الي فقلبي في الواقع

راح مع حلمي هذا ...... قعدت من النوم وقمت أفكر ساعه.... وأنا أفكر .... طبعا لكل الي ما تدري عن مشكلتي في الحمال ..... أنا مشكلتي زوجي .... نقص الحركة والعدد ..... عالجنا وايد وما الله كتب لنا .........


قمت أتخيل اشلون حياتي بعد الطلاق ..... وشبح العنوسه الي راح يعيش معاي .... وسألت نفسي أيهو أقوى في التأثير شبح العنوسه .... ولا شبح اني أعيش بدون عيال ........ آآآآآآآآآآه يارب موقف صعب .........

زوجي ريال زين ويحبني ..... وهمن أنا أحبه ... بس في شي ناقص كبيير بحياتنا .... بدى الملل يتخلل حياتنا .... والروتين .... حتى الحب انقلب صداقة أكثر ..... ما عااد يهتم فيني من ناحية اني حبيبته ...!! ومو صديقته !!

ثلاث سنوات من .... التجربة .... والحب ... والتضحية من طرفي ... لكن أحس اني تعبت ... وخصوصا أهلي دااايما يحثوني على الطلاق ويشوفون انه الي سواه غلط .... خذاني واهوا يدري انه فيه المشكلة ولا قالي ...؟؟؟ ظلمني معااااه ..... وأنا عايشة قصة الظلم .....

ما ألومه يبي يتزوج حاله حال الناس .... بس كنت أنا الاختيار ... أنا الضحية .....


احلم بياهل ..... أحلم بيهاااااااااااال ...... كنت أتمنى أشوفهم حوالي ......


تعبت تعبت تعبت ......... ​

 

[هوى الدار]

حبيبتي 3 سنين مو مقياس ولا مده كبيره الي تقولين ماكو امل تو الناس والخير جدام ان شاءالله ياما ناس قعدو جريب ال15 سنه ورزقهم الله بعدين . انتي تقولين يحبج حرام تضيعينه من ايدج وبعدين هل انتي ضامنه تتزوجين من بعده واذا تزوجتى اكيد تاخذين واحد متزوج وشوفي مشاكل الشرايج ويمكن ما يحبج وتندمين انج ضحيتي بلي يحبج ويبيج وماله ذنب انه عنده ضعف كوني معاه لا تكونين عليه وانتي تقولين ضعف مو عجز الطب تطور والي كانو ما في امل يجيبون عيال كاهم عندهم والله يرزقهم . ومادم في امل ان شاءالله بتحملين وبتصيرين ام بس داومي على العلاج اذا مو بالديره سافرو برا ياما ناس سافرو ورزقهم الله
. نصيحتى الاخيره صلي استخاره وشوفي شيصير معاج .

 

[محتاره]

والله شقولك انا لي عشر سنين ماكتب لي الله ياهل
والمشكله مو فيه ولا فيني
بس هذا نصيب من رب العالمين
الملل الي تقولين عنه انتي بعد سبب فيه
يمكن هو حس انج تبين تهدينه فقال خليني اخلى لها حرية الاختيار
انا رغم اني بدون عيال لكن الي يشوفنا يقول توكم متزوجين
الشغله تطلع من الاثنين حبيبتي مو من طرف واحد
ويمكن انتي توقعتي انه ريلج راح يدللك اكثر والا يحالو يتمسك فيك اكثر لانه العيب منه
غلطانه اختي
الريال ترى مايحب يحس انه ضعيف وخاصه بهالامور
نصيحتي شوفي انتي سويتي شي حسسه بحبك له وانه هو بالنسبه لي كل شي
والا الي كان يحسه انج تبين العيال وبس
على العموم هذا قرارك انتي
وانتي بروحك تعرفين مصلحتك
بس الريال اذا شاف وحده شاريته عمره ما راح يتخلى عنها
خاصه اذا ما حسسته بعيبه بين الفتره والثانيه
حتى لو مو بالكلام بالتصرفات

والله يوفقك يارب

 

[¤§ زيتونة §¤]

حبيبتي شمسة


تعوذي من ابليس واتركي عنج هالسالفة
الطلاق مو حل ولا جان كل اللي ما يابو عيال تطلقوا واولهم انا لكن الزوج المحب الوفي واللي مريحج يعوضج عن عشرين ياهل ولا تقعدين تفكرين انه ظلمج ومادري شنو ..لا حبيبتي .. خلي سالفة الظلم بعيدة عن حياتج ولا تهدين ريلج عشان سالفة الحمال وبعدين توج 3 سنوات في غيرج 6 و 9 منهم انا وفي اكثر واكثر
والطب ماشاءالله ما خلا شي ما لقاله علاج .......................

ولا تنسين اجرج على الصبر عند ربج كبير (( وبشر الصابرين ))


عموما ما ابي ادوخ راسج هههههههههههههه لكن حبيبتي لا تهدمين بيتج وتمسكي بزوجج دام انه ريال زين ويحبج ومقدرج ومو مقصر عنج بشي وحاولي تسوين تلقيح او انابيب ولا تياسين من رحمة ربج ترى رحمته واسعة وادعي واستغفري ولا تنسين قيام الليل والدعاء والتهجد والتباكي لله تعالى




وعسى الله يوفقج ويهديكم حق بعض يا رب

 

[virgo_kw]

حطي في بالج انه اليهال رزق من الله يعني على قولة المثل لو تجري جري الوحوش غير رزقك ماتحوش و اممممممم فكري عدل قبل كل شي بس تدرين يسوى انج اتغيرين حياتج علشان اتييبين عيال ولا تترددين لانه العمر يمشي وعقب انتي ماتقدرين اتييبين عيال

 

[هندااا]

انا رايي من راي البنات .........

لاتفكرين بالطلاق لانج ماراح تستفيدين شي ...ياإنج تقعدين ابيت اهلج مطلقة وشوفي عاد الصكه عاااد لانج راح اتكونين مطلقة.....

وحتى اذا اتزوجتي شنو تتوقعين بتاااخذين ؟؟؟يا مطلق وعنده عيااال ...ويا على مره.....

وحلمج فتفسيره والله اعلم....ان انتي راح تحمليين بإذن الله لان المو متزوجة اذا احلمت انها متزوجة راح تتزوج والمتزوجة اذا احلمت انها اتزوجت يعني بتحمل واتييب ياهل............

بعد قلبي احنا كلنا حاسين بحساسج وانا وحدة مثلج ميته عالياهل...بس شنسوي هذا قدرنا وانشااله الله سبحانه ماراح ينسانا .....

بس لاتيأسيييييييييييين ...وانشالله دورة هالسنة اتشوفيين عيالج التوأم بحضنج.....وانا وياج يارب...

 

[جروح تبتسم]

والله العظيم حسيت فيج مادري ليش ؟؟

والله اقره واحس ان فيني غصه بلعومي قام يعورني

الله يعينج ياقلبي وان شاءالله ربي يبرد قلبج

والله ياشمسه مافي احد مرتاح بهالدنيا شوفي اللي عندها عيال مومرتاحه

واللي ماعندها هم مو مرتاحه الحمدلله على كل حااااااااااااااال


سمعي اللي بقولج عنه الحين :


اول شي هو لاسمح الله عقيم ولا بس ضعف ؟؟

اذا بس ضعف لاتتركينه حرام والله العظيم في رياييل عقْم والله رزقهم

ثاني شي اذا انتي حييييل حييييل متضايقه من موضوع العيال لااااااازم تكلمينه

بقعده جديه بينج وبينه انكم تسوون عمليه اطفال الانابيب ومثل ماقلت لج بدار الشفا دكتور اسمه اسامه زييين وترى موغالي كل بيكلفج 900 دينار بس

وجربي يمكن تدفعينهم على اقساط؟؟؟


هذا رقمهم 223100

طلبي وحده كير واستفسري منهم عن الدكتور وعن اذا تقدرين تدفعينهم اقساط

دام الحين الصيف خفايف عنده الله يوفقج

وبعد العمليه فكري بعدين ......... ربج قال ياعبدي اسعى وانا اسعى معاااااااااااك

 

[شمسه]

هوى الدار مشكورة على النصيحة وبالفعل الامل اهوا الشي الوحيد الي يريح ... وإن شاء الله بصلي استخاره وأشوف


محتاره الله يهنيج يا رب ويتمم عليكم هالحب .....حالتج تختلف عن حالتي إنتو ما فيكم شي ... عسى الله يرزقكم .... وراضين بحكمة رب العالمين .... ولكن انا زوجي منه المشكلة ... وما قالي .... احترم وجهة نظرج ....



زيتونه حبيبتي .... عمرج ما دوختي راسي وبالعكس رايج وااايد يهمني ..... انا مارة بمرحلة متعبه شوي .... داخل نفسي وبره مع الناس ..... بس إن شاء الله ببدي أعالج .... واتقرب من الله أكثر وأكثر ....


virgo_kw اي والله هذا المثل دايما أحطه في بالي ... لو تجري جري الوحوش غير رزقك ما تحوش .... صح ..... وكل شي يسوا عشان العيال .... واحساس الامومه .... ولا جان ما شفتينا اهني نقزز هالأبر ... ونتسدح بالمستشفيات عشان الضنا


هندااا آمين يا رب العالمين .... ويا رب كلامج يكون صح في تأويل الحلم ..... ويكون صج ...يا رب يرزقنا كلنا يا رب العالمين في القريب العاجل



جروح تبتسم حبيبتي سلامتج من كل شر ... وإذا انتي حسيتي فيني بصراحة هذا دليل على إنسانيتج العالية .... الله يحفظج يا رب ....... وبالنسبه لسؤالج انه زوجي عقيم ولا لأ ..... زوجي في عنده حيوانات منويه ولكن قليلة وبطيئة الحركة ...... يعني في امكانيه عمل طفل أنابيب وتلقيح ... وأنا جربت من قبل التلقيح .....ولحين بجرب طفل الانابيب ....
وجزاج الله كل الخير حبيبتي على النصيحة والرقم .... ​

 

[سبائك]

لا تفكرين بزواج ثاني ولا شي حبيبتي

3 سنين تو الناس على هالتفكير

اول شي انتي مو ضامنه ريال عقب الطلاق صح؟؟؟؟؟؟

ثاني شي مو ضامنه انج تحملين اذا تزوجتي مره ثانيه صح؟؟؟؟؟

ميخالف هذي فتره تمرون فيها وبتروح لا تحاتين

وان شاءالله ماكو الا العافيه بتحملين وبتترسين البيت كوكش يهال

خلج متفائله حبوبه لا تخلين اليأس يتملك احاسيسج

تونا الاسبوع الي فات فرحانين بوحده من اهلنا يابت ياهل عقب 15 سنه بدون يهال

الفال لج يارب وكل بناتنا حبيباتنا ياااااااااارب

اهي عالجت عند فوزيه القطان

جربي روحي لها وان شاءالله ربي يكتب لج الي فيه الخير يارب

 

[ألوي الكويت]

الله يرزق الذريه الصالحه عاجلا غير آجلا

حبيبتي تعوذي من ابليس

بدام هو يحبك وانت تحبينه حرام انك تفكرين بالطلاق والطلاق مو حل

مثل ما قالولك سوي انابيب وايد حالات انجحت وياهم
وانشا الله تنجح معاك

 

[شاي اخضر]

لاحول ولا قوة الا بالله ولا حاسه فيج حبيبتي وادري هالكلام من الضغط اللي عايشته بالنسبه لموضوع الحمل ومثل ماقالو البنات ترى صج ناس ياخذون فتره اطول وبعدين في رياجيل عندهم مشاكل بالانجاب ومايعامل زوجته عدل واذا كان طيب اعرفي ان هذا معدنه واصله الطيب ولا موشرط كل واحد عنده مشكله يصير طيب بالعكس ... انا ادري موقفج حيييييييييييييييييل صعب ويوتر وادري صعب تفكرين بالطلاق بس تقولين هالكلام لانج متضايقه ..وانت بس جربتي التلقيح ماجربتي الانابيب والحقن المجهري نسبتة نجاحه عاليه باذن الله تعالى يعني لاتفقدين الامل وتيئسين بالعكس توج فبداية الطريج وصدقيني ماضاقت الا فرجت باذن الله ولاتنسين الرقيه الشرعيه والصلاة بجوف الليل والاستغفار ياماناس مشاكلهم اصعب واحملوا مثل قصه قريتها بأحد المنتديات زوجها كان مريض بالسرطان الله يكافينا الشر واخر ولد عمره 16 وعقبها مرض وصار عنده ضمور بالعضو مثل شكل الطفل والسائل اذا خرج تموت الحيوانات من المرض والادويه وسبحان الله تأخرت عليها الدوره وطلعت حامل وقالت لهم زوجي مريض شلون احمل وعشان يتطمنون عالجنين اخذوا منه عينه .. شفتي شلون مافي شي عن ربج بعيد كل شهر خلي ثقتج تزيد وانج بأذن الله تعالى بتحملين . والله يوفقج ويرزقج بالقريب العاجل ان شاء الله

 

[شمسه]

سبائك

ألوي الكويت


شاي اخضر

جزاكم الله كل الخير بنات على الرد

ريحتوني الله يريحكم ​

 

[مظلومه ياناس]

شمسه اسمحيلي اقولج مادام انتي فكرتي بالطلاق معناتها ماتحبينه وعمرج ماحبيتيه

خليني اقولج تجربت خالتي صارلها 35 سنه زواج وماحملت ولغت فكرة الحمل من راسها وزوجها حلف مايبدلها ابد ولايتزوج عليها يقول اللي تقسم اللقمه بيني وبينها ماتستاهل اني اعذبها واقهرها واتزوج
وشوفيهم عايشين احلى عيشه الكل يحسدهم حتى الللي عنددهم عيال هم قاعدين يحسدونها على زوجها ويحسدون زوجها عليها

وليش اروح بعيد ..... شوفي انا سبحان الله خذيت زوجي عن حب وانا ادري انه تعبان لانه على قولته كان مسحور ومحطوط له عمل ومايقدر يجيب عيال بس حبي له خلاني اضحي بعمري لعيونه وفعلا تزوجنا وهو مايقدر يعطيني حقي الشرعي (............) يعني فيه محاولات بس جدا بسيطه وحييييييل ضعيفه لدرجة اقعد بالاشهر مايصير بيننا اي اتصال (جماع) كان جدا تعبان وعقب 3 شهور من زواجي الله رزقني وحملت يمه كانت صدمه قويه ماتوقعتها كنت شايله فكرت الحمل من عقلي لان زوج مو ذاك القوه اللي يقدر فيها اني اقدر احمل بس الله قادر على كل شي وبعدها بكم شهر سقطت لاني تعبت نفسي حيييييييييييل
المهم دورة السنه حملت ورزقني الله باحلى ولد بدنيتي انا

حطي عينج بعين رب العالمين وادعي ربج والله قادر على كل شي وتعوذي من الشيطان ومادام زوجج يحبج وتحبينه خليج معاه وانتي شلون تضمنين انج راح تتزوجين وشلون تضمنين انج راح تحملين من غيره

صج العيال نعمه من الله بس مرات تنقلب نقمه وتعب وشقى محد ضامن عمره ولا احد ضامن عياله

تعوذي من ابليس وكثري من الدعاء والاستغفار

 

[bnt_kwt]

لالالا يا شموس لا تخلين الشيطان يغلبج ولا تسمعين حق الناس حتى لو كانوا اهلج طيعيني الوحده مالها الا ريلها وخاصه انه اذا كان زين

طيعيني يا شمسه ترا الزمان تغير ومافيه رياييل مثل قبل والله وما تظمنين انج اذا تطلقتي انج تتزوجين او انج اذا تزوجتي واحد ثاني على طول بتحملين

شموس اسمالله عليج تعوذي من ابليس ولا تخلينه يوسوس لج طيعيني يا وخيتي صدقيني بتحملين وبتييبين يهال وبتشبعين منهم بس متى ما الله كتب لج واراد ولا تيئسين وريلج مسكين مو عقيييييم والله انا اعرف واحد من اهل مرت خالي كان مافيه عيال كلش ولا فيه امل وسبحان الله زوجته الاوليه ما اصبرت عليه وتطلقت منه وتزوج وحده ثانيه وتبارك الرحمن عقب 10 سنوات الحين عنده 4 او 5 يهال يعني مافي شي بعيد على قدره الله يا شمسه

اسعي بكل الطرق وربي ما يقصر معاج شمسه انا صار لي 7 سنوات وترا الخلل فيني والحمدلله على كل حال

شموس حطي روحج مكان ريلج ويكون العيب فيج مو فيه شنو بيكون رد فعلج شي اكيد بتموتين من القهر والحره لا قالج بتزوج عليج او بطلقج علشان ابي عيال صح ولا لأ صونيه وحافظي عليه وانا اختج وشوفي اشكثر لما الله يرزقكم بالظنا بتكبرين بعينه بيحس انج ما بعتيه والله يهديكم لبعض يا شموس ومو خوش فكره كلش يا حياااااااتي صج ضيقتي خلقي وكدرتيني بفكرتج السوداويه يالله عااااااااااااااد غيري الموووووود كله

 

[أثير الورد]

والله ضيقتى خلقى يا شموس شدعوه توج على التفكير بالطلاق وين الحب وين التضحيه وين التفاهم وين السعاده هذا كله ينسيج عن الطلاق
وانتى توج عروس يا قلبى انا صار لى 8 سنوات و8 شهور يعنى انا اقدم منج
لازم تريحين اعصابج علشان تحملين انا اعرف اثنين مافيهم عيال شوفى ربج كريم رزقهم
الواحد ما يقنط من رحمة الله

 

[شمسه]

مظلومه ياناس أنا أحيي فيج شخصيتج الكبيره وتضحيتج الأكبر ..... سبحان الله ..... خذيتي ريلج وانتي تدرين انه احتمال ما تيبون عيال والله ارزقج ..... فعلا (( وعلى نياتكم ترزقون )) صدق الله العظيم .... جزاج الله كل الخير حبيبتي على الرد


bnt_kwt كلامج بقى يبجيني ..... بس مسكت نفسي :eh_s(15): والله يا حياتي ما كان قصدي اييني هالتفكير .... الحلم الي حلمته لخبط موازيني ..... تدرين لو أنا ما كتبت لكم الي فقلبي أمس ... أول ما قعدت من الحلم ..... جان ماخذه جنطتي ورايحه بيتنا ..... والله جد ...
حبيبتي تدرين الموضوع حساس وساعات الأفكار السوداوية تفرض نفسها .... صح كلامج الصبر زين ..... ومن صبر قدر .... كالعاده ريحني كلامج عسى الله يرزقنا جميعا



الـجـازى اي والله صاجه ..... ربج كريم وإذا بيرزق أحد بيرزقه ... إن شاء الله .... وعسى الله يعوض صبرج خير ويرزقنا كلنا من واسع فضله ​

 

[Amory]

تعوذي من ابليس

هاذي وساوس من الشيطان و( العياذ بالله منه )

أن من اعظم الاعمال المحبوبه عند الشيطان هو((الطلاق))

وكما ثبت في الصحيح عن جابر عن النبي - صلى الله عليه وسلم -: " إن إبليس ينصب عرشه على البحر، ويبعث سراياه، فأقربهم إليه منزلة أعظمهم فتنة، فيأتيه الشيطان فيقول: ما زلت به حتى فرقت بينه وبين امرأته، فيدنيه منه، ويقول: أنت أنت ! ويلتزمه ! ".

والشيطان يحرص كل الحرص على انه يوسوس للناس على انهم يتطلقون وانتي اكبر مثال لأنج وقعتي فريسة للشيطان وبديتي اتفكرين انج اتطيعينه.

اذا زوجج زين ومو مقصر عليج ابشي تبين تتركينه بس علشان عنده ضعف؟!

قولي الحمدلله ان عنده بس ضعف ولا عنده انعدام في الحيوانات المنويه يعني ( صفر ) وفي ناس وايد يعانون من هالحاله وعايشين مع بعض ينتظرون الفرج من الله سبحانه.

تخيلي ان عندج اعيال وزوجج لعين و كريه ومأذيج ويطقج ليل نهار يعني هاذي اهي السعاده؟!

اشدراج انج راح تتزوجين بعد زوجج وحتى لو تزوجتي اشدراج انج ابتلقين زوج ابمثل صفات زوجج يمكن بعدين تقعدين تتحسفين على زوجج وتتمنين انج ما خليتيه!

انا ادري ان هالكلام مو من قلبج لأن احنا الحريم ما اتهون علينا العشره ولو تخيلتي ان زوجج مات لا سمح الله والله يطول بعمره صدقيني هالشي راح يضيق خلقج وراح يخليج تبجين عليه.

استمتعي ابحياتج ولاحقه على العيال و لا تيئسين لأن اللي خلقج موجود وقادر على انه يخلق مثلج ، توكلي على الله واحسني التوكل عليه ونصيحه من اخت لي اخت لا اتروحين اتعالجين واتضيعين وقت على العلاج ابأي مكان ومشكلة زوجج واهي ( ضعف الحركه ) حلها معروف وهو طفل انابيب و أكرر وأعيد لا اتضيعين اسنين عمرج على العلاج ابأي مكان مو مضمون وما عندهم نسب نجاح تذكر وانصحج ابمستشفى لندن الفنطاس عند دكتور باترك اهو حاليا أعلى نسبة نجاح بالكويت ابطفل الانابيب وماشاء الله البنات اللي قاعدين يحملون عنده اشكثرهم ، الله يرزقج من خيره ويوسع عليج في رزقه ويفرج همج ويصلحلج أمورج كلها وييسرلج علاجج واتبشرينا ابخبر حملج بالقريب العاجل يارب.

 

[أحلى عيون]

اختي الغاليه الله يكون في عونك ولكن نقص العدد والحركه شي مو صعب لانه انا عندي ولد عمي نفسه بالضبط وقعد على 10 سنين وما جابوا عيال واخر شي راح اشترى من عسل العويد عسل وانتم قولوا لهم عن الحركه والنقص تقريبا على 150 دينار والله من اول شهر زادت الحيوانات المنويه وربي رزقهم الحين 4 بنات و2 صبيان

 

[دهن الورد]

تعوذي من ابليس وانا اعرف وحدة بعد 18 سنة جابت اول ولد وبعدها بسنة جابة الثاني والحين هي حامل وثلاث سنين مو مقياس انج ما تجيبن عيال بنت خالي بعد 4سنين حملت حمدي ربج لان زوجك يحبك والله يرزقك و يرزق المسلمين

 

[Harmony]

حبيبتى ماكو امل حتى بطفل انبوب؟ انا اقول جربي تراجعين عند دكتور محمود المطاوعة ترى تخصص بطفل الانابيب و شوفى يمكن الله يكتبلج ياهل على ايده
الصراحه الطلاق صعب خاصة اذا الريال زين حرام مو بايده اليهال حطى عمرج مكانه ترضين يطلقج لهسبب؟ صبرى و ربي ياجرج