بموووووت منه

[مارشميلو..]

الســـــــــــــــــــــــلام عليكم


بقولكم شصار وابيكم تنصفوني قولو لي من اللي مو طبيعي انا ولا هو


زوجي العزيز امس وانا قاعده اتعشى فجأه اتصل على امه وقالها فلانه
بكره بتجيكم اتغدا عندكم اللي هي انا!!!!!!!!
طبعا هو بكره دوام ومارح يطلع الا متأخر
يعني المفروض اني اروح انا و ولدي لحالنا
انا مو مشكله عندي اروح عادي لاتحسبوني مااحب اروح لهم لا والله
بس المشكله انه اول شي قرر بدون مايسألني ابي اروح ولا لا كذا كأني بنته الصغيره مالي راي
والشي الثاني انا ناويه اغسل الملابس بكره وعندي كم شغله ماقدر اطلع يعني
قلت له اني ماقدر اروح لان عندي شغل وسكت
اليوم الثاني والله يابنات من قمت الصبح فطرت ولدي ووقفت على الملابس وبديت اغسل
واكوي واسفط وارتب تعرفون انتو الملابس ماتخلص خصوصا ولدي باليوم ابدله مرتين 3
مالحق والله ع الشغل
اتصلت عليه عقب الظهر قلت له تراني ماني رايحه لاهلك ماقدر ماخلصت شغل
قال بكيفك مو لازم تروحين !!!! وسكر التلفون
ادري الحين بيقلب السالفه علي ويزعل بس بكيفه
انا تعبت بنات تخيلو اشتغل من الصبح مايمديني على وقت الغدا اتسبح والبس
يقول مو لازم خلي الملابس وروحي قلت شنو يعني اروح لهم مبهذله
مع العلم اني قلت له امس اذا طلعت من الدوام نروح لهم المغرب
يعني انا ماحسسته اني مابي اهله بس مابي اروح لهم بهالوقت

مايرحمني ولا يحس فيني
انا تعبت وانا اشوف خواتي وصديقاتي وكل اللي حولي مدلعات
خدامات عندهم وازواجهم مدلعينهم وسفرات وطلعات
وانا محرومه من كل شي حتى من الكلمه الحلوه محرومه
بدل مايقول لي يعطيك العافيه يقوم يزفني ويسكر بوجهي
انا تعبت من هالحياه
مادري شلون اتعامل معاه كرهني عيشتي
مارح اكلمه وبقعد بغرفتي وبقفلها وماني طالعتله

 

[iLLuMinaTion]

حبيبتي

اتصلي فيه بدلع

الرجل يحب الدلع

وخلي طلبات بدلع وانوثه

يمكن يفيد معاه

 

[Vaniela]

الله يعينج بس استحملس شوي وغيري من اسلوبج معاه و اطلبي خدامه مب بكيفه عاد الخدامه شي ضروري مب عشانج قاعده بالبيت م يحط لج خدامه شهالتلته ... استغفر الله ..


و اهله زين ما رحتي مب عن شي بس الروحه لها وقت معين والزواره عقب المغرب اما الظهر شكووو
لا تروحين لهم الا مع ريلج عشان اهو يعرف انج ماتروحينالا معاه ..
و نبهيه مره ثانيه قبل لا يقول لحد انج بتين خل يستاذنج يمكن انتي مشغوله . مالج خلق ولا مريضه .. شكو يتحكم بمنو تروحين والموعد ..
ريلج عوديه تكون لج شخصيتج و اسلوبج مب يطمسج باجر ياذيج ...

انا مادري ليش البنت بالمنتدى وايد يسكتون للريل ..
الخدامه قبل كل شي قبل لا اتدشين عليه اتكون موجوده ,, مادري شلون تتساهلون بهالنقطه


الله يعينج حبيبتي و كوني حازمه شوي

 

[غلا-زوجي]

لو كنت بمكانج جان قلت حااااااااااااااضر افا عليك بس اسوي طبق حلو او سلطة واروح لهم تامر امر لكن الملابس ماعليك امر اخذهم ودهم كلهم المصبغه غسيل وكوي لان مايصير اخلي شغل البيت واروح اسولف حبيبي قبل لاتروح دوامك ود الملابس ان قال مابي قوليله خلاص انا اسويهم بس ماراح اقدر اطلع .. جذي انتي مارفضتي لاااا اهو اللي بيقولج لا

 

[al-musk]

يعني هو غلطان قرر عنج بس مفروض تكونين واضحه من ساعتها يابتروحين يا لأ مو تنطرين لي باجر وتشوفين يمديج ولا لا .. عالعموم سهالات وبسيطه وبليل خليج جاهزة وطلعي وبعد ماترجعون قوليله ان هالطريقه ماتنفع لان عندج مسؤوليات ومافي خدامه ومن هالكلام وان كيان مهم بالبيت ولازم يتفق معاج على اي شي يخصكم اثنينكم عشان ماتضطرين ماتمشين كلامه .. بس لاتزعلين ماتسوا السالفه

 

[موج-البحر]

الله يهديه حاولي تتفاهمين معاه بالكلام واهم شي قوليله انج مو معترضة على زيارة اهله لايفهم غلط

 

[Tom ♥ Jerry]

.


جآن رحتي و بس !
صج حركته مو حلوة خصوصا آنه عندج يآهل و مآكو خدآمه .،
يعني المفروض يآخذ رآيج ويقولج قبلها بمده .،

المهم : الحين قعدي معاه و فهميه آنج تلهين ومآكو خدآمه وعندج ولد
يعني قوليله على الاقل شآورني .،
انا مو قصدي مآ آروح حق آهلك بس لازم تشاورني
لانك تدري بـ ظروفي ,،

وبس

 

[سندبادة]

الشغل مايخلص وانا اختج روحي كلها جم ساعه

 

[متلثمه بغترة ابوها]

شوفي حبيبتي انا عشت سنين ماعندي خدامه ودوام وحالتي حاله وطبخ وسهر مع ولدي بالليل ماينام كان مهدود حيلي لدرجة احيانا اطبخ وانا شايله ولدي لانه يبكي واجد مايحب اغيب عنه وكان دلوع وانا موسوسه بالنظافه فاتلاقيني طول اليوم اشتغل يجي اخر اليوم من التعب بس اتسبح انام على طول حتى شعري مااقدر امشطه من كثر مو مهدود حيلي وزوجي مارحمني ابدا حتى ظهري كان تعبان لدرجة اني اعرج مااقدر امشي كلش ومع هذا مارحمني يطلب ويتشرط ومايحب شي ناقص على السفره ولا يساعد لو قفشه مايشيلها حتى ولده مايخليه عنده وانا اشتغل او اطبخ يقولي كيفك دبري نفسك وخدامه حالف انها ماتدش البيت وكل اخوانه مدلعين حريمهم ومايرضون عليهم بنسمة الهوا وخواتي بعد الله يتمم عليهم تدرين شنو سوي؟؟؟؟؟؟؟؟
قلتله امي بتجيبلي خدامه كسرت خاطرها شافت حالتي وحلفت علي وانا استحيت اردها وهي قدمت عليها هديه لي طبعا بالاول عصب وشكو وليش وعطيت امي خبر خفت يسألها وعصبت هي علي ليش تدخليني بمشاكلكم المهم دقيت على المكاتب واخترت اللي ابي لم كنت عند اهلي ودشيت جمعيه وحطيت الخدامه باسم ابوي عشان يكمل الفلم وطبعا هو تضايق لان موقفه قدام اهلي صار موحلو ومقصر بحقي ولا رحمني فاستحى يكلم امي وتقط عليه كلام

 

[مارشميلو..]

مشكورين بنات على الرد
بقولكم شسويت
توه رجع من الدوام قبل ساعه لقاني قاعده اغدي ولدي سلم مارديت عليه
جا جمبي وباسني وحضني بس ماطالعت فيه
ادري حس انه غلطان بس مابي امشيها له لان مو هالمره وبس يقهرني دايما مايحس فيني
والحين انا سبحت ولدي ولبسته وانا كشخت ولبست
وبروح لاهله وبرسله مسج لاقام يشوفه
واكيد بيجي ياخذنا بالليل ساعتها بقول له انا اذا بغيت اروح لهلك اروح لهم بأي وقت مايحتاج انت تقول لي
ومايحتاج تتصل من الليل وتحطني بموقف مو حلو شرايكم؟؟
انا والله بروح الحين مع اني مالي خلق بس عشان خالتي لها كم يوم ماشافت ولدي وهي توله عليه تضايق اذا ماجبته لها

 

[اشواق2010]

حبيبي ولاتغثين نفسج اهم شي راحتج واطلبي لج خدامه مو عشانج ماتشتغلين مايجيب لج خدامه كل الحريم عندهم خدمات الي تشتغل ولي ماتشتغل وين قاعدين احنا بأي عصرر وارتاحي وريحي نفسج وخليه يزعل من نفسه ويرضي من نفسه

 

[انا لحبيبي .]

الله يهدي البال ويصلح الحال ،

والحمدلله انه اجا راضاكي حبيبتي ، في رجال ما براضو نسوانهم ، لا تعوديه على انه لما يجي يراضيكي ماتعطيه وجه بكره ببطل يراضيكي

 

[Gifts&Occaions]

الله يهديه انشالله

 

[جادل سبيع]

الله يهديكم انتي بعد لا تزيدينها كلها زواره ليش كل هالعصبيه ادري شغل البيت ايهد الضهر غيره الجاهل والزوج بس حرام والله احمدي ربك ايراضيك وايداري خاطرك غيره مايدري عن هوا دارك ..حسسيه ابغلطته وعاتبيه بس لا اتكبرين السالفه خلاص بالعكس استانسي ولا تحسسينه انه مو قادر يسعدك..الله يشرح صدرك ويبعد عنكم كل شر..

 

[om MaRyooM]

دامج عارفة طبع زوجج واهوا داق على امه جان رحتي ساعة ورديتي بيتج وعقب كملتي الشغل
ولما يرجع من دوامه قوليله يليت مرة ثانية تعطيني خبر او تسالني . ..


المهم اللي صار صار

الحين على مشكلة زوجج والطلعات والدلع ... ترا لاتغرج المظاهر الحين ماكو ريال يدلع مرته الا من رحم ربي

ولاتقارنين زوجج بغيره

وحاولي معاه باللين والكلمة الحلوة .. لاتعاندينه
يعني انتي الحين قلتيها بتقعدين بدارج ومارح تكلمينه
حسبالج الريال بيهمه ؟؟؟؟

اول شي سويتيه بتزيدين الطين بلة
وثانيا بتخلينه يفكر لبعيد او يهج ويدور راحته مكان ثاني


ادعي الله يسخره لج ويحنن قلبه .. واصبري ان الله مع الصابرين
وانشالله يطخ مع الايام

 

[فوفو22]

في امور نقدر نحلها بسلاسه وبهودء

واذا خاننا التعبير والعمل بسلاسه

تنقلب المشكله من بسيطه الى معقده

*****************

نرجع للموضوع

السالفه بدأت ببساطه

ولكن بقلة ذكاءج ممكن تكبر

الحل الامثل كان

حاضر يا عمري باجر اروح لخالتي وأأجل الغسيل ليوم ثاني

او اقعد مبجر واحاول اخلص شغلي قبل الزواره

بس يا حياتي مره ثانية قولي قبلها عشان ابرمج نفسي على شغل البيت لاني احب ازور خالتي ومزاجي رايق ومو تعبانه من شغل البيت

اتوقع عقب هالدلع والذرابه رح يستأذن منج مره ثانية

بسيطه حبيبتي هذه هي الحياة كل طراق بتعلومه

فوفو

 

[جوري 2007]

اهتمي بنفسج ،، لاحقه على شغل البيت اللي مايخلص

انا لومنج ادق عالمصبغه واعطيهم اغلب الهدوم ،،

 

[manoooona]

الله يعينك اختي اذا اول مره عديها ولاتفكرين بس اذا هذا اسلوبه لا غيري اسلوبك وصارحيه باللي بخاطرك ولا تشيلين عليه وتكبرين السالفه كذا احسن لك صدقيني بيتعود على صراحتك معاه ويتجنب الامور اللي تزعلك
اتمنى فهمتيني

 

[زوجة عزيز]

الله يعينج حبيبتي ويساعدج ان شاء الله بس لا تقارنين نفسج بصديقاتج واهلج كل واحد ياخذ نصيبه

 

[ام ميميتو]

حبيبتي عادي مافيها شي يعني اذا ما غسلتي الظهر تغسلين المغرب بسطي الامور لا تعقدينها