بليييز هيلب.. ابي احد يزفني

[Blueflower84]

هاي بنات.. انا عندي مشكلة و اهيا وزني الي مو راضي ينزل لان صراحة انا كلش كلش ماعندي ارادة.. اسوي رجيم يومين و من اشوف الاكل انفجع مادري ليش.. يعني آكل بشكل مو طبيعي حتى لو ماكنت يوعانة.. وصراحة هالشي قاعد يأثر على نفسيتي و على علاقتي مع زوجي يعني مالي خلق البس واكشخ كله مبهذلة واحس ولا شي حلو علي.. و فوق هذا صايرة ما اقرب يمه وماحب ان اهوا يقرب يمي لان ادري ان جسمي موعاجبه.. يربي كل شي جربت.. حتى رحت عند دكتور تغذية بس هم ماكو فايدة.. انا يبيلي من 10 الى15 كيلو عشان وزني يصير مثالي.. عفية زفوني هاوشوني.. ابيييييييييي اضعف.. بس ترى انا ماحب اشرب اعشاب وجاي اخضر وهالسوالف.. ابي يصير عندي ارادة مليت من التبهذل والمتن.. بلييييييييييز ساعدوني

 

[حصه11]

مي 2

الله يعينا بس انتي حاولي عشان ريلج

 

[ام فطوووم]

لوووووووووول اذا انتي ام ١٠ كيلوات تبينا انزفج
عيل احنا اللي يبيلنا ٢٠ كيلو شنقول ومنو ايزفنا ويلعن خيرنا
خليني ساكته

 

[Blueflower84]

المشكلة اني في زيادة مستمرة يعني كلها شهرين و راح اصير ام ٢٠ او ٣٠ كيلوووو 

 

[شتاء الحب]

بسم الله عليج من الزياده .!
و اول شي الشاي الاخضر صح مو حلو ( حقيقه ) بس مو معناه ما تشربيه مفيد جدا اثناء الرجيم
خذي لج شاي اخضر بالنعناع .. طعمه احلى من الاخضر لحاله !

و الشي الثاني حبيبتي .. انتي عندج هدف اقوى من اللي مو متزوجه !
يعني انتي مزوجه و تحسين لازم تضعفين لنفسج اولا و لزوجج عشان تحافظين لبيتج !

و اللي مو متزوجه ( احم احم مثلي انا و غيري ) احس ما في شي يدفعنا لجدام ..
نحن نحب نفسنا و نتمنى نضعف لنفسنا و محد يزفنا من اللي حولينا

و مثل ما قلتي انتي يبيلج 10 - 15 كيلو بس
و الله نعمه

وحدهمن الخوات قالت 20 بعد نعمه

عيل انا يبلي فوق 50 كيلو عشان اوصل للمثالي

الحمد لله على كل حال
ولو نطرت ان احد يزفني ولا يشجعني صدقيني ما راح نتحرك
انا كنت اسوي رجيم من شهر كنت اشجع نفسي و استمريت
بس بعد ما تركته .. الكل عادي و اذا بزفون بعد ما احس اني يحرك فيني شعره !

التشجيع الاساسي ينبع من داخلج
انتي ابدى و راح تشجعين نفسج بنفسج ! و راح تحبين الرجيم .. بس تشوفين النتايج

و هذا اللي بسويه من بارج ان شاء الله ..

 

[منال القلب]

لي ريلج شافله شوفه
او تزوج عليج بعدين عاد قولي يا ليت وياليت..

يعني عبالج ريلج عاجبه هالحال؟
دام ما تبينه يقرب صوبج على يروح عند منو!!!
إذا تبيني أزفج هذا انا قاعد أزفج..


10 كيلوات ما تقدرين تنزلينهم!!!! ماعندج سالفة الصراحةعيل
الي عندهم 28 ولا 35 كيلو مساكين شنو يقولون؟


لا تشربين أعشاب وخرابيط. كل الي عليج إنج تشتركين لمدة شهر كامل
في أحد شركات التغذية ميخالف قطي 200 دينار وشرط بتضعفين خلال
هالشهر 8 كيلوات بس يكون من ( دايت كير - دايت سنتر ) هذيل احسن اثنين
اختاري واحد منهم وتوكلي على الله.. بعد هالشهر انتي بروحج راح تحفزين نفسج على الضعف
لما تشوفين نفسج نازلة بالوزن والحلو ان اكلهم لذيذ


وفوقهم امشي بس نص ساعة 30 دقيقة فقط لا غير.. مع ان الاكل ينزل بدون رياضة


انتي راح تدمرين نفسج جذي وتذكري ريلج ماراح يعجبه جذي
اذا تميتي على هالحال
وانتي عارفة الرياييل شلون..

 

[Blueflower84]

حبايبي كل الي ردو.. ومنال القلب مشكورة حبيبتي صج يبيلي احد يعطيني كف على ويهي عشان يصحيني من الخمال الي انا فيه

 

[Blueflower84]

اب اب اب اب

 

[آنسه مسلمة]

السلام عليكم ورحمة الله وبركاته

هذي وحده انحفت وطيرت عقل زوجها
انقله لج ان شاء الله عشان تتحمسين
واحتسبي الاجر بالنحف للزوجج
وكثري من الاستغفار والله يوفقج
​

.
.
.

نحفت وطيرت عقل زوجي
​

بسم الله الرحمن الرحيم
السلام عليكم ورحمة الله وبركاته
((لايطوفكم موضوع يشوووق))
اخواتي
فية وحدة نزلت اكثر من ربع وزنها
وكانت تتكلم عن تجربتها وعجبني كلامها قلت
انقلة لكم
المهم
هي تكلمت عن اشياء كثيرة بس انقل لكم
عن التغيير الي حصل لها من ناحية زوجها
#تقول كان عادي عندة قبل انحف اني اروح مع اي احد من الاقارب مثل اخوانة وحريمهم او خالة او او او حتى سواق اهلة انا وعيالي
بعد الرجيم صار يرفض انها تروح مع احد ويصر انها تستناه يخلص شغلة ويوديها

#قبل الرجيم ماكان يحب السواليف كثير ولا الضحك
بعد الرجيم صار حتى نكتي البايخة يضحك عليها بالعربي يستحلى منها كل شى
#قبل الرجيم ماكان يركز على لبسها ولا عمرة علق علية
بعد الرجيم صار يختلس النظر لها اذا مشت من حولة وهى صارت عاد تدلع بس صار لايق عليها
#قبل الرجيم كان مايشيك عليها ولا يعطيها اي تعليمات قبل ماتروح اى عزيمة
بعد الرجيم محاضرة عن الستر وانها ماتقوم من مكانها علشان مايشوفها احد بالصدفة
#قبل الرجيم
تقول ماكان يحط يدة على يدى ابدا وكنت اعتقد ان الحركة هذا بس فى التلفزيونات
بعد الرجيم صار كل شوى يلتفت على وتذكر ان لي ايدين وانها بعد ناعمة
#قبل الرجيم كان فى السوق يمشى قدامي الحين يمشى معى ويطالع فى الرجال اذا هم يطالعونى او انا اطالع فى احد

# قبل تنحف تقول كان لو اشيل دبة الغاز مايهتم بعد مانحفت صار لو يشوفها
تبي تشيل ولدها الي عمرة 4 سنوات من الصالة اذا هو نايم ------يقول صحية خلية يمشى

#قبل تنحف بطلوع الروح يوديها للسوق واذا تكرم ووداها يستناها عند باب المحل واذا حبت تاخذ راية فى شى يقول لها زين زين بس عجلى اطلعى
بعد النحف صار يدخل معها ويقول لها انت اختاري وخلينى انا اتفاهم مه الرجال

# قبل النحف كان شعرها جميل بس ماعمرة انتبة لة بعد النحف صار يقول وش مسوية بشعرك عطينا من الي تحطين--------- عاد بسم الله علينا هو اصلع من ابو لمعة
قبل الرشاقة تقول كنت اذا جت وحدة جسمها حلو فى التلفزيون اغيرة على طول
بعد الرشاقة تقول صار اذا جاء مذيع في التلفزين صار هو يقول ترا هذولى مايطلعون الا بعد مايتعبون على انفسهم ويحطون مكياج




قبل الرجيم كان اذا سافر سفرة يجيب له عطر من الطيارة او بالكثير شنطة
لانة يقول مااعرف مقاسك خفت اجيبلك شى مايقد لك
بعد الرشاقة عرف مقاسها -------------سبحان الله ---------- وصار هداياة قمصان نوم وبلايز


قبل الرجيم كان اذا يبغى يمزح معها يقول لها انت حسودة -------------وش يضرك لو زوجتينى
بعد الرشاقة معاد جاب ذ السيرة

تقول الاخت
انا عني صرت وحدة ثانية حتي فى مشاعري واحاسيسى صرت احب الحياة والناس
كنت الناس تفرح بالعزايم وانا يركبني هم مايعلمة الا الله من يعزمني احد
وحدة اني مالاقى فى السوق شى مقاسى واشترى حتى لو موعلى ذوقى بس المهم يدخل فينى
وعلشان اضمن اني ماارجعة احرص يكون سترجش الي يزيد الطينة بلة
ويحلى جسمى اكثر من ماحو حلو
حتي الجزمة ماكنت اختارها بس الاقى مقاسى اشيلة واحيانا اخذ ثنتين من نفس الشكل
لاني ماصدقت لقيت المقاس

اما الفترينة هذي حلمى اني الاقى شى ينفع لى فيها ودئما سؤال للبائع عندك مقاس كبير من هذا
واشوف البنات فى المحل يختارون وعلى طول يطلبون المقاس اما انا لا زم ابعد شوى علشان اشبر الصدر لاتاكد انة مقاسى

كان معظم شرائي قمصان بيت ووصل بي الامر اني ازور اهلي فيها --------على اساس انها اريح اما البيت فهذى لبسى المفضل وحتى لو لبست تنور او شى ضيق حدى دقائق وافسخها
نكمل بعد الرجيم تقول
صرت افرح باي عزيمة حتى عزايم اهلى صرت اروح لها بالعربي صارت تحب الترزز
وبدال نظرة الاشفاق صارت نظرة اعجاب من الجميع ليس بسبب جسمى بل بسبب قوة ارادتى وصارو الحريم الي كانو انحف منى اسمع منهم الاسطوانة المشروخة
الي تقول -------------حبيبتى ليش ماتنحفين توك صغيرة لازم تملين عين زوجك -----هذولي يقالك المادبات
او الي تقولى عندي لك برنامج حلو اختة من وحدة علشانك وكاني السمينة الوحيدة فى العلم

صارو الي تقول ماشاء الله ارادتك قوية والي تقول تكفين وش سويتى وصرتى كذا
اما عن الذوق فى اللبس كنت اتحسر مرتين مرة يوم البس شى على غير مزاجى ومرة لما اطالع البنات الانيقات ودي اقول لهم والله ان ذوقى احسن منكم بس حكم الجسم
الحين البس الي نفسى فية ويافرحتي اذا جبت شى للبيت ولقيتة واسع ------لانها بصراحة صارت عقدة----------- مايهمني اني ارجعة قد مايهمني اني اقول لرجلي انا رجعتة لية



المرونة الي احسها بجسمى خلت ادلال وحركات الدلع لايقة على
وصرت بس ادور وش يقولون عن الرومنسية علشان اسوية-------واكتشفت ان فية اشياء ماكنت اسويها لم اتركها من ---- الحياء لا -----بس ماكنت حاسة انها تناسبنى
باختصار ر حسيت بانوثتى اكثر
وانعكس هذا على تصرفاتي وبدلت اشياء كثيرة فينى من غير مااحس
وشفت فرق فى تصرفات الي حولى بداية ب زوجى ثم اهلة الي كنت اشوف فى وجوههم الشفقة على اخوهم والتحسف على انى مخذة واحد وسيم والكل يتمناه
حتى ان خالتى ((((قصدها ام زوجها )))) ولاول مرة تنادينى دونا عن الباقين لما جاها ناس يشوفون بنتها طبعا هذا بطلب من البنت
ليش لاني بصراحة صرت اشيك وحدة فى عائلتهم
مع اني كنت اسنع وحدة بس هذا ماشفع لى عندهم




فى بيتى ومع زوجى حسيت اني نقصت عشرين سنة
بعد ماكنت احس اني ام موبس لعيالي والله اني احيانا احس اني ام حتي لزوجي
صرت احس اني عروس وصرت اكثر نعومة ورقة
وانعكس هذا على تصرفات زوجى مع
لما كنت ازعل معة كنت انا الي اجي اراضية اين كان السبب لانى بعد مااهدى ومن قلت الثقة فى النفس اقول من زينك عاد لا شكل ولا اخلاق روحي راضية
كنت لما اروح مع زوجى لمطعم او مكان عام كل مرة زوجي يشوف وحدة مع زوجها بس علشانها نحيفة ومامعها اطفال دائما يقول هذولي عرسان عاد انا اموت من القهر واقول فى نفسى تلقينة يقول فى نفسة ياحظة بهل عروس
الحين ماعاد صارو يلفتون انتباهة كثير------------صار تركيزة على اكثر


كنت لو شفت بنات يمرون من جنبنا احاول الهية بالكلام عن انة يطالعهم والحين اكتشفت اني تخلصت من هذي العادة بدون ماادري
كنت احس لما البنات يقابلونا ويطالعون فى زوجي على طول يطالعوني وكانهم يقولون ياسفابة عليها لاني فعلا فى العباية شكلى امة
يمكن هذا شعوري بس لاني حساسة مرة وعاطفية بس كل هذا كان مدفون بين الشحوم
وانا كان المهم عندي اعرف وش الي صح ضميرها وغير تفكيرها
تقول فى يوم كنت الحالي فى البيت عيالي راحو مع ابوهم لبيت اهلة
وجلست اطالع تمثيلية فى التلفزيون وجايبة باقى الغداء انقنق فية---بعد ماكفاها الي كلتة فى الغداء
بعد كذا رحت لغرفتى وجلست اطالع روحى فى المراية
قلت فى نفسى هذا جسم وحدة فى العشرين اجل اذا صرت فى الاربعين وشلون بصير

لو مهوب علشان شكلى على الاقل علشان صحتى
لو عشان نفسيتى الي صارت زفت من الي اشوفة ومن خوفى علىزوجي لايطير منى
فكرت سنين وانا اكل كل الي نفسى فية وش حصلت كلها متعة ماقتة بعدها الله العالم
وش هي كم شهر عند السنوات الي فاتت والسنوات الي تبي تجي وابيها تكون احسن من الي فات---------------تعبت ولازم احط حد لمعاناتي
بس وشلون
هل هو رجيم او دواء اواو؟
قالت اول شى الدعاء ومع الدعاء جتني قوة ارادة غريبة
ثاني شى عدم الياس دئما ادور على حل وماامل ابدا ومقتنعة ان كل شى لة حل بس نواصل البحث الى ان نجدة
اما عن الرجيم تقول استخدمت وجربت كل شى بس دئما مع فتمين
بس كلمة السر فى هذا كلة
انها لما تنقص عشرة كيلو وتخبص وترجع حتى لو نصفها كانت تقول الحمد لله
لازال عندي النصف الثاني مارجعتة فى الوقت الي غذيت جسمى فيى بكل الي نقص علية
يعني لازلت ربحانة
وبتلت على هذا التفكير الى ان انتصرت فى الاخير يعني كانت تجمع ربح على ربح
وماتبكي على الخسارة (وهذي الصراحة فلسفة اعجبتني كثير)

ماكانت تهتم انها تنزل فى اسبوع او شهر كانت تقول حتى لو مانزلت فى الشهر غير ثلاثة كيلو بركة مع الوقت بيكثرون وحتى لو اجلس سنة

والشى المهم قالت نصيحة لاي وحدة تسوي رجيم انها تشغل نفسها فى شى ثاني مثل تعلم هوايات جديدة او لغة وتعتني بكل الجسم من شعر الى بشرة وغيرة حتى اذا نحفت تكون مكملة اشياء كثيرة وهذا يبي يشغلها من التفكير فى الاكل

وتقول ان الشعور الجميل فى الجسم وفى النفسية يفوق اي وصف------------------- لما كانت سمينة كانت ودها تنحف بس علشان شكل الجسم والتمتع باللبس بس اكتشفت اشياء اهم ماكانت دارية عنها تفوق موضوع اللبس ---------مايكتشفها غير الي نحفو من بعد ماكانو سمان
حتى النحيفات مايعرفونها ----------------------شى يستاهل كل التعب لانها اكتشفت ان الحرمان من العادات الفذائية الغلط اسهل بكثير من الحرمان من المكاسب الثانية الي عرفتها بعد النحف وان مافية اكلة مهما كان طعمها تستاهل انها تهدم هذا الشعور الجميل

الشى الثاني والاجمل انها اكتشفت ان الذي كان ينقصها ليست الارادة بل
شياين الاول عدم ادراك الفائدة الحقيقية من الرشاقة من نواحي كثيرة
والثاني هو الوعى الكامل بالامور الغذائية واثرها
اما الارادة فهي تتكون تدريجين من زيادة مستوى القناعة عند الشخص
باهمية الشي

وعلى موضوع الرجيم
تقول فى البداية كنت كل مرة اسمع عن رجيم كان تركيزي بس كم ينحف
وعلى طول على السوق اجيب الطلبات الي كثيرا ما انرمت لانها
تستخدم يوم او يومين هذا اقصى حد
اما الاجهزة عاد هذى قصة
كانت تعتقد اذا سمعت عن جهاز انها مابينها وبين الرشاقة غير احضار هذا الجهاز للبيت
وانة لو كان عندها كانت صارت رشيقة من زمان
وينتهى الجهاز معلاق للملابس فى الغرفة لحد ماتمل منة وتبيعة بنصف ثمنة

قررت انها تاكل اكل البيت الموجود وتركض فى مكانها بدون جهاز
على الاقل اهون للفشيلة من رجلها كل يوم وين رايحة ابي اروح اشترى اغراض الرجيم
ولا شاف شى المسيكين

كل الرجيمات جربتها الي عدت على كلهم عندنا هنا فى القسم من الكيماوى الى البروتين الى رجيم السعرات الى الشوربة
بس افضل شى نزلت علية هو ترك العشاء +مشى نصف ساعة فى نفس مكانها +تخفيف +فى نهاية الاسبوع يوم واحد تاكل غدوة حلوة +بعد كل استحمام موية ابرد شوى على كامل الجسم
للأمانه منقول للتشجيع
أختكم قلوب
أدعوا لي




منقوووووووول

ان شاء الله تحمستي ؟؟؟

 

[اسورة]

اب اب اب اب

 

[قطوووة]

لاصرتي رشيقة كل شي بيتغيير للاحسن

انتي قدها

يلا شدي حيلج

 

[Blueflower84]

اي والله القصة تحمس و تشجع.. انشالله يارب الله يساعدني وابدي من باجر صفحة يديدة.. مشكورة حبيبتي وكل البنات الي ردوا.. ولي تدخل الموضوع و يكون عندها تجربة جذي اتشجع يريت اتحطها سواء كانت تجربتها او تجربة سامعتها.. يمكن هالتجارب اتساعدني و اتساعد كل البنات الي يعانون نفسي

 

[star warld]

وهم بعد بنات المنتدئ مسوين حملات كثير دشي وياهم الحملات راح تتحمسين اكثر وياهم

 

[قطوووة]

اهم شي ماتكونين بروحج ..
دشي قروبات عشان تعاونون بعض وماتملين

 

[sh-q]

اي والله كلهم 10 كيلو و ان شاء الله يتصيرين مثاليه

انا باقيلي 50 كيلو يمكن على المثالي
بس انا اقدر وقدها وانتي بعد تقدرين و اذا ضعفتي راح سوين كل شي تبينه
و ريلج راح يحبج اكثر ان شاء الله

 

[قطوووة]

^^^^^

كفووووووو