بسوي عملية تجميل لخشمي .. وأبي تجاربكم .. بس الميزانية تعبانه ؟؟؟ شسوي ؟؟

[النوري]

بنات .. بسوي عملية تصغير خشم ..


أنا خشميي من جدام يهبل ونعمووم وحلو .. يعني ما عندي خنافر ..

بس المسكله .. السنام اللي بنص الشخم ..

يبط جبدي .. وما يخلي عندي ثقه بنفسي أحس بس ودي أجبل الناس ما أبي أخليهم لا يميني ولا يساري ..


يشوفون سنامي .. أف ..


بس المشكله .. عندي ميزانية .. حدها 600 .. أو سبعمية دينار. .


ما أقدر أتعداها ..؟؟


في دكتور يسوي بهالسعر ؟؟؟


والمشكله الأم في ألم ؟؟

يمدحونلي الدكتور الفرنسي .. اللي ب ذا سوان ..

بس تخيلو يسويها ب ألفين دينار ؟؟

شامل العمليه و المراحعات و كل شيء ؟

بس غاليه ؟؟

جمال الحربي على ألف وميتين ؟؟جنه ؟؟صح ؟؟



ششسوي .. أخاف اروح لدكتور ب بهالسعر البسيط .. ويلعب فيني .. و أوفات أقول كلهم دكاتره وإحتمالية الخطأ موجوده .. عند الغالي والرخيص ؟؟




وبالنسبه للألم اللي نشوفه ب ذا سوان ؟؟ حيل يتألمون ..

بس أسمع عن بنات سوو عند دكاتره .. ويمدحونهم في وحده معانا بالمنتتدى سوتها عند إبراهيم ال
أشقر بلبنان ..

ب 3 ألاف دولار .. مع السكن لمدة ليله بالمستشفى ..

وطلعت بعد العمليه بشوي تتمشى في بو حمدون ؟؟

و تقول ما في جبس من بره ولا شيء. . بس من داخل بسيط .. يعني ما يبين عليها ..؟؟



أخاف من حمولتي و تشمتهم ؟؟ باجر كل وحده تقول لرفيجتها واللي ما شافني عباله .. خشمي شطوله ؟؟ مع إنه بسيط , مو حيل .. بس باط جبدي .. ؟؟




المهم كثرت حجي ..
بس

صارلي يومين ما قاعده أفكر إلا بهالعملية .. وبسويها على عطلة 15 ..( عطلة الربيع ) ..

 

[أمواج البحر]

يبط جبدي .. وما يخلي عندي ثقه بنفسي

لا حول ولا قوة الا بالله ... حبيبتي مااااا يجوز تقولين جذي عن خلقة ربي

وغير جذي العمليات التجميل حرااااااااااااااام مع ان للأسف الشديد الناس يتعاملون معاها بكل اريحيه رغم حرمتها

واهم شي با حبيبتي الثقه بالنفس تيي من داخلج مو من عملية تجميل او حتى مكياج

تركي عنج كلام الناس و بترتاحين

ارد و اعيد و ازيد هذي خلقه الله وهو قال ((لقد خلقنا الإنسان في احسن تقويمٍ ))

 

[النوري]

الحمد الله ولا إعتراض على خلقة الله ..

بس بجمل فيه شوي .. ماراح أشيله كله ..

مثثل ما تحط الوحده مكياج .,.. أ كريم أساس , .. الحبوب .. الزوده اللي بوجهج هم خلقة الله . .بس تحاولين تشيلينهم بالكريمات .. أو بالأساس . إذا ما قدرتيىتشيليهم من الأساس ..

و القصر خلقة الله .. بس ما عندج بكبتج كعبات ؟؟؟ ليش ما تقعدين على قصرج ؟؟؟

أنا بس بسوي شغله بسيطه .. حتى أقولكم .. مستحرمه الألف بالدكتور .. لأانه خشمي ما يبيله شيء الحمد الله ..

بس حك و برد بسيط ..



وجزاج الله خير .. على راسي كللامج ..

 

[أمواج البحر]

حبيبتي المكياج بعتبر من التزين و التزين حلاال

اما العمليه فهذي عـــمـــلـــيـــه يعني تغييييييييييييير خلقة الله ومو بغسلة ماي يروح

ومع الاسف الناس فاهمين عمليات التجميل بشكل غلط مثل ما انتي قارنتي الكعب بعملية التجميل!!

على العموم حبيبتي انا قلت لج عن حرمتها و هالشي راجع لج

 

[* عباية راس *]

عندي احساس لو بشوفج ماراح ألاحظ على خشمج شي ياقلبي لاتحطين فبالج هالتفكير

بعدين سألي فيها شيخ ثقه حلال والا حرام لأن اذا مو ضروري مو حلال

اذا محتاره استخيري بصلاتج والخير فيما اختاره الله


صدقيني شوفي نفسج حلوه بتصير عندج ثقه بنفسج

 

[النوري]

فعلا ما يبين حيل .. لدرجة أحد يعايرني فيه يوم كنت صغيره .. كلش.. كانو يقولونلي البطه بس .. بسيوم كبرت ضعفت ..

بس أنا بكلية و البنات .. خشومهم قصه وتهبل وتدوخ .. و أنا خشمي عوج .. حتى المكياج عليهم يهبل .. أما أنا ..

لأ ..



أبي أسويها بسويها .. و ماراح أسأل أحد ..

قولولي بس تجاربكم عن الدكاتره .. وبس

بقرر ..

 

[كويتية _ بكل فخر]

الله يهديج اختي


انتي تقولين ماراح اسأل احد


على الاقل سئلي شيخ

مااقول غير الله يهديج

 

[نملة حوله]

استغفر الله العظيم ..

حبيبتي .. انتي جنج قاعدة تعاندين بالحرام !!

والبنات قالولج وترى معروف عمليات التجميييل حراااام الا في حاول وحده : لو مثلا صار حق واحد حادث لا سمح الله واحترق او تكسر وانعفس شكله .. هني ممكن يعدل

لكن انتي ربج خاااالقج جذي!!! بتعاندينه وتغيرين بملامحج ؟؟؟

اوكي مو مشكله ..

تخيلي انج تسوين العمليه اونتي مو هامج كلام احد ..


طلعتي من العمليه


والا خشمج متغير !! وللأسف للأسوأ!!


والدكتور خربه لج !!!


انزين تخيلي تطلعين من العمليه عقبها بجم يوم ماتقدرين تتنفسين عدل!! او يصير لج شي!!!


شوفي كل واحد الله سبحانه اخلقه وله حكمه من كل نقطة حطاها فيه


مافي انسان كامل مستحييييل


اللي تقولين خشمهاناعم .. ممكن تلاقين عيونها مو حلوة ..


او سمره واايد


او متينه


يعني مافي انسان كامل!


بالنهايه القرار لج بس احنا علينا انبهج ... وصدقيني احسن شي تسوينه انج تدعين ربج وتحتسبين الاجر وصدقيني الناس ترى مو معطينه اهميه بس انتي شايفته جذي​

 

[marioom]

لبس الكعب والمكياج كلش غير عن عمليات التجميل ومايصير اتقولين ان نفس الشي لان هذولة اشياء مختلفه
بالله شلون لما البس كعب ولا احط مكياج يعني جني مسوية عملية تجميل ؟؟!!
على العموم عملية تجميل الخشم اتخلي ندبه صغيره اتبين بالخشم واكبر دكتور ما يقدر يخفيها يعني بكل بساطه راح اتجملين السنم بس راح يظل فيه تشويه
​

 

[supermarket]

السنم احتمال بس يبيله برد العظم يعني بدون فتح كامل للخشم

رفيجتي سوت بلبنان على 650 او 750 مو ذاكرة لانها من سنتين

روحي اي دكتور هني بس شوفي شلون راح تكون العملية

 

[عالي مستواها]

" ولأمرنهم فليغيرن خلق الله ومن يتخذ الشيطان وليًا من دون الله فقد خسر خسرانًا مبينًا "

حكم عمليات التجميل بشكل عام حرام باستئناء حالات التشوه أو الحالات اللي يكون الهدف من العملية مو تجميل كثر ما يكون تصحيح .. وهذا شي يعرفه الناس عامة لكن يكابرون

أنتي قلتي بنفسج " مو واضح حيل ومو مخرب شكلج " هل يستاهل تاخذين ذنوب عشانه .. أكيد القرار راجعلج بس فكري لو - الله لا يقول - صارلج شي أثناء العملية وتصير شكثر لأنها عملية جراحية فيها تخدير وقص وتحتاج مرات يكسرون أو يحكون عظام من الخشم فهي عملية جراحية فيها حياة وموت .. هل تستاهل السالفة بنظرج هذا ؟

أو نجحت العملية وصارلج مضاعفات نتيجة لخطأ طبيب الله كاتبه لج ما راح تتحسفين ؟


أنا أستغرب صراحة يعني فيه ناس مرضى وتعاني من المرض لكن مجرد ما تسمع إسم عملية تخاف حتى لو علاجها ما يكون إلا بهالشغلة وناس عندها العملية جنها رايحه تسوي تحليل شي عاااادي !! شلون أعرض نفسي لمجازفة وأنا ما فيني إلا العافية ؟

الواحد يطالع غيره ويحمد ربه على الصحة كافي أنه يمشي ويشوف ويتكلم ويفكر غيره ناس مشوهة ولا متخلفة ولا معاقة ومع هذا ما كان الخلل الوظيفي عائق بالعكس انجحوا أكثر من الناس الطبيعين ولهم انجازات

ليش دايم نتوقع إنه شكلنا بيحسن من وضعنا ؟ ليش ما نفكر أنه نطور من قدراتنا ولا نحسن من وضعنا الإجتماعي ولا نكتسب مهارة جديدة تكون مكسب لنا بدل ما نفكر أنه نسوي عملية تجميل ؟

أكيد هذا قرار شخصي وأنتي حرة فيه

 

[pretty sarona]

في دكتور ياي بطيبة كلينيك شفت اعلانه , دقي عليهم وسألي دام ما بذنج ماي ,, بس قبل كل هذا استخييري

 

[النوري]

شكرا لكل اللي ردو ..

بس ما بذني ماي ..

وما تعرفين شنو إسم الدكتور اللي بطيبة كلنك ؟


أنا بدق بعد شوي وبشوف..

بس هل تتوقعون في دكتور يسويها بهالسعر .. ؟؟

 

[النوري]

إيه صج انا بسويها بالعططله عطلة الربيع ..

مو ألحين . ما أتقوع الدكتور بيقعد لين عطلة الربيع .. ؟؟


أنا أحاتي لا أغيب ؟؟

وإلا إذا سهالات ؟؟ أسويها الخميس .. العصر .. و أقعد راحة يومين و الأحد أداوم ؟؟

شرايكم ؟؟

 

[blue diamond]

بنات ..

أخاف من حمولتي و تشمتهم ؟؟ باجر كل وحده تقول لرفيجتها واللي ما شافني عباله .. خشمي شطوله ؟؟ مع إنه بسيط , مو حيل .. بس باط جبدي .. ؟؟

..

حبوبه بسألج سؤال دام انج تخافين من حمولتج ما خفتي من ربج ؟؟؟؟!!!!!
لاحول ولا قوه ألا بالله ​

 

[@Miss Dio@]

اختي انا نفسج بالضبط عندي سنام وماكان مبين وانا صغيره وصار واضح بالبلوغ وودي أسويه بس اتعوذ من ابليس دام تزوجنا الحمد لله يعني في ناس خشموهم واعليه وايد قبيحه وطويله وعريضه
قولي الحمد لله شوفي سعاد نصر ماتت بالبنج والله الدنيا ماتسوا استاثم عشانها ماردي بدش المغيسل وانلف بخرجه اشوي عمليه ما أدري بموت والا بعيش وممكن مايضبط يمكن الله عشان يحبج ماقاعد يخلي الفلوس بأيدج
شوفي انا اختي قالت لي ان في وحده تعرفها قزت ابر فوق وتحت السنام بحيث ان يصير كله على مستوى واحد سألي بالجلديه على الاقل هالماده تروح مو تغيير دائم وهمن سالي عن الحلال والحرام

 

[النوري]

شكرا ...

و أرد و أقول ما بذني .. ماي ..


أنتضر دكتور .. معقول .. و تجاربكم معاه ...

 

[مولاتي سميه]

انا نفسج مجابل خشمي يهبل صغير ومرتب بس على جنب فيني عظمه بس خفيييفه موحيل موجوده تقريبا تشبه عظمة اصاله نصري قبل لاتسوي خشمها عمليه بس اصاله بعد اطول انا مونفس طول خشمها
الخشم الروماني يسمونه

انا حيل باطه جبدي ولانها باطه جبدي فاشوفها بارزه مع انها كلش موبارزه طبيعيه حيل

تدرين زوجي يقول احلى مافي خشمج هالعظمه

اغلب الرياجيل يحبونها وسالي زوجج اكيد بتعجبه والله العظيم مره واحد سخيف بالسوق جدام امي يقول عاجبني خشمج قصته عجيبه<< تنوره موخشم لووووووووووووووول مالت عليه جليل حيا

حتى خالاتي يحبون خشمي

وانا نفسج استغفرالله كله ودي اسوي واشيل هالعظمه ابييه سييييييييييييييييده بس هم اقول اخاف العب فيه واتحسف ويخرب شكل وجهي كله على هالعظمه النتفه اللي محد يشووفها غيري

والله اختي لاتحطين في بالج وخلينا نساعد بعض ونشوف خشمونا غصب علينا حلوين لوووووووووووووووول يعني ليش الناس تشوف خشومنا حلوه واحنا لا ليش نعقد نفسنا؟؟ <<<اي سألي نفسج خخخخخخ

دام محد يشوف خشمونا والكل يقول خشومكم حلوه ليش نعقد نفسنا ونفكر بالعمليات
انتي تقولين محد يعلق على خشمج بس لانج نفسي اتدققين واجد فتشوفينه موحلو

اصلا تلقين الناس عاجبهم خشمج وانتي بتسوينه نفس حالتي لووول

 

[حنان84]

شوفي القطاع الخاص عموما مو اقل من 700 ولد خالتي سواها بمستشفى الاتصالات والحمدلله اهو الحين وايد زين​

 

[زيـنـه]

من تجارب ناس اعرفهم ..اغلب عمليات الخشوم و تعديلها يبي لها فوق الالف كويتي .. و لا تنسين المضاعفات انه يتورم الوجه اسبوع تقدريبا و عوار الراس .. و لو كان في غرز داخليه او دعامات بلاستيكيه من داخل ما تنشال الا بعد اسبوعين من العمليه و النتائج مو مضمونه لان مافي دكتور يضمن شكل الخشم بعد العمليه او بعد سنوات من اجرائها .
و الخشم ما يتجبس .. بس ينحط عليه بلاستر او لزاق او دعامه مثل الحديده مقوسه و عليها لزاق من بره .
و براحتج.