بروح ماليزيا شهر عسل بعد إسبوعين.. أبي رايكم .. بشغلات

[أمونه الحلوه]

حبيباتي .. أنا زواجي بعد .. إسبوعين .. وبروح ماليزيا ..

أنا للأسف ما أدري زوجي بيوديني أي منطقه بالظبط . ..

ولا أدري حتى جم يوم .. لأان مالي علاقه معاه .. كلش ..


زواج تقليدي ..
نضام . بشوفه أول مره .. بليلة العرس ههه
الله يعيني بس لايطلع جيكر . .


المهم ..
حبيت أسؤلكم . وين . .أشتري الهدايا .. لأمه و أخته
وأمي وإختي ..

وإخته عمرها 25 .. وامه مو كبيره ..

ما أدري ششتري شغله .. تكون حلوه وتعجبهم . .تعرفون ..

أول هديه أعطيهم .. فودي تعجبهم

لأسف ما أرعف اخته ولاعمري شفتها ما ادري شنو تحب ؟؟

إنصحوني .. ووقولولي ووين الأماكن الحلوه ..اللي تبيع شغلات حلوه

وشنو أشتريلهم

طولت عليكم .. شكرا ..

 

[شهدQ]

اول شي مبروك وعسى الله يتمم عليك

اما عن الهدايا عندك السوق الصيني بالعاصمه كولالمبور اسمه جاينا تاون خصوصا يوم السبت والاحد

تلقين هناك شنط مقلده درجه اولى وابواك بس اخذي صناعة هونغ كونغ AAA

وبالمجمعات :الشحاطات من 3الى 5 وكلهم حلووات وصناعات ماليزيا اخذي طبيه حق ام زوجك

واخذيلها سجادة العود المعطره تلقينها عند الي يبيعون دهن عود وبخور يم مطعم خيمة الصحراء بالعاصمه كولالمبور وهم دهن العود المعتق روووعه


وللي يحبه قلبك البرجين التؤمين روووعه وخيال من جناط وشحاطات ومكياج وبدل الخ الخ واسمه Klccاو سوريا ( تن تورز )

والاسواق ماليه شارع العرب بالعاصمه كولالمبور

اما بالنسبه للرحلات سوي كوبي لموضوعي عن ماليزيا واهو ملف راح تدعيلي اذا اخذيتيه معاك وسويتيله كوبي

دعواتك لعيالي حبيبتي وتروحين وترجعين بالسلامه ويطلع ريلك خشف ومزيون حده باااي:eh_s(8):​

 

[أمونه الحلوه]

ههههههههههههههههههه
ضحكيتي بسالفة خشف ههههههههههههه

أمين ياربي ..

والله يجزاج خير

ويصلح لج إعيالج .. ويهديهم .. ويهدي إبوهم . ويسخره لج .

شكرا

 

[أمونه الحلوه]

إيه صج . .بنات .. في وحده معانا بالمنتدى . .بتسافر على 1_11 _2006

يعني لو .. فيه . .خلينا نتعرف على بعض

سفرتي يا ب 1_ 11 أو 2 _ 11 ما أدري بالظبط . << عروس ضايعه

يالله بنات . ودي وحده منكم معاي

 

[كويتية ذربه]

امبيه عروس وتبين وحده معاك ياحليلك خوووش عروس الناس ينحاشون

من الاوادم وانتي تبينهم معاك خخخخخخخخخخخخخخخ

انتي عجيييييييييييييييييييييييبه !! :eh_s(3):

 

[QUMAR]

الله يهنيج يا حبيبتي ويسعدج:eh_s(6):
ومبروك مقدما :eh_s(17):
http://www.q8yat.net/showthread.php?t=33527

لقيت لج هالرابط أن شاء الله يفيدج :eh_s(22):

 

[أمونه الحلوه]

لا حبيبتي أنا إذا بنحاش بنحاش من زوجي

أحس .. غريب ما أعرفه كلش..

فما ودي أقعد يمه . .

ودي أي أحد .. ثاني

قاعده
أحن يودون إختي الصغيره معاي . شهر العسل ههههههههه < أتشغر ترى

ههههههههههههه
ياله أشوف عل وعسى وحده وياي

 

[Filakawyia]

اذا تبين اشياء "جناط" تقليد درجه اولى:
في جزيرة "بيننج" اذا بترولحون لها (عجييييييييييييييييييبه) تلقين اكو سوق اسمه سوق الليل عجيييب (صاير بالشارع عند هوليدي ان و اشطوووووووووووووله على طول الشارع) احلى من الجاينا تاون (الحي الصيني ) اللي في كوالا لالمبور . . . لان الجاينا تاون صاير كله ماركة "كوج" مافيه تنوع وااايد
اما اذا ماتبين تروحين "بيننج" . . روحي الجاينا تاون . . . و حوسي عدل لان عندهم سالفه مثل سالفة البلدية . . يعني مايطلعون درجه اولى بسهوله يبيلج تدورين عدل
و الاسعار تتراوح بين "40 رنجت (4 دنانير تقريبا ) الى 90 رنجت ( 9دنانير ) بس الاغلبيه تاخذينهم على 50 او 55 رنجت"

اما اذا تبين اشياء اصلية او حتى عشان تقارنين جوده التقليد الموجود بالاماكن اللي قلت لج عنها :
روحي "توينز تاورز" موجود في كوالا لامبور . . . في اتوقع الدور الثالث جنة "يعني احد الادوار" كله ماركات اصليه و اسعارها حلوة . . . تقدرين تاخذين من اهناك

و اللي يروح ماليزيا او تايلاند او الصين و هالاماكن يعني لازم لازم يشحنننننننننننن جناط من اهناك لان تقليدهم درجه اولى "في الغالب" و الاصلي اللي عندهم سعره زين

 

[أمونه الحلوه]

يعطي ألف عافيه حبيبتي فيلجاويه ..

جزاج الله خير

 

[Filakawyia]

حياج الله امونه
بالتوفيق يار رب الله يهنيج
بس لا تطوفج بيننج وايد حلوة

 

[شهدQ]

خخخخخخخخخخخخخخخ امونه يما منك وقتها تبين الفكه منا

بنصير عذال لووووووووووووووووووووووول اذكرك بعدين :eh_s(21):

 

[أمونه الحلوه]

لا فيديتج . قلتلج . .ما لي معرفه بزوجي وأبي النحشه منه صدقييني

أبي وحده تخليني أتبادل المقاعد ويا زوجها أهو يقعد يم زوجي وأنا أقعد يمها << حيا زايد ههههههههه


جد والله ما ودي أقعد يمه .. أحس بتضايق. .ياليت تكون الطياره فل ومقاعدنا بعيده عن بعض << حاجزهم بوقت واحد يا الخبله أكيد يم بعض ههههههه

الله يعيني. . حيل متضايقه من هالسفره وكنت بقولهم يكنسلونها أنا متنازله عن شهر العسل

بس أقعد مع رجال غريب بالكويت ولا أقعد مع رجال غريب بديره غريبه

تومتش علي. . ما أتحمل. . بموت من الخوف إن أمي مو يمي لا صار
شيء

أدق عليها ؟.


شفتو أنا بشنو ألحين ..؟؟


شهوده . .انا بوضع لا أحسد عليه

 

[أمونه الحلوه]

بنات أبي أعرف وين أحصل بخاخ السيقان ..

بماليزيا .. وبجم سعره ؟؟ وهل يعمل مفعول

أنا عمري ما جربته ..
وينحط بس للساق ؟؟ ما ينفع للرقبه . أو اليد .. ؟

 

[شيخه_البيض]

مرحبا امونة


حمدي ربج على الاقل انتي بتسافرين بروحج انا بسافر مع حماي وزوجته لان بنتزوج في نفس اليوم

فبنروح شهر العسل مع بعض تبيني اخليهم يروحون معاج :eh_s(3):

وبالنسبه للبخاخ حق شنو ؟

 

[أمونه الحلوه]

خخخخخخخخخخخ

شيخة البيض..

والله وناسه تونسوون بعض.. بالسفر..

المهم .. بخاخ السيقان مال اللي يوحد اللون .. لون السوق

يصير كله نفس الشيء..

؟

مات تعرفينه ؟ ؟

يقلوون تحصلينه هناك ..
عموما.. انا باجر عرسي..إدعولي بنات الله يوفقني وعقب باجر سفرتي..

مع السلامه

 

[شيخه_البيض]

الله يوفقج انشاء الله

وتروحين وترجعين بالسلامة


وانشاء الله ترجعين لنا مستانسة ومرتاحه

 

[شهدQ]

الله يوفقك ان شاء وقرينا الموضوع متأخر

بخاخ السيقان في ساسا بمجمع تايم سكوير

 

[حاااايره]

أولا: ألف مبروك وعسى الله يهنيكم ويرزقكم الذريه الصالحه يارب..

والهدايا انا انصحج للأم إخذيلها قطعة خامه (فالمسجد الهندي) سوق للخام معروف بماليزيا واخذي شحاطه طبيه(الله ماكثرهم فالمجمعات) وهم قطعه بخور (محلات البخور واجد)
والاخت اخذيلها من الحي الصيني جناط تقليد 100% وساعات بعد
وعسى الله يهنيج مره ثانيه

 

[bambena]

ما انصحج تاخذين تقليد فشله
اخذي لهم جنطه مو ماركه حلوه احسن ما تاخذين تقليد ماركه

موفقه