[ بدونك من أكون ] ..~ روآية بـ أنآمل كويتية ..~

[Absent Hope]

الساعة: 8 مساء

في بيت وسمية...

راشد: شعندج متصلة وتعاال بسرعة.. شفيج خرعتيني..!
وسمية: ابيك توصلني
راشد يطالع ساعته وباستغراب: وين.!
وسمية: بيت نوال.. بالي مو متطمن اتصل عليها من زماان ولا ردت علي .. ما صارت مستشفى
راشد: وليش ما رحتي مع السايق..!
وسمية: ما احب اروح مع السايق بالليل .. يلا توديني ولا لأ..!
راشد: اوكي يلا تعالي
وسمية: يلا
.... نزلوا تحت في الصالة كانت عواطف قاعدة ....
عواطف: على وين..!
وسمية سكيب ما عطتها وجه ومشت:....
عواطف: اظن قاعدة اسأل
وسمية لفت عليها: واظن هالشي مو من تخصصج ولا شغلج
عواطف: والله بمزاجي بعرف اللي يدخل واللي يطلع وين كان ووين راح يروح
وسمية حقرتها: يلا راشد
راشد:يلااا

( راحوا لبيت نوال نزلت وسمية وظلت تطق الباب محد فتحلها حاولت حاولت ولما تعبت وشافت انه مافي فايدة ركبت السيارة )
وسمية بخوف: محد رد
راشد: شلون الحين .. شنو بتسوين..!
وسمية: بروح المستشفى اللي كانت فيها جدتها اشوف يمكن هي هناك عند جدتها
راشد: انزين اي مستشفى..!
وسمية: هذي المشكلة .. اني ناسية اسمها
راشد: حاولي تتذكرين
وسمية: لحظة شوي.. شنو اسم اقرب مستشفى لبيت نوال..!
راشد: والله ما ادري
وسمية: ياا ربي ... اي اي تذكرت لما قالت مستشفى الـ....
راشد: اي اعرفها .. بتروحين
وسمية: اي اكيد بروح يلا
راشد: يلاا

في بيت ام يوسف...

ريم: آهااا وليش يعني بالذات هذا التخصص..!
عالية: بس جذي
نورة: بس يقولون أنه تخصص نادر
عالية: لا مو ناادر ما أظن
ريم: اووف عاد تدريس وعوار راس الله يعينج
عالية: آنا لاني احب الانجليزي عشان جذي بصير مدرسة .. منها اني احبه ومنها اني اتقن لغة
ريم: ونااسة عاد تصير علوووي الـ dictionary مالنا
بسمة: نووروو وعاليوو امي تقول قوموا شوفوا حمودي لأنه يبجي
ريم: وما تصير ريموو معاهم
بسمة: تصير .. بس المهم يلا قوموا
عالية: يلا بنات
ريم: يلاا

في بيت منصور...

سعود: شكثر يعني..!
مناير: اممم 5 أيام
سعود: يا الظالمة 5 أيام وتبينه يرد.. الريال شهر عسل خليه يستانس
مناير: من حلاة اللي يبي يستانس معاها شينة الحلايا
سعود: صج عااد مو حلوة..! ولا مرة شفتها.. يعني كل مرة لمحة ع السريع
مناير: لا مو حلووة وييع .. ما ادري منصوروو ما لقى غيرها بالدنيا
سعود: ممكن سؤال..!
مناير: تكلم لا تسوي نفسك مؤدب
سعود: يعني انتي ليش تكرهينها هي ما سوت شي .. ولما الحين ما شفنا خيرها من شرها
مناير: شووف حبيبي.. الانسان اول ما تشوفه يبين شره من خيره وآنا عن نفسي حسيت اني شفت شرها وما شفت خيرها
سعود: جايز ... بس ما ادري احس انج تظلمينها
مناير: لا ما اظلمها والايام راح تثبتلك هالشي
سعود: نشووف

 

[Absent Hope]

في المستشفى...

السستر: والله لازم اسمها
وسمية: والله ما أعرف الا ان اسمها ام جراح
السستر: انزين انتي قوليلي لما دخلت شنو كانت حالتها وانا اخليج تروحين عند الدكتور المختص عن هالحالات واكيد راح يعرف وينها
وسمية: هي من اكثر من اسبوع تقريبا دخلت المستشفى كان عندها عملية بالقلب وعلى حسب علمي ان العملية خطييرة وهي بغيبوبة و..
السستر تقاطعها: خلاص روحي الممر اللي هناك .. تلقين غرفة دكتور اول ما تدخلين ع اليمين هو مسؤول عن مثل هالحالات
وسمية: مشكورة
السستر: العفوو

راشد: هااا شقالت..!
وسمية: قالت روحي غرفة فيها الدكتور المسؤول عن هالحالات
راشد: هذي الغرفة
وسمية: اي .. يلا ادخل معاي
راشد: يلا
... طقوا الباب ودخلوا وبعد ما دخلوا وقعدوا قالوا الموضوع للدكتور...
الدكتور يعقد حواجبه: اممم ام جراح اللي عندها حفيدة اسمها نوال
وسمية ابتسمت: اي عليك نوور
الدكتور: اممم انتوا اهلها .. تقربولها..!
وسمية: انا رفيجتها وهذا اخوي يعني حسبة اهلها
الدكتور: وما تدرون عن حالتها
وسمية: لا ادري هي قالتلي انها سوت عملية بالقلب وهي خطيرة بس بالتفاصيل ما ادري..!
الدكتور: لا لا اقصد تدرون عن حالة نوال
وسمية استغربت: حالة نوااال ... شلون يعني..!
الدكتور: اسمحيلي يا اخت وسمية انتي الحين ليش جاية..!
وسمية: جاية ادور نوال اتصل على بيتها محد يرد قلت اكيد الاقيها عند جدتها بالمستشفى
الدكتور هز راسه: وانا كل فكري انج جاية تسألين عن نوال
راشد تدخل: عن نوال.. شلون يعني دكتور .. نوال فيها شي..!
الدكتور: انا بصراحة يؤسفني انكم ما تدرون عنها وعن حالتها لأن صارلها يومين طايحة عندنا بالمستشفى ومحد سأل عنها
وسمية: نوااال.!
الدكتور: اي نوال... الظاهر يا اخت وسمية ما عندج خبر ان جدتها متوفية من يومين
... وسمية من سمعت ان جدتها متوفيه شهقت وحطت ايدها على حلجها من الصدمه وظلت ثواني مو مستوعبة بعدها نزلت دموعها كل هذا ما تدري عنه وينها عن رفيجتها عن صديقة عمرها وينها ...
راشد: وليش ما قلتولنا او قلتوا لأحد من اهلها يعني ما يصير جذي
الدكتور: يا اخ راشد .. اصلا مافي مجال نسأل الآنسة نوال تعرفين احد ولا ما تعرفين لأنها من سمعت بخبر وفاة جدتها طاحت ومن يومين ما دخلت اللقمة حلجها واول ما تقعد ترد تبجي وتنام مرة ثانية .. يعني ماكان في مجال ان احنا نسألها
وسمية وهي تبجي: يا بعد عمري يا نوال.. وينها دكتور بأي غرفة..!
الدكتور: جناح 3 غرفة 24 .. بس لو سمحتي آنسة وسمية بسررعة وما ابي اي ازعاج ع المريضة
وسمية: ان شاء الله.. يلا راشد
.... مشوا لحد جناح 3 غرفة 24 وظلت وسمية واقفة عند الباب ما تعرف شتسوي...
راشد: توكلي على الله وادخلي
وسمية: مو تروح بعيد انطرني عند الباب
راشد: ان شاء الله
( دخلت وسمية واول ما شافت نوال حست نفسها متضاايقة .. ندمت انها قصرت بحق رفيجة عمرها وروحها .. ضميرها أنبها وقالها ليش ما سألتي عنها كل هالايام ليش .. راحت وقعدت عندها ع السرير وظلت تتأمل بوجهها .. الحزن مالي وجه نوال مع انهم يومين بس مبين عليها الحزن والتعب.. قامت تحوس نوال وفتحت عينها وكالعادة بس شافت النور غمضت عينها .. بس لما حست ان في احد عندها حاولت تفتح عينها مرة ثانية ما صدقت ان في احد سأل عنها ما صدقت حست انها بحلم .. فتحت عينها شوي شوي شافت وسمية تطالعها وعيونها مليانه دمووع .. بس عكس كل توقعات وسمية ان نوال راح تقعد وتشوفها وتنهار بالعكس اول ما شافتها نوال ابتسمت ابتسامة عريضة ابتسامة حزن ولا ابتسامة أمل .. وشوي شوي قامت وقعدت على حيلها وانهارت نوال على حضن وسمية تطلع كل اللي كتمته اليومين اللي طافوا تطلع حرتها وبهاليومين كانت تبجي بس بكااء صاامت .. شافت وسمية وقاامت تبجي بصوت عالي كأنها بحلم ان وسمية عندها )

نوال وهي لما الحينها تبجي في حضن وسمية: وينج يا وسمية وين كنتي ..!
وسمية: والله يا حياتي اتصل عليج ما تردين والله ما ادري ما ادري
نوال: شفتي شصار فيني هذي جدتي توفت منو بقالي منوو
وسمية: يا حبيبتي لا تقولين جذي .. عندج اختج وسمية ما راح تتخلى عنج
نوال: تعبت يا وسمية تعبت
وسمية: لا تخافين انا عندج ما راح اهدج

.. يا صديقي .. ما دريت ان الهموم
ثقّلت حمل الرفيـق و صـاح بـك
يا صديقي .. عطني اليمنى بـقوم
واعضد بكتفك .. بقايا صاحبـك!!..

... بره الغرفة ..
( كان راشد واقف عند الباب وقلبه يتقطع لما سمع صوت نوال تبجي وحس نفسه متضايق ولا شعوري دخل للغرفة وظل واقف ويطالع بنوال وهو متضايق .. وسمية انصدمت ما توقعته يتجرأ ويدخل ظل واقف ثواني بعدها طلع بره المستشفى حاس نفسه يبي يشم هوا وبعدها راح ركب السيارة ينطر وسمية وهو يتذكر صوت نوال وهي تبجي وشكلها كان صج يقطع القلب )

... امسح الدمعة ترى ضعفك قوي
أنهزم قدام ضعفك يا غلاي
امسح الدمعة بعمري لو تبي
عطني احزانك وخذ مني هناي
امسح الدمعة قبل تقضي علي
دمعتك تغرق صباحي في مساي ...

( يومين قضتهم نوال بالمستشفى وطول هاليومين وسمية ما تركتها ولا دقيقة من تصبح لين تمسي وهي عندها .. )

 

[Absent Hope]

اليوم: السبت
التاريخ:30-6-2007م
الساعة: 2ونص ظهرا

في المستشفى...

وسمية: اي عاد خلاص مانبي دلع .. كافي تدلعتي كم يوم الحين خلاص
نوال ابتسمت بدون ما ترد:....
وسمية: نوالي
نوال: هلا
وسمية: هلا فيج يا قلبي .. بس بغيت اسألج تبيني اوديج بيتكم ولا في احد راح ياخذج..!
نوال: والله ما ادري
وسمية: يعني اوصلج
نوال: ننطر نص ساعة زايدة واذا ما شفنا احد نمشي
وسمية: اوكي من عيوني
نوال: وسمية
وسمية: هلاا حبيبتي
نوال: والله بدونج ما أدري شلون راح اعيش وشنو راح اسوي
وسمية ابتسمت: يعني بدوني بتضيعين
نوال: اكييد .. أنا بدونج منو أكون..! ولا شي اكيد ولا شي
وسمية حضنت نوال: يا حبيبتي .. وانا بعد ما ادري بدونج شلون كانت حياتي

في بيت ام يوسف...

( ريم بغرفة عالية )

ريم: علوووويه
عالية: بسم الله انتي متى ييتي
ريم: اوووووه منذ مبطي
عالية: صج عااد
ريم: لا اضحك توني واصلة
عالية: غريبة شعندج ياية الظهر
ريم: يعني اطلع اوكي مع السلامة
عالية: يا الهبلة بلااج كلها رمسة رمسناها لا تتدلعين
ريم: ياا عيني من زمان مو سامعة الرمسة الاماراتية منج
عالية: بعد شنسوي كبرناا
ريم: لا والله حلفي.. انتي لو تكبرين على كل شي الا على سوالفج هذي
عالية: واااي من ييتي حسيت نفسي نعسانة
ريم: ليش شايفة مكتوب على ويهي للنوم فقط
عالية: هيهيهي بااايخة
ريم: اقولج شعندج قاعدة بدارج .. ليش مو قاعدة تحت مع العايلة الكريمة
عالية: مالي خلق غصب .. كيفي
ريم: بسم الله شفيج سين سؤال بس ما كفرنا ... الا بقولج مفاجأة.!
عالية: شنوو .. اكيد بايخة مثل ويهج
ريم: قصدج بايخة مثل ويهج انتي
عالية: المهم شنو هي
ريم: الليلة حطيلي فراش يمج
عالية: ليش..!
ريم: واااي عاد غبية عاليوو .. بنام عندج ما تشوفين قشي معاي
عالية: صج والله
ريم: صج عيل كل هالقش حق شنو
عالية: وناااسة من زمان مو نايمة عندنا .. من أول ما عطلنا كله احنا اللي ننام عندج
ريم: من أول ما عطلنا اللي يقول دهر كلها اسبوعين تقريبا
عالية: يعني اسبوعين شوية
ريم: عااد عاليو بتفتح تحقيق يا كرهج .. اقولج وين ريلي
عالية: مااالت حتى مااالت .. توها ما ملجت وتقول ريلي ومو مصدقة
ريم: خلصيني وينه ..!
عالية: صج ما تستحي وبايعة الحيا ... اشوف لج عين تسأليني عن اخوي
ريم: عاادي نو بروبليم
عالية: اووف طالع
ريم: وين..!
عالية: شكوو انتي تحقيق اهو
ريم: ريلي وبعرف وين يروح ووين يرد
عالية: قلبي ويهج قلبيه احسن لا اقلبه لج آنا
ريم: اوكي.. وين توأمج المليغ مثلج
عالية: جب مالج دخل بتوأم روحي
ريم: يا معوده التوأم المختلف
عالية: مالج دخل فينا احنا حابين نفسنا
ريم: هههههههه شلون صارت حابين نفسكم
عالية: واااي وينها نورو عشان تفكني منج
ريم: اوريج يا البطه
عالية: حسرة علي جسمي جسم غزاال مو نفس بعض الناس
ريم: وشفيهم بعض الناس حبيبتي بعض الناس الناس كلهم ميتين عليهم
عالية: ومنو كلمج انتي ومنو قال عنج
ريم: احساسي قالي
عالية: الله والاحساس
ريم: اقوول خلج ماسكة هالكمبيوتر بطقلي فره بالبيت وراده
عالية: يا ليتج ما تردين بعد لو سمحتي
ريم: عنااد برد

في بيت ريم...

محمد: اي يما كلام ابوي صح .. ليش خليتيها تروح
ام محمد: حراام عليكم خلوا البنت تستانس من تزوجت اختها وهي قاعدة بالبيت مقابلين بعض انا وياها .. انا اللي قتلها تروح تستانس شوي
ابو محمد: بس يا ام محمد .. تقعدين بروحج ومنوو يقعد عندج.!
ام محمد: ما عليكم مني انتوا روحوا قضوا اشغالكم .. وانا عندي منى اروح واقعد معاها او اخليها تييني
محمد: يعني ما يضيق خلقج
ام محمد: ما يضيق شضيقه الحمدلله قاعدة ومستانسة وما علي شر
ابو محمد: ومتى بيردون بناتج الباجي من أول العطلة وهم بره البيت
ام محمد: رشا مو راضية ترجع مستانسة عند منى وام يوسف تقول روان هادية ومونسة بسمة وفاكتنا من حنتها وتقول محجوزة عندي طول العطلة
ابو محمد: بس ما يصير يا ام محمد
ام محمد: لا تخاف بيردون .. بس تمر فترة راح يملون من بعض وكل واحد يبي يرد بيته

 

[Absent Hope]

في بيت منى...

منى: بس انت تدري ان هذا مو ذنبي
فايز: ولا ذنبي انا
منى: فاايز شفيك هذي ارادة ربنا
فايز: ونعم بالله ما قلنا شي .. بس كيفج تنفذيلي طلبي ولا كيفج
منى: شنو كيفج .. السالفة بيدي آنا
فايز: كااهو اخوي العود عنده 5 عيال ما شاء الله مو 1 لاا 5 والثاني عنده 2 واللي اصغر مني عنده 2 وهذا غير عيال خواتي بس آنا
منى: فايز انت تعترض على المكتوب
فايز: آنا ما اعترضت بس اذكرج لأني صبرت عنج واايد بالأولى خيبتي ظني .. قلت يلا يمكن الثانية اوكي بالثانية نفس الشي والحين مرت سنتين تقريبا وانتي مو حاامل
منى تنهدت: اقولك مو مني
فايز: مو منج .. اي مصدقج
منى: استغفر الله
فايز: مو عاجبج
منى: فاايز انت شفيك.. ولا عمرك اخذت هالموضوع بهالحساسية .. شفيك منو اللي وازك.!
فايز: لا تقطين نغزات محد وازني .. وانا ريال واعرف مصلحة نفسي وياي اقولج السالفة بنفسي واحذرج اوكي.. انا طاالع

في المستشفى...

وسمية: نوال .. مر فوق النص ساعة امشي انا اوصلج
نوال: يلاا
وسمية: انا بنادي السايق يطلع اغراضج على ما تلبسين اوكي
نوال: اوكي
....: السلام عليكم
وسمية ونوال: وعليكم السلام
نوال: جدي
ابو جراح: شلونج نواال
نوال: هلا جدي .. وينك من زمان مو شايفتك..!
ابو جراح: والله كنت مشغول بكم شغلة وما فضيت .. عظم الله أجرج
نوال: أجرنا واجرك
ابو جراح: اقعدي شوي ابيج بسالفة
وسمية: عن اذنكم انا طالعة.. نوال انطرج بره اوكي
نوال: اوكي
ابو جراح:....
نوال: خير جدي
... ابو جراح تنهد وطلّع بطاقتين من جيبه وعطاهم لنوال...
نوال: شنو هذا.!
ابو جراح: انتي شنو تشوفين..!
نوال: بطاقتي المدنية وهذي بطاقتك
ابو جراح: اي
نوال باستغراب: شنو اي..!
ابو جراح: اقريهم
نوال ابتسمت وعلى وجها علامة تعجب: شنو اقرا فيهم
ابو جراح: كل شي الاسامي مثلا
نوال وابتسامة باهتة على وجها: شنو هذي نوال فيصل مطر عيسى .. وهذي مطر مبارك حسن الـ...
... سكتت نوال كأنها استوعبت ورجعت تدقق بالبطاقتين وهي مو مصدقة وتعيد الكلام...
نوال: نوال فيصل مطر عيسى .. مطر مبارك حسن ... نوال فيصل مطر عيسى .. مطر مبارك حسن
... رفعت راسها وقامت تطالع جدها باستغراب وراسها بينفجر 100 فكرة تمر براسها ...
نوال بصوت متقطع: جدي ..شـ..شلون.. جذي..!
ابو جراح بصوت واطي: شنو اللي شلون..!
نوال: جدي انا ادري ان اسمك مطر بس أول مرة ادري ان .. ان.. اسمك مطر مباارك حسن
ابو جراح تنهد: وهذا اللي كنا انا وجدتج خاشينه عنج
نوال باستغراب اكثر: جدي شلون انت مطر مبارك حسن وانا ابوي فيصل مطر عيسى .. شلون .. منو جدي منو مطر عيسى ولا مطر مبارك..!
ابو جراح: مطر عيسى
نوال فتحت عيونها: شلوووون...!
ابو جراح: هدي اعصابج وراح تفهمين كل شي
نوال: شلون راح افهم وانا احس ميه فكرة تدور براسي.. يعني .. يعني .. جدتي مو جدتي بعد
ابو جراح: لا جدتج هي جدتج ام ابوج
نوال: وأنت..!
ابو جراح: انا مو أبو ابوج انا زوج جدتج وابو جراح مو ابو ابوج
نوال: يعني شلون..!
ابو جراح: اسمعي السالفة.. جدتج كانت متزوجة من جدج اللي هو مطر عيسى وجابت منه فيصل اللي هو ابوج وبعد ولادتها توفى الله يرحمه.. وبعد العدة انا تزوجتها مطر مبارك وعديت فيصل مثل ولدي وجابت جدتج جراح وبس هذي السالفة
نوال: شلووون .. يعني انت مو جدي..!
ابو جراح: انا جدج بس مو الحقيقي
نوال ولما الحينها مستغربة: انزين ليش ينادون جدتي الله يرحمها ام جراح .. ليش ما ينادونها ام فيصل مو هو ولدها الكبير..!
ابو جراح: يا نوال .. ابوج متوفي من زمان وانا من زمان ينادوني ابو جراح فصاروا ينادونها هي ام جراح
نوال: وليش خشيتوا السالفة علي لييش..!
ابو جراح: ما ادري .. يمكن لأن نبيج تعتبريني مثل جدج وجدتج الله يرحمها مثل جدتج وما تحسين انج عند واحد غريب
نوال ضحكت ضحكة استهزاء: وليش قلتلي ع السالفة .. ليش ما كملتوا السالفة وظليتوا خاشينها عني لما اموت..!
ابو جراح: لان بعد جدتج مالج مكان تقعدين فيه وما يصير تقعدين عندي انا مو ولي امرج ولا مسؤول عنج .. بعدين انتي تدرين بيتنا اجاار وخلاص انا ماني ساكن فيه
نوال: شلون يعني انا وين راح اروح وانت بعد وين راح تروح..!
ابو جراح: انتي راح تعيشين عند عمج جراح لأن هو المسؤول عنج الحين وهو ولي أمرج وكل اوراقج عنده خصوصا انج قاصر لما الحين وما عديتي سن الرشد .. وانا بروح المكان اللي ارتاح فيه واريح غيري مني دار المسنين
نوال: ليييييش..! مابي اروح عند عمي جراح ما اعرفه .. انت تعال معااي..!
ابو جراح: انا ما اقدر وعمج جراح ما يقدر يستقبلني وخلااص انا ما عاد لي شي عشان اظل
نوال دمعت عينها: جدي انت شتقووول .. انا مستحيل اعيش بمكان ما اعرف احد فيه
ابو جراح: مع الزمن بتعرفينهم.. وبعدين انتي توج صغيرة وين بتعيشين بتروحين دار الأيتام وتضيعين عمرج وانتي عندج ولي
نوال: شلون جدي شلوون...!
ابو جراح تنهد: هذا اللي صار يا بنتي .. حكم القوي على الضعيف
نوال: وليش عمي جراح ما يقعدك عنده مو انت ابوه..!
ابو جراح: هذي المشكلة هو ما يعتبرني ابوه ولا من زمان انا رايح عنده
نوال وهي تبجي: جدتي راحت عني قبل كم يوم... والحين انت يا جدي بتروح عني .. خلاص صرت يتيمة الام والابو والجد والجدة .. ما عاد لي أحد
ابو جراح وهو يوقف: لج الله يا نوال لج الله.. الله ما ينسى عباده وما ينسى اي مخلوق
نوال: وين راايح..!
ابو جراح: خلاص بروح المكان اللي المفروض من زمان فيه.. انا كبرت يا بنتي وما عاد فيني حيل .. ومعاشي ما يكفيني لأجار واني اعيش
نوال: انزين شلون قبل كنا عايشين الحين نعيش نفس قبل ..!
ابو جراح هز راسه: قبل كنا عايشين على معاشي ومعاش ابوج الله يرحمه اللي كان ينزل لج عند جدتج الحين المعاش تحول عند عمج لانه المسؤول عنج
نوال: جدي الله يخليك لا تروح الله يخليك
ابو جراح وهو ماسك نفسه: خلاص يا نوال .. عيشي الواقع انا ماني جدج.. مع السلامة
نوال ركضت ومسكت ايد ابو جراح: الله يخليك انت جدي وتاج راسي غصب ع الكل غصب ع اللي يرضى واللي ما يرضى بس لا تروح
ابو جراح ترك ايدها: خلاص يا نوال انا مو جدج افهمي الكلمة مو جدج
( طلع ابو جراح وترك نوال جريحة .. جريحة القلب والمشاعر حست نفسها تاهت زيادة .. بعد ما جربت الضياع بالكم يوم اللي مروا الحين حست نفسها بدون ولي بدون عايله .. احساسها يقولها ما راح ترتاحين في بيت عمج .. شلون بترتاح وهي ما شافتهم ولا مرة ولا تعرفهم شلون ..)

 

[Absent Hope]

في البحر...

يوسف: ليش .. ليش.. هو صار منا وفينا
عمر: ما ادري في شي يمنعني اني اكلمه بهالمواضيع احس انها خاصة تخصني وتخصك وبس
يوسف: خلاص اسكت.. هذا هو قريب .. وتراك كسرت بخاطره اعتذر منه
عمر: ان شاء الله
راشد: تفضل العصير
يوسف: داام فضلك يا راشد
عمر: احم.. رااشد
راشد: هلاا
عمر: اسف يا خوك والله ما كان قصدي
راشد ابتسم: ما عليه يا عمر.. معاك حق المفروض ما اتدخل بينكم وبأموركم الشخصية
عمر: لا تتضايق يا راشد والله ما ادري شلون قلتها صج لا تزعل
راشد: صدقني مو زعلان .. ومو معقولة صداقة سنين واجي انا بأقل من شهر اتدخل بينكم
عمر: يعني مو زعلان...!
راشد: صدقني مو زعلان يا الغالي
عمر: الحمدلله.. والله متى ما احس الوقت مناسب راح اقولك كل اللي بقلبي .. بس آنا هذا طبعي ما اخر الكلام بسرعه
راشد: هههههه عادي.. عكس يوسف يخر الاكو والماكو
يوسف يخزه بطرف عينه: لا والله هذا انا هااا .. انزين يا رشود اوريك
راشد: هههههههه والله اضحك معاااك.. بالعكس هذا شي جميل انك تخر الاكو والماكو شي جميل
عمر: ههههههه عااد يوسف لو واحد ماشي بالشارع يسأله انت متزوج .. يخرله السالفة كلها وانه يحب بنت خالته ويبي يتزوجها
راشد: هذا اذا ما قاله اسمها وعنوان بيتهم هههههههههه
عمر: ورقم تلفونها ههههههههههههه
راشد: ههههههههه والله انك صاج يا عميير
يوسف: حلفوا انت معاه .. اوريكم يعني صرتوا علي هااا .. انزين نشوف نشوف يا رشوود ويا عمووور .. من اليوم ورايح ما راح اقولكم اي سالفة انزين
عمر: مو مصدقك بعد شوي تيي وتقول صار كيت وكيت هههههه
يوسف يهز راسه: على قولة اختي مااالت حتى مااالت عليكم وعلي اللي اسولف معاكم
راشد وعمر: ههههههههههههه

في بيت وسمية...

عواطف: لو فيج خير يبتي الولد حق ولد عمي
سلوى: انتي مالج دخل هو راضي انتي شكو تتدخلين..!
عواطف: لا حبيبتي مو راضي هو يمثل انه راضي
أحمد: عوااطف لا تصارخين على سلوى .. ترى والله اعلم فهد عليج
عواطف: هيهيهي حتى انت يا النتفة ياي تدافع وخر عن ويهي
أحمد: اوريج انتي وحدة ما تستحين
سلوى: الصغير عرف قيمتج وقدرج .. احسن لج اعرفي قيمتج وقدرج بنفسج ولا تحرجين نفسج اكثر.. تعال حمادة
عواطف: اوريكم هين ان ما قلبت البيت على راسكم ما اكون انا عواطف بنت وائل هين
... راحت عواطف مكتب ابو فهد ودخلت بدون ما تطق الباب طبعا ...
عواطف: هاااي
ابو فهد: هلاا ..تفضلي اقعدي
عواطف: اكيد بقعد يعني بظل واقفة
ابو فهد: خيير شكلج متضايقة
عواطف: وشلوون ما اتضايق وسلوو مرت ولدك موجودة بالبيت
ابو فهد: عيب يبا عواطف هذي بنت عمج وبحسبة اختج
عواطف: يع تخسي هذي اختي .. وبعدين انا ما عندي خوات لسانهم طويل
ابو فهد: افاا ليش شقالت
عواطف: مشيشة ولدك علي وقاعدين يقولون انتي قليلة ادب وما تستحين
ابو فهد: افااا فهييد يقول هالكلام
عواطف: لا يا عمي مو فهد أحمد
ابو فهد: أحمد أحمد
عواطف: اي احمد النتفة شفت شلون محرشينه علي
ابو فهد يهز راسه: لا حول ولا قوة الا بالله
عواطف: شوف يا عمي يا توقفهم عند حدهم ولا اشيل قشي واطلع بره البيت .. وانت تعرف اذا انا طلعت شنو راح يصير
ابو فهد: لا حشاا هم اللي يطلعون وانتي تظلين .. لا يبااا ما تطلعين وتقعدين معززة مكرمة على راسنا
عواطف: اي عمي هذا الكلام العدل.. واذا شفتهم شوي علمهم شغلهم
ابو فهد: ان شاء الله... الا صج وين وسمية..!
عواطف: هيهي وسمية تفر بالشوارع هايتة من يومين تروح عند رفيجتها ما ادري وين
ابو فهد: رفيجتها منو..!
عواطف: تقول اسمها نوال.. الله يستر شنو في بينهم وشنو يسوون..!
ابو فهد: اذا جت وسمية خليها تجي عندي
عواطف: ان شاء الله .. تبيني اناديلك سلوى واحمد..!
ابو فهد: لا مو الحين اذا طلعت من مكتبي اكلمهم
عواطف: ان شاء الله .. عن اذنك

في بيت هدى...

ابو هدى: خلاص شراايج اوديج عند بنات عمي..!
هدى: لا يبا ماصخين .. خلاص بظل بالبيت احسن
ام هدى: انتي بس تتحلطمين اللي يقول اول مرة تمر عليها عطله
هدى: لا يما بس هالعطلة ملل ما ادري ليش
ام هدى: لا تتحججين وتحطين حق نفسج اعذار.. انتي ما يعجبج شي
هدى: عن اذنكم رايحة غرفتي
ابو هدى: ليش تقوليلها جذي.. تضايقت الحين
ام هدى: خلها شوي تتأدب مو على طول تتشكى وتتحلطم ومو عاجبها شي
ابو هدى: كيفج بنتج وانتي ادرى بتربيتها

 

[Absent Hope]

الساعة: 5 المغرب..

في بيت نوال...

وسمية: الحين باقي شي بعد ولا خلصتي
نوال: على ما أظن خلصت
وسمية: منو راح ياخذج..!
نوال: ما ادري ما ادري عن شي لا تسألين
وسمية: نوااال.. لا تتضايقين يمكن حياتج هناك تكون احسن من الحياة اللي كنتي عايشتها ... يمكن ترتاحين وتفرحين انتي ما تعلمين الغيب
نوال: صح .. صح كلامج .. واضح راح ارتااح .. اذا عمي مو راضي يخلي جدي عنده .. شنو تفسرين هالشغله انه حنون وطيب وراعي واجب واصول ولا شنو
وسمية: اذا مو عمج .. يمكن عياله ..او زوجته..!
نوال: انا ما ادري متزوج مو متزوج كم عدد عياله .. وبعدين اكيد طالعين على ابوهم
وسمية: مو شرط
نوال تتنهد وتطالع البيت: ما ادري شلون بعد هالسنين بترك هالبيت ما ادري شلون
وسمية: توكلي على الله وهو يصبرج سبحانه
نوال: ونعم بالله .. تعبتج معااي
وسمية: تعبج رااحة .. ما سويت شي انتي مثل اختي واكثر
نوال: يا ليتني اختج وافتك من هالعبالة اللي انا فيها
وسمية ابتسمت: وليش ما تعيشين عندي
نوال: السالفة لعبة عندج .. بأي حق اسكن عندج.. وشنو انا عشان اسكن عندج..!
وسمية: اولا صديقتي واختي .. وثانيا ليش ما نخليها رسمي
نوال: وسمية شفيج خرفتي .. شلون يعني رسمي..!
وسمية بصوت واطي: تتزوجين اخوي ويصير رسمي
نوال سكتت وبعد لحظات: من صجج..!
وسمية: اي ليش لأ.. وبعدين اخوي شااريج ويحبج .. وتعالي ارتاحي عند ناس غرب وتعرفينهم احسن ما تروحين عند ناس قرب وما تعرفينهم
نوال: انتي صاحية
وسمية: والله نوال .. رااشد مسكين من أول مرة شافج قبل شهرين او 3 شهور وقالي افاتحج بالموضوع وانا رفضت .. بس لما شفت انه متمسك فيج اقتنعت والحين بعد ما شفت ظروفج قلت يمكن هذا الشي يساعدج
نوال: انتي شتقولين.. يساعدني بشنوو..! نسيتي سوالف اخوج لما تقوليلي عنه .. نسيتي سالفته مع هدى نسـ...
وسمية تقاطعها: نوااال لا تدخلين موضوع بموضوع السوالف اللي تتكلمين عنهم ماضي وانتهى بالنسبة لراشد وطيش شباب وهالمرحلة الكل يمر فيها .. ما في احد ما مر فيها.. بس الحمدلله انا ما اقولج اخوي مثالي بس الحين تسنع وتغير صدقيني يا نوال تغير علشان منو ولا عشان شنوو.. عشانج انتي .. اي عشانج انتي وبس
نوال: عن شنو تتكلمين .. وليش يتغير علشاني .. انا شكوو وانا شنوو..!
وسمية: والله يا نوال انج غيرتي حياته وخليتيه يفكر بحياته وبمستقبله ويتسنع .. صدقيني راشد يحبج يحبج ولا تبيعين انسان حبج وعزج
نوال سكتت بعدها تنهدت: والله ما ادري شقولج يا وسمية بس ما اظن الظرف مناسب ان احنا نتكلم عن هالموضوع
وسمية: نوااال .. لا تبيعينه برخيص .. بالعكس الحين الظرف انسب شي .. انتي بس قولي اي عشان بعد فترة نخطبج من عمج وترتاحين منه
نوال هزت راسها: ما اقدر ما اقدر بهالسهولة اني اوافق وانا كنت عارفة ماضي اخوج مستحيل
وسمية: نواال لا تخلين هالشي يأثر عليج كل شخص له مااضي
نوال: افكر وسمية افكر .. بس مو الحين بعدين الحين مالي خلق على شي
وسمية: توعديني
نوال: اوعدج

في بيت ام يوسف...

بدر: اي والله من زماان
ريم: بس لا تستانس مو ياية عشانك
بدر: ادري ادري عشاان يويسف
ريم: وييييييييعة .. عشان علوي ونووروو
بدر: ويوسف بعد
ريم: جب ملييغ
بدر: يوسف شوي ياي لا تحاتين .. ما يقدر يسمع انج موجودة وما ييي
ريم: جب .. عاليوو سكتي اخووج
عالية: ليش بالعكس هو يقول درر
ريم: جب انتي الثانية
نورة: اي والله كلامه حلو ... انه يوصل مشاعر الحب بين طرفي الحب السالب والموجب
ريم: حمدلله والشكر صايرتلنا فيلسوفه على آخر عمرها
عالية: كااهوو يووسف وصل
بدر: اي عفيه عدلي ملفعج تبين ديرم
ريم: شخبااااري ديرم الحين الناس يحطون حمرة .. غلووس
بدر: غلووس.. ييبيلها غلووس يا نورة
نورة: ما عندي انا ما اتعامل مع هالسوالف
يوسف: السلام عليكم
الكل : وعليكم السلام
يوسف: اووه وانا اقول ليش البيت منور
بدر: اي تسلم النور نورك يا خووي
يوسف: شلونج ريووم..!
ريم: الحمدلله بخير .. انت شلونك..!
يوسف: الحمدلله بخير
عالية: اووه خطيرة صايرة تسأل عن اللون بعد
ريم: جب انتي
يوسف: اي والله شيخة الحريم قالت جب يعني جب
نورة: منو شيخة الحريم..!
ريم: آناا في غيري
عالية: ماااالت حتى ماااااالت .. اذا هذي شيخة الحريم .. انا بتخلى عن جنسي وانضم للجنس الخشن
ريم: من الحرة

 

[Absent Hope]

الساعة: 9ونص مساء

في بيت وسمية...

( في غرفة وسمية )

وسمية: آآآه الله يعينها هالبنت .. عسى الله يريحها
راشد: انزين وبعدين منو اللي أخذها
وسمية: ظلينا ننطر من المغرب لما الساعة 9 ومحد جأ عشان ياخذها .. نطرنا نطرنا لما ملينا .. والمشكلة ما عندها رقم احد من اهلها
راشد: اي وبعدين هي لما الحينها بالبيت
وسمية: لاا آخر شي السايق طقلها هرن ولما اسألت قال انه سايق عمها واخذها .. والحين ما يندرى شنو مصيرها
راشد: وشلون راح تعرفين أخبارها..!
وسمية: وصيتها .. قتلها اذا حصلت لها فرصة تتصل علي على طول
راشد: اي زين سويتي

في بيت جراح...

( نوال توها وصلت البيت .. نزلت اغراضها بروحها وظلت واقفة جدام البيت الكبير .. كانت تعرف ان عمها غني بس ما تصورت بيته بهالفخامة .. دخلت البيت وهي حاسه بخوف وقلق ورعب وأمل يعني مشاعر متضاربة مو عارفة شنو بس أكثر شي الخوف .. أول ما دخلت لقت ممر وسيع.. مشت فيه وهي مو عارفة وين تروح يمين ولا يسار.. شافت بعدها صالتين كباار حيل ... ما عرفت شتقول .. او تنادي منوو.. دورت المطبخ لما لقته دخلت كانوا الخدامات ماليين المطبخ.. وحده منهم قربت صوبها وهي مستغربة منها ..)

نوال: السلام عليكم
الخدامة: وعليكم السلام
نوال: وين ماما موجود..!
الخدامة: انتي منو..!
نوال: انا اسمي نوال
الخدامة: ايوه انا اسمي ماري
نوال: هلا ماري بس .. ماما موجود او بابا موجود
ماري: انتي نوال .. بابا يقول بس يجي وحده اسمها نوال وديها غرفة ..!
نوال: ليش مافي احد بالبيت
ماري: ما يعرف آنا
نوال: اوكي .. يلا وديني الغرفة
ماري: تعالي
نوال: بس الله يخليج مافي احد يشيل الاغراض معاي
ماري: بابا ما يرضى يقول انتي بروح يشيل
نوال: ان شاء الله.. امري لله .. يلا وديني الغرفة

( صعدوا الدرج بس ما راحوا الدور اللي فوق لا راحوا الدور الثالث )

نوال: ماري .. وين غرفهم هني هم
ماري: لا هذا غرفة احنا
نوال منصدمة: غرفتكم..!
ماري: لاا بس انتي ينام بالغرفة الثانية مو غرفة احنا
نوال مو مستوعبة: انزين ليش هني يعني..!
ماري: بابا يقول

( كان بالدور الثالث ممر كله غرف < حق كل خدامة غرفة > بس يعني صغار .. وآخر الممر طلعت ماري المفتاح وفتحت الباب اللي بآخر الممر ودخلت نوال الغرفة .. لما شافتها سكتت وما علقت .. كانت غرفة صغيرة فيها فراش ع الأرض بالزاوية وكبت صغير للملابس وبس .. وقفت نوال تتأمل الغرفة اللي ما تتسمى غرفة .. بعدين تذكرت شي )

نوال: ماري .. الغرفة مافي حمام داخلها..!
ماري: لا في حمام بره انتي يقدر يدخل
نوال تنهدت: مشكووورة خلاص اذا تبين تروحين روحي
ماري: حاضر

( طلعت ماري وسكرت الباب وراها وظلت نوال تتأمل الغرفة مرة ثانية بتعجب.. هي لما كانت في بيت جدها كانوا فقرا بس الغرفة كان شكلها احلى من جذي .. بس حمدت ربها على شغلة وحدة ان الغرفة فيها دريشة على الشارع على الاقل تحس انها بغرفه شوي ويدخل فيها هوا مو جحر ..)

في بيت ام يوسف...

عالية: اوووف ما بغيتي تصكين التلفون ما صارت طيرتي رصيد بيتنا
ريم: ياا معوده اسكتي بس
عالية: شفيج لا يكون ياية بس تتصلين وتروحين بيتكم
ريم: عاليووو ترا مالي خلق
نورة: شفيج.. كنتي تكلمين منو..!
ريم: رفيجتي
عالية: اي وحده فيهم هدى ولا وسمية ولا نوال
ريم: نوا.. اقصد وسمية
عالية: وشفيج متضايقة..!
ريم: نوال جدتها متوفية ومن 4 أيام وهي نايمة بالمستشفى وانا ما استحي ما اتصلت ولا تطمنت عليها
عالية: ياا حراام .. هي مالها الا جدتها .. والحين شلونها..!
ريم: هذا اللي مكدرني .. طلعت من المستشفى.. وراحت بيت عمها تعيش عنده مع انه ما تعرف عمها ولا مرة شافته
نورة: حرام.. وليش ما تروح عند امها
ريم: امها بالامارات هم ما تعرفها
نورة: مسكينة
عالية: وجدها ليش ما تقعد عنده
ريم: ما ادري تقول وسمية قصة طويلة .. جدها مو جدها ما ادري شالسالفة
عالية: الله يعينها

 

[Absent Hope]

في بيت هدى...

ام هدى: شعندج .. غريبة اول مرة احد يتصل فيج هالحزة
هدى: هذي وسمية.. حراام تقولي عن نوال ان جدتها متوفية وراحت تعيش عند عمها
ام هدى: وشفيها .. اكيد بتعيش عند عمها هو أولى فيها
هدى: بس يما ولا مرة شافته بحياتها وما تعرف عايلته ولا شكله ولا شي
ام هدى: وشلون جذي بتعيش عندهم
هدى: والله ما ادري يماا

في بيت وسمية...

وسمية: هو شنو قالك..!
أحمد: قالي روح نادلي وسمية بسرررررعه
وسمية: قوله ان شاء الله الحين جاية
أحمد: انزين
... بعد 5 دقايق راحت وسمية مكتب ابوها وهي مالها خلق على شي ...
وسمية: السلام عليكم
ابو فهد: وعليكم السلام.. تعالي اقعدي
وسمية: هلا يبا بغيتني
ابو فهد: شعندج من كم يوم تطلعين وما تقعدين بالبيت
وسمية: كنت اروح عند رفيجتي
ابو فهد: لو وين ما كنتي تروحين .. مافي ابوو تستأذنين منه وتقولين انج بتطلعين
وسمية: بس يباا انت..
ابو فهد يقاطعها: لا بس ولا شي .. بنت شكبرج لما هالحزة برة البيت .. احنا وين قاعدين
وسمية: يبا انت مرة قلت...
ابو فهد يقاطعها: قوليلي شتسوين عند رفيجتج لما هالحزة..!
وسمية بنفاذ صبر: يبااا .. انت مرة قتلي اذا كنتي بتروحين مكان مهم روحي بدون ما تستأذين .. وأنا ما طاوعني قلبي .. فهد يدري اني طالعة وراشد يدري .. يعني انا قايلة لهم
ابو فهد: الحين تقولين قلت لفهد وراشد.. وكأنه ابوج ميت ولا تستأذنين
وسمية: بسم الله عليك يباا .. بس والله مو عشان جذي أنا عشان..
ابو فهد يقاطعها: شنو كنتي تسوين عند رفيجتج..!
وسمية: رفيجتي جدتها متوفية من فترة وهي طايحة بالمستشفى مريضة وكنت اروح عندها لما اليوم قامت بالسلامة وراحت بيت عمها
ابو فهد: ما عندها اهل عشان تجابلينها 24 ساعة بالمستشفى
وسمية: لا يباا ما عندها اهل .. يتيمة مقطوعة من شجرة
ابو فهد سكت شوي وبعد لحظات: يلا روحي غرفتج ولا تعيدينها مرة ثانية
وسمية بقلبها: ادري عواطفوو هي اللي محرشتك بس هين يا عواطف
ابو فهد: يلا وسمية تيسري
وسمية: ان شاء الله .. عن اذنك يباا
.. طلعت وسمية ومرت الصالة ولا عواطف قاعدة ..
عواطف: شنو يبي عمي..!
وسمية: مالج دخل
عواطف: لا حبيبتي لي دخل اعرف كل شي يصير بهالبيت
وسمية: اصلا احنا من غير لا نقولج انتي مدخلة نفسج وتعرفين كل شي بالبيت فما له داعي تسألين
عواطف: وسمية احترمي نفسج.. لا تعرفين شلون اتصرف معااج
وسمية: يويويو يماا خوفتيني بصراحة قمت ارجف.. انا بشوف شلون تتصرفين
عواطف: يعني مو خايفة
وسمية: انا ما أخاف من أشكالج
عواطف تصارخ: عميييييييي عمييييييييييييي
وسمية: لا والله حبيبتي هذا ابوي يعني تستنجدين فيه
عواطف تصارخ بزيادة: عمييييييي عميييييييييييييي
... ابو فهد طلع من المكتب على الصراخ...
ابو فهد: خير
عواطف: شووف عمي يا تربي بنتك عدل ولا انا اللي بربيها
ابو فهد: بسم الله .. ليش شصاير..!
عواطف: قليلة أدب وما تمسك لسانها .. وانا ما اتحمل البنت اللي جذي
وسمية بضحكة استهزاء: والله ما ادري منو اللي قليلة أدب
عواطف: سمعت سمعت يا عمي
ابو فهد: عيب وسمية
وسمية انصدمت: يباا الحين لما قالت عني قليلة ادب ما تكلمت ولما انا قلت عنها على طول تكلمت
عواطف: عمي يا تقعد وسمية بالبيت ساكتة وتحترم نفسها .. ولا والله مالي قعدة في بيتكم .. وشنو اللي يحدني اقعد مع وحدة قليلة ادب ولسانها طوييييل
وسمية: هيهي يعني كلش الحين .. هذي الساعة المباركة .. يوم السعد اللي تطلعين فيه من البيت وتفكينا يكون أحسن
ابو فهد عصب: وسمية عييييب هالكلام اللي تقولينه .. هذي مهما كان بنت عمج ... اذا ما تحترمينها احترميني انا اللي واقف
وسمية: يعني راضي على تصرفاتها واللي تسويه
ابو فهد: اسمعي يا وسمية انتي ما كنتي بيوم من الايام عنيدة ومشكلجية .. بس الحين تغيرتي .. اذا ما رديتي تسنعتي .. تعرفين شغلي معااج ساااامعة
(.. وسمية من الصدمة ما عرفت شتسوي .. راحت ركضت على غرفتها .. وابو فهد توجه لمكتبه وعواطف قعدت وعلى وجها ابتسامة انتصار)

 

[Absent Hope]

في بيت ام يوسف...

في الصالة...

يوسف: امم .. انت هد بالك وما يصير الا الخير.. صدقني صدقني انت متوتر وخايف ع الفاضي .. الحين الكل نايم .. انزين روح البيت انت وانت مرتااح.. تبيني امرك الحين .. تبيني امرك.. خلاص براحتك .. اوكي .. يلا مع السلامة.. وشد حيلك خلك ريال بهالمواقف... اوكي
بدر: شالسالفة..!
يوسف: امووت على لقافتك
بدر: صج يويسف شالسالفة..!
يوسف: بعدين اقولك الحين مو وقته
نورة: ليش مافي احد غريب .. بس انا وبدر قوول
يوسف: عنااد فيج ماني قايل
نورة: شفيه عميير
يوسف طالع نورة بنظرة: لا والله حلفي
نورة: هههههههه اضحك معاااك .. شفيك عصبت على طووول
يوسف: لا حبيبتي بهالسوالف لا تضحكين معاي سامعة
نورة: ان شاء الله

اليوم: الاحد
التاريخ: 1-7-2007م
الساعة: 10ونص صباحا

في بيت جراح...

( نوال قعدت من النوم ونزلت الصالة على طوول .. لأنها بتشوف عيال عمها وتبي تتعرف عليهم .. نزلت لقت البيت هدووء راحت صوب المطبخ وقالولها الخدامات ان عمها جراح بغرفة الطعام .. وراحت بهدوء لغرفة الطعام وقلبها يرقع من الخوف )

نوال: السلام عليكم
.. جراح كان منزل راسه يطالع الجريدة أول ما سمع صوتها رفع راسه على طول ..
جراح: وعليكم السلام.. نعم
نوال بصوت واطي: شلوونك عمي..!
جراح: منو انتي..!
نوال: انا نوال عمي
جراح: عمى بعينج ان شاء الله .. شنو اللي منزلج من دارج
نوال باستغراب: نزلت اسلم عليكم و.. و اشوفكم
جراح: نعم .. وبأي حق تنزلين .. سمعي تصعدين دارج الحين والأكل يوصلج لما دارج مابيج تنزلين سامعه .. حمدي ربج اني مقعدج في بيتي
.. نوال طالعت عمها بذهول وبدون ولا كلمة انسحبت وراحت فوق على طول ..

في بيت ام يوسف...

نورة: يلاا ريموو قومي
ريم: اذا اختج مو قاعدة تبيني انا اقعد
نورة: خلصي
ريم: ذلفي بره وخليني أنام مو فاضيتلج
نورة: اوريج هين
.. بعد ربع ساعة ...
نورة: ريم ريموو ريوومة
ريم: اووووف استغفر الله
نورة: الله يخليج قومي
ريم: ماابي طلعي الحين لا اسوي شي ما يعجبج
نورة: انزين
... بعد 10 دقايق ...
نورة تصرخ: ريموووووووو
ريم: ويعة.. ما تخلين الواحد يرتاح شوي.. توبه ايي بيتكم مرة ثانية تووووبة
نورة: قومي
ريم قعدت وهي تفرك عيونها: انا بفهم انتي شتبين شتبين خلصي يلااا
نورة: مو أنااا
ريم: اوووف اي اليني اكيد
نورة: لاا حبيبتي يوسف اللي يبي
ريم: نعم
نورة: اي تحاسبين ميتة عليج اقعدج من الصبح .. لا هذا يوسف صارله ساعة يحن يقولي قعديها وقعديها .. هيهي حاط أمل بزوجة المستقبل ما يدري ان اكسل منها ما فيه
ريم: جب يلا جب.. لو قايلتلي يوسف من الاول كان قمت
نورة: كنت بسويها مفاجأة صج مو كفوو
ريم: انزين يلا قضبي الباب عشان ابدل وانزل
نورة: اي عااد ما وصيج تكشخي .. مثل لما تروحين عرس الحين تكشخي
ريم: مالج دخل انا كيفي .. يلا آوت بليز
نورة: ان شاء الله
(.. لبست ريم ونزلت تحت .. ما لقت احد بالصالة .. راحت غرفة الطعام لقت يوسف ونورة وام يوسف قاعدين ياكلون ..)

ريم: صبااح الخير
الكل: صبااح النور
ام يوسف: هلا والله برويم تعالي يما تريقي
ريم: حاضر خالتي
ام يوسف: والله من زمان مو ياية نايمة عندنا يحليلج.. خلاص بعد الحين كل يومين نامي عندنا
ريم: لا خالتي ما اقدر
نورة: ليش من كثر أشغالج ما تقدرين..!
ام يوسف: نويرة لا تتدخلين
ريم: لا عادي خالتي.. بس صج انا ما اقدر اخلي امي بالبيت بروحها تدرين ضحى تزوجت ما اقدر مثل قبل اروح واخليها
ام يوسف: اي والله حراام .. الحين قاعدة بالبيت بروحها
ريم: هي حلفت علي اني اروح .. وقالت بتروح عند منى
ام يوسف: يعني تنام عندها..!
ريم: والله ما أظن.. لا يمكن تروح بس تقعد وبعدين ترجع البيت بالليل
نورة: ريمووو
ريم: نعم
نورة: زهقاانة
يوسف: صج ما تستحين على ويهج .. كلنا قاعدين وتقولين زهقانة ليش طوف عندج احنا..!
نورة: والله مو قصدي.. بس من أول ما يت ريم ما سوينا شي حلوو وأكشن خلونا نسوي
ريم: مثل شنوو يعني..!
نورة: يعني اي شي نضحك نستانس نغير جو شوي
ام يوسف: من صباح الله خير بتزعجينا
نورة: مو شرط شي يكون فيه ازعااج
ام يوسف: والله ما ادري عنج.. انا طالعة داري تبون شي
يوسف: لا سلامتج يماا
نورة: اوووف والله زهقاانه
يوسف: لقيتها ... آنا عندي فكرة
نورة بفرحة: يلا قول شنوو.!.
يوسف: شراايج تقلبين ويهج وتروحين
نورة مدت بوزها: اوووف .. وعناااد ماني رايحة
ريم: عالية متى تقوم من النوم ما صارت.. عشان بقعد معاها شوي قبل ما اروح البيت
نورة: خير خير وين رايحة تو الناس .. ما ترجعين الا بالليل او باجر
ريم: والله ما اقدر
يوسف: لا تقدرين .. واذا مافي احد يوديج بيتكم بالليل انا اوديج
ريم استحت:...
نورة: ايووووه الولد عرض خدماته بعد شعليج
ريم: لا مو قصدي مافي احد يوديني .. بس.. بس
نورة: بس شنو لا تتحججين
ريم: والله ما اقدر اخلي امي بروحها .. امس من الظهر انا عندكم
يوسف: الحين هذي صارت حجة.. نورة عطيني التلفون عشان اتصل على خالتي واقولها تخلي ريم تظل
ريم: لا الله يخليك لا تتصل .. اكيد بتقول اي .. والله حرام تظل بروحها
يوسف: خلاص تردين البيت بالليل
ريم: اشووف
يوسف: ماكو اشووف .. مو كيفج
نورة: عااش يوسف عاااش يوسف
ريم ابتسمت وقامت: بروح اقعد عااليووو
نورة: اي ازعجيها مثل ما ازعجتج
ريم: افااا عليج

 

[Absent Hope]

الساعه: 12 ظهرا

في بيت ريم..

ام محمد: اي توها اتصلت
ابو محمد: شقالتلج .. عسى مستانسة..!
ام محمد: اي الحمدلله تقول مستانسة
ابو محمد: وما قرروا متى يرجعون..!
ام محمد: يوم الاربعاء ع العصر
ابو محمد: اي الحمدلله .. شرايج نسوي العزيمة يوم الخميس..!
ام محمد: خووش رااي
ابو محمد: شراايج بالمزرعة ولا الشاليه.!
ام محمد: والله ما ادري كيفك.. بس احسن المزرعه
ابو محمد: خلاص المزرعة المزرعة.. يلا انا طاالع ابو يوسف يبيني بشغل .
ام محمد: الله يحفظك

في بيت وسمية...

وسمية: مابي
سلوى: يلا وسمية انزلي
وسمية: مابي .. مالي خلق ع البيت ولا على مقابل عواطفوو
سلوى: ما عليج منها اعتبري وجودها وعدمه وااحد.. باختصار احقريها
وسمية: ابووي تحت..!
سلوى: لا طااالع
وسمية: والله مالي خلق
سلوى: انزين انا وأحمد قاعدين بروحنا وزهقانين تعالي اقعدي معانا
وسمية: ووين فهد..!
سلوى: ما ادري عنه طااالع
وسمية: خلاص شوي نازله
سلوى: اكيييييد
وسمية: اكيدين

في بيت ام يوسف...

ريم: علووي بقولج شي بس مو تزعلين..!
عاليه: قوولي ما راح ازعل
ريم: بسألج سؤال .. وابيج تجاوبيني بصرااحة
عاليه: يلاا قولي
ريم: امم .. والله ما ادري شلون اقولج .. بس يعني انتي تحبين..!
عاليه: ريموو شنو هالسؤال الغبي
ريم: من صجي اتكلم
عاليه: ريم انتي تعرفيني من زمان مو أول مرة تعرفيني .. وتدرين اني ما اهتم لهالسوالف والخرابيط
ريم: ابيج تكونين صريحة بردج
عالية: شفيج والله اني صريحة
ريم: اووكي
عالية: ليش ... شاكة بشي يعني انتي..!
ريم سكتت وبعد لحظات: منو عبد العزيز..!
.. عالية انصدمت وظلت ساكتة بعدها حطت عينها بعين ريم وهي مستغربة شلون ريم عرفت..
عالية: انتي شدرااج..!
ريم: أمس بالليل كنتي تحوسين بالفراش وتتكلمين بصوت واطي.. ولما قربت سمعتج تسولفين ما ادري شتقولين بس سمعت عبد العزيز
عالية: بس هذا اللي سمعتيه
ريم: بس..!
عالية: اوكي
ريم: شنوو اوكي.. شالسالفة عالية انا بحسبة اختج منو هذا عبد العزيز..!
عالية: ما اقدر اقولج الحين
ريم: مو انتي قلتي بتكونين صريحة
عالية: وانا صريحة فعلا.. بس مو الحين اقولج ما اقدر
ريم: ليش ما تقدرين..!
عالية: صعبة صعبة ياا ريم
ريم: شنو الصعب اللي فيها
عالية دمعت عينها: ريم الله يخليج خلااص .. الحين مو وقته خلاااص
ريم: خلاص براحتج

في الكافيه...

يوسف: وانت حيل مستانس الحين ..!
عمر مبتسم: والله حييل مستانس
يوسف: حمدلله والشكر.. هذا بدال ما تروح بنفسك تسلم عليها وتواسيها .. تستانس انك ما شفتها
عمر: من صجك تبيني اروح اسلم عليها
يوسف: اي شفيها مو بنت عمك .. مو لازم تسلم عليها
عمر: بس ما اعرفها ولا شي .. وبعدين هي اللي ما نزلت ولا شفت ويها ... يعني مو انا اللي انحشت منها
يوسف: يعني معقولة من امس بالليل لما اليوم الظهر وهي ما نزلت من دارها .. غريبة .. يا أن فيها شي او انها انطوائية
عمر: يمكن ما تبي تحتك فينا لأنها ما تعرفنا
يوسف: غرفتها قريبة من غرفتك ولا بعيدة..!
عمر: اصلا ما ادري هي بأي غرفة
يوسف: من صجك
عمر: اي والله
يوسف: ولا اخوانك يدرون..!
عمر: يا معود كلهم ما يدرون وين الله قاطهم واحد 24 ساعة هايت مع ربعه بره البيت ويفر بالمجمعات والثاني طول الوقت عند ولد ييرانا والكبار عند حريمهم ما نشوف ويوهم . اما الخوات اللي في بيت ريلها والثانية هايتة بعد
يوسف: انتوا دايما جذي..!
عمر: من فتحت عيني على الدنيا واحنا جذي.. واذا كلمت احد فيهم يعلمون ابوي عني ويزفني ويقول مالك دخل فيهم.. والله والله آنا اقعد بالبيت مرات اكثر منهم
يوسف: ما يصير جذي اخوانك الصغار واختك راح ينحرفون جذي اذا محد يدري عنهم
عمر: والله من توفت امي وانا غاسل ايدي من العايلة من كبيرها لما صغيرها بس الظليمة شينة والله اختي فجوور ما شاء الله احسن وحدة فينا .. لما الحين فيها الخير البنت
يوسف: قوول الله يعين
عمر: اي والله الله يعين

 

[Absent Hope]

في بيت جراح...

( نوال زهقت من قعدتها بالجحر .. نزلت وقامت تتفرج ع البيت .. قامت تمشي في ممر طويل لقت بنهايته صورة كبييرة لعمها.. قامت تتأمل وجهه ..)( نوال بقلبها: سبحان الله فيه حييل من جدي ... آآه والله اني بدونكم يا جدي ويا جدتي ما اسوى شي .. )( ظلت واقفة وسرحانة بالصورة وحست بأحد وراها ولما لفت )

.....: انتي شتسوين هني..!
نوال: انت منوو..!
.....: انتي اللي منو .. آنا اسألج .. وبعدين هذا بيتي وانتي اللي تجاوبيني
نوال: انا نوال
......: منو نوال.!
نوال: الحين قولي انت منو عشان اقولك منو نوال
......: آنا خليفه
نوال: منو خليفه..!
خليفه: بعد منو خليفه .. خليفه هو خليفه
نوال: انت ابوك جراح صح..!
خليفه: اي.. يلا خلصي انتي منو..!
نوال: انا نوال بنت عمك
خليفة: بنت عمي .. أي عم.!
نوال: عمك فيصل الله يرحمه اللي هو ابوي
خليفه: بس آنا ما اعرفه ولا اعرفج
نوال: وانا بعد اول مرة اشوفك فيها وما اعرفك
خليفه: امممم .. وليش ياية عندنا..!
نوال: تعال نقعد واقولك
خليفة: انزين بس مو تطولين وراي شغل
نوال: ان شاء الله
( نوال حست بالفرحة.. اخيرا لقت احد بالبيت تسولف معاه.. اخيرا حست ان في روح في بشر ساكن بهالبيت اللي ظنت انه مهجور ... راحوا قعدوا بالصالة )
نوال: اسمع خليفة .. انا اسمي نوال فيصل بنت عمك.. كنت ساكنة عند جدي وجدتي الله يرحمها .. لما توفت جدتي جدي صار ما عنده فلوس.. قالي اوديج عند عمج جراح عشان تعيشين عنده وانا جيت وبس
خليفة: انزين يعني يدي ماات بعد
نوال: لا جدي راح دار المسنين
خليفة: اهااا.. انزين آنا حتى يدي ويدتي ما اعرفهم
نوال: لأنك ولا مرة شفتهم.. الا اقولك انت كم عمرك..!
خليفه: 12 سنة .. وانتي..!
نوال: انا 17 سنه
خليفة: اي مثل حسوون
نوال: منو حسوون اخووك..!
خليفة: ههههههههههه لا حسنا اختي
نوال: هههه اي عمرها 17
خليفة: اي كبرج
نوال: وينها ما شفتها
خليفه: ما ادري دايما تطلع
نوال: انزين انت مشغول..!
خليفه: اي الحين بطلع بس مستحملج لما تخلصين اسألتج
نوال ابتسمت: خلاص اخر سؤاال بعدين رووح
خليفه: شنوو.!
نوال: قولي انت كم اخو عندك وكم اخت ووين امك..!
خليفة: أمي ماتت من زمااان من بعد ما يابتني ماتت وآنا عندي 4 اخوان غيري وبنتين.. اقولج اساميهم من الكبير لما الصغير اوكي.. اول شي عامر متزوج عمره 29، سعد متزوج عمره 26 ، عمر عمره 21 ، مساعد عمره 14، خليفه اللي هو آنا عمري 12 والبنات فجر عمرها 27 وحسنا عمرها 17 وبس تبين شي..!
نوال: هههههه لا مابي شي مشكووور
خليفه: العفوو .. مع السلامه
نوال: خليفه.. وين راايح..!
خليفه لف عليها وهو مستغرب: تناديني..!
نوال مبتسمة: اي مو انت اسمك خليفه..!
خليفه: اول مرة احد يسألني وين راايح
نوال انصدمت: من صجك..!
خليفه: غريييبة..
نوال ابتسمت: انزين قولي وين رايح.!
خليفة: بروح عند ولد ييرانا العب معاه بلي ستيشن او كرة قدم او كمبيوتر او جنجفة او اشيااااء واايد
نوال: هههههه خلاص رووح اهم شي تستانس.. بس لا تتأخر
خليفه: ابوي يقول كيفك متى ما تبي ترد رد ولو تبي نام عندهم يكون أحسن
نوال فتحت عيونها: لا خلووف.. انا ناطرتك مو تتأخر
خليفه ابتسم: الله حلوو خلووف
نوال: هههههه خلاص خلوف دايما اناديك جذي
خليفه: اي وناااسه .. يلا مع السلامة
نوال: مع السلامة

... بعد ثلاث أيام ...

 

[Absent Hope]

اليوم: الاربعاء
التاريخ:4-7-2007م
الساعة: 2 ظهرا

في بيت ريم...

ريم: يمااا اي وحدة احلى هذي البدلة ولا هذي
ام محمد: ياا ربي عليج خليني اخلص الاكل الحين يوصلون وانا توني
ريم: يلا بس بسرعة اختاري.. تو الناس على ما ييون
ام محمد: الوردية أحلى
ريم: انا عاجبتني البيضا شلوون
ام محمد: خلاص كيفج سوي اللي تبينه
ريم: يما حيرتيني.. متى ييون بيت خالتي .!
ام محمد: خالتج تقول راح ييون بالليل
ريم: يوووووو حسااافة.. خلاص بعد من واحد للعشرة واللي تطلع البسها
ام محمد: كيفج

في بيت جراح...

في غرفة نوال ( أو جحرها )

نوال: هههههههه انا الفايزة للمرة المليووون
خليفه: انتي غشااشه
نوال: والله اني ما غشيت
خليفه: انزين خلاص مو غشاشه
نوال: يلا نلعب بعد
خليفه: لا خلاااص مليت
نوال: ليش خلووف خلنا نلعب شنو ورانا
خليفه: لا خلاص نسولف شوي أحسن
نوال: اوكي يلا سولف شنو بتقول
خليفه: تدرين نوال انا ولا مره قعدت بالبيت واستانست هذي اول مرة بحياتي
نوال: شفت شلون قعدة البيت حلوة
خليفه: حلوه اذا كان في احد يونسك
نوال: يعني انا الحين مونستك
خليفه: اكيييد
نوال: انزين اقولك .. الحين صارلي كم يوم ولما الحين ما شفت أي احد من اخوانك ولا خواتك بس مساعد شفت زوله وهو طالع من البيت
خليفه: لو بتظلين طول عمرج ما راح تشوفينهم
نوال: اوووف شدعوه
خليفه: انزين الحين خلينا منهم .. عندي فكرة
نوال: شنووو...!
خليفه: شرايج اييب حلويات ونسويها سهرة اليوم
نوال ابتسمت: ما عندي مانع افاا عليك
خليفه: هياااااا... من زمان مو سهران .. بس حسافة مافي تلفزيون
نوال: مو ضروري نقعد ناكل حلويات ونسولف ونلعب
خليفه: خلاص الحين بروح اشتري .. تبين شي محدد
نوال: لا كل شي على ذوقك.. بس خلووف .. ابي تلفون شلون
خليفة: ما عندج تلفون..!
نوال: لا والله ما عندي
خليفه: غريبه احنا كلنا عندنا
نوال: انزين عادي حتى لو تلفون بيت
خليفه: لا اخذي موبايلي كلمي منه
نوال: اخاف اطير رصيدك
خليفه: لا عادي كلمي واخذي راحتج
نوال: صج..!
خليفه: اي .. هذا هو كلمي اللي تبين على ما اروح اشتري الحلويات وارد
نوال: اوكي مشكوور بس مو تتأخر
خليفه: ان شاء الله

في بيت وسمية...

فهد باستغراب: اشوف وسمية مالها خلق هاليومين تنزل
سلوى: اي شفت شلون..!
فهد: عواطف هذي مصدر مشااكل الله يعينا عليها
سلوى: والله هالبنت فاصخة الحيااا ما تستحي
فهد: لا حول ولا قوة الا بالله
سلوى: فهد اقولك شي بس مو تزعل
فهد: قوولي شنو..!
سلوى: اوعدني انك ما تتضايق ولا تزعل
فهد: ما راح ازعل صدقيني بس شنوو
.. تررررن ترررن ..
سلوى: ترد ع التلفون ولا أنا ارد
فهد: لا انتي ردي
سلوى: الوو.. السلام عليكم اي هلااا.. اي موجودة منو اقولها.. هلاا نوال شلونج..الحمدلله .. ان شاء الله بس دقيقة احول الخط فوق اوكي.. يلا مع السلامة
... في الصالة اللي فوق...
(ترررررن تررررن << التلفون يرن.. ووسمية بغرفتها ومالها خلق تطلع وترد .. ظل حوالي الـدقيقتين ومحد يرد )

راشد: ألووو
نوال: ألوو السلام عليكم
راشد: وعليكم السلام
نوال: وسمية موجودة..!
راشد مشبه ع الصوت: منو أقولها..!
نوال: رفيجتها
راشد: نوال.!
نوال: اي نعم نوال
راشد: شلوونج نوال .! انا راشد
نوال ما توقعت انه هو: راااشد
راشد: اي راشد.. شلونج عساج بخير.. عظم الله اجرج ولو انها متأخرة..!
نوال: اجرنا واجرك لا شدعوه عاادي.. انت شلونك..!
راشد انصدم: انا الحمدلله بخير .. بس أهم شي انتي شخبارج..!
نوال: والله الحمدلله بخير.. بس ياليت لو تناديلي وسمية لأنه تلفون نقال قبل ما يخلص الرصيد
راشد: اووكي .. دقيقة
.... شال راشد التلفون وركضة على غرفة وسمية ودخل بدون اي استئذان...
وسمية: حمدلله في شي اسمه باااب شفيك داخل جذي
راشد يأشر على التلفون: تلفووون
وسمية: ادري انه تلفون جاي تعلمني من صجك
راشد بصوت واطي: نوال ع التلفون
وسمية: صج والله .. عطني بسررعة.. الووو
نوال: الووو .. هلاا وسوومة
وسمية: هلاا فيج يا حياتي.. شلونج شخبارج عسااج بخير . ان شاء الله مرتااحة..!
نوال: هههه شفيج شوي شوي علي
وسمية: والله ما تدرين شكثر احاتيج.. مشتاقتلج مووت
نوال: وأنا اكثر والله
وسمية: ما رديتي على اسئلتي ... اخبااارج..!
نوال: والله الحمدلله بخير
وسمية: مابي اجابة مختصرة قوليلي شصاار مع عمج وعياله شلونهم زينين معااج ولا لأ..!
نوال: هههههههههه
وسمية: شفيج تضحكين..!
نوال: انا ما شفت الا واحد بس
وسمية: صج والله
نوال: اي والله .. اول يوم ما شفت احد .. ثاني يوم الصبح شفت عمي بدل ما يرحب فيني طردني وقالي لا تنزلين من دارج وبعدها شفت ولد عمي صغير اسمه خلووف وكلمته وقالي ان اخوانه كلهم طالعين ومحد يقعد وهو كان يبي يطلع بس بعدها بكم يوم خليته يقعد معاي بالبيت والله يحليله هو اللي مونسني مجابلين بعض انا وياه ولعب وسوالف
وسمية: يحليله..الحمدلله يا معوده لقيتي احد تسولفين معاه
نوال: اي والله الحمدلله
وسمية: وشلون مرت عمج..!
نوال: متوفية من زماان الله يرحمها
وسمية: الله يرحمها.. انزين اقولج هذا تلفون منوو..!
نوال: موبايل خلووف خلاني اتصل فيه وراح الجمعية يشتري حلويات للسهرة
وسمية: هههه يحليلكم مسوين جوو بروحكم
نوال: نستانس شنو ورانا
وسمية: انزين عفيه عطيني رقمه عشان من فترة لفترة اتطمن عليج
نوال: اوكي بس ما اعرفه
وسمية: خلاص انا اعطيج رقم موبايلي وطرشيلي مسج عشان اخزنه وانتي بعد خزنيه
نوال: اوكي من عيوني
وسمية: تسلم عيونج.. سجلي عندج........
نوال: اوكي سجلته.. تبين شي حيااتي
وسمية: لا بس ابي سلامتج وابيج تطمنيني على نفسج متى ما قدرتي
نوال: حااااضر.. خلاااص سلميلي على اللي عندج
وسمية: يووصل.. بس ما عندي الا شخص واحد
نوال: هههههه ما عليه سلميلي عليه
وسمية: ههههه افااا عليج يوصل..
نوال: مع السلامه
وسميه: مع السلامه
راشد: شلووونها..؟
وسمية: انت دايم لازق انطر شوي
راشد: خلصي مرتاحة ولا لأ
وسمية: تقول الحمدلله بخير .. و.. وتسلم عليك
راشد: بلا تمصخر وسميه
وسمية: والله ما اتمصخر من صجي ... تسلم عليك
راشد: احلفي
وسمية: والله
راشد: والله تستاهلين هدية يا حبيبتي
وسمية: اووف شسويت.. ما سويت شي يستاهل
راشد وهو يوقف والضحكة ماليه وجها: شلون ما يستاهل الا يستاهل ونص ونصين بعد
وسمية ابتسمت: الله يعطيك على قد نيتك
راشد: آآآمييين

 

[Absent Hope]

في بيت هدى...

هدى: لا مابي ارووح
ام هدى: لما نكون بالبيت تتحلطمين وتقولين ملل ولما نبي نطلع ما تبين
هدى: يما مالي خلق ع السوق
ام هدى: الحين صار مالج خلق
هدى: والله مالي خلق
ابو هدى: خلاص خليها براحتها .. كيفها
ام هدى: انت راح تخربها بدلعك لها
ابو هدى: اذا ما دلعت وحيدتي ادلع منو
ام هدى: ان شاء الله جاي بالطريج واحد
هدى: يما يمكن وحدة
ام هدى: واحد وحدة ما تفرق
ابو هدى: بس نبي فرد جديد واحنا بخير
ام هدى: خلاص مصممة ما تبين تروحين
هدى: لا مابي
ام هدى: كيفج

في بيت ريم...

ريم: يماا منى وصلت
ام محمد: اي انزين خلاص روحي
ريم: يمااا منى وصلت مع بناتها
ام محمد لفت معصبة: ريموو شفيج اليوم حنانة انزين وصلت خلاص مو غريبة
ريم نزلت راسها: يما مو هي قالت ما راح ايي..!
ام محمد: اي والله صح .. اكيد غيرت رايها
ريم: بس والله شكلها ما يطمن
ام محمد: يعني شلوون..!
ريم: ما ادري ما ادري شلون.. انتي روحي اسأليها
ام محمد: ليش ما سألتيها..!
ريم: خفت يما يكون في مصيبة .. مالي خلق ع المصايب
ام محمد: اعوذ بالله .. فالج ما قبلناه

... نهاية البارت...

لما هني ويخلص البارت..

شنو توقعاتكم..!
نوال .. حياتها الجديدة في بيت عمها .. وعلاقتها بالتحديد مع خلوف ( خليفة ) < يحليله > .. تتوقعون بتستقر وتظل جذي على طول ولا بيصير شي وتتغير الموجة ..!
عمر.. ما شاف نوال ولا درا عنها .. هالشي راح يطول..!
راشد.. نوال عطته الاشارة الخضرا بسلامها له .. تتوقعون غيرت رايها من ناحيته ولا بس جذي..!
وسمية.. علاقتها المتوترة مع ابوها وعواطف بتدوم .. !
عواطف.. متى بتتأدب وتتعلم الاحترام..!
ريم.. تغير قياسي بشخصيتها .. اثبتت بجدارة انها تعلمت من الدرس .. تتوقعون في شي جديد يغير نمط حياتها ولا راح تظل ماشية سيدة..!
ضحى ومنصور.. بيردون بالسلامة.. راح يصير شي بحياتهم اللي راح يبدونها في بيت منصور..!
مناير اخت منصور.. حاقدة على ضحى بدون شي ولا في سبب معين.. وراح تستسلم ولا تكمل طريجها بمشوار الحقد..!
سعود.. اخو منصور .. ما تكلمنا عنه بس تتوقعون له دور بالجزء الجاي ولا نفس هالجزء..!
عالية.. لما الحين ما عرفنا قصتها مع عبد العزيز... يا ترى شنو قصتها بالضبط.. ولها علاقة بالوصية ولا لأ.. ومنو عبد العزيز اصلا..!
منى.. شصاااير.. وفي شي ما يطمن على قولة ريم ولا متوهمة..!
نورة.. لما الحين ما حددنا ملامح دورها بالقصة.. لها دور ولا بتمر مروور الكرام.!
هدى.. ما في عندهم سالفة الا البيبي وبس...!
سلوى.. شنو الشي اللي بتقوله لفهد وما قدرت..!
ابو فهد شنو سر تمسكه بعواطف..!

... هديل الحب ...

 

[Absent Hope]

يلا اشوف ردودكم يا حلوين

 

[miss 3yara]

لايوقف لايوقف لايوقف
كملي

 

[Absent Hope]

هلآ بنآت ..

يمكن انزلكم الجزء اللي بعده اليوم ..~

لأني ما اقدر انزل الجزء الياي الا بعد كم يوم ..

اوكي

 

[Absent Hope]

الجزء السادس:::

اليوم: الاربعاء
التاريخ: 4-7-2007م
الساعة: 5ونص مساء

في بيت ريم...

ام محمد: حسبي الله ونعم الوكيل حسبي الله
ابو محمد: ما عليه يا بنتي هدي أعصابج.. هالأشكال ما تستاهل واحد يضايق نفسه علشانها
منى: والله احرمه من بناته ولا اخليه يشوفهم
ابو محمد: لا حول ولا قوة الا بالله خلاص هدي نفسج.. خلاص .. يباا ريم اخذي اختج فوق خليها ترتاح
ريم: ان شاء الله يباا
.... وبعد ما راحوا...
ام محمد: شفت يا بومحمد هذا مستقبل بنتي ضااع شفت شلون
ابو محمد: خلاص يا ام محمد مثل ما الله قدر وزوجهم الحين بيطلقهم
ام محمد: الحين انت شنو بتسوي معاه
ابو محمد: والله ما ادري .. بس والله ما يستاهلها .. ما ابيها تظل على ذمته
ام محمد: يعني براايك يطلقها..!
ابو محمد: يكون أحسن اذا طلقها
في غرفة ريم...
ريم: يعني يمكن انتي كنتي متخانقة معاه عشان جذي عصب وطردج
منى: لا والله مو على شي بس صارله كم يوم يحن على راسي وكنت عارفه انه بيسويها مشكله
ريم: يحن على شنو..!
منى: يبي ولد
ريم: استغفر الله وانتي شكوو بهالموضوع .. هذا مو منج
منى: قلتله والله قلتله بس مو راد علي
ريم: أول مرة اكتشف ان عقله صغير .. بصراحة كان كبير بعيني قبل بس الحين صغر
منى: خلاص الحين انا اللي ما ابيه مو هو اللي ما يبيني
ريم: هدي نفسج انتي الحين

في بيت جراح...

( خليفه لما الحين ما رجع ونوال بغرفتها تنطره بس لما شافته طول خافت عليه.. واخيرا قررت تنزل تحت تشوفه او تسأل الخدامات يمكن تتطمن عليه .. نزلت تحت وهي ماره من الصالة سمعت صوت ناس وازعاج استغربت والفضول غلبها وراحت تطل .. طلت بسرعة لمحت احد قاعد بس منو ما تدري ظلت سرحانه تفكر منو ممكن انه يكون بالبيت وما حست الا بنوتة صغيرة واقفة قدامها وتطالعها باستغراب .. نزلت عندها وباستها )

نوال: أنتي منوو..!
البنت: آنا سارة الحلوة
نوال: اي والله حلووه.. انزين انتي ليش واقفة هني..!
سارة: آنا ياية مع أمي
نوال: صج منو أمج..!
سارة وهي تجر نوال: تعالي تعالي شوفيها
نوال: وييين...!
سارة تجرها: تعااالي
... دخلت نوال الصالة مع سارة كانوا بنتين قاعدين مع خليفه...
نوال: السلام عليكم
الكل: وعليكم السلام
خليفه: هذي نواااال بنت عمي
نوال: هلا والله
خليفه: نواال .. هذي فجر اختي
.. راحت نوال وسلمت على فجر..
فجر: شلوونج..!
نوال: الحمدلله بخير.. انتي شلونج..!
فجر: والله بخير
نوال: الحمدلله
خليفه: وهذي حسناا
حسنا وهي قاعدة تطالع نوال من فوق لتحت: هااااي
نوال: هااي
فجر: حسوون عيب عليج قومي سلمي ع البنت
حسنا: وحده ما اعرفها ولا تعرفني ليش اسلم عليها
فجر: حسنا عيب هذي بنت عمج
حسنا: صج والله.. بس ليش اول مرة اشوفها
فجر: اورييج.. اقعدي نوال حيااج
نوال تتلفت: وين عمي..!
فجر: ابوي مو هني .. اقعدي خلينا نتعرف عليج
نوال قعدت..
فجر: هاا شلونج ان شاء الله مرتاحة في بيتنا
نوال: الحمدلله
فجر: انتي كم عمرج..!
نوال: 17 سنه
فجر: اهاا يعني كبر حسنوو
حسنا: اظن اسمي حسناا
فجر: حسناا شفيج اليوم .. هذا وانا من زمان مو شايفتج..!
حسنا: اوووف بصراحة عطلتيني عن أشغالي
فجر: أي أشغال يا معوده.. قصدج الهياته
حسنا: والله انا كيفي اهيت ما اهيت هذا شي راجعلي.. مع السلامة انا طالعة رفيجتي ناطرتني
فجر: استغفر الله
نوال: فجر
فجر: هلا
نوال: انتي بس عندج هالبنوتة الحلوة
فجر ابتسمت: اي بس
نوال: ما شاء الله كم عمرها..!
فجر: 4 سنوات
نوال: الله يخليها لج
.....: السلام عليكم
الكل: وعليكم السلام
فجر: شلونك يبااا..!
جراح: الحمدلله انتي ليش ياية .. !
فجر: يبا ياية ازوركم واسلم عليكم من زمان مو شايفتكم
جراح: مو ضرووري.. اقعدي عند ابو عيالج احسن.. وانتي ليش نازلة مو أنا محذرج ما تنزلين
فجر: يباا شفيك.. بيت عمها مثل بيتها.. خلها تقعد معانا عادي
جراح: انتي مالج دخل ولا كلمة .. وانتي يلا ذلفي فوق ولا اشوف رقعة ويهج
نوال: ان شاء الله
خليفه: يباا ليش تطردها ..! حراام
جراح: انت الثاني اسكت واذا مو عاجبك اذلف وراها .. بعد ديوانيات في بيتي ماكو شغل

 

[Absent Hope]

في بيت وسمية...

وسمية: يلااا حماادة بسرررعه
أحمد: انزين .. لحظة شوي
عواطف: على وين على وين رايحين ان شاء الله..!
وسمية: مالج دخل .. انا حرة اي شي بسويه اسويه
عواطف: لا حبيبتي مو حرة
أحمد: وسمية خلصت
وسمية: يلا تعال
.. عواطف وقفتها ...
عواطف: شوفي عاد.. كل مرة اخليج تحقريني وتروحين.. بس هالمرة لااا
وسمية: على كيفج هو ( دزتها ) وخري عن طريجي اووف
عواطف: لا تدزين وماني موخره وكيفي سامعة.. انا اليوم مو ناوية على خير
وسمية عصبت: حمدلله والشكر فيج حالة نفسية.. بعدي عن طريجي
عواطف تصرخ: ماااكوو طلعه
وسمية: مو كيفج مو كيفج يا اخت
عواطف: كيفي ونص
وسمية: اقولج مو كيفج يا المجنونة
عواطف: هين يا وسمية آنا مينونة .. الحين اوريج الينون شلون صاير
.... دزت عواطف وسمية وخلتها تطيح بالأرض وسمية ولا مرة بحياتها طقت أحد بس عصبت خلاص ما قدرت تستحمل قامت وعطتها طراق وظلوا لدرجة ان وحدة قامت تجر شعر الثانية ويصارخون .. أحمد حاول يفك بينهم لما شاف انه ما منه فايدة قعد يتفرج عليهم.. وما بيده حيله.. شوي دخل ابو فهد البيت ..
ابو فهد وهو يركض صوبهم: انتوا شفيكم .. الشيطان بينكم..!
بعد ما فرقهم ابو فهد .. عواطف: شووف بنتك والله والله اوريها الشغل الحين
وسمية: انتي تسكتين ولا كلمة .. عايشة في بيتنا وماكله من خيرنا وتقل ادبها
عواطف: اسمعي يا أنا يا انتي بهالبيت
وسمية: اسكتي اسكتي بس
ابو فهد: بببببسسسسسس .. مو محترمين وجودي بينكم.. اسكتوا ولا كلمه
راشد وهو يدخل البيت: هاا وسوم وينكم ليــ...
.. سكت لما شاف المشهد اللي جدامه عواطف ووسمية شعورهم منفوشه وابو فهد بينهم ووجها احمر من العصبية وأحمد قاعد ع الدرج يتفرج...
راشد: شالسالفة..!
ابو فهد: الحين.. سكتوا .. كأنكم جهال تنتفون شعر بعض.. يلا كل وحدة لغرفتها
وسمية: بس يبا راشد بيطلعنا
ابو فهد وهو يصرخ: ما في طلعه.. ويلا على غرفتج.. واخذي اخوج معاج
وسمية: يبااا مو عشان هذي تحرمنا من الطلعه
ابو فهد: اقوولج يلا على غرفتج
.. وسمية اخذت أحمد وصعدوا فوق .. وابو فهد ظل يخز بعواطف بعدها طلع من البيت.. ظل راشد ضايع ما يدري شالسالفه..
عواطف تطالع راشد بطرف عينها: شفت اختك شسوت..!
راشد: شالسالفة..!
عواطف: تمد ايدها علي اللي ما تستحي
راشد: عواطف احترمي نفسج
عواطف: انا بحترم نفسي .. بس مو عشان وسمية لاا عشاني اولا انا محترمة وثانيا عشاانك
راشد: استغفر الله .. وهذي الطلعة تفركشت
عواطف: رشووود.. شرايك نطلع انا معاك وخلاص
راشد عطاها خوش نظرة: اسمي راشد.. مع السلامة
عواطف وهي تقعد ع المطرحة: اووف مع السلامة .. يا... يا رشوووود

في بيت ريم...

ابو محمد: نورت الكويت
منصور: تسلم يا عمي الكويت منورة بأهلها
ابو محمد: هاا ضحاوي عسى استانستي
ضحى: الحمدلله يباا
ابو محمد: يعني استانستي ولا لأ
ضحى هزت راسها يعني اي:...
ابو محمد: الحمدلله
منصور: يلا عمي احنا نستأذن
ابو محمد: لاا ماا يصير ما صارلكم نص سااعة.. لازم تتعشون عندنا
منصور: لا عمي تسلم والله بودنا نقعد بس الله الشاهد اني تعبان وما فيني حيل
ابو محمد: ما يصير وانا ابووك
منصور: اعذرنا يا عمي
ابو محمد: معذوور يا ولدي معذور
منصور: يلا مع السلامة
ضحى: لحظة منصور دقيقة بكلم ابوي
ابو محمد: خير يباا
ضحى: لا بس وين ريم ما سلمت عليها مشتاقتلها
ابو محمد: هاااا .. ريم.. اي ريم في بيت خالتج
ضحى: اي وانا اقول وينها.. وامي شفيها قعدت خمس دقايق وقامت
ابو محمد: كانت بتجهز العشاا
منصور: لا عمي وقت ثاني ان شاء الله
ابو محمد: ان شاء الله
منصور: يلا مع السلامة
ضحى: مع السلامة يباا
ابو محمد: مع السلامة
في غرفة ريم...
ريم: ليش يمااا..!
ام محمد: تقول مدام ضحى ما راح تقعد ما راح تيي اليوم
ريم: خالتي لازم تغير رايها بآخر لحظة
ام محمد: روييم انتي شايفة الظرف اللي عندنا واختج منى حالتها ما تسمح ان احد يزورنا
ريم: يعني يمااا باجر ما راح نروح المزرعة
ام محمد: لاا ما راح نرووح
ريم: لييييييييش..!
ام محمد: شفيج ريم انتي مو ياااهل
.. منى دخلت الغرفة..
منى: حلفتج بالله يا يماا ان باجر ترووحون وما عليكم مني حلفتج بالله
ام محمد: ما يصير يا بنتي ما يصير .. الظروف ما تسمح
منى: يمااا لا تخربون فرحتكم وتكسرون بخاطر ضحى عشااني .. والله حراام
ام محمد: وانتي شلوون..!
منى: ما عليج مني .. انا بروح معاكم واقعد واستانس.. ووالله ما همني فايز ولا عشرة من أشكاله.. مدام هو باعني برخيص انا ببيعه برخيص .. صج ما تهون علي العشرة بس ليش اتعب نفسي اذا هو هانت عليه.. وانا من باجر بطلب الطلاق منه ومابي اظل بذمته اكثر من جذي
ام محمد: تعوذي من الشيطان يا منى ما يصير جذي.. شلون تطلبين الطلاق .. شنو يقولون الناس عنج..!
منى نزلت راسها: يماا اذا هامج كلام الناس.. وخايفة تسمعين الناس يقولون ان بنتج مطلقة.. انا مستعدة آخذ بناتي واروح اعيش بشقة بروحي ولا اخليج تسمعين كلام الناس
ام محمد: منى شهالكلام.. الحين معقولة انا اتخلى عن بنتي والله هذا مو قصدي.. بس الطلاق ابغض الحلال عند الله وانتي لازم تفكرين وما تتهورين.. واذا ما شالج البيت تشيلج عيونا
منى: تسلم عيوونج يماا.. بس خلاص انا وفايز ما نقدر نعيش مع بعض.. خلاص لما هني وبس كافي.. صارله من ولادة هاجر وهو حالته مو طبيعية .. ويسوي مشكلة على اتفه شي.. وانا ساكتة ومتحمله بس عشان ما اضايقكم.. بس كل شي وله حد وانا خلاص وصلت حدي .. والحين ما اقدر اسكت اكثر لاني راح انفجر
ام محمد: لاحول ولا قوة الا بالله... شوفي انا ماراح اوافقج بالراي.. بس ابيج تفكرين بالسالفة مدة .. واذا هذا اللي شايفته صح خلاص لج اللي تبينه
منى ابتسمت: تسلمين يا أحلى ام... وصدقيني يماا انا لو تطلقت منه ما راح اضايق نفسي ولا راح ازعل.. بالعكس راح اعيش حياتي طبيعية واكثر من طبيعية
ام محمد: اللي كاتبه الله بيصير ان شاء الله
منى: ان شاء الله

 

[Absent Hope]

في بيت ام يوسف...

نورة: والله ضيقتي خلقي
عالية: اوووووف مزعجة.. خلاص خلاص كاافي
نورة: زهقااانة من البيت تعرفين يعني شنو زهقاانة
عالية: احسن ان شاء الله طول عمرج زهقانه.. اسكتي خليني اطالع التلفزيون
نورة: انا طالعه
عالية: يكون أحسن
في غرفة يوسف...
نورة: غريبة اليوم قاعد بالبيت
يوسف: زهقااان وما عندي شغل
نورة: وربعك وينهم..!
يوسف: كلهم اثنين وكل واحد بدنياه
نورة: اثنين..غريبة انا خبري واااحد
يوسف: لا تطورنا وصاروا اثنين
نورة: صج والله شلوون..!
يوسف: الصدفه
نورة: شفيك .. تتكلم من طرف خشمك..!
يوسف: اوووف
نورة استغربت: يووسف.. شعندك..!
يوسف: ولا شي
نورة: عاااد صج يوسف
يوسف: شفيج مافيني شي افكر بربعي
نورة: شفيهم..!
يوسف: افكر بهمومهم وبمشاكلهم
نورة قامت وسكرت الباب وردت قعدت: يلا تكلم ياا أخ يوسف... قول انا اختك وترى مو عيب اذا قتلي اللي مضايقك
يوسف: لااا ولا شي بس افكر بعمر
نورة: قول شفيه عمر .. اسمعك..!
يوسف: رافع ضغطي
نورة ابتسمت: يووسف آخذ الكلام منك بالقطارة قول ليش شالسالفه..!
يوسف: مو متعود اتكلم معاج وافضفضلج احسج يااهل
نورة: ويييييييييييعه... عناد عليك راح تقولي كل السالفه وتفضفض
يوسف ابتسم: غصب
نورة: اي غصب... يلا قووول انطق
يوسف سكت وبعد فترة: ابووه مسويله مشاكل بحياته.. من هو صغير يضغط عليه بأشياء واايد.. ويوم كبر كل دقيقة مضايقه.. والحين طالعله بسالفه يديدة يبيه يتزوج بنت عمه
نورة: ويعني يتزوجها عاادي.. يعني هي فيها شي..!
يوسف: مو عن جذي .. بس هو من صغيير ما يعرفها ولا مرة شافها .. صغيرة او كبيرة والحين يبيه يتزوجها
نورة: غريبة .. وليش ابوه يبيه يتزوجها...!
يوسف: لأن هي كانت عايشة عند يدتها وريل يدتها والحين يدتها توفت فهي راحت سكنت في بيت عمها اللي هو ابو عمر.. وابو عمر مثل ما قتلج ثقيل دم .. عصبي .. كل شي فيه سلبي .. ويبي يفتك من مسؤوليته للبنت قام وقال لعمر تزوجها وعمر رافض هالشي رفض نهائي وهي صارلها فترة في بيتهم وهو ما فكر يطل عليها ولا يشوفها أو يسلم عليها
نورة: انزين اقولك .. يعني هي امها وابوها متوفين .. عشان جذي كانت ساكنة عند يدتها..!
يوسف: لااا .. بس ابوها متوفي.. اما امها متطلقة من ابوها من قبل لا يموت
نورة باستغراب: وليش ما تعيش عند امها..!
يوسف: امها مو كويتية ما ادري شنو جنسيتها بس مو كويتية وهي تطلقت من هني وتنازلت عن حضانة البنت بنفس الوقت وسافرت لديرتها
( نورة من أول ما قال يوسف القصة حست بنغزة بقلبها وان السالفه فيها شي .. ولما كمل للنهاية سرحت وقامت تتذكر هي ويين سامعه هالقصة ويين.. بس ذاكرتها خذلتها هالمرة لانها مو متذكرة ولا شي .. بس متأكدة انها سمعت القصة هذي من قبل .. ظلت سرحانه تعصر مخها بس ماكوو فايدة)
يوسف: نوووورة وين رحتي..!
نورة: افكر بالقصة
يوسف: اي قصة..!
نورة: قصة عمر..!
يوسف: شفيها..!
نورة: احس اني سامعه القصه من قبل
يوسف: حمدلله والشكر.. يتهيأ لج
نورة: لا لاا .. متأكدة
يوسف: اوووف وذبحني صارله فترة ما عنده غير هالسالفة
نورة: ولما الحين راافض يتزوج
يوسف: اي لما الحين .. ويقول لما باااجرمستحيل اتزوجها
نورة:....
يوسف: لا حوول تراج رفعتي ضغطي اكلم الطوفه
نورة: لاا بس والله سامعه السالفه
يوسف: نويير ممكن تطلعين بره..!
نورة وهي تقوم: ان شاء الله

اليوم: الخميس
التاريخ: 5-7-2007م
الساعه: 11 صباحا

في المزرعه...

ريم: طولوا
ام محمد: ريمووه تراج حنانة حيل انطري شوي
ريم: حموود.. حموود
محمد: نعم
ريم: قووم
محمد: على وين..!
ريم: نسوي سباااق
محمد وهو مبتسم: من صجج
ريم: اي ويعني
محمد: ههههه ولا مرة شايفج تركضين
ريم: خلصني يلااا قووم
محمد: يلاا
ام محمد: هذي ضحى وزوجها وصلوا
ريم: يوووو لما بسوي السباق
محمد: اي عادي امشي
ريم: لا فشلة
محمد: لااا .. ولا عشان خفتي يعني
ريم: بروح اسلم على ضحة مشتاقتلها
محمد: اي رقعيها وانحاشي

في بيت وسمية...

وسمية: أنا خلاص زهقت ما اقدر اتحمل
فهد: لا تقدرين ان شاء الله عامليها بالطيب صدقيني بتكسبينها
وسمية: عاملتها بالطيب ما يفيد فيها شي هالبنت
فهد: ...
وسمية: وين سلوى..!
فهد: ما ادري عنها بغرفتها
وسمية: غريبة مو من عوايدها تنام لما هالوقت
فهد: بروح اشوفها
وسمية: اوكي
في غرفة فهد وسلوى...
سلوى: صدقني ما فيني شي
فهد: صارلج كم يوم حالتج مو عاجبتني.. شفيج
سلوى: اقوولك .. بس ما ادري خايفه
فهد: من شنو خايفة قولي ولا تخافين
سلوى: انزين بس لا تنفعل واسمعني بهدوء
فهد: اوكي يلا انطقي

في المزرعه...

ريم ومناير قاعدين على صوب ومو مستحملين بعض بس مجاملات...

ريم: اهاا ومنيرة ما راح تيي
مناير: والله ما أظن
ريم: شوي بيت خالتي راح يوصلون
مناير: اممم.. سعوودوو سعوودوو
سعود وهو ماشي صوبهم: نعم
مناير: شوفي هذا سعود اخووي اصغر واحد
ريم ابتسمت: تشرفنا
سعود ابتسم ولف على مناير: منو الاخت..!
مناير: ريم اخت ضحى الصغيرة
سعود: اهاا .. شلونج ريم..!
ريم: الحمدلله بخير.. انت شلونك..!
سعود: بخير دام اني شفتج
مناير تطق سعود بكتفه: هييي شكو شكوو .. تتغزل فيها
سعود عطاها خوش نظرة: منايروو عيب
مناير: انزين اقلب ويهك ما صدقت لزقت
ريم بهدوء: مناير انا بروح اشوف خالتي يت ولا لأ
مناير: اوكي
.. بعد ما راحت ريم...
سعود: انتي مو عيب عليج تقولين هالكلام والبنت واقفه احرجتيها
مناير: لا والله وانت ما صدقت تغزلت فيها
سعود: شقلت آنا الحين
مناير: اسكت اسكت
سعود: بس ما شاء الله عليها قمر يمشي
مناير: لا والله احلف بس .. اقلب ويهك اقلبه لا اقلبه لك
سعود: يوو الشرهة علي واقف اكلمج

 

[Absent Hope]

في بيت جراح...

نوال: ما عليك مني يا خلووف
خليفة: شنو ما علي منج .. خلصيني انزلي لا انزلج غصب الدنياا حر وانتي قاعدة بغرفتج
نوال: اي شفيها واذا قعدت بغرفتي..!
خليفة: لا والله .. غرفتج ما فيها مكيف شلون تتحملين
نوال: اتحمل اتحمل ان شاء الله
خليفه: يعني عشان ابوي امس ..
نوال تقاطعه: خلاص خليفه لا تضغط علي انا دخلت هالبيت مجبورة مو بكيفي ومابي تصير مشاكل واطلع انا سببها
خليفة: شلون يعني دخلتي مجبورة
نوال: خلاص خليفه الله يخليك .. والله مو مستحمله القعده بمكان الناس اللي فيه ما اعرفهم وأنا هم ثقيل على قلوبهم
خليفة: انتي منو قالج هالكلام.!
نوال: انا اشوف بعيني واحس بقلبي ماله داعي احد يقول
خليفة: صدقيني احنا نحبج ووالله لو انتي مو موجودة راح يضيق خلقي
نوال: انا مو عليك خلوف ع الباقي.. من اول ما دخلت هالبيت ما شفت احد من اخوانك اللي هم المفروض عيال عمي الوحيد
خليفة: شوفي الكبار من قبل ما نشوفهم الا عمر بس ما ادري شفيه صارلي فترة ما اشوفه بالبيت كلش ولما اسأله وينك يقول مالك شغل .. ما كان جذي
نوال: اكيد لأني موجودة بالبيت
خليفة: لا لا .. اصلا هو من زمان يقول لابوي ليش ما نشوف عيال عمي واهلنا وليش احنا منعزلين
نوال: اي بااين من أول ما دخلت هالبيت ما عرف حتى يقول السلام ما عرف يقول شلونج يا بنت العم
خليفة: يمكن ظروف او متهاوش مع ابوي .. هو دايما يتهاوش مع ابوي
نوال: انت بفهم شدراك..!
خليفة يبتسم ابتسامة خبيثة: انا دايما لما يدخلون الدار ويصكون الباب وراهم اقعد اتسمع شنو يقولون.. ودايما يتهاوشون .. لما آخر شي مليت وما قمت اسمع هواشهم
نوال: خليفووو ما توقعتك جذي .. ليش تتسمع..!
خليفة: شنوو عادي..!
نوال: لا خلوف مو عادي حراام
خليفة: صج والله توني ادري .. قبل كنت اشوف حسوون توقف عند البيبان وتتسمع
نوال: لا لا عيب ولازم ما تقلدها هي غلط
خليفة: خلاص اوكي.. بس تكفين امشي تحت بموت من الحر
نوال: لا خلني هني خلوف .. انت انزل خلاص
خليفة: كيفج ..

في المزرعة...

عالية: هذي المزرعة شايفتها يا ربي..!
ريم: ويييعة يعني ما تدرين
عالية: لا ما ادري
ريم: حمدالله والشكر .. قبل يوم كنا صغار كنا نيي هني دايما
نورة: حلفي.. ما اتذكر
ريم: واااي انتوا شنو.. الميموري مالكم بو طقه
عالية: انا احس اني متذكره ومو متذكره
نورة: انا مرة وحدة الميموري قاطته وما ادري عنه
ريم: اووف طافكم قبل شوي قعدت مع منايرو .. ياااي يا ثقل دمها
نورة: منو مناير..!
عالية: مو هذي اخت منصور
ريم: اي هي نفسها
عالية: عاد شكلها فرفوشة
ريم: لا عاد ما تعرف الفرفشة ولا تمر صوبها.. اقولكم وين يوسف ما شفته..!
عالية: يمااا منج تبي تضمن ريلها يشوفها وهي متكشخة
نورة: اي تذكرت طاافكم امس يوسف قال عن.... عن .. لا لا خلاص
ريم: ويييعة عن شنو قولي
نورة: لا ولا شي
ريم: اذا ما قلتي يا ويلج .. لا يكون ما يبيني
نورة: حمدالله والشكر.. شكوو..!
ريم: انزين شقال..!
نورة: لا ولا شي نسيت
عالية: جذااابة انتي اذا تبين تتهربين تسوين نفسج ناسية السالفة
نورة: بروح اشوف امي تبي شي
ريم: اوريج ما تتهنين بيومج الا اعرف السالفة
عالية: طنشيها تلقين ما عندها سالفة بس بتقيس فضولج
ريم: لا والله تقيس فضولج يعني محللة نفسية.. سكتي بس سكتي .. انتي يبيلج احد يحلل حالتج
عالية: ماالت حتى ماالت .. ليش حبيبتي شفيها حالتي .. ما فيني الا البخت
ريم: تعالي تعالي .. لا تتهربين .. انا قبل ما اكون بنت خالتج انا اختج وصديقتج
عالية: شفيج انتي اليوم شاربه شي ..!
ريم: عااليو لا تتهربين ترى كاشفتج
عالية: من شنو اتهرب
ريم: شفيج .. شنو الموضوع اللي مضايقج من فترة وانتي مو على بعضج ومو عالية اللي نعرفها كلنا..!
عالية: صدقيني ريوم ما فيني شي.. بعدين احنا يايين المزرعة نستانس وبس
ريم: بالأمانة اللي يشوف ويهج يحس انج ياية تستانسين .. احس انج داخلة عزا..!
عالية: ليش ..!
ريم: ويهج اصفر وضعفاانة فوق ما انتي ضعيفه ولا اللبس .. من متى انتي ذوقج اي شي
عالية: الله.. يعني الحين اذا لبست جذي وغيرت من ذوقي يصير فيني شي
ريم: لا حبيبتي .. بعدين لازم تعرفين ان الذوق باللبس اليومي يعكس نفسية الشخص
عالية: يا عيني ع اللي صايرة مثقفة وتعرف تتفلسف
ريم: انا ما اتفلسف انا اقول الصج .. ريووم مالج دخل .. ريوم ما فيني شي.. مو علي هالسوالف ..!
عالية: تعالي نشوف امهاتنا اذا يبون شي ..!
ريم: لا والله.. اذا بتروحين روحي بروحج
عالية: اووكي .. سي يوو
ريم: الحين آنا بقولج ماالت حتى ماالت

في بيت وسمية...

أحمد: يمين
وسمية: لا يساار
راشد: انا اقوول يمين
وسمية: يسار يعني يساار
أحمد: دوختوني .. ما راح العب معاكم اووف
وسمية: لا والله لا والله
راشد: وسميوو ليش تدوخين حمود البطة..!
أحمد: يعني انت مو مدوخني
راشد: لا اعوذ بالله
احمد: وسووومة...!
وسمية: ما ورا الدلع الا ... شنو
راشد: الا الولع
وسمية ابتسمت: الا الطلب.. نعم حماادي
أحمد: شرايج.. الحين.. تخليني.. اكلم . نواال ..!
وسمية: والله يا ليت انا ودي اكلمها بس مو وقته بعدين
راشد: ليش مو وقته .. اتصلي ع البنت شوفي اخباارهاا..!
وسمية: تدخل المتحدث الرسمي
أحمد: عفيه
وسمية: حمادة .. بعدين يعني بعدين
عواطف وهي داخله: انتوا ليش قاعدين بالصالة اللي فوق .. شفيها الصالة اللي تحت ..!
وسمية: فيها وبااء
عواطف: بسم الله وباء شنو..!
وسمية: الله أعلم ..
راشد بصوت واطي: وسمية خلاص مالنا خلق
عواطف: انزين وين فهيد ومرته
وسمية: قصدج اخوي فهد وزوجته سلوى
عواطف: اي اي اخوج فهد وزوجته سلوى
وسمية: وانتي شكوو فيهم..!
عواطف: شكلج ناوية على هوشة
وسمية: انا رايحة غرفتي .. لاني هاليومين صايرة افقد السيطرة على اعصابي
عواطف: ههه فيوزاتج ضاربة من الينون
وسمية بنظرة عصبية وانزعاج: تعال حمادة
أحمد: و.. راشد..!
وسمية: يا ليت لو راشد تجي معانا بعد يكون أحسن
راشد: انا الحين طالع
عواطف: وبعدين انا مو صاعدة لعيونج .. ابي راشد بموضوع
راشد: انا طالع الحين مشغول
عواطف: بليز راشد تكسر بخاطري
راشد: بعدين وراي شغل ضروري .. لما ارجع
... بعد ما راحوا...
عواطف: اوريك يا رشود .. بردها لك ..