الكاتبة: هديل الحب
العنوان: بــدونــكـ مـــن أكــون
الموقع: مدرسة للبنات
المكان: صفوف الحادي عشر أدبي ( ثالثة ثانوي )..
الساعة: 12 ظهرا
التاريخ: 11-4
اليوم: الأربعاء
وسمية: يلااااااا
هدى: وااااااااااااحد
ريم: اثنيييييين
وسمية: ثلاااااثة
الكل: هييييييييييييييييي
وطفوا الشموع وصفقوا كلهم مع بعض وراحوا افتحوا الليتات وقاموا وحدة وحدة وعطوا الهدايا لنوال وهنوها بعيد ميلادها..
نوال: والله يا بنات ما ادري شقولكم اخجلتوا تواضعي بصراحة
وسمية: ماله داعي تقولين شي اهم شي انج تقضين هاليوم كللللللله وانتي فرحانة والضحكة شاقة هالويه الحلووو
ريم: على فكرة الكيكة هذي من ذوق وسومة والفطاير من صنع هدهودتي وانا تتوقعين شسويييت..!!
( وسمية وهدى يطالعون بعض وبعدين يطالعون ريم ويضحكون )
نوال ( بتفكير) : اممم اكيد الزينة عليج..
ريم: لأ الزينة كلها علقتها وسومة
نوال: ايييي عرفت انتي الحلويات والعلوج اعرفج راعية هالسوالف
ريم: لاااااا الحلويات اشتروها هدهودتي ووسومة
نوال ( تقول بحيرة): ما ظل غير البيبسي والسفن والميرندا
ريم ( بدلع): تدرين شلون ليش طولناها وهي قصيرة انا دخلت ولما شفتهم خلصوا كل شي صفقت لهم
هدى تطالعها وهي رافعة حاجب: يا قلبي ليش تعبتي عمرج حراام مو زين ايدج بعدين تتعب.!!
ريم: ادري بس شسوي قلت لازم اساعدكم شوي وما اكون ظالمة
نوال: هههههه لا لا ما بتكونين ظالمة لا تخافين اهم شي راحتج
وسمية: اصلا رفعت ضغطي اقولها تعالي عطيني اللزاق بعيد عني وانا فوق الكرسي تقول (وتقلد دلع ريم) لحظة دقيقة بروح اعدل حجابي بعدين يصير خير
ريم: ههههه بسم الله علي انا جذي صوتي
هدى: يا معودة اسمعي اسمعي نوالي واحكمي عليها امس اتصلت عليها قتلها مو تنسين باجر الحلويات قالتلي عفية هدووو انا الحين مسترخية واريح بشرتي ما ابيها تنشغل بسوالف ثانية يلاا باااي وصكت التلفون بويهي
نوال: هههههه لا من جد ترفع الضغط
هدى: ليش تصكين التلفون ها تبيني الحين اذبحج
ريم: لااا حرام عليج بس كنت حاطة رووب على ويهي مع خيارتين على عيني وجزرتين على اذني
الكل: ههههههههههه
وسمية: الحين شكوو الجزر بتسوين سلطة
ريم: لااا تضحكون ترى والله ابجي الحين. اصلا انتوا ما تعرفون شي بالجمال انا قارية هالمعلومة بالنت
هدى: ههههههه وشنو الفايدة اذا حطيتي جزر على اذنج تقومين تسمعين عدل
نوال: لاا تنعم احبالها الصوتية ههههههه
ريم: لا تتمصخرووون
نوال: انزين قوليلنا بالله عليج شتسوي..!!
ريم: تخلي اذنج ناعمة وطرية
البنات: هههههههههههه
(وظلوا يتطنزون ويتمصخرون ع ريم وهم ما يدرون من وين جابت هالمعلومة)
وفجأة::
طررررررررررررررررررررررن << جرس المدرسة
ريم : يووو افففف شنو هذا علينا جغرافيا يعععععع ما اطيق هالمادة..
هدى: يعععع ما اطيق هالمادة . وانتي شتحبين بالله عليج قوليلي
ريم: احب احب احب ولا شي
هدى: ادري عارفة الاجابة
وسمية: يووو انتوا بتظلون تتناجرون خلصوا شيلوا معانا الزينة . ما ادري شلون مستحملين بعض بصف واحد
هدى: لا افا عليج اذا صرنا بروحنا بالصف بدونكم نصير سمن على عسل
ريم: اي طبعا مالج احد غيري
هدى: لا والله يعني متأكدة انزين اوريج اشوف منو بتجيني تقولي تكفين واجب العربي تكفين ما كتبت اللي ع السبورة
ريم: لاااا خلااا...
وسمية: هييييييييييييي خلصونا تعالوا ساعدوا
ريم: انزين انزين افف مزعجة صوتها نشااز تقول صوت..
( وسمية طالعت ريم بنظرة خلتها تسكت)
وسمية بقلبها : ما يمشون الا بالعين الحمرا ههه يحليلي خوفتها
] نوال ، وسمية، ريم ، هدى [
مثل ما شفتوا رفيجات خلونا نتكلم عن وحدة وحدة :
( نوال) صف 11 ادبي وبالصف بروحها ولا وحدة من رفيجاتها معاها هي نقدر نقول مستواها بالدراسة جيد يعني مو متفوقة بس زينة نسبتها دايما بالثمانينات < يعني جيد جيدا> ولا مرة نزلت اكثر من جذي. اقرب وحدة لها وسمية هي اللي تفهمها من نظرة وحدة ، شخصيتها هادية نوعا ما مؤدبة حييل في تعاملها مع المدرسات والبنات ، شكلها مثل شخصيتها هادي وبريء ، ملامحها ناعمة وحتى جسمها صغيرون مو قصير حييل بس ضعييفة وجسمها نااعم وشعرها طويل لما اخر ظهرها ونااعم ولونه أسوود وبشرتها حنطاوية لا سمرة ولا بيضة، عايشة مع جدها وجدتها < ام وابو ابوها > وحالتهم المادية مو زينة يعني قريبين للفقر حييل والفقر جارهم طوفة بطوفة .. ابوها متوفي من زمااان حتى انها ما تذكر شكله عدل اما امها مو كويتية من جنسية خليجية (اماراتية) وابوها مطلق امها قبل ما يتوفى والام تنازلت عن حضانة نوال لابوها لأنها تزوجت واحد ثاني وما تعرفها وحتى امها لو تشوفها ما راح تعرفها...
(وسمية) صف 11 علمي ومحد غيرها علمي وهي ما دخلت علمي الا ترضية لأبوها لأن شافه من مصلحتها فدخلت ومستواها مثل مستوى نوال بس احسن شوي لأن ظروفها المادية <و المعنوية > تسمح لها بالدراسة بجو مناسب، ومثل ما قلنا انها قريبة من نوال ، اما عن شخصيتها فهي لا هادية ولا جريئة ومنطلقة يعني بينهم شخصيتها متزنة وهي اعقل وحدة فيهم وما فيها تهور فكري مثلهم اما بالشجاعة فهي أشجع وحدة ، اذا تكلمت تتكلم بالحق والعدل ومو يعني رفيجتي اوقف معاها لا عندها الحق الحق ورفيجاتها فاهمين قصدها ودايما يحبون يستشيرونها بمشاكلهم، احلى شي بوسمية جسمها فيها صحة بس مو متينة ولا ضعيفة وطولها حلوو ومناسب لعمرها وملامحها بين وبين لا حلووة ولا جيكرة بس بشكل عام حلوة واللي يميزها عيونها الوسااع ولونهم العسلي شعرها يوصل لكتفها وهو بعد ناعم بس مو مثل نعومة شعر نوال << شعر نوال شعر فلبينية>> وبشرتها حنطاوية مثل بشرة نوال ، وهي عايشة مع ابوها < اللي مدللها ومو مخلي عليها قاصر > واخوها فهد الكبير عمره 26 متزوج بنت عمته سلوى ما صارلهم فترة واخوها الثاني اكبر منها بعد اسمه راشد وعمره 22 سنة واصغر واحد أحمد وعمره 7 سنوات < عرفتوا ليش مدللها لأنها بنته الوحيدة وعلى قولتهم عين السيح > وامها متوفية من قبل 3 سنوات ونص تقريبا بالخبيث < بعيد الشر عنكم > وتأثروا بموتها حييل بس وسمية ما شاء الله عليها شايلة البيت شيل وصارت حرمة البيت والحين بنت عمتها سلوى معاها تساعدها بمسؤولية البيت...
( ريم ) صف 11 أدبي وأكثر وحدة مهملة ومستواها نازل وينصحونها البنات بس < اذن من طين واذن من عجين > وظروفها المادية زينة ، واظن انكم عرفتوا جزء من شخصيتها دلوووعة لأبعد الحدود وما تهتم بأحد أو شي كثر ما تهتم لجمالها وبشرتها وتمووت بشي اسمه شوبينق ومستحيل تدخل مجمع الا وتطلع شارية أغراض المجمع كلها ،مع هذا حبوبة وفرفوشة وقلبها ابيض بس اللي يخرب عليها انها جريئة حييل وعوبة حتى مع المدرسات ، ريم بيضة عكس كل بنات شلتها وبياضها معطيها جمال سبيشل وجسمها حلو لا متينة ولا ضعيفة نقدر نقول رشيقة بس عيبها قصرها لأنها اقصر وحدة بين البنات عشان جذي دايما تنقهر من وسمية لأنها طويلة وسمية ما تقصر تقهرها لما تقول بس، ملامحها حلوة وجذابة بس ملامح نوال أنعم ملامح فيهم، شعرها قصير تقريبا بوي مو قصير حييل و مدرج وشكله حلوو، مو ناعم حيل يعني شوي شعرها نقدر نقول مموج شوي مو حيل << بس هي ما تقصر حارقته بالاستشوار >> ولون شعرها أشقر فيه خصل بني فاتح < طبعا صبغ ، وهي عايشة مع ابوها وامها وعندها اخو واحد عمره 16 اصغر منها بسنة اسمه محمد و4 بنات غيرها الكبيرة منى 28 سنة متزوجة وعندها بنت اسمها هنادي عمرها 4 سنوات وبنت ثانية عمرها 1ونص اسمها هاجر ، اختها الثانية ضحى 23 سنة عرسها الصيف الجاي ، الثالثة روان 11 سنة ، والرابعة رشا 5 سنوات ...
( هدى ) صف 11 أدبي وهي أشطر وحدة متفوقة ما شاء الله بس ما تحب العلمي عشان جذي دخلت أدبي ، هي وريم بصف واحد ، شخصية هدى غامضة نوعا ما فهي ما تحب تقول اللي بقلبها لأي شخص حتى لو رفيجاتها فتفضل تحتفظ بهالأشياء لنفسها وتعتبرها خصوصيات باستثناء مدرسة الفلسفة أبلة ايمان تمووت عليها وابلة ايمان بعد تحبها وتقولها كل شي وكأنها امها ومتعودة عليها، هدى ملامحها اكثر وحدة عادية فيهم < ما راح اقول جيكرة بس عادية > وهي حنطاوية مثل نوال ووسمية وطولها زين بس متروسة شوي وشعرها بني لما اخر ظهرها < مثل نوال بس مو ناعم مثلها، يعني مجعد شوي ، هي عايشة مع امها وابوها ومستواهم المادي كويس بس هي وحيدة امها وابوها ، وعلى الرغم من انها حييل مع امها وعلاقتهم ما فيها شوائب بس هي بعد مع امها غامضة ...
