بأمانه بنات جاوبوني .. للي خبره بالبيوت .. بيت حكومي قديم ولا ارض و قرض !!!!!!!!!!!!!

[ام اغلى الناس]

السلام عليكم
شلونكم بنات
امانه جاوبوني بصراحه ... الخبيرات
انا متزوجه من 7 سنين ... عائله مكونه من 3 أشخاص .. انا و زوجي و ولدي توه ما تم سنه
طبعا مقدمين على ارض و قرض بس تدرون مو اقل من سنه لين تطلع و 3 سنين بنيان
المهم
من زمان اقنع زوجي نشتري بيت بالسبعين الف و نزيد عليهم قرض .. نأخذ لنا شقه و الباقي نأجره نسد فيه القرض
مرات يوافق و مرات لا .. متردد
عاد امس بيت ينباع بالفردوس ...
بيت قديم بس مجددينه .. 3 طوابق فيه شقق معاريس و حوش و يطل على 3 جهات .. الجهه اللي ورى شارع تراب و الجنب تراب

الحين اقولكم مزاياه:
يطل على 3 شوارع
فيه حوش و باب خلفي
3 ادوار و شقق معاريس
جيرانهم خالتي اخت امي

عيوبه:
بيت قديم
شارع ضيق



ترى للحين ما شت البيت بس الكل يمدحه و يقولون ب مية الف يعني بس نحتاج قرض 30 ألف
امانه علموني فرصه ما تتطوف؟ ولا انطر؟؟؟
خايفه يروح علي البيت
شرايكم ؟؟؟؟؟؟؟؟؟؟؟؟؟؟؟؟

 

[مسك وطيب]

رد : بأمانه بنات جاوبوني .. للي خبره بالبيوت .. بيت حكومي قديم ولا ارض و قرض !!!!!!!!

إذا البيت قديم يعني محتاجه تزيدين القرض عشان الترميم اقل شيء بتسوينه تغيرين الحمامات تكرمين تبنين طوفه او تهدين طوفه ,,, صبغ وغيره ,,, انا من رايي تروحين تشوفين البيت من داخل بعد وتالي صلي استخاره ,,,

بس بسألج دام قلتي شارع ضيق لايكون من بيوت الحكومه بالفردوس؟؟؟ اذا ايه فكري عدل لان هالبيوت حيييل قديمه


واذا بالقسايم ق 9 انا اشوف انها ممتازه وفرصه ماتطوف وسعره ممتاز حتى لو تاخذينه وتأجرينه كم شهر تستفيدين واذا كثروا العيال تطلعين وفلس على فلس تشترين بيت اكبر واحلى


الله يكتب لج الخيره

 

[أباجورة محترقه]

رد : بأمانه بنات جاوبوني .. للي خبره بالبيوت .. بيت حكومي قديم ولا ارض و قرض !!!!!!!!

بيت قديم بس مجددينه .. 3 طوابق فيه شقق معاريس و حوش و يطل على 3 جهات .. الجهه اللي ورى شارع تراب و الجنب تراب

الحين اقولكم مزاياه:
يطل على 3 شوارع
فيه حوش و باب خلفي
3 ادوار و شقق معاريس
جيرانهم خالتي اخت امي


^
^
^
^
مميزات حلوووووووه ودام انهم مجددينه يعني مو قديم مسكر
انا اقوووول اخذيه وأجري الشقق المفرووشه واجري البيت كله
دام انه تووووكم 3 اشخاااص على الاقل استفيدوا شوي جمعوووا من هالبيت طبعا يطلعلكم بالشهر تقريبا مو اقل 700 حلووين اضريهم في سنه؟؟ وشوفي جم يطلع

واذا ماتبينه انا ابييه لانه زوجي قاعد يدور على بيت بهالمواصفاااااااااااااات حلوووووووووو

 

[ام اغلى الناس]

مسك و طيب ...
تسلمين يا قلبي على مرورج
البيت بقطعه 5 و أكيد بيوت حكوميه
والله محتاره

 

[ام اغلى الناس]

اباجوره يا قلبي تسلمين
جزاج الله خير
ان شاء الله لو ما صار لنا فيه نصيب بادز لج عنوانهم عالخاص

 

[غادةالكاميليا]

فكري عدل هذا بيت العمر
بس يعني انتي تدرين الفردوس فيها سلبيات وايد والشوارع فيها ظيجة وبيوت الحكومة قديمة حييييل
يعني اصوم اصوم وافطر على ثوم؟
مومذمة بالفردوس والله والنعم فيها وبسكانها بس بيوت الحكومة فيها وايد قديمه يبيلج فوق ال30 اللي بتاخذينهم قرض على الاقل 20 الف ترميم وتعديل وهدم بعض الاشياء من داخل البيت وبناءها

 

[استعجلت الرحيل]

رد : بأمانه بنات جاوبوني .. للي خبره بالبيوت .. بيت حكومي قديم ولا ارض و قرض !!!!!!!!

توكلي على الله وخذوه خوش مميزات

انا وزوجي مفكرين ناخذ بيت ونأجره لين مانجمع من وراه بعدها نبيعه ونشتري احسن منه

لاطوفينه اخذيه

بس اذا الله ماكتبلكم فيه ياليت تراسلني على الخاص احنا ندور بيت

 

[noor al3yoon]

رد : بأمانه بنات جاوبوني .. للي خبره بالبيوت .. بيت حكومي قديم ولا ارض و قرض !!!!!!!!

والله الحين محد محصل بيت اشتري بيت قديم واجررووووووه وتالي من تكبر عائلتج من فلوس الاجارات تضبطووووووون البيت والله يوفقكم

 

[اميره بعزوتي]

ماانصحج هذا بيت العمر حراااااام تاخذينة بيت قديم وشوارع ضيجة وبيوت الفردوس لو مبنية ومسنعه مقموتة ويبيلج تصليحات الدنيا وانتي

بكرامة البواليع سنة الطواعين و الحمامات يبيلهم تبديل والمطابخ يعني بالعربي بتقطين فلوسج بقرض على بيت قديم ونفس المبلغ بتسوين فيه بنيانج الجديد

نصيحة انا اقول انطري ارضج وابني بيتج على راحتج وعلى ذوقج وكل شي جديد وفرش ونظييف وسنع هذا رايي وانتي بكيفج

 

[سنعه بس مظلومه]

رد : بأمانه بنات جاوبوني .. للي خبره بالبيوت .. بيت حكومي قديم ولا ارض و قرض !!!!!!!!

^^^^

صآجه...اصبري الصبر زين...او اشتري بيت دور ونص بمنطقه جديدهاحسن من بيت قديمعلى مايكبرون عيالج ان شاءالله الا البيت صآر هدآم

واستخيري..

 

[بَيّروتْ .!]

رد : بأمانه بنات جاوبوني .. للي خبره بالبيوت .. بيت حكومي قديم ولا ارض و قرض !!!!!!!!

تبين راحتج اشتري البيت
والله ما تدرين باجر وين راح تنقطين
وكافي انج يم بيت خالتج
وبامكانج تاجرين دور وتالي ترممين البيت على كيفج
بس اهم شي اتشوفين البيت من داخل اذا يبيله توسيع وترميم راح يكلفج وايد لا تغامرين وتشترينه
انا عندي اشتري بيت ولا اخذ ارض وقرض واعابله ( :

 

[ام اغلى الناس]

تسلمون يالغاليات على مروركم
والله حيرتوني اكثر
مرات اقول فرصه حلوه نأخذه ونأجر الدورين اللي فوق او نأجره كله لين يخلص القرض نطلع بيت جديد
و مرات اقول انطر بيتي
بس لمتى ننطر؟ ناس اعرفهم فوق ال 15 سنه وما طلع لهم شي للحين
و بالاخير يقطزنا المطلاع ولا الاراضي البعيده
ودي اصير هني قريبه ... يعني اشبيليه ولا جليب الشيوخ الجديده لكن هالشي مستحيل لانهم غاليين ...
البيوت ب 300 الف و فوق

 

[ام اغلى الناس]

زين بنات بغيت اسالكم
اقدر قبل اشتريه اجيب شركة بنيان يشوفونه و يقولون لي شكثر يحتاج فلوس للتعديل؟؟؟
اللي تعرف شركه حلوه تدز لي الرقم

 

[am_kshaa]

السعر مايتطوف بس روحى شوفيه من داخل يمكن مايعجبج البنيان

 

[ام اغلى الناس]

تسلمين يا قلبي

 

[بصْمةُ ضِيَاءْ]

بدوون تردد بيت ارض وقرض تبنينه ع كيفج ومنطقه جديده
وليش 3 سنين بنيان!!!!! احنا ماخذا منى 7شهوور ما كمل سنه !
والله يختارلج ان شاء الله

 

[ام اغلى الناس]

تسلمين غصون على مرورج
اي والله حلو تبنينه بكيفج بس ودي اتهنى ب بيتي بشبابي و عيالي توهم صغار
مو عقب شقى
مدري متردده

 

[missnohaa]

حبيبتى ارض وقرض واااااااايد احسن لج
وهذا بيت العمر ماراح تبيعين وتشترين
طيعينى لا تستعجلين
على الاقل الارض والقرض تبنين بذوقج وعلى راحتج

وانتى بكيفج ياقلبى وانصحج تصلين استخاره
الله يوفقج

 

[ام اغلى الناس]

تسلمين يالغاليه على مرورج

 

[farawlaa1]

رد : بأمانه بنات جاوبوني .. للي خبره بالبيوت .. بيت حكومي قديم ولا ارض و قرض !!!!!!!!

نصيحتي لج اخذييييييييييييييييييييييييييييييية . الأراضي قاعده تصعد و تشعلل نااار و هالبيت صيده . اجرية و سددي القرض من فلوس الأجار و يمعو فلسين من معاشاتكم علما يكبرون العيال يا اتبيعونه و اييبلكم السعر دبل ولا تقولين البيت راح يصير قديم ترى كافي سعر الأرض واذا تبين اتوسعين على روحج و البيت متحمل سنعية اشوي و سكني فيه واتكونين حزتها امسدده جزه كبير من القرض و انتي مو حاسة فيه من فلوس الأجار واللي تقول نطري .. حبيبتي الحين البيوت اللي تطلع من الخيران و ابعد ؟؟ محد قادر يسكن فيها كل اللي اعرفه قاعد يطوف دوره عشان يعيدونله الفرز .. البيت ما يتطوف طيعيني