اول موضوع تكفون لاتطنشوني ولدي حركي ولويه

[غلاي عزوزي]

شلونكم

طبعا ولدي بجر
ساكنه ابيت الحموله
فالبيت عكس بره
يخرب يكسر حركي حيل ام الله عليه محد يرتاح بالصاله اذا اهو موجوود
قامو حمواتي يقطون نقزات
والله جربت كل شي معاه من حرتي اطقه وادش داري ابجي لانه ادري انه الطق ماعمره صلح الغلط بس لانه الناس قامو يشتكون منه


حتي بالزواره قمت اكره انزلهم
ليش
لانه يطفرني يحذف الكوشيات
يطق
يكسر
وصراخي جدام الناس ينرفزني



شسوي شل الحل
كلمته بالعقل
بهدوء
بعصبيه
بطق
كل شي ماياب معاه فايده


الي مجربه
وعندها خبره
تنصحني شسوووي فيه

ولكم الاجر ان شاء الله​

 

[Om 3zo0oz_2011]

جم عمره ولدج ؟

 

[والله أحبه]

هلا حبيبتي

السلام عليكم .. اتقولين حركي مستحيل تتخيلين حركت بنتي اسملى عليها مع انها سنه ونص بس حركيته بدرجه لايعلا عليها .. الله يخلي ولدج لج انا علمت بنتي ابطل لها ابدارها فيديو واي مسرحيه من مسرحيات قبل .. مثل .. ليلى والذيب او دكوووش .. وحاولي اتخلين المربيه عندهم وسكري الباب او يوم مراح يتقبلون بس لما تقعدين معاهم يوم ويومين تندمجين وتغنين معاهم والله ثم والله بترتاحين والمربيه مشرط اتقابلهم لا تسوي اوتي او تسوي شغلها واهيا عندهم وراح يستانس والله .. وعسى ربي يأجرج كل هذا اجر عيل ليش يقولون الجنه تحت اقدام الامهات

 

[غلاي عزوزي]

عمره 5 سنوات

 

[" ام حمود "]

عندي وعندج خيييييييير
انا ولدي عمره 3 سنوات يفشلني حتى بالطلعات خصوصا اذا شاف اللعاب يبجي يصرخ يخلي الكل يشوف يييمه فششله
واذا رحت بيت اهلي نفسج حركي حيييييل ... والله الحين شريت له أي بود لعبه شوي قعد عليه

 

[الينبوعة]

ما شاء الله يفهم ؟
بس تعاملج معاة غلط اختي
حاولي تغرينة بكل شي يحبة انا دكتورتي يعني دكتورة اطفالي كثير علمتني امور واستفدت منها واولها المخالطة الزايدة يشتت عقل الطفل يعني انتي وزوجك الي تربونة لاتخلين احد ثاني يتدخل حتى لو امج
اعطي حنان وعلمي شوي شوي
اذا بتسوي هيجي اشتري لك واعطيك الي تريدنة والطفل بسرعة يتقشمر ما عليج من احد المهم انتي تعبي نفسج معاة وهو اكيد بيتغير ​

 

[دنياغريبه للاسف]

حاولي تحتوينه وتعطينه اهتمام وحنان اهوه يمكن من كثر ماتصرخين عليه وطقينه ماقام يفرق صار الموضوع عنده عادي
يبيله العاب منتسوري تركيز صدقيني راح ينشغل فيهم
اتمنى ان افدتج

 

[غلاي عزوزي]

مشكورين خواتي
بس الي ساكنة ابيت اهل الزوج تعرف انه الابو والام والجد والجده والعم والعمه كل واحده يربي ويعلم من ناحيه

الله يعين والله اني تعبانه معاه حيل حيل نفسيتي بالحضيض
وصاير بعد يعاند ويسوي اي شي بكيفه
الله كريم وايد شايله هم التربيه ليل ونهار مع انهم 3 اسم الله عليهم والحمدلله مابي غيرهم لاني وحده احاتي وافكر فيهم حيل

 

[حجيه هيونه]

ولدج فيه طاقه زايده مو عارف شلون يصرفها فتلقينه يسوي هالحركات

ليش ماتحاولين تطلعينه مكان جذي نفس الترفيهيه كبيره وكلها العاب تمتص شوي من طاقته اسم الله عليه

 

[ضايعة بدنيتي]

^^

صح

المفروض حبيبتي كل كم يوم تطلعينه مكان مفتوح تخلينه يركض ويلعب ويطلع طاقاته كلها ربي يحفظه ..

واهم شي الهدووووووء الطق عمره ما يجيب نتيجة . المفروض تمسكين العصى من النص . لا دلع ولا قسوة . شوي من الاثنين

 

[غلاي عزوزي]

مشكورين وماقصرتو
والله يعينا ان شاء الله ويعين كل ام قلبها علي عيالها

 

[@سيدة نفسي@]

جيبي له أخو لوووووووووول

يابنت الحلال الله المستعان كلهم جذي والخير بقباااال ..

عموما الله يقومج بالسلامة وبعد الولادة عطيه أهمية وخليه يساعدج في رعاية البيبي

أو يقعد ويا خواته .. اهم مصيبتهم يبوووون يلفتون انتباهنا بأي طريقة واحنا مو

عارفين شلون نتعامل وياهم .. كلنا في الهوا سوا :eh_s(1):

 

[++The DuchesS++]

الله يعينج نفس الحاله بس ولدي جريب ال3 سنوات
كل ماطلعنا يبجي ويطيح على الارض ويفشلني جدام الناس
واذا زرت ما يرد علي لو شنو
حتى لمن نطلع بحر او حديقه ما ينشغل باللعب كثر ما يروح عند الاوادم
وياخذ اغارضهم والعابهم تخيلي ؟؟ حد الفشله مستغربه من طبعه
بالبيت شي وبرا البيت شي ثاااااااني

 

[flower quen]

لا تشكينلي ابكيلك
انا بنتي 8شهور مجننتني
ماتجلس
ولا تخلي بالبيت شي الا تحطه بفمها

 

[سمردحه]

أنا ولدي بعد حركته زايده يكسر خاطري والله قالولي وديه دكتور مختص يعطيه دوا يقلل من الحركه

شرايكم بنات