اودي عيالي امريكا؟؟

[نطوووعه]

هلا بنات شلونكم

انا ودي اروح امريكا قبل رمضان ان شالله مدة 3 اسابيع اذا الله كتب يارب

بس المشكله ريلي يقول مايبي اليهال معانا لان الطريج متعب و بنعابل فيهم هناك والسفره مو قصيره واهو ماله خلق جذي

و بنفس الوقت كاسرين خاطري اخليهم هني و امريكا مو خفيفه كل سنه نروح فودي دام رايحين اهما ويانا خصوصا الكل يقولي لو ماخذيتيهم بتحسفين لان كل شي هناك لهم و يونس لليهال

متردده ماني عارفه اسافر ويا ريلي بروحنا والا اصر اني اخذهم وياي؟
اذا بروحنا ودي بلوس انجلوس بس اذا اليهال ويانا مالنا الا فلوريدا لان ماني نتنقل وايد

عيالي 3 و 5 سنوات

 

[عواشه القرقاشه]

بصراحه اخذيهم احسن لج

حراام تخلينهم 3 اسابيع
اصلا قلبج راح يعورج لما اتشوفين اليهال هناك

و رحلة سعيدة ن شاءالله

 

[قآنون كيفكـ!!]

مادري بس من رايي خذيهم وعلى قولتج امريكا مو خفيفية كل سنة
روحي واستانسي مع عيالج وان شاء الله ماياذونج ..

 

[ام مهاوش]

هالعمر يتعب بس اذا عيالج تقدرين عليهم مايتعبون وايد حاولي تجربين طلعي على يوم من غير خدامه وشوفي تقدرين عليهم
ولا لا
حاولي تقنعين ريلج عشان يتحملهم معاج بالسفر ومثل ماقلتي امريكا موخفيفه وثلاث اسابيع موشويه

 

[krkosha]

انا سافرت من غير ولدي وصكت فيني هالمره باخذه معاي
اخذيهم راح تتعبين صح بس عالاقل جدام عينج

 

[نطوووعه]

مادري متردده وايد

 

[نطوووعه]

الووو الوووو

 

[طيبة83]

وديهم اهما يهال بيرقدون في الطياره لا تعب ولا شي

الرياييل بس يبون الفكه يمه منهم

 

[رفيف الخير]

اهلين نصيحتي اخذيهم ماكو احلى من ديزني لاند في فلوريداوالله كثر ماتلعبين ماتشبعين واعيالج من حقهم يستانسون ولو ماخذتينهم انت مابتحسين باي وناسه لانها مليانه صغار بتشوفينهم مستانسين وانت عيالج بالحر والحبسه في الديرة بس اخذي معاج اشياء يحبونها مثل قصص ودفاتر تلوين او اايباد خليهم مع الرسوم المتحركة وبتنسينهم في الطيارة وللتسوق والمشي عربات وشنطة فيها اشياء تلهيهم شبسات فواكة لعبه صغيرةوبتضبط وكل ماتسمعين ضحكتهم بتحسين انك على حق يوم خذتيهم معاج حتى وان تعبت بهم شوي بس عيالج يستاهلون انا سافرت بعيالي الاثنين كان عشر وثلاث سنوات وللحين مانسوا المكان يمكن من الفيديو وان شا الله قبل رمضان بشهر بنروح امريكا لان صار عندنا بنوته تعاتب ابوها ليش ماوديتني نفس اخواني يرد عليها كنت مانولدتي تقول كا اني امي ولدتني مع ان العام كنا في باريس وراحت ديزني افه ان طولت عليج بس تحمست*

 

[نطوووعه]

مشكورين بنات

شكلي باخذهم معاي ان شالله بس مو هالسنه نرتبها على سنع السنه اليايه ان شالله

 

[ام مهاوش]

يكون احسن بعد بنتج تكون اربع سنين كبر بنتي وان شاءالله الله يكتبلي واروح واودي بنتي بعد

 

[أم سيف وسلطان]

انا اقول وديهم

 

[* إشراقة *]

نصيحة اخذيهم

انا دايم اسافر سفرات قصيره بيومين ثلاثه بدون عيالي
ومره رحت المانيا ١٠ايام بدونهم
تقطعت بجي تعبت واهما مرضوا ويستعسرون مع ان امي وخواتي مايقصرون

بس جربي نصيحه الاخت ام مهاوش طلعي معاهم بدون خدامه وردي البيت بدليهم وغليهم ووكليهم عشان تحسين فيها من صج

وربي يخليهم لج

 

[awashamen7asha]

عندج احد مستعد يمسكم بالكويت يعني تسافرين و قلبج متطمن ,, سافري مع ريلج لأنها تهبل تهبل تهبل..
اما اذا عيالج هاديين و ماعندهم مشاكل و يسمعون الكلام و انتي عندج استعداد تجابلين اخذيهم انا اشوف دبي و امريكا احلى ديرتين لليهال.. مع العلم انهم ماراح يذكرون اذا كبروا شي من السفر او انج خليتيهم و سافرتي عنهم..

 

[لولو8090]

خذيهم صج بيتعبون بس احسن تخليهم 3 اسابيع

 

[روان_الكويت]

انا حلمي اسافر امريكا وصراحه قررت ما اخذ ولا واحد فيهم
قبل اخذت اثنين باله صراحه كانو ٤ و ٥ سنين وديتهم تركيا ما استانست مع ابو العيال واول ما دخلنا بوفيه الريوق كتن فندق هوليدي ان واول ماحطيت صحني بنتي ام اربع سنين ماما فيني ---- صكت فيني الدنيا
هالمره اسم الله عليهم اربع وامريكا حلمي من قبل لا اتزوج بخليهم عند امي وفكرنا انشالله السنه اليايه اوديهم دزني فرنسا او امريكا كلهم
هالمره ابيها بروحي انصحج خليهم ماراح يذكرون اذا كبرو

 

[ام الدرر]

حبوبة امريكا جم مرة بتروحين لها اخذي عيالج والسفر سهليها وتتسهل
عربانة للصغير والثاني اسم الله عليه يمشي

.. مع العلم انهم ماراح يذكرون اذا كبروا شي من السفر او انج خليتيهم و سافرتي عنهم..

حبوبة بالعكس انا عيالي رديت فيهم الكويت الكبير 8 سنوات والصغيرة 6 عشنا هناك من عمرهم 4 و2 وللحين يذكرون كل شي ويذكروني باشياء انا ناسيتها​

 

[حبيبه ببي]

انالاثنين اللي عندي باخذهم امريكا حق الصيحه :eh_s(2):يوم كامل بيجلطوني فكرت مااخذهم بس قلبي ماطاوعني وحجزت لهم لانه انا هجره

 

[نـعـومـه]

يعتمد على ظروفج وشخصيتج

في حريم عادي يسافرون بدون عيالهم وفي حريم حارين ويحاتون مايقدرون وفي حريم متعلقين بعيالهم مايقدرون يفارقونهم

وفي ناس ماشاءالله خوات واهل وايد يعني اكثر من شخص بيجابل عيالها وفي ناس ماعندهم احد

شوفي انتي وظروفج انا عن نفسي احسها صعبه عالاقل مرتاحه نفسيا حتى لو تعبتي جسديا شوي اسمج نفسيا مرتاحه وترا بو 5 سنين يتذكر ؟ يعني اذا صار عمره 15 سنه مثلا يتذكر هالسفره !

 

[اخت خالتهم]

بو 5 سنوات اخذيه
اما بو 3 بيتعبج