اه من حظي الاغبر

[مارشميلو..]

مرحبا شخباركم
انا سبق وكتبت لكم مشكلتي مع زوجي وماقصرتوا رديتو علي
بس للحين انا بعذابي ماتغير شي
تعبت يابنات والله اكتب لكم وانا ابكي
قبل كنت اقول يحبني بس مايعرف يعبر
يحبني بس مايقول
بس الحين عرفت انه مايحبني ولا شلون ماعمره قال شلون ماعمره وداني وطلعني
نتمشى مثل هالناس بس محبوسه بالبيت اطبخ وانظف وارضع هالبيبي
اتعب طول النهار وبالليل يبيني اصير رومانسيه واسوي له اللي يبيه مايراعي اني انسانه
ولي طاقه
زوجي اناني بس يبي ياخذ ومايعطي
بس اكيد لو انه يحبني كان حاول يبين هالشي
عمره مامرت على لسانه كلمه حبيبتي
ولا مشكوره ولا يعطيك العافيه
جفااااااااااف بكل شي
ماخذ منه الا الطنازه انعدمت ثقتي بنفسي بسبته
اليوم واجهته وقلت له لازم نوصل لحل انا ماني مرتاحه بحياتي معاك
احس ان احنا مو مستانسين مع بعض وعلى فكره حتى هو مبين عليه بعد مو انا بس
قلت له قول انا شمقصره فيه شنو اللي مو عاجبك فيني
قعد يقول بسم الله عليك مو ناقصك شي انا اللي مافيني شي حلو ولا قد سويت لك شي زين
قاااااعد يتطنز علي شفتو شلون
عشانه يعطيني مصروف ومايقصر يخليني اشتري كل اللي بخاطري
خلاااااص صار الزوج المثالي
تفكيره بس بالفلوس دايما يقول احمدي ربك الناس تحسدنا على عيشتنا
مااااااالت على حظي بس
احس اني عايشه مع شايب عمره 70 سنه عل هالدفاشه اللي عنده
مادري شسوي
حاولت ابدأ معاه واقوله كلام حلو وارسله مسجات
بس مافي تفاعل ماقد مره حسيت انه فكر وسوا شي عشان يرضيني او يكسبني
:eh_s(2)::eh_s(2)::eh_s(2):
فكرت واجد بالطلاق بس صععععععععععب
العيشه عند اهلي صعبه ابوي ميت وامي كبيره لو قلت لها بس اني مو مرتاحه
مادري شبيصير فيها تحاتيني حيل وتتعب لو عرفت اني مضايقه
واخواني كل واحد لاهي في بيته واكيد مارح يرضون اني اتطلق
وانا ماودي اشتت ولدي اخاف لاكبر يلومني
شسوي تعبت والله وصلت لدرجه اني بس ابكي ومكتئبه طول اليوم
والله مو مبالغه ترى مااعرف اعبر واجد ولا كان قلت اكثر
ياليت تحسون فيني

 

[مارشميلو..]

وينكم بنات ليش محد رد علي

 

[! بــدويه وآآيــد !]

،

لاحول ولاقوة الا بالله
والله مادري شقول صـــراحه بس الله يكون بعونج
دامه مايطق ولايشرب ولايزني حرام تطلقين وكل شي بالصبر والمحاولات يتعدل ان شاءالله​

 

[ام فواازي]

شوفي دام الرجال مايقصر في مصرف ومو ناقص الا الكلام الحلو عادي في رجال جذي طبعهم بس بعدين يتغيرو مع العشره بتقولين مستحيل بقولج لا كل شي يصير
اعرف وحده زوجها مغرقها كلام حلو وحب ويطلعها كوفي شوباو سينما بس تعالي شوفي شلون يقلب اذا قالت ابي فلوس بوجب فلانه او ابي كرت تلفون بالعامي مايندي كلش يعني عكسج بس اصبرت عليه وشوفيه الحين مع انها موظفه يعنيماعاد هي بحاجته مثل اول بس كل شهر يعطيها من معاشه 100 او اكثر مرات وقبل اول ماتوظفت الخادمه كان معاشها عليها شوفي الحين هو يدفع معاشها
اللي ابي اقوله نقص الماده اصعب من نفص العاطفه يعني تمر بالشهور ماتفصل ماتلبس عند الناس بالعرس ماعندها فلوس صالون مع انها كانت مدلعه عند اهلها ماينقصها شي بعد الزواج كرهة نفسها والحياه مع هالرجال بس اصبرت و كل فترة والثانيه تعاتبه لين قدرت عليه والحين مرتاحه ماشالله عليها الله يتمم عليها نعمته
صبري والله الرياجيل يتغيرون مع الزمن انتي توج متزوجه ترى سنه 2 او 3 تعتبر توج معاه ماتقدرين تغيرينه بيوم وليله
وانسي الطلاق البنات مو لاقين رجل هالدوب مطلقه وعندج ولد خلي ولدج ينعم بحظن ابوه لاتحرمينه

 

[(*ام عهــــد *)]

ماقصرو البنات اصبري دام مايقرب للحرام ومومقصر فيج

 

[ҜęҜสђ]

احمدي ربج احسن من غيرج..ع الاقل اهوا مايطقج..
اذا ماقدرتي تغيرينه بروحج>>كلمي استشاريه تساعدج ..
يمكن شخصيه ريلج صعبه وانتي مو فاهمته..ومو قادره توصلين له اللي ببالج

 

[قنــــــــــوت]

والله يالغاليه ...انا احس انج انتي مخليته هو كل محور حياتج ...
علشان جذي موقادره تفكرين غير في : ليش مايقول كلام حلو وليش وليش وليش ....

ليش ما تشغلين نفسج عنه .... تعلمي شي جديد ..هوايه جديده تملا وقتج مثلا ..
... اهتمي بعلاقاتج الاجتماعيه ... اطلعي واستانسي ..مع اهلج .. او صديقاتج ..
كملي دراسه ... مثلا ...

راح تلقين نفسج مشغوله وموفاضيه تفكرين بهالامور ...
وتلقينه هو نفسه يشتاق لج ويذبحه الفضول ... ويحس انج مشغوله عنه ووقتج مليان ..
حزتها اهو اللي يقول لج ليش بعيده عني ... ويبدا يتقرب منج بأي طريقه ..

صدقيني هالشغله صارت معاي ومع اكثر من وحده اعرفهم ...خصوصا اول سنه او سنتين زواج ... يكون الزوج هو محور حياة الوحده .. وكل وقتها له ..
بمجرد ما تشغل وقتها بشكل كامل ... راح تلقى نفسها نست تماما كل هالافكار وطلعت من دوامه الاكتئاب والبجي ...

وحتى الزوج يحس انه وده يقرب منها ..ويجيه نوع من الغيره لانه وقتها ماعاد كله له ..
ولا عادت تعاتبه وتتشرّه عليه مثل قبل ...

جربي هالامور ...وان شالله تتحسن حالتج ..
ولا تفكرين ابدا ابدا بسالفة الطلاق ...
ترى ماطرت عليج هالسالفه الا من الضيقه ياعمري ...

ديري بالج على عمرج ..وعيشي حياتج ..

 

[انا لحبيبي .]

الله يهدي البال ويصلح الحال حبيبتي ،

 

[أم توتو]

خليه مايقول احسن من اللي يقول وهو طاقله خيانات الله يعين بس انتي احسن من غيرج انتي غيريه بطريقتج خليه يتطنز وانتي عاد لا تجادلينه اتركيه وهو من نفسه بيحس سلي نفسج بهوايه بشي تحبينه والله يسخره لج

 

[ام زهقانه]

اصبري يا اختي الدلع ماكو بس الحمد الله علي كل حال وبعدين ماكو الرجال الكويتي يدلع

 

[بخـــارى]

مادري ماشوف انها مشكله
والله في رياييل العن طق وخيانه ووقاحه الخ

 

[dectora 7elwa]

الله يهديه لج
مشكلتج هي مشكله نص حريم الكويت
لازم تتعلمين تعطين بدون مقابل
وتلهين نفسج عنه
ونسي نفسج

 

[يارب احفظ عيالي]

عادي حبيبتي والله كنج تتكلمين عني بس ارد واقول احسن من غيره عيوبه مقدور عليها مالنا غير الصبر

 

[جديده 1]

اختي تبين الصراحه .. انا مادري عن مشاكلج اللي طافت .. بس بالموضوع هذا مشكلتج فقط انج تبين حنان و رومانسيه و كلمه حلوه .. البنات مخلوق حساس .. و الرجل العكس .. لو قلتيله محتاجتلك تلقينه يضحك ولا يتطنز لان اهم فعلا مايحسون بهالشي هذا لان هذي هي طبيعه الرجل .. و لاتروحين بعيد ترى والله الاغلبيه الساحقه كلهم جذي دفاشه و مايحب يعبرلج عن اللي بداخله بالكلام فتلقين احياناً يعبرها بأشياء ملموسه مثل الفلوس و غيره .. اما الرومانسيين فيمكن 2% اما اللي مسوين نفسهم رومانسيين فجذابين حتى ياخذ اللي يبيه و يقص على زوجته يامعوده كلنا جذي بوصروال و فانيله وينه ووين الرومانسيه ههههههههههههههه

شوفي دام الريال مايقصر عليج ولا على البيت مادياً و مايخون تعلقي فيه بضروسج !! ... و بيني و بينج الرومانسيه تخصصنا احنا يالحريم اكشخيله سوي حركات و شموع غيري من ترتيب اثاثج خلي بيتج حيوي دائماً انت باين انج مقصره من ناحيه الرومانسيه اخر الليل فإنتبهي للنقطه هذي .. موفقه ^_^

 

[كنوشة 2009]

ترى اغلب الريايل مثل ريلج صدقيني مع الايام راح يتغير
بس محتاج وقت وصبر وانت اللي تقدرين تغيرينه
وشوفي مصيبة غيرج تهون عليج مصيبتج
في ريايل مثل ريلج وفوق هذا خيانات والكلام الحلو حق العشيقة
بس انت الظاهر رومانسية زيادة عن اللزوم
ودزي في يوم هذا المسج واهم شي يكون مو عندج
ومزاجه رايق
دزي له
انت لي كل شي بالدنيا بس انا بالنسبة لك وش اكون ؟
وشوفيه شنو يرد عليج

 

[om_dodo]

الله يعين

 

[ام مراوي]

ادعيله ان الله يهديه

 

[brettey]

مشكلتج كلش ماتستاهل انج توصبينها لي الطلاق
ما يمد ايده ولا يخون ولا يشرب
قولي الحمدلله
انتي عبالج كل هالي يطلعون حريمهم معناه انهم رومانسيين ؟لاتغرج المظاهر قلب
عليج بصلاه الليل والدعاء
الله يسخره لج ويجعلج ملكه بعينه ياااااارب

 

[الـجـميلة]

بنات المشكلة صغيره جدا فكووو عن نفسكم شوي وبطلوووو كئابة وانا انا وراح تجيكم الكلمة الحلوة عفوية بعد يامعودة انتي وياها شكلك عاقدة النونة 24 ساعه معذور لو ماقال كلم حلوة تدلعي وعيشي وتجيلك الكلمات الحلوة ونتي نايمة وضلي زي منتي كلامك معه عسل :eh_s(17):