السلام عليكم حبيبتي
و الله خليتيني اسجل دخول للمنتدى عقب غيبه طويله شوي
انا بسألج سؤال واحد
(( انتي من شنو خايفه ؟؟ )))
ليش خايفه ؟؟
اذا خايفه على زوجج و حياتج الزوجيه ادعي ( اللهم اني استودعك زوجي و زواجنا و حسن ذات بيننا انا و هو و اهله يا من لا تضيع ودائعه ) و خلاص بإذن الله ضمنتي محد راح يخرب عليج
هذا واحد
الشي الثاني
سالفه اللي كان يحبج
خلاص يبا , انتي مو تزوجتي ؟؟ و مقتنعه بزوجج ؟؟؟ خلي هذاك يشوف نصيبه , سواء اختج او وحده ثانيه برا عايلتكم
زواجه من وحده من خواتج يمكن سببه انه يبيج تكونين تحت عينه , هذا اللي يخوف صج , لذلك استعيذي بالله من شره .
بعدين تقرب اهلج من اهل زوجج , انتي تقولين عشان اختج تتزوج ولدهم , يبا , اذا الله كاتب لها تتزوجه , فحتى لو سكنتوا المريخ راح تتزوجه
استخيري الله في زواجها هي منه . و اذا هالسالفه فيها شر لج , ربي راح يخلي اختج تصرف النظر و تبتعد عنه . و جذي افتكيتي انتي من التفكير
امج , اذا تبي تيي ديرتكم , حياها الله ,,, و ترا اهل الزوج ضروري يحسون ان البنت هذي وراها ناس , حتى لو كانوا طيبين , لانهم راح يحسبون حساب لاهلج .
بالنسبه لخواتج و استفزازهم لج بتقربهم من اهل زوجج , حسسيهم ان هالشي عادي , و حياكم الله و عادي و كل شي
و استودعي الله ما رزقك من زوج و اهل زوج ,, و خواتج تعاملي معاهم بقوه و برحمه , خلي شخصيتج قويه لا تنهزين من تصرفاتهم , و اشفيها لو زاروج او تلصقوا بأهل زوجج ؟؟ خل يتلصقون , اذا لهم نصيب بياخذونه حتى لو ما تلصقوا
و اذا نيتهم التخريب عليج اكيد الله ما راح يرضى لج بالمضره , فراح يبعد شرهم عنج
بالنسبه للتحقيق و الاسئله الدايمه عن تحركات اهل زوجج , عطيهم المختصر المفيد و لا تطولين بالمكالمات , طلعي أي عذر بس يكون حقيقي مو كذب ,,, روحي اقري قرآن و قللي مكالمات قد ما تقدرين
و بالتوفيق
