انتى هيلقية و الا لا ؟

[بريسم]

مرحبا فيكم و اعتذر عن العنوان الاستفزازى



هذا هيلقى و هذا لا !!!

يمكن لان سيارته مو همر صار هيلقى ؟؟؟

هذى هيلقية و هذيك لا !!!

يمكن لان جنطتها مو ماركة ؟؟؟؟

هذولا هيلق

يمكن لانهم يلبسون اللى يعبر عن مجتمعهم الصغير او عاداتهم او ثقافتهم

استغرب من وجود كلمة هيلق على لسان البنات ... دشينا القرن الواحد و العشرين و للحين نصنف البشر لطبقات !


احنا مسلمين و من مبادىء الاسلام المساواة بين البشر : الابيض و الاسود و الغنى و الفقير و و

ليش على طول ننتقد الناس ؟؟؟ لبسهم .. شكلهم ... كلامهم ...

ترى هذا عيب نفسى او عادة مادرى و هالشى فينا كلنا و انا اولكم ..... ما تعودنا نتقبل الناس مثل ما هم بلبسهم بثقافتهم بكلامهم

لاحظوا خوفنا من النقد صار كل المجتمع يلبس ماركه ( او تقليد ماركة ) الكل قام يتحجى بنفس الطريقة ....

شىء غريب صرنا نسخة وحدة من بعض محد يقدر يعبر عن نفسه بالطريقة اللى تعجبه و الا فالكل راح ينقده و يوصم بانه... هيلقى !!!!

ملاحظين هالشى او لا ؟؟؟؟

انا الحمدلله عمرى ما صنفت البشر لهيلقى او غيره .... بس انتقد .... بس نقعد انا و ولدى على التلفزيون نبتدى : طاع اشلابسة .... طاع اشلون يتكلم .... طاع اشلون ترقص !

فاتفقنا انا وولدى ما ننتقد و كل واحد ينبه الثانى ... فلما ينتقد ولدى اذكره : لا تتطنز على الناس

و لما انتقد انا يذكرنى : يما اشقلنا !

الموضوع مو مرتب بس كلام بقلبى و قلته و ان شاء الله يفيدكم .​

 

[SabaQueen]

مشاركة: انتى هيلقية و الا لا ؟

خووش موضوع اختي بريسم ..
و مثل ما قلتي عنوانه استفزازي ، بس آنا بصراحه ما اصنف الناس بلبسهم او شكلهم او سياراتهم على انهم هيلق ،، لا الهلاقه عندي بالتصرفات و التعامل مع المجتمع ، آنا وحده اذا شفت وحده او واحد يعامل غيره بطريقه سوقيه او يرد و يصارخ في موقف معين بطريقه الصراحه احنا ما نتقبلها و نرفضها اهنيه اقوول هذيلا هيلق . و اتحاشي التعامل معاهم ...

لكن تصنيف اللبس و الشكل فآنا ارفضه الصراحه كل واحد و امكانياته و ذوقه ، ومو شرط الماركه يكون راعيها اهوه السنع يمكن العكس ...


هذا رأيي و حبيت اوصله لكم ..


مع خالص التحية

 

[مستشاره قانونيه]

مشاركة: انتى هيلقية و الا لا ؟

مشكوووره اختي بريسسم عالموضوووع

وبصراحه موضوعج حلوو بطلتي علينا باب للنقااااش

وصح كلامج احنا مادري ليش جذي @@ تفكيرنا مثل مثل

انا جذي مرات اشوف البنات بلبسهم ومكياجهم اذا كان مو شي على طول مسكت اللي يمي وحشينا فيها و علقنا وضحكنا .. اقول شنو هذي هيلقيه ماكووو ذوق والله هلاقه وماكو شغل نقعد ونحش ونعلق عالرايح واللي راد


مشكوووره حبيبتي يعطيج العافيه

واهم شي انج طلعتي اللي بقلبج

تحياتي لج

مشتشاره قانونيه

 

[^^دموع الكويت^^]

مشاركة: انتى هيلقية و الا لا ؟

خوش موضوع وصاجة هالناس صار همهم الوحيد الحش بالناس وشوفي مكياج فلانة وشوفي لبس علانة


مشكورة على الموضوع

 

[رفرف]

مشاركة: انتى هيلقية و الا لا ؟

من وجهة نظري ان الهلاقة تصرف مو لبس ...
يعني الهيلقي يكون هيلقي بتصرفاته مثل ماقالت sabaqueen اللي تصرفاته سوقية اهوه الهيلقي لكن اللبس او الشكل والمستوى المادي ماله علاقة كلنا عيال ادم وحوا ومثل ما في ناس اقل مني هم في ناس احسن مني فماله داعي انتقد غيري ....

 

[ام طلال]

مشاركة: انتى هيلقية و الا لا ؟

مشكوره حبيبتي على الموضوع الحلو هذا وبصراحه هالكلمه وايد تتردد وكأن ماعندنا مشاكل الاّ هذي شلابسه وهذا شنو سيارته وطالهي لبسها وشوفي شكله وكأن تقييم الناس عندنا ماصار بالاخلاق وبالدين لأ صار باللبس والشكل وهذا بصراحه يبين لأي درجه احنا سطحيين نهتم بالمظهر وننسى الجوهر

 

[bnt q8 in usa]

مشاركة: انتى هيلقية و الا لا ؟

الناس مخابر مو مناظر وهالشي الي علا نشوفه بالناس نقيم الشخص علي لبسه وكشخته وممكن نلاقيه من داخل انسان فاضي

يارب نبتعد عن هالعاده السئيه وهي الحش والقرض والتعليقات علي الناس

مشكوره

 

[بريسم]

مشاركة: انتى هيلقية و الا لا ؟

شاكره ردودكم بنات و لى عودة للتعليق

 

[Kuwait]

مشاركة: انتى هيلقية و الا لا ؟

اذا ماننتقد ومانتحلطم فإحنا موكويتيين!

 

[@ الرسامة @]

مشاركة: انتى هيلقية و الا لا ؟

اي والله صاجة ومعاج حق باللي قلتيه وانا بعد تزعجني هالكلمة حيل

 

[روزالكويت]

مشاركة: انتى هيلقية و الا لا ؟

انا بالنسبه لي والله مايهمنى لبس ولا سياره ولا شكل احد اللي عنده بيكشخ واللي ماعنده بكيفه وفي ناس عندهم بس مايقطون على عمرهم بالسوالف هذى يعنى المسأله ذوووووووق وحرريه شخصيه ومصطلح الهلاقه من زمان متوااجد وتلاحظين فجر السعيد غذت مسلسلاتهاالهابطه لا فض فوهها ومات حاسدوهابكلمة (هيلق)يعنى مو بس الكبار حتى الصغار اللحين يستعملون هالكلمه شوفي الانسان اللي معاملته مع الناس غير محترمه ومغرور وشايف حاله ويتعامل بصراخ على اساس انه ثقه بالنفس يستاهل اللي ينقال عنه غير جذى كل يمد لحافه على قد رجوله وبس يامحفوظة السلامه.

 

[سبائك]

مشاركة: انتى هيلقية و الا لا ؟

خووش موضوع اختي بريسم ..
و مثل ما قلتي عنوانه استفزازي ، بس آنا بصراحه ما اصنف الناس بلبسهم او شكلهم او سياراتهم على انهم هيلق ،، لا الهلاقه عندي بالتصرفات و التعامل مع المجتمع ، آنا وحده اذا شفت وحده او واحد يعامل غيره بطريقه سوقيه او يرد و يصارخ في موقف معين بطريقه الصراحه احنا ما نتقبلها و نرفضها اهنيه اقوول هذيلا هيلق . و اتحاشي التعامل معاهم ...

لكن تصنيف اللبس و الشكل فآنا ارفضه الصراحه كل واحد و امكانياته و ذوقه ، ومو شرط الماركه يكون راعيها اهوه السنع يمكن العكس ...


هذا رأيي و حبيت اوصله لكم ..


مع خالص التحية

صح لسااااااااااااانج حبيبتي عشره على عشره

لا فض فوك ولا عاش حاسدوك

 

[شمس الكويت]

مشاركة: انتى هيلقية و الا لا ؟

مشكوره ا نج فتحتي لنا الموضوع هذا لان بالنسبة لي مهم جدا لان في مجتمعنا بدا الناس يستخدمون مصطلحات غريبة مثل الكلمة اللي تقولون عنها انا لاحظت ان الكثير من الناس لما يشوفون وحده محتشمه لابسة عباية ونقاب يعيبون عليها بسرعة بذات بنات الحظر احس ان ما يعجبهم شي وياليت مايزعلون مني بس هذي الحقيقة انا بالكلية وايام المدرسة مرت علي مواقف جذي يعيبون على البنت المحتشمة بانها انسانة متخلفة ورجعية وهذا كله غلط يبونها مثلهم تمشي بدون حجاب والتنورة قصيرة وله لابسه ملفع والبنطلون الضيق والفانيل فوق البطن والمكياج مكياج عرس

 

[كويتية أمورة]

مشاركة: انتى هيلقية و الا لا ؟

الحمدلله اللي الله عافانا من اللي ابتلى فيه عباده
تصدقين الناس اللي جذي مرضى نفسيين وياكثرهم حوالينا والحمدلله اني تعلمت من اهلي اني اقيم الانسان على اخلاقه مو على اي شي ثاني
وهالشي يخليني مرتاحة نفسيا والله لايغير علي

 

[lolo77]

مشاركة: انتى هيلقية و الا لا ؟

صج ظاهرة تعور القلب

وهالشي ترى من التربية
والتواضع بكل شي
اذا انتي شفتي الجدامج هيلقية مالج شغل فيها
الا تحشين ولا ما يصير
والناس مو كلهم نفس الحاله المادية
ومو معناته اللي ماعنده لازم يصير عنده ويقلد بكل شي

انالله وين وصلنا

 

[sara wth love]

مشاركة: انتى هيلقية و الا لا ؟

صباح الخير


حبوبة كلامج كله صح وجميل ولكنه للاسف ا لشديد كلام نظري

احنا انقول ان التفرقة منبوذة سواء التفرقة باللون والبشرة والمذهب والطبقات الاجتماعيه ولكن الواقع يقول غير جذي


لاتعتبرينها نظرة سوداوية ولكن بمواقف صغيرة جدا وبسيطة بتكتشفين ان الغالبية العظمى من المنادين بالمساواة مايطبقونها حرفيا ووقت الصجية بينسون هالحجي

عادات سيئة انزرعت فينا لان مجتمعنا طبقي ويهتم بالفوارق حتى لو انكرنا هالشي ولكن بقرارة انفسنا نعلم الحقيقة ,,ياريت نغرس حب الغير والقناعه واحترام ادمية الاخرين بغض النظر عن الشكليات بنفوس ابناءنا هذا اقل شي انسويه


على فكرة


برافو عليج والله ,,طريقتج مع ولدج حدها اعجبتني

 

[همسات ليالي]

مشاركة: انتى هيلقية و الا لا ؟

مشكوووووووووووووره اختي بريسم على الموضوع المهم

صج ديرتنا صارت ديره مظاهر يعني الوحده منا لازم تلبس وتكشخ حتى لو راح الطبيب تون من المرض

ليش؟؟؟؟؟؟؟؟؟؟؟
علشان الناس ما تنتقدها

صار الواحد ما يهمه اللي شلون يداري كلام الناس

لكن انا والحمدالله ما عاد ياثر فيني هالكلام
الشي اللي ارتاح عليه البسه
ما اضغط على نفسي علشان ارضي الناس
واهم شي القناعه والرضا النفسي

وشكرااااااااااااااااااا على هذا الموضوع الاكثر من رائع

 

[أوركيد]

مشاركة: انتى هيلقية و الا لا ؟

بريسم....

موضووعج حلوو وحساس...

آنا اشوف انه المجتمع الكويتي حالياً ما تشوبه بس هالكلمة ....وااايد أشياء استجدت علينا وثبتت بين الشباب خاصةً..

الطنازة ....النظرة الفوقية لكل اللي حواليك (كأن البني آدم اللي جدامك حشرة مو حاله من حالك)....السطحية بالتفكير...ووايد اشياء..

المهم ...

الواضح انه هالشيء موجود بكثرة بين الشباب....والسبب الأول والأخير التربية والبيت والصحبة السيئة..

والعلاج....اهو ( إن الله لا يغير ما بقوم حتى يغيروا أنفسهم) المفروض البيت يبين انه هالشيء غلط ومنبوذ ..ليما الولد يحاول يشيل هالصفة من نفسه..

 

[bnt_kwt]

مشاركة: انتى هيلقية و الا لا ؟

من وجهة نظري ان الهلاقة تصرف مو لبس ...
يعني الهيلقي يكون هيلقي بتصرفاته مثل ماقالت sabaqueen اللي تصرفاته سوقية اهوه الهيلقي لكن اللبس او الشكل والمستوى المادي ماله علاقة كلنا عيال ادم وحوا ومثل ما في ناس اقل مني هم في ناس احسن مني فماله داعي انتقد غيري ....

صح كلام رفرف 100% انا معاها
يعني مثلا كنت واقفه عند الاشاره والاشاره فيها فرعي وانتي واقفه تلقين واحد ياي بسيارته من جنه بيلف فرعي وايي يلف عليج علشان يصير جدامج ويطوف قبلج بدون استئذان شيصير فيج بالذمه هذي مو قله ادب وهلاقه
تصرفه يدل على انه هيلقي

وفي ناس يعني بيلفتون النظر ويلبسون اغلى الملابس ومن احسن الماركات وتلاحظين انها تبي تقلدج وما عارفه كل اللي لابسته يلوع الجبد اهي تبي تحرج باي طريقه علشان يقولون انها لبيسه وكشيخه وتقعد وتتكلم شريت الجنطه الفلانيه وشريت الساعه بالمبلغ الفلاني هذي شنو ينقال عنها ؟؟؟ تتفلسف وبنفس الوقت هيليقيه لانه ما عندها اصول السنع والله صاير فيني مثل هالموقف وايد

 

[مووونيك]

مشاركة: انتى هيلقية و الا لا ؟

فاتفقنا انا وولدى ما ننتقد و كل واحد ينبه الثانى ... فلما ينتقد ولدى اذكره : لا تتطنز على الناس

شكووورة على طرح المشكلة.... وطريقتج تربيتج لولدج جدااااااا رااااااااائعة!
يتربى بعزج انشاءالله
وانشاءالله كل الامهات يسوون مثلج... لان الانسان اولا واخيرا تربيته تبتدي من البيت.....

واذا الهلاقة على سيارة ولبس ماركة..... فأنا اول هيليقة!

ومثل ماقالوا البنات الهلاقة بالتصرف والتعامل مو بالشكل!

يعطيج العافية